Paratiisi ajornartorsiorfiunngitsoq piviusunngungajalerpoq

’PARATIISIMEEQATIGIUMAARPAKKIT.’ Oqaatsip tamatuma angut pinerluttuusimasoq tuppallertissimassaqaa! Aap, angut isumaqanngilaq anniarfimmukarnani qilaliassalluni. Pinerluttup Jesusip saniani kikiattugaasup paratiisi pilerseqqinneqarpat inuunermut makititaanissamik neriuut tuppalliutigisimassavaa. Malugiuk kia neriorsuut oqaatigigaa — Guutip nammineq ernerata, Jesus Kristusip. — Lúkarse 23:43.

Kristusip Paratiisimik neriorsuutaa qanoq tatiginartigiva? Pinerluttoq ima qinusimavoq: ’Jesus, naalagaallutit tikiukkuit eqqaaginga.’ (Lúkarse 23:42) Naalagaaffik Jesusip naalagaaffigisassaa suua nunamilu paratiisimut qanoq attuumassuteqarpa? Qanoq ililluni paratiisip ajornartorsiorfiunnginnissaa qulakkeerpaa?

Paratiisimik pilersitsisinnaasoq

Isumaqataassagunarputit oqarutta paratiisi nunami aatsaat piviusunngorsinnaasoq ullumikkut nunarsuarmi ajornartorsiutit peerpata. Inuit ajornartorsiutinik aaqqiiniarnerigalui ulloq manna tikillugu iluatsissimanngillat, soorlu oqaluttuarisaanerup takutilluaraa. Pruffiiti hebriiariusoq Jeremias ima nassuerpoq: „[Jehova], nalunngilara . . . angutip aalajangigassarinngikkai qanoq ingerlanissani alloriartarnissanilu.“ (Jeremia 10:23) Kiami ullumikkut ajornartorsiutit tamaasa peersinnaavai?

Silapiluttarneq mingutsitsinerlu. Galileap tasersuani anorersualersoq mallersorsuanngortorlu umiunissaq aarlerinarsimmat umiartortut angalaqatertik sinittoq itersarpaat. Taassuma imaq ima oqarfigaa: ’Nipaalliit, siorsussaarit.’ Markusip iivanngiiliuani qanoq pisoqarnersoq oqaluttuarineqarpoq: ’Anori taava atorsarorpoq qatsorluinnarlunilu.’ (Mákorse 4:39) Angalaqataat tassaavoq Jesus. Silap qanoq inneranik sunniisinnaasoq.

Aamma taannaavoq Jesus apustili Johannes aqqutigalugu siulittuisoq Guutip ’nunamik aseruisunik aseruinissaa’ nalliukkumaartoq. (sarĸúmersitat 1:1; 11:18) Taassumunnga, Noap nalaani ulersuarmi silarsuarmik guutiitsumik piiaasumut, ajornartoqanngilaq. — 2 Pîtruse 3:5, 6.

Pinerlunnerit nakuusernerillu. Biibilimi ima neriorsuuteqarpoq: „Ajortummi piiagaasussaapput, [Jehovamulli] neriuttut nuna kingornutissavaat. Kisianni qanilaartut nuna kingornutissavaat, pilluangaarlutillu inuussapput.“ (Tussiaat 37:9, 11) Tassani aamma Guuti, Jehova, neriorsuisuuvoq pinerluttuliornerit nakuusernerillu peerumaarlugit, qanilaartunut paratiisiliorluni.

Piitsuuneq kaannerlu. Ullutsinni naapertuilluanngissutsip kingunerisaanik naalakkersuisut nerisassarpassuarnik quersuarni toqqortuiinnartarput naak nunat allat piitsuussuseq sorsuutigigaat. Ikiuiniaqatigiit silarsuaq tamakkerlugu isumaaluttunik tapersersorneqartut pisariaqavissunik pilersuiniaraluartut iluatsitsinngitsoortarput aaqqissuussinerit ajalugaangata inatsisit aaqqissuussinerillu pitsaannginneri pissutigalugit. Tamatumunnga akerliusumik pruffiiti Esajas ima allappoq: „Katersaarsuit [Jehovaat] qaqqami Sionimi inuannik tamanik neriartortitsissaaq sassarlugit nerisassat pikkunartut viinnilu kimittooq, nerisassat patermik orsuarnequtillit viinnilu kimittooq pitsaalluinnartoq.“ (Jesaja 25:6) Ilaa soorlu kaannersuaqarunnaarnissaa eqqartorneqartoq? Taamaappoq.

Sorsunnerit. Inuiaqatigiinnit tamanit oqartussaaqataasunit silarsuup aqunniarneqarnerigalua iluatsissimanngilaq. Naalagaaffeqatigiit, 1920-mi pilersinneqartut, sorsunnersuup aappaata aallartinnissaa pinngitsoortissimanngilaat. FN-ip, eqqissinissamut neriuutituamik taaneqartartup, sorsuffiusuni akersuuttut eqqisseqatigiissinniarsarisaraluarpai. Naak eqqissineq nalunaarutigisaraluaraa sorsuuttoqartuarpoq, inuiaqatigiit iluanni, inuiaqatigiit akornanni innuttaaqatigiilluunniit iluanni. Guutip Naalagaaffiani naalakkersuisut neriorsuipput ullumikkut sorsunnermut pissutaasut peerumallugit innuttaasullu eqqisseqatigiillutik inuunissaannik ilinniartikkumallugit. — Jesaja 2:2-4; Daniel 2:44.

Ilaqutariinni ileqqussatigullu ajutoorneq. Ilaqutariit avissaartuuttarnerat takussaaqaaq. Inuusuttut akornanni pinerlunniartoqartaqaaq. Innuttaaqatigiinni inissisimaffinni tamani ileqqorluttoqartarpoq. Guutilli najoqqutassiai allaqqaataaniilli allanngorsimanngillat. Jesusip uppernarsarpaa ’inuup angunni arnilu qimassagai nuliilu attavigalugu, taakkulu marluk uiniussapput ataaseq. . . . Taamaattumik Guutip katititai inuup avissaartissanngilai.’ (Matîuse 19:5, 6) Jehova Guuti aamma ima peqqusivoq: ’Ataatat anaanallu ataqqikkit . . . nunami pilluaqqullutit inuummersoqqullutillu.’ (Evfisumiut 6:2, 3) Pissutsit taamaattut Guutip Naalagaaffiata ataani atuutissapput.

Nappaatit toqulu. „[Jehovap] . . . annatsikkumavaatigut,“ pruffiiti Esajas neriorsuivoq. „Nunatsinni ima oqartoqassanngilaq: ’Napparsimavunga!’“ (Jesaja 33:22, 24) ’Ajortimmi akissarsiarititaa tassa toqu,’ kristumiu apustili Paulus nassuerpoq, ’Guutilli saammaannermit tunnissutaa tassa inuuneq naassaangitsoq Kristus Jesusimi Naalakkatsinni.’ — Rûmamiut 6:23.

Jehova Guutip ajornartorsiutit tamaasa qilammi naalagaaffini ernerminik, Jesus Kristusimik, aqunneqartoq atorlugu piissavai. Immaqa oqarumassaatit: ’Tamanna sinnattugaannartut piviusunngortinneqarsinnaanngitsutut nipeqarpoq. Piviusunngussagaluarpat nuannissagaluaqaaq, taamaassinnaavali?’

Piviusut takukkit

Nunarsuarmi maanerpiaq ajornartorsiuteqanngitsumik paratiisimi inuuneq inuppassuit piviusorsiorpalaanngitsutut isigaat. Taamatut misigiguit taamaalisinnaaneranut uppernarsaatit misissoriakkit.

Jehovap Nalunaajaasui ullumikkut nunarsuaq tamakkerlugu inuiaqatigiiupput 5 millionit sinnillit; nunani 233-init amerlanerusuni ilagiinni 82.000-iusuni avatangiisini allanut naleqqiullugit ajornartorsiorpallaarnatik inuupput. Katerisimaarnerisa ilaat, angisooq mikisorluunniit, najuuffigigukku suna malugissagaluarpiuk?

(1) Avatangiisit najoruminartut minguitsullu. Tuluit Nunaanni Norwichimi ataatsimeersuarneq pillugu oqaaseqarluni arsaattarfissuup pisortaa oqarsimavoq: „Ulluni sisamani eqqissisimanarnera . . . kajungernaqaaq. Silarsuarmi niuerfiusumi ilungersunartumi ulluinnarnilu inuunermi ullunut sisamanut akerliulluinnartunik inuttut eqqissineq misiginarpoq. Nalunaajaasut ilumut allaassuteqarput allaassutaallu nassuiaruminaappoq.“

Angut Londonimi Jehovap nalunaajaasuisa allaffiinut pulaarsimasoq oqarsimavoq: „Takusakka tusakkakkalu assut tupigusuutigaakka illuutissinniinnaanngitsoq aammali [angutit arnallu] akornanni eqqissisimanangaarnerup killippaanga. Misigivunga inooriaasersi pilluarnersilu silarsuup sinneranut ajornartorsiorfiusumut ilinniutissaasoq.“

(2) Isumannaassuseq eqqissinerlu. Canadami Journal de Montréal-mi aaqqissuisoq allassimavoq: „Nalunaajaasuunngilanga. Nalunaajaasulli ileqqorissuunerannut ilisimannittuuvunga. . . . Silarsuarmi taakkua kisimik inuugaluarpata unnuami matuvut parnaarsortariaqartassanngikkaluarpavut tillinniartoqarnissaanullu kallerissaarutit atortariaqassanngikkaluarpavut.“

(3) Guutip Naalagaaffiata naalakkersuineranut ilumoorneq Nalunaajaasut ilisarnaatigaat. Kalluunnaveersaarnerat ilaannut nikallortitsisarput, taamaattariaqanngikkaluarpoq. Ullumikkut politikkikkut aaqqissuussinernik ilaartuinernut akuliukkusunnginnerat innuttaaqatigiinnik ineriartortitseqataanissamut akisussaassuseqanngitsutut misiginermik aallaaveqanngilaq. Qilammi naalakkersuisup, tassa nunarsuarmik Pinngortitsisup, Jehova Guutip iluarisaanik iliorniartuupput.

Nalunaajaasut upperisaata, Guutip oqaasianik tunngaveqartup, immikkut upperusiornermut napititaannginnissaannut illersorpai. Inuit tamaasa soqutigaat, upperisaat apeqqutaatinnagu. Aap, upperisartik allanut pinngitsaaliissutiginianngilaat. Siulersortertik, Jesus Kristus, malinniarpaat paratiisip ajornartorsiorfiunngitsup qanittukkut nunarsuarmi pilersinneqarnissaanik uppernarsaatit Biibilimeersut saqqummiullugit. — Matîuse 28:19, 20; 1 Pîtruse 2:21.

(4) Anersaakkut peqqinneq pilluarnerlu. Piviusorsiorlutik Jehovap nalunaajaasuisa piffissami matumani ajornartorsiutaarunnissartik ilimaginngilaat. Tamanna inunnut Adamimik kingornussaminnik ilisarnaatillinnut ajornarpoq. Guutilli anersaava ikiortigalugu inuttut piginnaassutsit ineriartortittarpaat, soorlu makku: ’Asanninneq, tipaatsunneq, eqqissineq, kamaginninneq, avaaginninneq, ajunngissuseq, upperneq, saamaneq imminullu naalakkersorsinnaaneq.’ (Galâsiamiut 5:22, 23, NV) Jesus Kristus aqqutigalugu Jehovamut pallorfiginninnerata ataasiussuseqartippaat neriuutaallu uummaaritsillugu.

Qularutiginngilarput Nalunaajaasut ataatsimiinnerinut najuunnerpit qularunnaarsissagaatit Guutip nunarsuaq paratiisinngortikkumaaraa.

Ullumikkut ajornartorsiutit qaangerneqassapput. Allaat naammalluinnannginneq Kristusip pilliutaa utertitsissutaasoq atorlugu inuiannit naalattunit peerneqassaaq. Aap, peqqilluinnarneq pilluavinnerlu illit pigilersinnaavatit.

Misissuinerup taamatut neriugisaqalersissinnaavaatit. Atuagaq Ilisarsineq inuunermut naassaanngitsumut sammisoq nalunaajaasunit piumaniaruk.a Taanna atorlugu piffissaq sivikitsoq atorlugu Guutip sumik piumaffigineraatit ilinniarsinnaavat illittaaq paratiisimi ajornarsiorfiunngitsumi naassaanngitsumik inuuneq nuannaarutigisinnaaqqullugu. (gE 8/10 97)

[Quppernerup ataani ilanngussaq]

[Qupp. 30-mi issuagaq]

Nalunaajaasut upperisaata, Biibilimik tunngaveqartup, immikkut upperusiornermut napititaannginnissaannut illersorpai

[Qupp. 28, 29-mi assiliartaq]

Paratiisi ajornartorsiorfiunngitsoq maanna tunngaviliorneqarpoq

Qanittukkut nunarsuaq tamakkerlugu paratiisi tigussaasoq atuutilissaaq