Biibili qanoq oqarpa?
’Silamiut ilaginngilaasi’ Qanoq isumaqarpa?
UKIUNI 300-kkunni kristumiuunerartut tusindilikkuutaat Egyptenip inoqajuitsortaani avinngarusimasumi inuujumallutik pigisatik, qanigisatik inooriaasertillu qimassimavaat. Kiserliornianik imaluunniit anakoretinik taaneqartarsimapput, oqaaseq griikerisooq nagguigisaa tassaavoq a·na·kho·reʹo, isumaqartoq „tunuarpunga“. Oqaluttuarisaanermik allattartup naliminni inuusunit immikkoorniartunik taasimavai. Innuttaaqatigiinnit alisimanermikkut isumaqarput ’silamiunut ilaaqqunatik’ Kristusip peqqussutaa malillugu. — Juánase 15:19.
Biibilimi kristumiut ’silarsuarmit mingutsinnaveersaaqqullugit’ oqaaqqissaarneqarput. (Jâko 1:27) Erseqqissumik mianersoqqussuteqarpoq: ’Uersartusi ukorsii-aa, ilisimanngilisiuk silap piinik asanninneq Guutimut akerartuutaasoq? Taamaammat silap piinik asannikkumaannartoq Guutimut akerartortigitittaraaq.’ (Jâko 4:4) Tamanna isumaqarpa kristumiut kiserliorniartuussasut inunnit allanit alisimallutik? Uppeqatiginngisatik attaviginngilluinnarlugit?
Kristumiut innuttaaqatigiinnermut akerliunngillat
Silarsuarmut ilaannginnissaq Biibilimi arlalippassuariarluni oqaatigineqarpoq nassuiarneqarporlu sooq kristumiut silarsuarmit Guutimit avissaarsimasumit immikkoornissaat pisariaqartoq. (Naleqqiuguk 2 Korintumiut 6:14-17; Evfisumiut 4:18; 2 Pîtruse 2:20.) Taamaattumik kristumiut silatusaarlutik isummat, oqariartaatsit ileqqullu Guutip naapertuilluartumik najoqqutassiaanut akerliusut, soorlu pisuussutinik ataqqisaanermillu silarsuup piumatooqaluni piniartarnera nuannaarniutinillu ingasaassinera, ingalassimaniartarpaat. (1 Juánase 2:15-17) Aamma sorsunnernut politikkimullu kalluukkumannginnermikkut silarsuarmit immikkoorput.
Jesus Kristus oqarsimavoq ajoqersukkani ’silarsuup ilagissanngikkai’. Aammali Guutimut ima qinusimavoq: ’Qinnutinngilakka silarsuamit peerseqqullugit, kisianni ajortumut sernigeqqullugit.’ (Juánase 17:14-16) Ersarippoq Jesusip kissaatiginngikkaa ajoqersukkani innuttaaqatigiinnermut akerliussasut kristumiuunngitsunullu tamanut attaveqanngivissasut. Kristumiut avinngarusimagunik suliassiissutigineqartoq, tassa „illumiit illumut“ oqaluussineq ajoqersuinerlu, naammassisinnaanavianngikkaluarpaat. — apustilit suliait 20:20, NV; Matîuse 5:16; 1 Korintumiut 5:9, 10.
Silarsuarmit mingutsinnaveersaarnissamik peqqussutip kristumiut allanit ajunnginnerusutut imminnut isiginissaannut pissutissaqartinngilai. Jehovamik mianerinnittut „makitasaarneq“ uumigaat. (Ussatit 8:13) Galâsiamiut 6:3-mi ima allassimavoq: ’Suunngikkaluarluni imminik suusorisoq imminut salloqittarpoq.’ Allanit ajunnginnerusutut misigisut imminut salloqittarput ’tamarmimmi ajortuliorput Guutimi nersornaammik ajorsarlutik’. — Rûmamiut 3:23.
’Kimilluunniit mitalleqqunagit’
Jesusip nalaani inoqarsimavoq upperisaqatiginngisaminnut tamanut asissuisunik. Farisiiarit taamaattuusimapput. Mosesip inatsisaanik juutillu ileqqutoqaannik soqutaarpasinngitsunik ilisimasaqarluartuusimapput. (Matîuse 15:1, 2; 23:2) Upperisarsiornikkut ileqqulersuuterpassuaminnik malinneqqissaarnertik pingaarniutigisarsimavaat. Farisiiarit silaqassutsikkut piginnaanitik upperisarsiornermilu inissisimanertik pissutigiinnarlugit allanit nersorneqartariaqarnerusutut pissusilersortarsimapput. Asissuinertik ilaatigut ima oqarlutik ersersittarsimavaat: ’Inuit uku inatsisinik nalusut perloqqunarsissapput.’ — Juánase 7:49.
Allaat farisiiarit farisiiariunngitsut nikanarsaasumik taaguuteqartissimavaat. Epriarit oqariaasiat ‛am ha·’aʹrets inuinnarnut nikanarsaanngitsumik taaguutaasimagaluarpoq. Judamili upperisarsiornikkut siulersuisut makitasuut ‛am ha·’aʹrets-ip isumaa allanngortillugu nikanarsaarpaluttunngortissimavaat. Eqimattakkuutaat allat, aamma kristumiuunerartut, allamik upperisallit nikanarsaarpaluttumik nipeqarlutik taaguuteqartissimavaat, soorlu imaattumik „Guutimik nalusut“.
Ukiuni hundredelinni siullerni kristumiut kristumiuussutsimut ilanngutinngitsut qanoq isigisarsimavaat? Jesusip ajoqersugai uppinngitsunut ’qanilaartassasut’ aamma ’mianerinnittassasut’ oqaaqqissaarneqarput. (2 Timûtiuse 2:25; 1 Pîtruse 3:15) Tamatumani apustili Paulus maligassaalluarsimavoq. Ilakkuminartuusimavoq anneruniartuunani. Allanit qutsissisinnani maniguuttuusimavoq kajumissinartuusimallunilu. (1 Korintumiut 9:22, 23) Isumassarsisitaalluni Titusimut allakkamini Paulus oqaaqqissaarisimavoq ’kimilluunniit mitalleqqunagit saqitsaagajoqqunagillu, piuaaqqullugilli inuillu tamaasa qanilaartumik pisartuaqqullugit’. — Títuse 3:2.
Ilaannikkut Biibilimi taaguut „uppinngitsoq“ kristumiuunngitsut pillugit atorneqartarpoq. Oqaatsilli „uppinngitsup“ kikkut tamarmik tutsaanni nikanarsaasumilluunniit atorneqarsimaneranik takussutissaqanngilaq. Kristumiuunngitsunik nikanarsaasutut asissuisutulluunniit atorneqarsimanngilaq, Biibilimmi najoqqutassiaanut akerliussagaluarpoq. (Ussatit 24:9) Ullumikkut Jehovap nalunaajaasui uppinngitsunut inussiarniitsuunngillat makitaniartuunatilluunniit. Qanigisatik sanilitilluunniit nalunaajaasuunngitsut taaguusersussallugit ataqqinninngitsuliornertut isigaat. Biibilip unnersuussutaa imaattoq malippaat: ’Naalakkamut kiffaasoq . . . tamanut inussiarnersuussavoq.’ — 2 Timûtiuse 2:24.
’Tamanut ajunngitsuliorta’
Silarsuarmut, ingammik Guutip najoqqutassiaanut sualuttumik ataqqinninngitsunut, qanimut attaveqarnissap navianaateqarnera paasissallugu pingaaruteqarpoq. (Naleqqiuguk 1 Korintumiut 15:33) Biibililli ’tamanut ajunngitsulioqqulluta’ unnersuussutaani oqaatsimut ’tamanut’-mut kristumiutut uppeqatiginngisavut ilaapput. (Galâsiamiut 6:10) Ukiuni hundredelinni siullerni kristumiut pissutsini assigiinngitsuni uppinngitsut nereqatigisarsimagunarpaat. (1 Korintumiut 10:27) Taamaattumik ullumikkut kristumiut uppinngitsut oqimaaqatigiissumik isigisariaqarpaat tullermissullu isigalugit. — Matîuse 22:39.
Inuup Biibilip sallusuissutaanik ilisimasaqannginnera pissutigiinnarlugu ileqqorluttuunissaanik kanngunartuliortuunissaannilluunniit pasillernissaa kukkunerussaaq. Pissutsit inuillu assigiinngitsuupput. Kristumiut ataasiakkaat namminneq aalajangertariaqarpaat uppinngitsut qanoq annertugisumik attaveqarfigissanerlugit. Kristumiulli itsaq kiserliorniat avinngarusimaniarnissaat farisiiarisulluunniit imminnut annerutinniarnissaat pisariaqanngilaq Biibilerpalaarnanilu. (gE 8/9 97)