Nutsikkami matumani aalajangersakkat iluaqutissallu

New World Translation of the Christian Greek Scriptures tuluttut 1950-imi saqqummersin­neqaqqaarpoq. Biibili tamarmi New World Translation of the Holy Scriptures atuakkatut ataatsitut 1961-imi saqqummersin­neqarpoq. Taamanili atuartartut millionilik­kuutaat Biibilimik nutsigaq paasiuminartoq taanna oqaatsinut 250-init amerlanerusunut nutserneqarsimasoq iluaqutigisimavaat.

Ataatsimiititaliap New World Translation of the Holy Scriptures-imik nutserisup paasivaa ullumikkut atuartartut uummataannik killiisin­naasumik nutsigaqar­tariaqartoq. Tamannalu anguniarlugu uku eqqumaf­figineqarsimapput:

• Oqaatsit ulluinnarsiutaal­lutillu paasiuminartut. Soorlu Grækerisut Allakkat Illernartut allanneqarmata oqaatsit atuartartunut paasiuminartut atorneqarsimasut, nutsikkami matumani aamma oqaatsit ullumikkut atuartartunut paasiuminarlutillu ulluinnarpalaartut atorneqarput. Assersuutigalugu Jiisusip malinnittai ‘ajoqersukkanik’ taaneqarnatik ‘ilinniar­titanik’ taaneqarput. (Matiusi 18:1) Kristumiut upperisaat ilumoortoq ‘sallusuissummik’ taaneqarnani ‘ilumoortumik’ taaneqarpoq. (Johannesi 18:37) Oqaaseq ‘angeruseq’ atornagu ‘isumaqatigiissut’ atorneqarpoq, aamma ‘naalaffik’ atornagu ‘guutisiorfik’ atorneqarpoq. – Lukkarsi 1:72, 73; Apustilit Suliaat 6:13.

  Kiisalu oqaatsit naanerat (qasseersiutaasut kinaassusersiutillu pingajuannik piginnit­torsiutillit) -vut atornagu -gut ullumikkut amerlasuunit atorneqar­tarneratut atorneqarpoq.

• Biibilimi allassimasut isumaasa eqqornerusumik nutserneqarnerat. Biibilimik nutsikkat ilaanni oqaatsit ilarpassui paasilluar­neqarnias­sammata nassuiar­neqartariaqarput. Assersuutigalugu Biibilini kalaallisuun­ngortitani amerlasuuni allassimavoq Jiisusi sanningasulimmi toqusoq. Grækerisulli oqaatsip allassimaq­qaarfinni allassimasup isumavia tassaavoq “qisuk imaluunniit quassuttooq nappagaq”. (Geoffrey Cumberlege: The Companion Bible) Taamaattumik nutsikkami matumani oqaaseq tamanna ‘qisummik naalliutsitsiviliamik’ nutserneqarpoq. (Matiusi 27:42; Johannesi 19:19; aamma nassuiaatini “Qisummik naalliutsitsiviliaq” takuuk). Aamma oqaaseq ‘Anniarfik’ Biibilini allani atorneqartartoq nutsikkami matumani atorneqarnani grækerit oqaasiat Gehenna atorneqartarpoq, tassaaginnarmat Jerusalemmip avataani eqqakkanik ikuallaaviup taaguutaa. (Matiusi 5:22, 29, 30; Lukkarsi 12:5; aamma nassuiaatini “Gehenna” takuuk). Biibilimik nutsigarpassuarni aamma allassimavoq Jiisusi kristumiullu ‘kuisittut’. Grækerilli oqaasiat tamanna isumaqarpoq ‘morsutsitaaneq’, taamaattumik nutsikkami matumani oqaaseq tamanna ‘imermut morsutsitaanermik’ nutserneqartarpoq. – Lukkarsi 3:21; Apustilit Suliaat 8:38.

  Grækerit oqaasiisa isumaviat eqqoqqis­saartumik nutserumallugit aamma oqaatsit allat taarser­neqarsimapput. Assersuutitut eqqaaneqarsin­naapput ‘naalagaaffimmik’ nutsikkani allani allanneqar­tarsimasoq ‘kunngeqarfimmik’ allanneqar­talermat, ‘poorski’ ‘qaangiiffimmik’ aamma ‘sabbati’ ‘ulloq qasuersaarfimmik’. Taaguutilli taakku Biibilimik atuartartunit ilisimaneqarluarmata quppernerup ataani ilanngussani ilaannikkut allanneqartarput. – Matiusi 6:10; 26:2; Lukkarsi 4:16.

  Grækerisut oqaaseq kosmos Biibilimik nutsikkani amerlanerni ‘silarsuarmik’ nutserneqar­tarsimavoq. Oqaaserli ‘silarsuaq’ assigiin­ngitsunik paasineqarsinnaavoq, assersuutigalugu ilaasa ‘avataarsuanik’ isumaqar­tippaat. Taamaattumik oqaaseq taanna allassimaffiit ataqatigiinnerisa isumaat apeqqutaatillugit ‘inunnik’, ‘inunnik ajortunik’, ‘nunarsuarmik’ allanil­luunniit nutserneqartarpoq. (Johannesi 3:16; 16:28; Jaaku 4:4) Aamma oqaaseq ‘iluarneq’ kalaallisut Biibilini pisoqaanerusuni atorneqartartoq nalitsinni allatut paasineqartarmat nutsikkami matumani oqaatsit ‘eqqortuliorneq’ imaluunniit ‘naapertuil­luarneq’ atorneqartarput. – Matiusi 5:6; Romamiut 9:30.

  Grækerisut oqaaseq ‘uummat’ atorneqaraangat inuup uummataa timaaniittoq pineqartarpoq imaluunniit assersuutitut atorneqar­tarluni. Assersuutitut atorneqarnera paasiuminaak­kaangat isumaa naapertorlugu nutserneqartarpoq, soorlu inuup isumaa eqqarsaataaluunniit erseqqis­sarniarlugit. (Matiusi 5:28; Lukkarsi 6:45) Oqaatsit eqqaaneqareersut ilaat aamma nassuiaatini takuneqarsin­naapput.

• Atit taaguutillu allanneqarneri. Biibilini kalaallisuun­ngortitani atit taaguutillu assigiin­ngitsumik allanneqartarput. Nutsikkami matumani atuaruminar­nissaat Biibilinin­ngaanniillu allanit allaanerual­laanngin­nissaat anguniagaavoq. Nutsikkani allani kalaallisut allanneqarneri atuaruminaraangata allanngor­tinneqarneq ajorput, soorlu Jiisusi, Daavi Aaperaallu. Aterli kalaallisut allanneqarsinnaasoq Biibilini kalaallisut allanneqarsiman­ngikkaangat atuaruminar­nerusumik allanngor­tinneqartarpoq, soorlu Matiusi, Makkorsi Juuserfilu. Atit allat nutsikkanit allanit allaanerual­laanngin­niassamata annikitsuinnarmik allanngor­tinneqartarput, soorlu Zakkaria, Jerusalemmi Cesariialu. Atit ilaat ilisimaneqarluarmata allanngor­tinneqar­tariaqan­ngillat, soorlu Jehova, Johannesi, Paulusilu.

  Biibilimi matumani allassimaffiit tamarmik Ataatsimiititaliap New World Translation of the Holy Scriptures-imik nutserisup suliaanik ataqqin­nilluni, qinoreerluni peqqissaartumik nutserneqartarput.

Nutsikkami matumani iluaqutissat allat:

Nutsikkami matumani quppernerup ataani ilanngus­saqarpoq. Ilanngussat ukuusin­naapput:

• “Imalt.” Grækerisut oqaaseq assingusumik isumalimmik qanoq allatut aamma nutserneqarsinnaasoq. – Matiusi 5:3, “anersaakkut pisariaqar­titaqar­nerminnik”.

• “Imalt. immaqa” Grækerisut oqaaseq allatut isumalimmik qanoq aamma nutserneqarsinnaasoq. – Lukkarsi 12:11, “Katersorsimasunut tamanit najuuffigineqartunut”.

• “Nutsiinn.” Grækerisut oqaaseq nutsiin­navillugu nutsigaq. – Matiusi 13:38, “Diaavulup”.

• Paasissutissat amerlanerusut Atit taaguutillu isumaat (Saqqummersitat 12:7, “Mikaalip”); uuttuutit pillugit paasissutissat (Matiusi 25:15, “talentinik”); kikkut pineqar­nerannik erseqqissaaneq (Johannesi 5:39, “taakkorpiaallu”); tapiliussani nassuiaatinilu paasissutissanut innersuussutit. – Matiusi 5:22, “Gehennap.”

Aallaqqaataani qulequtarineqartoq “Guutip oqaasia qanoq iluaqutigisinnaagit” Biibilimi ilinniar­titsissutigineqartunik pingaarutilinnik imaqarpoq. Naggataatungaani “Biibilimi atuakkat pillugit nalunaarsukkat” aamma “Nassuiaatit” nassaarineqarsin­naapput. Nassuiaatini oqaatsit ilaat Biibilimut naapertuuttumik qanoq paasisariaqarnerat nassuiar­neqarput. Tapiliussami uku nassaarineqarsin­naapput: “Biibilimik nutserinermut najoqqutassat”, “Nutsikkami matumani aalajangersakkat iluaqutissallu”, “Biibili nalerput tikillugu qanoq piujuartoq”, “Guutip aqqa Grækerisut Allakkani Illernartuni”, “Jiisusip nunarsuarmiinnerani pisimasut pingaarnerit”, nunap assingi, nalunaarsukkat paasissutissallu allat Biibilimik misissuisunut iluaqutaasinnaasut.

Biibilimi atuakkat aallaqqaataanni tamani imarisai eqikkar­neqarnikuummata allassimaffiit nassaaripal­lanneqarsin­naapput.