Есте сақтауға тұрарлық күн

БҰЛ күн бүкіл адамзаттың болашағын өзгерткен күн болды. Адамзаттың болашағына бұлайша әсер еткен күн тарихта болмаған. Бұл күні Иса Мәсіх жерге келгендегі мақсатын толық жүзеге асырды. Азап бағанасында шегеленіп тұрған Иса ақырғы демі шығарда дауыстап: “Енді түгел орындалды!” — деді (Жохан 19:30). Иса Мәсіх жерге қандай мақсатпен келді?

Бұл туралы Исаның жауабы Киелі кітапта жазылған: “Өзіме қызмет еткізуге емес, Өзім қызмет етіп, көптеген адамдардың азаттық төлемін өтеу үшін жанымды қиюға осы дүниеге келдім” (Матай 20:28). Иса Мәсіх адамдарды мұра етіп алған күнәнің салдарынан, яғни өлімнің өзінен құтқару үшін жанын қиды. “Құдай адамзатты сондай қатты сүйгендіктен, Өзінің жалғыз Ұлын оған сенім білдірген әркім жойылмай, мәңгілік өмірге ие болсын деп құрбандыққа берді” (Жохан 3:16, ЖД). Исаның құрбандығы қаншалықты бағалы десеңші!

Бұл күнді еске сақтаудың маңызды болуының тағы бір себебі бар. Өлерінен бірнеше сағат бұрын, Құдай Ұлы шәкірттеріне адалдықтарын сақтауға көмектесетін өте бағалы тәлім берген. Оның сөздері оқушыларының жүректерін қаншалықты толғантты десеңші! Иса оларға қандай тәлім берді және оның сөздерінен біз не нәрсеге үйренеміз? Бұл сұрақтар келесі мақалада талқыланады.