Кеңпейілмен кешіре білу

КИЕЛІ КІТАПТАҒЫ ДАНАЛЫҚ: “Әлдекімнің біреуге ренжуге себебі болса да,.. бір-біріңді кеңпейілмен кешіріңдер. Ехобаның өздеріңді кеңпейілмен кешіргеніндей, сендер де солай етіңдер” (Қолостықтарға 3:13).

Бұл нені білдіреді? Киелі кітапта күнә қарызға, ал күнәні кешу қарызды кешіруге теңеледі (Лұқа 11:4). Бір еңбекте жазылғандай, Киелі жазбаларда кездесетін “кешіру” деп аударылған грек сөзі “қарызды талап етпей, ұмыту” дегенді білдіреді. Демек, бізді ренжіткен адамды кешіруді шешсек, оның есесіне сол адамнан ештеңені талап етпейміз. Бірақ біреуді кешіру деген оның бұрыс қылығын мақұлдайтынымызды немесе сезіміміз жараланбағандай сыңай танытуды білдірмейді. Керісінше, бұл ренжуге келелі себеп болғанның өзінде, ішіміздегі өкпе-реніштен арылуды білдіреді.

Бүгінде қандай пайдасы бар? Кемелсіз болғандықтан, бәріміз де күнә жасаймыз (Римдіктерге 3:23). Олай болса, басқаларға кешірімшіл болғанымыз абзал, өйткені ертелі-кеш өзіміз де біреудің кешіріміне мұқтаж боламыз. Өзгені кешу өзіміз үшін де жақсы. Қай жағынан?

Қателік жасаған адамды кешірмей, көңілімізде ашу-ренішті сақтау өзіміз үшін зиян. Себебі мұның кесірінен қуанышымыздан айырыламыз, өміріміз қиындайды және бейшара күйге түсеміз. Денсаулығымыз да кәдімгідей нашарлауы мүмкін. Кардиология туралы бір журналда дәрігер Йоичи Чида мен психология профессоры Эндрю Степто келесідей тұжырым жасаған: “Қазіргі зерттеулер ашу мен өшпенділіктің және жүректің ишемиялық ауруының арасында тікелей байланыс бар екенін көрсетіп отыр” (“Journal of the American College of Cardiology”).

Ал кешірімді болу көп жағынан пайдалы. Әлдекімді кеңпейілмен кешсек, біз арадағы татулығымызды сақтаймыз, осылайша қарым-қатынасымызды бұзып алмаймыз. Ал одан да маңыздысы, тәубеге келген күнәкарларды кешіріп, өзіне осы жағынан еліктеуге шақыратын Құдайымыз сияқты әрекет ететін боламыз (Марқа 11:25; Ефестіктерге 4:32; 5:1).