Қайта қауышқан апалы-сіңлілі

Линда: 12 жасымда анамнан менің сіңлім бар екенін, бірақ оны басқа бір отбасы асырап алғанын білдім. Сонда сіңлім де мен сияқты саңырау ма екен деп ойладым. Бірақ сол күйі оның кім екенін білмей өстім.

Салли: Мен асыранды бала екенімді білген жоқпын. Өгей анам мені аяусыз ұрып-соғатын, малай сияқты жұмсайтын. Содан өзімді бақытсыз сезініп, жалғызсырап жүрдім. Бұл саңырау болып туылған мен үшін жығылған үстіне жұдырық болды. Бір күні мен Ехоба куәгерлерін кездестіріп, олармен Киелі кітапты зерттей бастадым. Мұны өгей анам білгенде, белдікпен әбден сабады да, есіктің құлпын ауыстырып, үйге қамап қойды. 20 жасқа толғанымда, мен үйден қашып кеттім. Куәгерлер мені үйлеріне кіргізіп, қамқорлығына алды. Ал 2012 жылдың басында шомылдыру рәсімінен өттім.

Линда: 20 жасқа келгенде, мен Куәгерлермен зерттей бастадым. Ал кейінірек ым тіліне аударылатын Джакартадағы аймақтық конгрестерге баратын болдым. Онда мен құлағы естімейтін көп адаммен таныстым. Солардың арасында Солтүстік Суматрада тұратын Салли есімді Куәгер қыз болды. Неге екенін білмеймін, оған бауыр етім бұрып тұратын.

Салли: Линда екеуміздің достығымыз жарасып кетті. Түріміз бір-бірімізге ұқсайтындай көрінді, бірақ мен бұған аса мән бермейтінмін.

Линда: 2012 жылдың тамыз айында, шомылдыру рәсімінен өтерден бір күн бұрын, жоғалтып алған сіңліммен көрісуді қатты аңсадым. Ехобаға жалбарынып, “Сіңлімді табуға көмектесе көрші, оған сен туралы айтқым келеді” дедім. Көп ұзамай анам күтпеген жерден сіңлім жайлы білетін бір кісіден хат алды. Содан бір-біріне ұласқан бірнеше жағдайдан кейін, ақыры мен Саллимен байланыса алдым.

Салли: Линда менің ұзақ уақыттан бері іздеп жүрген сіңлісі екенімді түсіндіргенде, мен бірден онымен кездесу үшін Джакартаға бет алдым. Әуежайда тексерістен өткен соң, мен Линданы, әкем мен анамды және тағы бір әпкемді көрдім. Жан дүнием алай-дүлей болды. Барлығымыз құшақтасып, сүйісіп көрістік. Анам мені құшағына қысып ұзақ тұрды. Көз жасымыз тыйылмады. Әкем мен анам біреуге асырауға бергені үшін кешірім сұрағанда, барлығымыз тағы да құшақтасып, жылап қоя бердік.

Линда: Тәрбиеміз екі түрлі болғандықтан, мінез-құлқымыз бен әдеттерімізге бейімделу керек болды. Бірақ біз бір-бірімізді өте қатты жақсы көреміз.

Салли: Қазір мен Линдамен бірге тұрамын. Біз Джакартада өтетін ым тіліндегі қауымға бірге барамыз.

Линда: Салли екеуміз ажырап қалып, 20-дан астам жыл бір-бірімізден жырақта өстік. Бірақ Ехобаның арқасында біз қайта қауыштық!