Уақыттың тығыз екенін ұмытпа!
1 Иса Әкесінің тапсырған ісін аяқтау үшін жердегі уақытының шектеулі екенін түсінген (Жох. 9:4). Сол себептен ол қызметін уақыттың тығыз екенін ескеріп орындаған, әрі шәкірттерін солай етуге талпындырған (Лұқ. 4:42—44; 8:1; 10:2—4). Дүние-мүліктің беретін игіліктері оның өмірінде бірінші орында тұрмаған (Мат. 8:20). Сондықтан ол Ехоба тапсырған істі толығымен аяқтады (Жох. 17:4).
2 Уақыт шектеулі. Ізгі хабарды “күллі әлемге” уағыздау ісіне берілген уақыт та шектеулі (Мат. 24:14). Киелі кітап пайғамбарлықтары бұл дүниенің ақыры таяп қалғандығын көрсетеді. Жақын арада ‘Ізгі хабарға құлақ аспай, Құдайды танымай жүргендер... шексіз қасірет шегетін болады [“мәңгі өлім жазасына кесіледі”, ЖД]” (2 Сал. 1:6—9). Бұл аяқ астынан басталады (Лұқ. 21:34, 35; 1 Сал. 5:2, 3). Адамдар қауіп төніп тұрғанын түсіну қажет. Әлі де уақыт барда оларға Ехобаның ықыласына ие болу үшін көмектесуге міндеттіміз (Соф. 2:2, 3).
3 Қолымыздан келгеннің бәрін істейміз. “Осы заманның ақыры таяп қалды”, сол себептен Құдай қызметшілері уақыттың аз екенін түсіне отырып уағыздау ісін өмірлерінде бірінші орынға қояды (1 Қор. 7:29—31; Мат. 6:33). Кейбіреулер қызметке көп уақыт бөлу үшін өз еркімен материалдық жағдайды жақсартатын мүмкіндіктерден немесе басқа да жеке мүдделерінен бас тартты (Мар. 10:29, 30). Басқалары ауыр сынақтарға қарамастан ‘Иеміздің ісін әрдайым молынан істеуде’ (1 Қор. 15:58). Көптеген бауырластар ондаған жылдар бойы ізгі хабарды ‘жұрт алдында айнымастан жариялауда’ (Ев. 10:23, ЖД). Патшалықтың мүддесі үшін жасалған мұндай құрбандықтар Ехоба үшін өте бағалы (Ев. 6:10).
4 Ехобаға ғибадат ету, оған уағыздау ісі де жатады, өмірімізде басты орында тұрса, бұл Ехобаның күнін есімізде берік ұстауға және Шайтанның дүниесіне алданбауға көмектеседі, жүріс-тұрысымызды қасиетті етіп сақтауға деген шешімімізді нығайта түседі (2 Пет. 3:11—14). Иә, қызметімізді уақыттың тығыз екенін ұмытпай орындағанымыз өзімізді де, тыңдаушыларды да аман сақтайды (1 Тім. 4:16).