КИЕЛІ КІТАП. СҰРАҚТАР МЕН ЖАУАПТАР

Періштелер бізге көмектесе ме?

Ехоба Құдай адам баласын жаратудан ұзақ уақыт бұрын миллиондаған періштені жаратқан (Әйүп 38:4, 7). Періштелер Құдайға қызмет ететін құдіретті рухани жаратылыстар. Құдай кейде оларды жердегі қызметшілеріне басшылық беру үшін және қорғау үшін жібереді (Забур 90:10, 11). Бүгінде періштелер ізгі хабарды уағыздап жүрген Исаның ізбасарларын ақжүрек адамдарға бағыттау арқылы көмектесуде (Аян 14:6, 7 оқыңыз).

Дұғаларды періштелерге бағыттауымызға бола ма? Жоқ. Дұға ету — ғибадаттың бір бөлігі, сол себепті ол тек Құдайға тиесілі (Аян 19:10). Періштелер Құдайдың қызметшілері болғандықтан, адамның емес, Құдайдың айтқанын орындайды. Сондықтан біз дұғаларымызды Иса арқылы тек Құдайдың өзіне бағыштауымыз керек (Забур 102:20, 21; Матай 26:53 оқыңыз).

Зұлым періштелер бар ма?

Адамдар сияқты, періштелер де ерік бостандығымен, дұрыс пен бұрысты таңдай алатындай етіп жаратылған. Кейбір періштелер сол еркіндіктерін дұрыс қолданбай, Құдайға қарсы шықты (Петірдің 2-хаты 2:4). Солардың алғашқысы Шайтан, ал оған ерген басқалары жын-перілер еді. Шайтан мен оның жын-перілері көктен қуылып, жерге лақтырылды (Аян 12:7—9 оқыңыз).

1914 жылдан бері жер бетінде зұлымдық пен қатыгездік күшейіп, кең етек алды. Бұл Құдайдың жуырда Шайтан мен жын-періштелерді әрекетсіз күйге түсіретінін білдіреді. Содан соң Құдай жер бетін о баста ниет еткендей жұмақ бағына айналдырады (Аян 12:12; 21:3, 4 оқыңыз).