1. Шама-шарқыңызды біліңіз

Бәлкім, сіз өзгерістердің бәрін бір пәсте жасап тастағыңыз келетін шығар. Мысалы, “осы аптадан бастап темекі шегуді, балағаттап сөйлеуді, кеш жатуды қоямын және жаттығу жасап, дұрыс тамақтануды бастаймын әрі ата-әжеме қоңырау шалатын боламын” деп ойлайсыз. Бірақ “әлін білмеген әлек” демекші, барлық мақсаттарыңызға бір уақытта талпынсаңыз, ешқайсысына да қол жеткізе алмай қалуыңыз мүмкін.

Қарапайым адам өз шамасын біледі. Ол уақыты, күші мен қаражаты шектеулі екенін мойындайды. Сондықтан ол өзгерістердің бәрін бірден емес, шетінен жасайды.

НЕ ІСТЕУІҢІЗГЕ БОЛАДЫ?

Өзгерістерді шамаңызға қарай жасағаныңыз абзал. Бұл ретте сізге келесі қадамдар көмектеседі:

1. Екі тізім жасап алыңыз. Біреуіне қалыптастырғыңыз келетін жақсы әдеттерді, ал екіншісіне тастағыңыз келетін жаман әдеттерді жазып қойыңыз. Бірер әдетпен ғана шектелмей, мүмкіндігінше көп жазғаныңыз жақсы.

2. Әдеттерді маңыздылығына қарай нөмірлеп шығыңыз.

3. Әр тізімнен бір-екі әдетті таңдап, соларға ерекше көңіл бөліңіз. Сосын, келесі бірер әдетке көшіңіз.

Мұны тездету үшін жаман әдетті жақсысымен алмастырсаңыз болады. Айталық, жаман әдеттер тізімінде теледидарды көп көру тұр делік. Ал жақсы әдеттер тізімінде жақын адамдарыңызбен хабарласып тұру жазылған. Бәлкім, күнде жұмыстан келгенде, бірден теледидардың алдына жайғаса кетудің орнына досыңызбен не туысыңызбен хабарласып, жағдайын білуді мақсат еткіңіз келетін шығар.