Ilinniar­tuutillutit anersaakkut nukittujuarit

1-2. (a) Ilinniagaqar­niarlutit aalajangereeruit qanoq iliuuseqar­tuassavit? (b) ‘Toraakkamut torersumik ingerlajuarneq’ qanoq paasisariaqarpa? (Filippimiut 3:16)

JEHOVAP kiffaasa ilaat aalajangersimapput meeqqat atuarfianni atuarun­naarunik ilinniagaqar­niarlutik. Isumaqarput ilinniagaqarunik Jehovamut kiffartor­nerminni iluaqutaasumik suliffit­taarsin­naassallutik. Ilinniagaqar­niarlutit aalajangersimaguit qanoq qulakkeersin­naaviuk Jehovamut qanittumik attaveqar­tuarnissat? (Jaak 4:8a) Qularnan­ngitsumik meeqqat atuarfianni atuaral­laravit uppernikkut misilin­neqartarputit. Maanna ‘toraakkannut tassunga torersumik ingerlajuassaatit’ – tassa pisarnittut aalajaallutit Jehova kiffartorfigiuassavat. – Filippimiut 3:16 atuaruk.

² Oqaaseqatigiinni ‘toraakkamut torersumik ingerlajuarnermik’ nutserneqartuni grækerisut oqaaseq sakkutuut alloraqatigiis­saarlutik siumut ingerlanerannut atorneqartarpoq. Illit ilinniagaqar­niarlutit aalajangeruit Jehovamut kiffartornermi unittoornak ‘allorarluarlutit’ anersaakkut siumukar­tuartariaqarputit. Allaaserisami matumani Biibilimi najoqqutassiat sisamat iluaqutigisin­naasatit sammissavagut. Najoqqutassiat taakku nalunngereerunarpatit. Maleruar­tareerpatit, ilinniar­tuutillutit maleruar­tassavatit ilinniar­nerillu naammas­sereerukku maleruar­tuassallugit.

ANERSAAKKUT NUKITTUJUARUMALLUTIT ILIUUSEQARTUARIT

3. Ilinniar­tuutillutit ilaatigut suna eqqumaf­figissaviuk?

³ Eqqumaf­figisassaq. Ilinniar­tuutillutit ilimanarpoq ulluinnarni ulapputigisariaqar­takkatit amerlissasut. Ilinniarfimmi angusaqarluarusukkavit ilinniarnerit Jehovamut kiffartorninnit pingaar­tinneruler­toorsinnaavat. Ilagiinni ataatsimiinnerit, oqaluussineq, nammineq Biibilimik misissuineq qinunerlu aallukkun­naariar­torsinnaavatit. – Saqq 2:4.

4. ‘Naalakkamut kiffartornermi ulapputeqar­tuarneq’ sooq pingaaruteqarpa? (Korintimiunut 1. 15:58)

⁴ Korintimiunut 1. 15:58 atuaruk. Sikkilertoq uppissan­ngikkuni siumukar­niarluni iliuuseqar­tuartariaqarpoq. Taamatuttaaq anersaakkut ‘uppissan­ngikkutta’ siumukar­tuartariaqarpugut Jehovamut ‘kiffartornermi ulapputeqar­tuarnitsigut’. Anersaakkut ittut piffissaqarfiginissaat pineqaan­nanngilaq, aammali pingaar­nersiuineq pineqarpoq. Eqqaamajuk pingaarnertut Jehovamut kiffartor­tuusutit. Taamaattumik ilinniar­tuunerit pingaar­nerpaanngilaq. (Mat 22:37) Qatanngut arnaq inuusuttoq Samanthamik atilik ima oqarpoq: “Imminut neriorsorsimavunga ilinniar­tuunera Jehovamut kiffartorninnut ajoqutaalissappat ilinniarnera unitsis­sallugu.”

5. Anersaakkut siumukar­tuarumallutit susinnaavit?

⁵ Ilinniarnerit aallartitsinnagu susinnaasutit. Jehova inuuninni salliuttuaruk. Una eqqarsaatigiuk: ‘Ataatsimiinnerit, oqaluussineq namminerlu Biibilimik misissuineq aalluttuarumallugit sunik pilersaaruteqarpunga?’ (Jos 1:8; Mat 28:19, 20; Hebr 10:25) Aamma meeqqat atuarfianni atuartuugal­laravit qanoq pingaar­nersiuisarnerit eqqarsaatigiuk. Misigiguit taamani pitsaanerusumik pingaar­nersiuisimasin­naallutit maanna sutigut allannguisariaqarpit? Ilinniar­tuuninni Jehovamut kiffartornermi ulapputeqar­tuarnissat aalajangiusimajuk. Soorunami ilinniarnerit pingaaruteqarpoq, guutisior­ninnilli pingaar­nerunngilaq.a – Mat 6:24.

6. Jehova inuuninni pingaar­nerpaatin­nerlugu paasiumallugu apeqqutit suut eqqarsaatigisin­naavigit? (Aamma asseq takuuk).

⁶ Ilinniar­tuuninni qaammatit tamaasa eqqarsaatigisaruk Jehova inuuninni suli pingaar­nerpaatin­nerlugu. Apeqqutit uku eqqarsaatigisakkit: ‘Ataatsimiigian­ngitsoor­tarpunga? Imaluunniit inortuillunga ataatsimiigiar­tarpunga? Ataatsimiinnerni najuukkaangama ilinniarnera eqqarsaatigisarpara? Imaluunniit internetik­kuinnaq ataatsimiit­tarpunga?’ Aamma uku eqqarsaatigisin­naavatit: ‘Siornatigutulli qinukulatigisarun­naarsimavunga? Biibilimik atuarneq siornatigutulli piffissaqarfigitigiun­naarsimavara? Aatsaat oqaluus­sisariaqaraangama sivikin­nerpaamik oqaluus­seqataaniar­tarpunga?’ Apeqqutit taakkua ilaannut angeruit allannguiumallutit ingerlaannaq iliuuseqarit. Jehovamut kiffartorninni ilinniar­tuunerit kinguarsaatigeqinagu.

SILATUSAARTUARIT

7. Ilinniar­tuuninni eqqarsar­taatsikkut qanoq misilin­neqarsinnaavit?

⁷ Eqqumaf­figisassaq. Ilinniarfiit ilaanni ‘isumaliutersuutit tammartitsiniutillu’ – assersuutigalugu guuteqan­nginneraaneq pinngoriar­tuaarsimaneraanerlu – ilinniar­titsissutigineqartarput. (Kol 2:8) Aamma ilaannikkut imminut pingaar­tinnerunissaq ilinniar­titsissutigineqartarpoq. Qatanngut angut inuusuttoq ima oqarpoq: “Nutaamik piginnaaneqar­nissamik ilinniar­tinneqarpugut, aammali eqqarsar­taatsimik nutaamik – amerlanertigut Jehovap eqqarsar­taasianut naapertuutin­ngitsumik – ilinniar­tinneqarpugut. Assersuutigalugu ilinniar­tinneqarpugut taamaallaat nammineq iliuuseqarnikkut pillualersin­naasugut. Eqqarsalerpunga pillualissaguma Jehovap ikiuinera pisariaqar­tinnagu. Taamaat­tumillu sutigut tamatigut Jehovap tatiginissaa ajornakusoor­tippara.”

8. Sooq silatusaarnissaq pingaaruteqarpa? (Ussatit 5:1, 2)

⁸ Ussatit 5:1, 2 atuakkit. Biibilimi kajumis­saarneqarpugut silatusaaq­qulluta Saatanip eqqarsarsin­naassuserput ajortun­ngortin­niarsarimmagu. (Pet 1. 5:8) Ilinniar­titsisut allallu isumaat pissutigalugit ileqqoris­saarneq, inuunerup pilersimanera Guuteqarneralu pillugit Biibilimi ilinniar­titsissutigineqartut qularilersin­naavagut. Inuit taakku isumaqarput allanit silatunerullutik, ‘Guutilli inuit ilisimassusiat suutinngilaa’. – Kor 1. 3:18-20.

9. Silatusaar­tuarumallutit susinnaavit?

⁹ Ilinniarnerit aallartitsinnagu susinnaasutit. Silatusaar­tuarumallutit ilinniar­tunngun­nginninni qulakkeeruk Biibilimi allassimasut upperil­luinnarlugit. Apeqqutit uku eqqarsaatigikkit: ‘Sooq Guuti upperaara? Qanoq nalunngilara Biibili tassaasoq Guutip oqaasia? Sooq upperaara Biibili naapertorlugu inooriaaseq Nalunaajaasuun­ngitsut inooriaasiannit pitsaanerusoq?’ Aamma meeqqat atuarfianni atuartuunerit kingumut qiviarlugu uku eqqarsaatigikkit: ‘Pinngoriar­tuaarsimaneraasut isumaat uppernikkut sanngiil­lissutiginikuuara? Atuaqatikka eqqunngitsulioraangata ilaarusut­tarnikuuakka?’ Taakkua arlaat angerukku uppernerit nakussatsin­niarlugu maanna iliuuseqarit. Ilinniar­tuutillutit qulakkeeruk allat oqaasiinit sunnerneqan­nginnissat eqqarsarsin­naassutsivillu paarinissaa. – Tim 2. 2:16-18.b

10. Ilinniar­tuutillutit eqqarsarsin­naassutsit paariuarumallugu susinnaavit?

¹⁰ Ilinniar­tuuninni akuttual­laanngitsumik uku eqqarsaatigisakkit: ‘Allat Biibilimut naapertuutin­ngitsumik inooriaasiannit sunnertit­tarpunga? Ilinniar­titsissutigineqartut ilumoor­tuunersut inuilluunniit isummersuutaan­narineraat immikkoor­tissinnaasarpakka? Upperil­luinnarpara Guutip kunngeqarfia inuit ajornar­torsiutaannik aaqqiisin­naasutuaasoq?’ Eqqarsarsin­naassutsit paariumallugu Guutip oqaasia peqqissaarlutit atuaqqis­saartuartaruk. Biibilimik misissuisarnikkut eqqarsaatigin­neqqissaar­tarnikkullu Biibilimi allassimasut ilumoor­nerannik upperin­ninnerit nakussatsissavat. – Tim 1. 4:15.

PIFFISSAT ATORLUARTARUK

11. Ilinniar­tuutillutit sooq piffissap atorluarnissaa ajornakusoor­tissinnaaviuk?

¹¹ Eqqumaf­figisassaq. Ilinniar­tuuninni ilinniarnermut piffissarujussuaq atortariaqartarpat, ingammik misilitsinnerit nalaanni imaluunniit suliassiis­sutigineqartup naammas­siniarnerata nalaani. Piffissat atorluar­tanngikkukku uippakajaalersin­naavutit nukissaarus­sinnaal­lutillu. Taamaattumik timikkut misigis­sutsikkullu peqqissuunissat aamma eqqumaf­figissavat.

12. Pingaarutillit suut piffissaqarfigisariaqarpigit? (Efesossimiut 5:15, 16)

¹² Efesossimiut 5:15, 16 atuakkit. Iliuuserineqartussat amerlangaarmata ‘piffissap pitsaanerpaamik atornissaa’ imaannaan­ngitsuuvoq. Ilinniar­tuunerit pingaaruteqarpoq, ilaquttavilli ilagiinnilu qatanngutit ilagisar­nissaat pingaaruteqar­neruvoq. (Tuss 133:1; Uss 18:1) Anersaakkut pisariaqar­titatit soorunami pingaar­nerpaajupput. (Mat 6:33) Immaqa aamma ilaqutariinni akisussaaf­feqarputit suliffeqarlutillu. Kiisalu peqqiil­liulissan­ngikkuit qasuersaar­tariaqarlutillu timigis­sartariaqarputit. (Oqal 4:6; Tim 1. 4:8) Tamakku tamaasa angujumallugit pilersaarusiorluar­tariaqarputit.

13. Piffissat pitsaanerpaamik atorumallugu susinnaavit?

¹³ Ilinniarnerit aallartitsinnagu susinnaasutit. Biibilimi allassimavoq pilersaarusiorneq ajunngitsumik kinguneqartartoq. (Uss 21:5) Taamaattumik ilinniar­tunngun­nginninni pilersaarusiorluarit. Kingumut qiviaruit isumaqarpit atuartuugal­laravit piffissat atorluar­tarnikuullugu? Isumaqaruit piffissat atorluar­nerusimasin­naallugu sutigut maanna allannguisinnaavit? Pingaarutilinnut piffissaqarumallutit pilersaarusiorluartarit.c

14. Apeqqutit suut eqqarsaatigisarsin­naavigit?

¹⁴ Ilinniar­tuuninni akuttual­laanngitsumik uku eqqarsaatigisakkit: ‘Naammattumik qasuersaarlungalu timigis­sartarpunga? Ilagiinni uppeqatikka piffissaqarfigisarpakka? Ilinniarfimmi ilinniagassat piffissaq eqqorlugu naammas­sisarpakka? Taamaan­ngippat imaappa suliassaqarpal­laartunga imaluunniit pingaarutilinnik kinguar­titerisartunga? Ikinngutikka ilaquttakkalu isumaqarpat allannguisariaqartunga?’ Paasigukku pitsaanerusumik pilersaarusior­tariaqarlutit imminul­luunniit aqussinnaaneq ineriar­tortittariaqarlugu iliuuseqapallagit. Immaqalu pilersaarusiul­laqqissutut ilisimaneqartut oqaloqatigisin­naavatit. – Uss 11:14.

JEHOVAMIK ASANNITTUT IKINNGUTIGIKKIT

15. Ilinniar­tuutillutit suna aamma eqqumaf­figissaviuk?

¹⁵ Eqqumaf­figisassaq. Ilinniaqativit soraareernerup kingorna arlaannut ilaserisin­naavaatsit. Soqutigisaqaqatigiikkassi, ingammik ulloq naallugu ilinniarfim­meeqatigiit­tarassi, immaqa ilagerusuppatit. Immaqalu misigivutit ilinniaqatitit ilagiinni uppeqatinnit ilakkuminar­nerusut. Mianersor­tariaqarputilli. Ilinniarfim­meeqatigisar­takkatimmi inuunermi ilinnit allaanerusunik pingaar­titaqarput. Ilaginerujar­tortillugillu taakkunatut eqqarsar­taaseqar­nerujar­tulissaatit. (Kor 1. 15:33) Michaelip ukiuni sisamani innaallagis­serisutut ilinniarsimasup tamanna misigisimavaa. Ima oqarpoq: “Ilinniar­tuuninni suleqatikka sapaatip-akunneranut nalunaaquttap-akunneri 40-t sinnerlugit suleqatigisarakkit taakkua arnanut isiginnit­taasiat, nipilersuutit nuannarisaat kanngunar­tumillu oqaloriaasiat sunnerneqaatigilerpakka.”

16. ‘Ilisimasunik peqateqarneq’ qanoq paasisariaqarpa? (Ussatit 13:20)

¹⁶ Ussatit 13:20 atuaruk. Biibilimi mianersoq­qussutitut allassimavoq ajortumik sunniisin­naasunik peqateqarneq navianartuusoq. Paarlat­tuanilli “ilisimasunik peqateqartoq ilisimas­suseqalersarpoq”. Tassa ilagisar­takkatsinnit ajortumik ajunngitsumil­luunniit sunnerneqar­tarpugut. Taamaattumik Jehovamik asannil­lutillu ilinnik pitsaanerpaamik kissaassisut ikinngutigikkit. – Tuss 101:6, 7; 119:63.

17. Ilagisar­takkannit ajortumik sunnerneqan­nginnissat qanoq qulakkeersin­naaviuk?

¹⁷ Ilinniarnerit aallartitsinnagu susinnaasutit. Eqqarsaatigiuk ilinniaqatissatit qanoq ilagitigisas­sanerlugit qanorlu qanitsigis­sanerlugit. Qatanngut angut Trenton ima oqarpoq: “Ilinniaqatikka inussiar­nisaarfigisarpakka soraaraangamali ilagineq ajorlugit. Ilinniaqatittut isigaakka, qanimulli ikinngutittut isiginagit.” Illit ilagisar­takkannut tunngatillugu qanoq killiliissavit? Apeqqut akiumallugu una eqqarsaatigiuk: ‘Meeqqat atuarfianni atuarallarama qanoq killiliisar­nikuuvunga?’ Misigiguit taamani pitsaanerusumik aalajangiisimasin­naagaluarlutit sumik maanna allannguissavit? ‘Ilisimasunik peqateqar­tuarnissat’ aalajangiusimajuk, Jehovamillu asannin­ngitsut ilaginaveersaakkit.d

18. Apeqqutit suut eqqarsaatigineri iluaqutigisin­naaviuk? (Aamma asseq takuuk).

¹⁸ Ilinniar­tuuninni akuttual­laanngitsumik apeqqutit uku eqqarsaatigisakkit: ‘Ilinniaqatikka qanitarival­laalerpakka? Oqaloriaasiat, isiginnit­taasiat pissusilersor­nerallu ilaartalersimavakka? Ilinniaqatinnut attaveqarnera Jehovap qanoq isumaqarfigaa?’ (Tuss 1:1) Paasigukku ajortumik sunnerneqarsimallutit ingerlaannaq iliuuseqarit. Qulakkeeruk qanimut ikinngutitit ilittut Jehovamik asannittuusut. Soorunalimi ilinniaqatinnut oqaluus­sinissamut tunuarsimaas­sanngilatit. Ilinniarfimmi Jehova pillugu oqaluus­sinissamut periarfissatit atorluartakkit.

ILINNIAR­TUUNINNI JEHOVA SALLIUTTUARUK

19. Ilinniar­tuuninni anersaakkut qanoq piareersarsinnaavit? Assersuuteqarit.

¹⁹ Asimi pisuttuar­niartoq silatooq piareersartarpoq. Angalanermini aqqusaarsin­naasaminut tamanut piareersarsin­naanngik­kaluarluni qulakkeersinnaavaa angalanissamut nukissaqar­nissani, naleqquttumik atisaqar­nissani apuuffissamilu sumiinnera. Illittaaq ilinniar­tuuninni assingusumik periaaseqarsin­naavutit. Uppernikkut nukittujuarit, “sakkutuup atisai sakkuilu Guutimeersut” atortuakkit, eqqaamajullu suna anguniagarigit – tassa Jehovap sutigut tamatigut ataqqinarsisinnissaa tassaananilu pisuunngornissat inunnillu ataqqisaanissat. – Ef 6:11-13; Kor 1. 9:26, 27; 10:31.

20. Qanoq ‘paasisin­naaviuk uppernermiin­nerlutit’?

²⁰ Biibilimi ima kajumis­saarneqarpugut: “Uppernermiin­nersusi paasiumallugu imminut misilit­tuaritsi. Inuttut qanoq ittuunerlusi misissor­tuarsiuk.” (Kor 2. 13:5) Ilinniar­tuutillutit taamaaliorsin­naavutit. Qanoq? Allaaserisami matumani sammineqartut eqqarsaatigisar­nerisigut. Anersaakkut nukittujuarumallutit iliuuseqar­tuarpit? Inuit ilisimas­susiannit sunnerneqar­naveersaar­niarlutit eqqarsarsin­naassutsit paariviuk? Piffissat atorluar­tarpiuk? Ajortumik sunniisartut ikinngutiginagit uppeqativit akornanni qanimut ikinngutis­sarsiortarpit? Ilinniarfim­miikkuit, suliffim­miikkuit allamiik­kaluaruil­luunniillu apeqqutit taakku eqqarsaatigisariaqarpatit. Qanorluunniit atugaqaraluaruit anersaakkut nukittujuarnissat aalajangiusimajuk. Taamaalioruit Jehovap pitsaanerpaamik inooriaaseqar­nissannut ikiussavaatit. – Uss 3:5, 6.