Кешірімділік

“БАЛА КҮНІМДЕ ҚОРЛЫҚ СӨЗДЕР МЕН ҰРЫС-КЕРІСТЕН КӨЗ АШПАДЫМ,— дейді Патрисия есімді бір әйел.— Мен кешіруді білмейтінмін. Тіпті есейгенде де, біреуге ренжісем, соны ойлай беріп, бірнеше күн ұйықтай алмай жүретінмін”. Рас, ашу-ыза мен өкпе-реніш адамды бақыттан да, денсаулықтан да айырады. Зерттеулер көрсеткендей, кешірмейтін адам...

• ашу мен ренішке берілгендіктен, басқалармен қарым-қатынасын бұзады, ал бұл жалғыздыққа апарады.

• тез өкпелеп, жантыныштығынан айырылып, тіпті қатты күйзеліп кетеді.

• жаман нәрсеге ойша қадалып қалатыны сонша — өмірдің қызығын көре алмайды.

• өзін адамгершіліктен аттап жүргендей сезініп қиналады.

• стреске көп ұшырайды және жоғары қан қысымы, жүрек пен бас ауруы, артрит сияқты ауруларға бейім боладыa.

КЕШІРІМДІЛІК ДЕГЕН НЕ? Кешіру ренжіткен адамға рақым етіп, өкпе-реніштен, ыза мен кектен азат болуды білдіреді. Бірақ бұл — болған жаман жағдайға көндігу, көз жұмып қарау немесе түк болмағандай жүре беру деген сөз емес. Кешіру — адамның ойланып қабылдайтын жеке шешімі. Мұндай қадамды адам татулықты сүйгендіктен және өзгелермен жақсы ара-қатынаста болу үшін жасайды.

Кешірімділік түсінікті де қамтиды. Кешірімшіл адам барлық адамның күнәкар екенін, сөзінде не ісінде қателік жіберетінін түсінеді (Римдіктерге 3:23). Киелі кітапта: “Әлдекімнің біреуге ренжуге себебі болса да, өзара төзімді болып, бір-біріңді кеңпейілмен кешіріңдер”,— деп жазылған (Қолостықтарға 3:13).

Кешірімділік “адамдарды толықтай біріктіретін” сүйіспеншіліктің маңызды бір қыры болып табылатыны бекер емес (Қолостықтарға 3:14). “Мейо” емханасының веб-сайтында түсіндірілгендей, кешірімділік...

• қарым-қатынасты жақсартады; ренжіткен адамға жанашырлықпен, түсінушілікпен қарауға талпындырады;

• адамның психикалық күйін жақсартады және Құдаймен жақсы қарым-қатынасын сақтайды;

• өшпенділікті, уайым мен стресті басады;

• депрессияны өршітпейді.

ӨЗІҢІЗДІ КЕШІРЕ БІЛІҢІЗ. Бір медициналық журналда адамның өз-өзін кешіруі өте қиын болатыны, алайда кешіре білудің жан мен тән саулығына өте пайдалы екені айтылады (“Disability & Rehabilitation”). Өзіңізді кешіре алу үшін, мына кеңестерге ден қойып көріңіз:

• Өзіңізден мінсіз болуды талап етпеңіз, қайта барлық адамдар сияқты қателік жіберетініңізді мойындаңыз (Уағыздаушы 7:20).

• Ағаттық жасаған жағдайлардан сабақ алыңыз, сонда оларды қайталамайтын боласыз.

• Кемшіліктеріңіз бен жаман әдеттеріңіз бірден жоқ болып кетпейтіндіктен, шыдамды болыңыз (Ефестіктерге 4:23, 24).

• Өмірге оң көзбен қарайтын, қолдау көрсетуге дайын, мейірімді, сөйте тұра сізге қатысты ойын ашық айтатын адамдармен дос болыңыз (Нақыл сөздер 13:20).

• Біреуді ренжітіп алсаңыз, қателігіңізді мойындап, тезірек кешірім сұраңыз. Татуласу жүрегіңізді тыныштыққа бөлейді (Матай 5:23, 24).

КИЕЛІ КІТАПТАҒЫ ҚАҒИДАЛАР РАСЫНДА ДА ТИІМДІ!

Жоғарыда аталып өткен Патрисия Құдайдың Сөзін оқи келе кешірімді болуды үйренді. Ол былай деп жазды: “Мен өмірімді улап келген ашу-ызадан азат болдым. Енді өзім де қиналмаймын, өзгені де қинамаймын. Киелі кітаптағы тәлім-тәрбиеден Құдайдың бізді жақсы көретінін және бақытты болғанымызды қалайтынын түсіндім”.

Киелі кітаптағы қағидаларға құлақ асқанның арқасында таза ар-ұжданға ие болған Рон есімді бір ер кісі былай деп бөлісті: “Басқалардың не ойлап, не істейтіндерін қадағалай алмасам да, өз ойларым мен әрекеттерімді қадағалай аламын. Татулық сақтағым келсе, өкпе-реніштен арылуым керек. Реніш пен татулықты дүниенің екі жағы — оңтүстік пен солтүстік — деп қабылдайтын болдым. Демек, екі жақта да бірдей жүре алмайтынымды түсіндім”.