Uppinngitsut uniaammik allanertamik uniaqatigeqinasigik
’Uppinngitsut uniaammik allanertamik uniaqatigeqinasigik. . . . Uppertu [mmi] uppinngitsoq sukkut agguaqatiginerpaa? — 2 KORINTUMIUT 6:14, 15.
1. Qatanngutip arnap uppinngitsumut katinnera qanoq kinguneqarpa?
UKIUALUNNGUIT matuma siorna arnap Jehovamut Nalunaajaasuusup USA-meersup uini biilimik ajunaartoq annaavaa. „Aallaqqaataani aliasuttorujussuuvunga,“ oqaluttuarpoq, „aalajangiusimavarali tamanna Jehovamut kiffartorninnut akornusiissanngitsoq. Ukiulli marlussuit qaangiummata ilagiinni aappariinnik ilaqaraangama misisalerpunga ’qamutit assakaasuisa tallimarigaannga’. Panigalu ilaqutariit asiaqatigiinnerinut qaaqqusaajuaannarneq ajorpugut. Aappariit kristumiut imminnut tunniusimanermik ersersitsivigisut takugaangakkit suli kiserliornerulersarpunga. Qularnanngitsumik arlaannaataluunniit maluginngilaa anersaakkut sanngiinnerulersunga. Taamaattumik angutip suliffinnit ilisarisimasama neriartoqatiserimmanga akuersivunga. Sivitsorianngitsoq asannilerfigaara. Naggataatigut sanngiillingaarama kiserliungaaramalu katinnissaanut akuersivunga.“
2. Katikkusunneq sooq pissusissamisoorpa, aappariinnerlu suusussaava?
2 Aap, inooqateqarusunneq sakkortoorujussuusinnaavoq, kissaallu tamanna pissusissamisoorpoq. Soorlu Jehova nammineq oqarsimasoq: „Iluanngilaq inuk kisimiimmat. Ikiortissiussavara, angummut naammaataasumik [„naleqquttumik“].“ (1 Môrsase 2:18, NV, New World Translation-ip atuaqqissaarutitaani nassuiaasiussaq.) Aappariinneq angutip arnallu qanimut, ataavartumik ataasioqatigiissutigisussaavaat. Ima oqartoq Adamiunani Jehovaavoq: ’Tamanna pillugu angutip angunnilu arnilu qimassavai, nuliilu attavigalugu, uiniussappullu ataaseq.’ (1 Môrsase 2:22-25; naleqqiuguk Matîuse 19:4-6.) Immaqa illit ’naammaatissannik’ nanisinissat erinigaat.
3, 4. (a) Uppinngitsumut qanimut attaveqarnissaq Bibelimi qanoq mianersoqqussutigineqarpa? (b) ’Uniaammik allanertamik’ uniaqateqarneq pillugu Paulusip unnersuussutaa aappariinnermut qanoq ilillugu atorneqarsinnaava? (c) Oqaaseq ’uppinngitsoq’ kristumiut Korinthimiittut qanoq paasisimassavaat? (Ataani ilanngussaq takuuk.)
3 Uppinngitsumulli qanimut attaveqarneq Bibelimi mianersoqqussutigineqarpoq. Soorlu apustili Paulusip oqaatigigaa: ’Uppinngitsut uniaammik allanertamik uniaqatigeqinasigik [„qimoqatigeqinasigik,“ The Jerusalem Bible].a Uppertu[mmi] uppinngitsoq sukkut agguaqatiginerpaa?’b (2 Korintumiut 6:14, 15) Ussik siutitoorlu uniaqatigiissillugit assallatserinissamik Mosesip inatsisaani inerteqqutigineqartoq immaqa Paulusip eqqarsaatigisimavaa. (5 Môrsase 22:10) Siutitooq naliginngisaminik uniaqateqaruni naalliuttussaavoq, minnerunini sanngiinneruninilu pissutigalugit. Aappariineq tassaavorlusooq angutip arnallu uniaqatigiinnerat, kristumiu uppinngitsumut katikkaluaruni naligiinngitsut uniaqatigiinnerattut issagaluarpoq. (Matîuse 19:6) Naligiinngitsutut uniaqatigiinneq aappariinnermi ajornartorsiutinik annertuunik kinguneqarajuttarpoq. — Naleqqiuguk Korintumiunut agdlagkat sujugdlît 7:28.
4 Soorluli misigisalikkersaarummi ilanngutassiap aallaqqaataaniittumi ersersinneqartoq kristumiut ilaat uppinngitsumut katissimapput. Sooq ’kisianni [taamaallaat] Naalakkami’ katinnissamik inassutip maleruarnissaa ilaasa taama ajornakusoortitsigaat?
Sooq ilaat allami ujarlertartut
5. Kristumiup uppinngitsumut asannilersoorsinnaanerata qanoq pisinnaanera nassuiaruk.
5 Pissutaasoq tamatigut tassaasariaqanngilaq Guutip unnersuussutaasa maleruarnissaata sumiginnarnissaa kissaatigigamikku. Assersuutigalugu, takorlooriaruk arnaq kristumiu katikkusuttoq. Angummik kristumiumik ujarleraluarpoq, sallusuissutilli iluani ilisarisimasaasa akornanni qatanngutinik angutinik kisimiittunik naleqqutoqarpallaanngilaq. Qassinik ukioqarninittaaq eqqarsaatigaa. Immaqa qitornaqalerusuppoq. Kisimiilluni utoqqanngornissamik annilaanngatiginninnerata asaneqarnissaminillu pisariaqartitsinerata killitsiasunngortissinnaavaa. Taavalu angutip silamiup soqutiginninnermik ersersitsivigippani tunuartinnissaa ajornakusoortissinnaavaa. Immaqa angut taanna pitsaarpasillunilu inussiarnersoorpasippoq, aammalu pujortartarnanilu oqaasipilunneq ajorpoq. Taava qatanngut arnaq utoqqatsissutissanik nassaarniartalerpoq: ’Qatanngutinit angutinit nalunngisannit iluarinarneroqaaq!’ ’Bibeli atuaqqissaarusuppaa.’ ’Qatanngutinik arnanik arlalinnik angummut uppinngitsumut, kingornalu uppertunngortumut, katissimasunik nalunngisaqarpunga.’ ’Aammattaarmi aappariit kristumiut ilaat ingerlalluarpallaanngillat!’ — Jerimia 17:9 takuuk.
6, 7. (a) Qatanngut arnaq katissimanngitsoq pissutsinik atukkaminik qanoq nassuiaava? (b) Apeqqut suna eqqarsaatigilluartariaqarpa?
6 Kristumiu kisimiittoq katikkusuttoq pissutsini ajornakusooqisuni ippoq. Ilaat neriuutaarulluinnartutut misigisarput. „Qatanngutit angutit kisimiittut ikittuararsuupput,“ najukkamini pissutsit pillugit qatanngut arnaq aappaqanngitsoq oqaluttuarpoq. „Qatanngutillu arnat aappaqanngitsut amerlalluinnarput. Qatanngut arnaq inuusuttuaraajunnaaruni marluinnarnik periarfissaqarpoq: katinngilluinnassalluni, imaluunniit qatanngutit arlaannik katipallaannassalluni.“
7 Bibelimili unnersuussutigineqartoq paatsoorneqarsinnaanngilaq: ’Uppinngitsut uniaammik allanertamik uniaqatigeqinasigik.’ (2 Korintumiut 6:14) Mianersoqqussut tamanna Guutimeersoq sukannerpallaarpa imaluunniit ingasappallaarpa?
Guutip isumassuineranut asannittumut ersiut
8. Uagutsinnut ajunnginnerpaamik kissaassinini Jehovap qanoq ililluni ersersippaa?
8 Ajunngitsumik ingerlanissarput Jehovap kissaatigaa. Imminut akisugaluaqisoq ernini ’amerlasuut utertinneqaatissaannik’ tunniussimannginnerpaa? (Matîuse 20:28) Taannaannginnerpa ’iluaqutissatsinnik ajoqersuisorput’? (Isaia 48:17) Neriorsunnginnerpaatigut ’artukkatsinnik ussersinnaviarata’? (1 Korintumiut 10:13) Taamaappoq. Taamaattumik uppinngitsumik uniaqateqaqqunnginnermisigut uagutsinnut ajunnginnerpaaq eqqarsaatigisimassavaa. Eqqarsaatigeriaruk mianersoqqussut tamanna qanoq ililluni taassuma uagutsinnik isumassuineranut asannittumut ersiutaasoq.
9. (a) Kristumiut uppinngitsumut qanimut attaveqarnissaat qanoq Paulusip mianersoqqussutigaa? (b) Oqaaseq grækerisooq ’isumaqatigiinneq’-mik nutserneqartoq qanoq isumaqarpa, ajornartorsiutillu kristumiup uppinngitsumik aappaninneratigut pilersartut qanoq ililluni oqaatsip paasinarsisippai?
9 Pinngortitsisup siunertaraa aappariinneq angutip arnallu qanimut attaveqaatigissagaat, taamaalillutik ’uiniulerlutik ataaseq’. (1 Môrsase 2:24) Uppinngitsumut taama qanitsigisumik attaveqarneq kristumiumut silatusaarnerunerpa? Ilungersortumik, tamarmik iluarinanngitsumik akissutissaqartunik, apersornermigut Paulus akivoq: ’Iluarnerummi iluaanneq sukkut peqatiginerpaa? Qaamasorlu taartorlu sukkut ilagiissuteqarpat? Beliarip [Satanip] Kristus sukkut isumaqatiginerpaa [symfōʹnēsis]? Uppertulluunniit uppinngitsoq sukkut agguaqatiginerpaa?’ (2 Korintumiut 6:14, 15) Oqaaseq grækerisooq symfōʹnēsis toqqaannartumik nutserlugu isumaqarpoq „nipigeqatigiinneq“ (syn isumaqarpoq „-qatigiinneq“, fōnēʹ isumaqarpoq „nipi“). Nipilersuutit nipigilluaqatigiinnerat tamatumani tikkuarneqarpoq. Soorunami Kristusikkut Satanilu imminnut naleqqussuteqanngillat. Taamatuttaaq angutip nuliatalu uppeqatigiinngitsut ’noqartinik nipigeqatigiinnik’ nipilersornissaat ajornakusoortorujussuussaaq. Nipilersuutitut nipigeqatigiinngitsutut ipput, nipilersornermik nipigeqatigiissumik pinnatik nikingasumik nipiliortutut illutik.
10. Pilluarnartumik aappariinnerup suna tunngavigaa, uppeqammillu aappaqarneq qanoq iluaqutaava?
10 Inuk anersaap piinut atasoq inummut tarnimut atasumut qanoq ililluni naleqqulluarsinnaassagami? (1 Korintumiut 2:14) Uppeqatigiinneq, assigiinnik najoqqutassaqarneq assigiimmillu anguniagaqarneq aappariinnermut pilluarnartumut tunngaviupput. Pinngortitsisumut tunniusimaqatigiinnerup allanit tamanit annermik aappariinneq nakussatsissinnavaa. Angut arnarlu uppeqatigiikkunik pallorfiginninnerminni kaammattoqatigiissinnaassapput. Isumaqatigiinngissutitik aaqqinniarlugit Bibeli ikiortigisinnaavaat. Jehova oqarami uppinngitsumik uniaqateqassanngitsugut ersarinnginnerpa kissaatigigaa sapinngisamik qaninnerpaamik aapparmut attaveqarneq nuannaarutigissagipput?
11. Sooq israelikkut Jehovamik pallorfiginninngitsunik aappaneqqusaasimanngillat, apeqqullu eqqarsarnartoq suna tamatumuuna pinngorpa?
11 Bibelimi mianersoqqussutaasut maleruarutsigik aammattaaq kristumiup uppeqatiginngisaminik katinnerata kingunerisartagaanut alianartunut illersuutigissavarput. Assersuutigalugu, kristumiu Jehovamik pallorfiginninneranit uppinngitsup tunussiteratarsinnaavaa. Itsaq israelikkunnut Jehovap mianersoqqussutaa eqqarsaatigeriaruk. Imminik pallorfiginninngitsumut katinnissaat inerteqqutigaa. Sooq? ’Ernerit uannit nigortikkumaarmagu,’ Jehovap mianersoqquai, ’guutit allat kiffartorfigeqqullugit.’ (5 Môrsase 7:3, 4) Kristumiu apparminit uppinngitsuusumit arlaatigut akerlilersorneqaruni maannakkorpiaq ajornannginnerusorisaminik iliornissaminut ussernartorsiorsinnaavoq. Immaqa ima eqqarsarputit: ’Tamanna uannut pinavianngilaq!’ Salomonimulli, ilisimassuteqarluaraluaqisumut, tamanna pisimavoq. Taava aamma ilinnut pisinnaassannginnerpa? — 1 kúngit 11:1-6; naleqqiuguk kúnginik agdlagkat sujugdlît 4:29, 30.
12. Israelikkut israelikkuunngitsunik katinnginnissaannik Guutip peqqussutaa qanoq israelikkunnut sernissuutaava? Assersuutinik taasaqarit.
12 Aammattaarli kristumiu uppinngitsumut katittoq pallorfiginninnermut ilumoortumut tunussinngikkaluarluni ajornartorsiutit ilungersornartullu angerlarsimaffinni upperisarsiornikkut avissaartuuffiusuni atugaasut akiorniagassarissavai. Guutip Israelimut inatsisai eqqaaqqeriakkit. Oqarta niviarsiaq israelikkuusoq angummut Kana’animiumut katinnissaminut akuersisoq. Taamanikkut Kana’animi kinguaassiuutitigut atoqatigiinnikkut ileqquusut eqqarsaatigigaanni ilimanarsinnaassanerpa nuliami Guutiata inatsisai ataqqiumassagai? Assersuutigalugu, Mosesip inatsisaani piumasarineqartutut nuliami aaqarnerata nalaani kinguaassiuutitigut atoqatiginnginnissaa akueriumassanerpaa?c (3 Môrsase 18:19; 20:18; naleqqiuguk Môrsasip agdlagaisa pingajue 18:27.) Angullu israelikkuusoq niviarsissamut Kana’animiumut katikkuni, taava nalliuttorsuarsioriartorluni ukiumut pingasoriarluni Jerusalemimukaraangat nuliata nuannarisassanerpaa? (5 Môrsase 16:16) Tamanit takulluarneqarsinnaavoq aappariinnernik taama ittunik Guutip inerteqqutaa israelikkunnut sernissuutaasoq.
13. (a) Sooq inuk silamiuusoq Bibelimik ajoqersorneqarsimasumik kristumiuusumillu nalunngeqatiginnissuseqanngila? (b) Ajornartorsiutit tatineqarnerillu suut inoqutigiinni upperisaqatigiinngitsuni atorneqartarpat?
13 Ullumikkummi qanoq ippa? Inuit silamiuusut ileqqorisaat Bibelimi najoqqutassanit allaanerulluinnarput. Inuit silamiuusut qanorluunniit pinnerlutillu pitsaarpasitsigigaluarlutik taamaattoq Bibelimik ajoqersorneqarsimasumik kristumiuusumillu nalunngeqatiginnissuseqanngillat. Ukiorpassuit atorsimanngilaat Guutip oqaasianik atuaqqissaarlutik, ’isumamikkut nutaanngorlutik’ aammalu ’inutoqaq iperarlugu’. (Rûmamiut 12:2; Kulorsamiut 3:9) Taamaattumik kristumiu uppinngitsumik uniaqatissarsisoq aliasuutissarpassuarnik imminut atugassittarpoq. Ilaat kinguaassiuutitigut atoqatigiinnikkut maajunnartuliortunut imaluunniit silamiut nalliuttorsuinut peqataanissaminnut kajumissaarneqarsimapput. Ilaasalu allaat kiserliornertik nimaarutigaat. Soorlu qatanngut arnaq allattoq: „Kiserliorneq Jehovamut asanninngitsumik aappaqarnermi misigisimasaq kiserliornernit tamanit ajornerpaavoq. Tassami inuunermi pingaarnerpaamik, sallusuissummik, aappamik avitseqatissaqanngilanga.“
14. (a) Sooq meeqqat inoqutigiinni upperisaqatigiinngitsuniittut ’Jehovami perorsarnissaat inerternissaallu’ ajornakusoorpa? (b) Inoqutigiit upperisaqatigiinnginnerat meeqqat ineriartornerannut qanoq sunniuteqartarpa?
14 Inoqutigiinni uppeqatigiinngitsuni meeqqanik ’Jehovami perorsaallunilu inerteriniarneq’ ajornakusoorsinnaasorujussuuvoq. (Evfisumiut 6:4) Assersuutigalugu, uppinngitsup meeqqani ataatsimiinnernut oqaluussinermullu ilaaqqusassanerpai? Ilaqutariit taama ittut meeraat naggataatigut paatsiveerukkajuttarput — angajoqqaatik tamaasa asavaat, angajoqqaavisali aappaannaata Jehova asavaa. Qatanngut uppinngitsumik ueqarsimasoq ima oqaluttuarpoq: „Ukiuni 20-ni aappariinnitsinni aliasuutissarpassuaqarsimavunga. Ernikka eqqissiveqanngeqalutik misigissutsikkullu ajornartorsioqalutik alliartorput, maannalu sallusuissummiikkunnaarsimapput. Panimma ataataminut pulaartartussaanini pissutigalugu qimakulasariaqaraminga isumatsakulaqaaq. Ajornartorsiuterpassuit tamakku atuupput 18-inik ukioqarlunga Jehovap najoqqutassiaasa ilaannik ataatsimik sumiginnaasimanera pissutigalugu.“ Najoqqutassiaq suna? ’Uppinngitsoq uniaammik allanertamik uniaqatigeqinagu.’
15. Uppeqatiginngisatsinnik uniaqateqannginnissamik sooq Jehovap siunnersorpaatigut?
15 Qularutissaanngilluinnarpoq Jehovap kissaatigigaa inuunerput sapinngisamik nuannaarutigissagipput. Uagutsinnut piumasai, ilaatigut uppinngitsut uniaammik allanertamik uniaqatigissanngikkivut, uagutsinnut ajunnginnerpaamik iluaqutissaapput. (5 Môrsase 10:12, 13) Uppinngitsumut katinneq Bibelimi unnersuussutigineqartunut, ilisimassutinut atoriaannaasunut tamanut allallu misilittagaannut annernartunut asissuineruvoq.
Apeqqutigineqarajuttut
16, 17. (a) Mianersunngikkaanni qanoq ilillutik misigissutsit aqunneqarsinnaajunnaarsinnaappat? (b) Kristumiunik uppinngitsumut, kingornalu uppertunngortumut, katissimasunik nalunngisaqarneq pissutigiinnarlugu Guutip inatsisai asissorneqassappat? Nassuiaruk.
16 Mianersunngikkutta misigissutsitta aqulersinnaavaatigut. Immaqa isumaqalersinnaavugut pissutsit atukkavut asseqanngilluinnartuusut. Apeqqutit apeqqutigineqarajuttut eqqarsaatigeriakkit.
17 Qatannguteqarpugut uppinngitsumut katissimasunik, uppinngitsorlu taanna kingorna Jehovamik kiffartuussisunngunnginnerpa? Aap, taamaakkaluartorli uppingitsumut katinneq Jehovap najoqqutassiaanik unioqqutitsineruvoq. Ilumoorpa ’ajunngitsoq siunertaralugu sunaluunniit sakkugineqarsinnaasoq’? Juutit Babylonimi inussiaasimanerminnit utermata pissutsit atuutilersut ersersippaat Guutip inatsisiminik asissuisut qanoq isigigai. Angutit ilaat Guutimik nalusunik nuliarmata iliuusaat Bibelip ilaanit allattunit, Ezramit Nehemiasimillu, sukannersumik avoqqaarineqarput. Angutit pineqartut taakku ’peqquserluttulisimapput’, „annertuumik unioqqutitsisimapput“ (NV) aammalu ’pillagassanngortissimapput’. (Esra 10:10-14; Nĩmia 13:27) Allattaaq eqqarsaatigisariaqarpoq: Guutip unnersuussutaanik asissuigutta nalunngeqatiginnissutsitsinnik qileruliisunik anersaakkut ikilertitersinnaavugut. Qatanngut arnaq katinnermik kingornagut aatsaat uppertunngortumik uinissimasoq oqarpoq: ’Misigissutsikkut qileroqarlunga suli akiuuttuartariaqarpunga. Allat ima oqaraangata qanoq isumatsatsigisarnera nassuiarsinnaanngilara: „Ilissinnummi ajunngitsumik kinguneqarpoq.“’
18. Suli kuisimanngitsumut asannilersooraanni qanoq iliornissaq silatunerpaava, taamaaliornikkullu suna ersersinneqassava?
18 Bibelimik atuaqqissaartarlunilu ataatsimiigiartartumut sulili kuisissimanngitsumut asannilersoorpunga. Qanoq iliussaanga? Sallusuissummik soqutiginnittoqaraangat tamatigut nuannertarpoq. Unali apeqqutaavoq: Peerariilissavisi? Silatusaarnerunerpaavoq kuisereersimalernerata Guutillu inerititaanik inerititaqalereernerata kingorna utaqqissalluni. (Galâsiamiut 5:22, 23) Siunnersuutip tamatuma maleruarnissaa immaqa oqitsuunngilaq, maleruarukkuli ersersissavat Bibelimi najoqqutassianik ataqqinnittuullutit, taamaaliornerillu aamma aappariinnermi pilluarnermut piviusumut tunngaviulluassaaq. Ikinngutivit taassuma ilumut nuannarigunitit Jehovamillu asannissuseqaleriartorluni qularnanngitsumik kissaatigissavaa marluullusi tamassi — tunniulluinnaqqallusi kuisimallusilu — ’Naalakkamiilernissassinnut’ peerariilernissarsi utaqqisissagissi. Eqqaamajuttaaq asanninnerup ilumoortup utaqqisinneqarnini ajoqutiginavianngimmagu. — 1 Korintumiut 7:39; 1 Môrsase 29:20.
19. Uppeqatit akornanni aappassarsinissaq ajornakusoorpat suna eqqaamasariaqarpa?
19 Sallusuissutip iluani naleqquttumik aappassarsinnissaq ajornakusoorpat qanoq iliortariaqarpa? „26-nik ukioqarpunga, aappaqarnanga kiserlioqalungalu,“ qatanngut arnaq taama oqarpoq. Kisimiittuulluni ajornakusoorsinnaavoq, uppinngitsumilli aappaqarneq suli annertunerusunik ajornartorsiuteqarfiusinnaavoq! Guutip inassutai naalanniaraanni upperneq, imminut naalakkersinnaaneq naammagittarnerlu pisariaqarsinnaapput, qularutigissanngilalli pissutsit atukkatit Jehovap arajutsisimanngimmagit ajunnginnerpaamillu kissaammatit. (1 Pîtruse 5:6, 7) Pissutsit atukkatit Jehovamut qinuninni taakkit, utaqqiullu. (Tussiaat 55:23) Aaqqissuussaanermi matumani kinaluunniit nalerisimaarnarluinnartumik inuunngilaq. Immaqa aappaninnissat erinigisorujussuuat. Inuilli allattaaq ajornartorsiuteqarput, ajornartorsiutaasalu ilaat aaqqissuussaanermi matumani aaqqinneqarsinnaanngillat. Aatsaat silarsuassami nutaami Jehovap ’pinngortitat tamaasa piumasaannik qaarsillartissavai’. — Tussiaat 145:16.
20. Qatanngutip arnap katissimanngitsup suna aalajangiusimavaa, aalajangersinnaassutsimillu taama ittumik ersersitsinikkut nalerisimaarneq suna angusinnaaviuk?
20 Uppinngitsumik uniaammik allanertamik uniaqateqalinnginnissat aalajangiusimajuk. Qatanngutip arnap aappaqanngitsup 36-nik ukiullip aalajangiusimannilluinnarnini ima oqaatigaa: „Aappassannik ullut tamaasa Jehova qinnuigisarpara. Jehovap peqatigiissortaasa avataanni ujarlernissara kissaatiginngikkaluarlugu taamaattoq ussernartorsiornartarpoq. Naleqquttumilli nassaarnissama tungaanut pissutsit uannik pissuserinnerulersitsisinnaasut pissuserilerniarsarissavakka, taamaalillunga tassaalerniassagama arnaq anersaap piisigut pingaartitsisoq angutip anersaap piisigut pingaartitsisup ujartugassaa.“ Aamma illit taamatut aalajangersimavit? Taamaappat taava Guutimut naapertuilluartumut ilumoortuunivit uppernarsarneratigut nalerisimaarneq angusinnaassavat. — Tussiaat 37:27, 28. (wD 1/11 89)
[Quppernerup ataani ilanngussat]
a Oqaaseq ’uppinngitsoq’ oqaatsip ’uppertoq’-p, tassa kuisimasup, akerlerisaatut Korintumiunut agdlagkat sujugdlît 14:22-mi Paulusip atorpaa. Taamaattumik oqaaseq ’uppinngitsoq’ kuisimanngitsutut Korintumiut paasisimassavaat. — Takuuk apustilit suliáinik agdlagkat 8:13; 16:31-34; 18:8.
b „Najoqqutassiaq tamanna erseqqinnerusumik ima oqaatigineqarsinnaavoq: ’Atuukkallartussamik imaluunniit ataavartussamik uppinngitsumik aappanissanngilatit, kristumiut najoqqutassaannut akerliusumik iliornermik kinguneqassammat imaluunniit kristumiut tusaamaneqarnerata aalajaassusianik ajoqusiissammat. Sooq taamatut immikkoortitsineqassava? Uppinngitsoq kristumiut najoqqutassaannit, tapersersugaannit siunertaannillu allaanerusumik soqutigisaqarmat.’“ — The Expositor’s Bible Commentary, atuagaq 10, qupperneq 359.
c Takuuk Vagttårnet 15. november 1972-imeersoq, qupperneq 527-8.
Nassuiarsinnaavigit?
□ Uppinngitsumut qanimut attaveqarneq pillugu qanoq Bibelimi mianersoqquneqarpugut?
□ Sooq kristumiut tunniulluinnarsimasut ilaat ilagiit avataanniittumik aappassarsiortarpat?
□ Jehovap ’uniaammik allanertamik’ uniaqateqarneq pillugu mianersoqqussutaa qanoq ililluni isumassuineranut asannittumut ersiutaava?
□ Apeqqutit aappariinnermut tunngasut suut apeqqutigineqarajuppat, qanorlu akissavigit?