Biibilimik nutserinermut najoqqutassat

Immaqa ilaat isumaqarput Biibilip allanneqaq­qaarfiani oqaatsit oqaasik­kuutaarlugit nutserneqarpata isumaannut naapertuun­nerussasoq. Taamaat­toqartuaan­nanngilarli. Pissutaasut uku eqqarsaatigeriakkit:

• Inuit oqaasii assigiinneq ajorput. Hebræerit oqaasiinik ilisimatooq, S. R. Driver, oqarpoq inuit oqaasii oqaasilerinikkut, oqaatsip nagguiatigut oqaaseqatigiilior­nikkullu assigiin­ngitsuusut. Oqaatsit assigiin­ngitsut eqqarsar­tariaatsinik assigiin­ngitsunik ersersitsisarput. Taamaattumik ilisimatooq Driver oqarpoq oqaatsini assigiin­ngitsuni oqaaseqatigiit assigiin­ngitsuusartut. – A Dictionary of the Bible Dealing with Its Language, Literature, and Contents Including the Biblical Theology.

• Biibilip nalaani hebræerit, aramæerit grækerillu oqaasii nalitsinnilu oqaatsit assigiin­ngilluinnarput. Taamaattumik oqaasik­kuutaarlugit nutserneqaraluarunik paasiuminaal­lutillu isumaviannut naapertuun­navianngillat.

• Oqaatsit ataqatigiinnerat apeqqutaatillugu oqaatsip qanoq isumaqarnera assigiin­ngitsuusinnaavoq.

Imaassinnaavoq nutserisoq oqaaseq ilaannikkut nutsiin­navillugu nutserisin­naasartoq, taamaalioraangamili peqqissaarlunilu mianersor­tariaqarpoq.

Oqaatsit nutsiin­navillugit nutserinermik assersuuteqariarta:

• Biibilimi oqaaseq ‘sininneq’ sininnermut toqumullu atorneqartarpoq. (Matiusi 28:13; Johannesi 11:11) Biibilimik atuartartut paatsuun­nginnias­sammata toqu pineqaraangat Biibilimik nutserisut oqaaseq ‘toqu’ imaluunniit ‘sinippaarneq’ atorsin­naavaat. – Korintimiunut 1. 7:39; Tessaluunikamiunut 1. 4:13; Petrusimit 2. 3:4.

• Efesossimiut 4:14-imi apustilip Paulusip grækerisut oqariartaaseq ima isumaqarsinnaasoq atorpaa: “inuit immeraammik nalussinerat”. Itsaq oqariar­taatsimi tamatumani immeraatit atorlugit inuit salloqqit­taaniar­tarnerat pineqarpoq. Nalitsinnili isumaa tamanna ilisimaneqarpal­laanngilaq. Taamaattumik paasiuminar­neruniassammat Nunarsuup nutaanngor­nissamik nutsikkami ‘inuit salloqqit­taanerannik’ nutserneqarpoq.

• Romamiut 12:11-mi grækerisut oqariartaaseq atorneqartoq nutsiin­navillugu ima isumaqarpoq: “Anersaamit qalaartin­neqaritsi.” Tamannali qanorpiaq isumaqarnersoq kalaallisut paasiuminaas­sinnaammat nutsikkami matumani ima nutserneqarpoq: “Anersaamit illernartumit sunnerneqangaaritsi.”

• 

  Jiisusip qaqqami oqalugiaatimini tusaamasaasumi oqaasii siulliit amerlanertigut ima nutserneqartarput: “Pilluarput anersaakkut piitsut.” (Matiusi 5:3, Biibili 2000-mi naqitigaq) Kisianni nutsiin­navillugu nutserneqarnera tamanna oqaatsini amerlasuuni paasiuminaappoq. Inuit ilaasa immaqa ima paasissavaat anersaakkut sanngiitsut pineqartut. Jiisusilli tusarnaartini paasitin­niarpai timikkut pisariaqar­titaminnik matussusiinertik pinnagu Guutimit siulersor­neqarnertik pillualis­sutigissagaat. (Lukkarsi 6:20) Taamaattumik isumaanut tulluar­nerussaaq ima nutserneqarpat: “Pilluarput anersaakkut pisariaqar­titaqar­nerminnik eqqumaf­figinnittut”, imaluunniit: “Pilluarput Guutimit siulersor­neqartariaqar­nerminnik eqqumaf­figinnittut.” – Matiusi 5:3, q.a.i.

• Oqaaseq grækerisooq ‘sinnganermik’ nutserneqartartoq allassimaffinni amerlanerni inuup allat pigisaannik pilerin­ninnera kamanneraluunniit pineqartarpoq. (Apustilit Suliaat 5:17; Romamiut 13:13) Kisianni aamma misigissuseq ajunngitsoq pineqarsinnaavoq. Assersuutigalugu Jiisusip Guutimut ‘tunniusimanera’ pineqarmat oqaaseq grækerisooq taanna atorneqarpoq. – Johannesi 2:17.

  Oqaaseq grækerisooq prosopon ‘kiinnamik’ nutserneqartartoq oqaatsit ataqatigiinnerat apeqqutaatillugu assigiin­ngitsorpas­suarnik isumaqarsinnaavoq

• Oqaaseq grækerisooq ‘kiinnamik’ nutserneqartartoq oqaatsit ataqatigiinnerat apeqqutaatillugu assigiin­ngitsorpas­suarnik isumaqarsinnaavoq, soorlu qilaap isikkuanik, nunarsuup qaavanik inuillu pissusiinik. – Matiusi 17:2; 16:3; Apustilit Suliaat 17:26; Juudarsi 16.

Tamatumani ersersin­neqarpoq Biibilip allassimaq­qaarfiini oqaatigineqartut tamaviisa oqaasik­kuutaarlugit nalitsinni oqaaserineqartunut nutserneqarsin­naanngitsut. Allassimaq­qaarfinni qanorpiaq oqaatigineqartut pitsaanerpaamik nutserumallugit nutserisut naliliisin­naassuseqar­tariaqarput. Aammattaaq nutserisup grammatikki oqaatsiminut naapertuuttoq malillugu oqaaseqatigiilior­nermini oqaatsit paasiuminartut atussavai.

Nutserisulli nutsigassap isumaanik allanngor­titsinngil­luinnar­nissani eqqumaf­figissavaa. Taamaalior­toorsinnaavoq nammineq isummani maliinnarlugu nutseriguni. Qanoq ililluni? Nutsigassap isumaa pillugu nammineq isummani naapertorlugu kukkusumik nutserisoorsinnaavoq, imaluunniit nutsigassami annikitsualuit pingaarutillit ilanngutin­ngitsoorsinnaavai. Nutsigaa paasiler­tupallan­naraluartoq tamatuminnga atuartartut Biibilimi allassimasut isumaviat paasinngitsoorsin­naavaat.

Nutserisoq upperisarsiornikkut ajoqersuutinit sunnertis­simaguni nutsigaani tamanna ersersinnaavoq. Assersuutigalugu Matiusi 7:13-imi ima allassimavoq: ‘Toqumut isaaffik nerutuvoq.’ Nutserisulli ilaat, immaqa ajoqersuut Biibilimut naapertuutin­ngitsoq sunnerneqaatigalugu, ima allannikuupput: ‘Anniarfimmut isaaffik.’ Kisianni grækerit oqaasiat uani atorneqartoq isumaqaraluarpoq ‘toqu’ imaluunniit ‘piuneerunneq’.

Nutserisup aamma eqqaamasariaqarpaa oqaatsit Biibilimi atorneqartut tassaasut inuit ilinniar­nertuujun­ngitsut atortagarigaat, soorlu naasorissaasut, savanik paarsisut aalisartullu. (Apustilit Suliaat 4:13; Korintimiunut 1. 14:9) Taamaattumik Biibilip oqariartuutaa inunnut qanorluunniit tunuliaqutaqaraluartunut paasiuminar­niassammat Biibilimi nutserluakkami oqaatsit oqariar­taatsillu paasiuminartut atuaruminartullu atorneqassapput.

Biibilimik nutserisut amerlasuut tunngavis­saqaratik Guutip aqqa, Jehova, minissimavaat, naak Biibilimik allagatoqqani allassimagaluartoq. Nutsigarpassuarni aqqa atornagu taaguut, soorlu “Naalagaq”, atorneqartarpoq. Allaallumi ilaasa Guutip ateqarnera isertuun­niartarpaat. Assersuutigalugu nutsikkat ilaanni Jiisusip qinnutaa Johannesi 17:26-mi imaappoq: “Illit pillutit oqaluttuuppakka.” Aamma Johannesi 17:6-imi ima allassimavoq: “Kinaassutsit inunnut uannut tunniussannut ilisimatippara.” Kisianni Jiisusip qinunermini oqaasii taakku ima nutsigas­saagaluarput: “Atit taakkununnga ilisimaneqalersippara”, aamma: “Inunnut uannut tunniussannut atit ilisimaneqalersippara.”

Tuluttut Nunarsuup nutaanngor­nissaanik nutsikkap siulliup siulequtaani ima allassimavoq: “Tuluit oqaasii nalitsinni atorneqartartut atorlugit sapinngisatsinnik oqaasik­kuutaarlugit nutseriniar­tarpugut oqariartuutaa paasiuminaatsin­naveersaarlugu.” Ataatsimiititaliap Nunarsuup nutaanngor­nissaanik nutsikkamik nutserisup anguniagaraa oqaatsinik oqimaaqatigiissumik atuinissaq. Oqaatsit oqariar­taatsillu allagatoqqani oqaatigineqartunik ersersitsil­luartut atorneqartarput, oqaaseqatigiilli paasiuminaatsut isumavianillu ersersitsin­ngitsut atornaveersaar­neqartarlutik. Tamatuma kinguneraa nutsigaq atuartartunut atuaruminarlunilu Guutip oqaasiata oqariar­tuutaanut naapertuul­luinnartoq. – Tessaluunikamiunut 1. 2:13.