Paratiisi ajornartorsiorfiunngitsoq takorluugaannaava?
EQQISSISIMANAQ!“ USA-mi naalagaaffimmi Idahomi Redfish Lakep eqqaa orpippassuarnit isikkivia assut eqqisisimanarpoq. „Paratiisi taamatorluinnaq takorloortarpara,“ angalasoq oqarsimavoq.
Qeqertap Immap Akullersuarmiittup, Cypernip, kujammut sineriaani seqinnareqaaq. Sissami mallit qaraarput. Qaqqap qaavani neriniartarfimmit isikkivik isiginnaajutigalugu tikeraaq ima oqarpoq: „Tassa aatsaat paratiisi!“
Amerlanersatta eqqaamasat taamaattut pingaartippaat. Najugaqavissulli malugisarpaat paratiiserpalaartumik avatangiiseqarneq ulluinnarni inuunerup ilungersunarneranik akerlilerneqartartoq: Qaqqarsuarni Rocky Mountainsini orpippassuit ikuallannerat, immap mingutsitaanerata uumasunut naggataagullu inunnut sunniunnerat — nunarsuaq tamakkerlugu nunat assigiinngitsut akornanni innuttaaqatigiillu iluanni akersuunnerit eqqaassanngikkaanni.
Paratiisi suua?
Illit paratiisi qanoq takorloortarpiuk? The New Shorter Oxford English Dictionary-p nassuiaataa siulleq imaappoq: „Edenip naatsiivia Mosesimik allakkat siulliit-ni kapitalit aappaanni pingajuannilu allaaserineqartoq.“ Tamanna Biibilip atuagartaasa siullersaanni Guutip inummut siullermut, Adamimut, inissiiffiata allaaserineqarneranut innersuussineruvoq. Paratiiseqqaami tassani „orpiit tamalaat takorannersut neriffigiuminartut“ naammattorsuit naasarsimapput. — 1 Moses 2:9.
Ujarlerfissiami nassuiaatip aappaani „paratiisi“ aamma „kristumiut musliimillu guutisiorneranni qilak“ imminnut atassuserneqarput, nangipporli: „Ullumikkut taalliarpalaarneruvoq.“ Angalasunulli qulaani taaneqartunut paratiisi „nunaavoq alianaatsorujussuaq imaluunniit nuannersorujussuaq“, ujarlerfissiami nassuiaatip pingajuanni taaneqartutut.
1500-kkunni Tuluit Nunaanni naalagaaffimmi atorfilik sir Thomas More Utopia-mik atsikkaminik atuakkiorsimavoq, tassani nuna takorluugaq pitsaalluinnartunik inatsisilik naalakkersuisulillu innuttaaqatigiillu pitsaalluinnartunik atugaqartut allaaserisimavai. Allaaserisaa piviusorsiunngingaarmat ullumikkut Webster’s New Collegiate Dictionary-mi „Utopia“ ima nassuiarneqarpoq: „Innuttaaqatigiinni siumukarnissamut aaqqissuussiniarneq piviusunngortinneqarsinnaanngitsoq“.
Immikkut upperusiortut People’s Templet siulersuisuata Jim Jonesip malittaanut Utopia tassaavoq Guyanap orpippassuini orpiiaaneq. Alianaraluartumik 1978-mi paratiisissarsiortunut taakkununnga 900-nit sinneqartunut toqumik piuneerussaanermillu kinguneqarsimavoq! Taamaattut kingunerisaannik paratiisi immikkut upperusiortunut eqqumiitsunut uissuumminartunik isumakulunnartunillu iliuuseqartartunut atassuserneqartarpoq.
Silarsuarmi pinerlunnertalimmi nakuusernertalimmilu, inersimasunik meeqqanillu assigiimmik nappaatinik eqqugaasoqartartumi, innuttaaqatigiinnilu uumissuineq upperisarsiornikkullu assigiinngissutit pissutigalugit avissaartuuffiusumi avatangiisit alianaatsut qalliinnarsiortuunerusarput. Tupinnanngilaq paratiisi takorluuinerinnartut isigineqartarmat! Inoqarporli paratiisimik ujarlernerminni tamatuminnga akornusertinngitsunik. Qanoq iluatsitsisimatigippat? (gE 8/10 97)