Tuba Kieleka na Mawete mpi na Ntangu ya Mbote

1. Inki beto fwete sala sambu na kuvanda na dibuta ya Yehowa?

KANA beto me kutana ti mpangi mosi na mbala ya ntete, mbala mingi beto ke yulaka yandi nde: “Inki mutindu nge zabaka kieleka?” Bankaka lenda tuba nde: “Mono me yelaka na kieleka.” Kansi bankaka diaka lenda tuba nde: “Mono me katuka kulonguka kieleka ntama ve.” Beto ke pesaka bamvutu yai sambu kieleka ya Ndinga ya Nzambi ke sobaka luzingu na beto. Sambu na nki? Sambu beto ke zabaka nde beto lenda vanda na dibuta ya Yehowa kaka kana beto ke monisa nde beto ke zolaka kieleka mpi ke sadila yo na luzingu na beto. Yo ke tendula nde beto fwete vanda mpi masonga na mambu yina beto ke tuba mpi ke sala.​—Nk. 15:1-3.

2. (a) Inki bantu vandaka kuzaba sambu na Yezu? (b) Yezu zabaka nde malongi na yandi ta sala bantu nki?

² Yezu vandaka kutuba kieleka ntangu yonso. Nkutu bambeni na yandi zabaka nde yandi vandaka kutuba kaka kieleka ata ntangu yo vandaka ve kusepedisa bantu mingi. (Mat. 22:16) Yezu tubilaka mambu yina bantu ta sala sambu na kieleka yina yandi longaka. Yandi tubaka nde: “Mono kwisaka kutula kukabwana, na kati ya mwana-bakala ti tata na yandi mpi mwana-nkento ti mama na yandi mpi nkento ya makwela ti bokilo na yandi ya nkento.” (Mat. 10:35) Yezu vandaka ve kuzola nde bantu kubuya malongi yina yandi ti balongoki na yandi vandaka kulonga. Ata mpidina, yandi zabaka kaka nde bantu ya nkaka ta buya yo. (Mat. 23:37) Yandi zabaka mpi nde malongi na yandi ta kabisa bantu na bimvuka zole: Kimvuka ya bantu yina ke zolaka kieleka mpi ya bayina ke mengaka yo.​—2 Bate. 2:9-11.

3. Inki beto ta tubila na disolo yai?

³ Bonso Yezu, beto ke salaka yonso sambu na kuvanda masonga mpi kutuba kieleka ntangu yonso ata ntangu yo ke sepedisa ve bantu mingi. Diaka, beto ke longaka kieleka ya Biblia ata mambu yina beto ke tuba ke pesa bantu ya nkaka makasi. Keti yo ke tendula nde beto fwete tula ve dikebi na mutindu mpi na ntangu yina beto fwete tuba kieleka? Ata fioti ve. Na disolo yai, beto ta pesa ntete mvutu na ngiufula yai: Na wapi beto lenda zwa kieleka? Na nima, beto ta pesa mpi mvutu na bangiufula yai: Sambu na nki beto fwete tuba kieleka? Inki mutindu mpi nki ntangu beto fwete sala yo? Disolo yai ta sadisa beto na kutuba kieleka na mawete, disongidila na luzitu mpi na ntangu ya mbote.

NA WAPI BETO LENDA ZWA KIELEKA?

4. Sambu na nki beto ke tuba nde Yehowa kele Nto ya kieleka?

⁴ Yehowa kele Nto ya kieleka. Mambu yonso ya yandi ke tubaka ke vandaka kieleka. Mu mbandu, mambu yina yandi ke tubaka nde yo kele mbi to mbote ke vandaka ya kieleka. (Nk. 19:9; 119:142, 151) Mambu yonso ya yandi ke tubaka sambu na bilumbu ke kwisa ke lunganaka. (Yez. 55:10, 11) Yandi ke salaka mambu yonso ya yandi ke silaka. (Kut. 23:19) Ya kieleka, Yehowa ke kusaka ve ata fioti. (Baeb. 6:18) Yo yina Biblia ke tubaka nde Yehowa kele “Nzambi ya kieleka.”​—Nk. 31:5.

5. Sambu na nki yo kele ve mpasi na kuzaba “Nzambi ya kieleka”? Tendula. (Bis. 17:27)

⁵ Bantu ya nkaka ke tubaka nde Yehowa ke vandaka ve. Bankaka diaka ke tubaka nde ata yandi kele, yo kele mpasi na kuzaba yandi. Kansi yo kele ve mpidina. Bima yonso yina yandi me salaka ke monisaka nde yandi kele mpenza. (Bar. 1:20) Diaka, na Atene, ntangu ntumwa Polo vandaka kusolula ti Bagreki yina longukaka mingi, yandi songaka bo nde Nzambi ke zolaka nde beto “mona yandi” mpi nde “yandi kele ntama ve ti konso muntu na kati na beto.” (Tanga Bisalu 17:27.) Ya kieleka, Yehowa ke bendaka bantu ya kudikulumusa yina ke sosaka kuzaba kieleka ya me tala yandi.​—Yoa. 6:44.

6. (a) Tubila mwa bakieleka ya Biblia yina beto ke kwikilaka na yo. (b) Sambu na nki nge ke vandaka na kiese mutindu nge me zabaka yo?

⁶ Beto lenda zaba mpi Nzambi kana beto ke longuka Biblia. Yehowa pesaka bantu mpeve santu sambu na kusonika yo. (2 Pie. 1:20, 21) Mambu yonso na Biblia kele ya kieleka mpi yo me fwana na kutudila yo ntima. Mu mbandu, beto ke kwikilaka mambu yina yo ke tubaka sambu na luyantiku ya zulu, ntoto mpi luzingu. (Kuy. 1:1, 26) Beto ke kwikilaka mambu yina yo ke tubaka sambu na kisina ya masumu, bampasi mpi lufwa. (Bar. 5:12; 6:23) Beto ke kwikilaka mpi ntangu yo ke tubaka nde Yehowa ta sadila Yezu sambu na kumanisa bampasi yonso yina Satana, “tata ya luvunu,” me natilaka beto. (Yoa. 8:44; Bar. 16:20) Diaka, beto ke ndimaka mpenza mambu yina Biblia ke tubaka nde Yezu ta fwa bantu ya mbi, ta telemisa bafwa, ta kumisa diaka ntoto paladisu mpi ta sadisa beto na kukuma bantu ya kukuka. (Yoa. 11:25, 26; 1 Yoa. 3:8) Yehowa me pesaka beto dibaku ya nene mpenza. Yandi me longaka beto kieleka mpi ke pesaka beto dibaku ya kulonga yo na bantu ya nkaka.​—Mat. 28:19, 20.

SAMBU NA NKI BETO KE TUBAKA KIELEKA?

7-8. Keti bikuma yina ke pusaka beto na kutuba kieleka kele mfunu na meso ya Yehowa? Pesa mbandu. (Marko 3:11, 12) (Tala mpi bifwanisu.)

⁷ Mutindu beto me tubila yo dezia, beto fwete tuba kieleka kana beto ke zola kuvanda na dibuta ya Yehowa. Kansi sambu na kupesa Yehowa kiese, beto fwete suka ve kaka pana. Sambu na nki? Sambu kima ya mfunu mingi na meso ya Yehowa kele bikuma yina ke pusaka beto na kutuba kieleka. Beto baka mbandu ya mambu yina salamaka ntangu Yezu vandaka na ntoto. (Tanga Marko 3:11, 12.) Ntangu Yezu vandaka kulonga nsangu ya mbote pene-pene ya Nzadi ya Galilea, bantu mingi kwisaka na yandi. Bantu ya nkaka na kati na bo yina vandaka na bademo, bwaka na ntwala ya Yezu mpi tubaka na ndinga ya ngolo nde: “Nge kele Mwana ya Nzambi.” Sambu na nki bademo tubaka kieleka yai sambu na Yezu? Mbala ya nkaka bo vandaka ti mfunu nde bantu yina vandaka kuwidikila bo kutudila bo ntima mpi nsuka-nsuka, bo kanga bantu yango nzila ya kusadila Yehowa. Bademo tubaka kieleka, kansi ti bangindu ya mbi. Yezu zabaka bangindu na bo, yo yina bo kukaka ve kukusa yandi to kuleba yandi. Yezu buyisaka bo na kutubila mambu na yandi.

⁸ Disolo yai ke longa beto nki? Bikuma yina ke pusaka beto na kutuba kieleka kele mfunu mingi na meso ya Yehowa. Yo yina, yo kele mfunu mingi nde zola sambu na Yehowa kupusa beto na kulonga bantu kieleka. Diaka, kana bo ke sosa kupesa beto lukumu sambu na yo, beto fwete benda dikebi na bo na kukumisa yandi.​—Mat. 5:16; fwanisa ti Bisalu 14:12-15.

9. Inki beto fwete sala ve mpi sambu na nki?

⁹ Beto tadila mpi mbandu ya nkaka yina beto fwete sosa ve nde bantu kupesa beto lukumu. Yindula nde mpangi mosi yina kele ti mikumba me songa beto kima mosi ya kinsweki mpi beto me songa yo bantu ya nkaka. Kana bantu yango me bakisa na nima nde mambu yina beto songaka bo vandaka kieleka, yo lenda yitukisa bo mpi bo lenda yindula nde mbala mingi beto ke zabaka mambu mingi ya kinsweki. Bo lenda kuma kupesa beto lukumu, kansi yo ta sepedisa ve Yehowa. (Bing. 11:13) Sambu na nki? Sambu ata mambu yina beto tubaka vandaka kieleka, beto vandaka ve ti nswa ya kutuba yo mpi bikuma yina pusaka beto na kutuba yo vandaka ve ya mbote.

INKI MUTINDU BETO FWETE TUBA KIELEKA?

10. Kutuba mambu ya “mbote” ke tendula nki? (Bakolosai 4:6)

¹⁰ Tanga Bakolosai 4:6. Ntumwa Polo yibusaka Bakristu ya Kolose nde bo fwete tuba ‘ntangu yonso mambu ya mbote.’ Yo ke tendula nki? Ngogo ya Kigreki ya bo me sadila na verse yai ke tendula nde mambu ya beto ke tuba fwete sadisa bantu ya nkaka mpi beto fwete tuba yo na mawete mpi luzitu.

11-12. Sambu na nki beto fwete keba ntangu beto ke longa bakieleka ya Biblia? Pesa mbandu. (Tala mpi bifwanisu.)

¹¹ Ntangu beto ke longa bantu kieleka, beto fwete sadila ndongisila ya Polo ya kuvanda mawete. Biblia ke fwanisaka bakieleka ya kele na kati na yo ti mbele ya makasi yina lenda kabisa moyo ti mpeve. Na kutuba ya nkaka, yo lenda monisa pwelele to na mpenza bangindu na beto mpi kimuntu na beto. (Baeb. 4:12) Kansi kana beto ke sadila ve Biblia mbote, beto lenda pesa bantu ya nkaka makasi mpi yo lenda basisa mavwanga ya kukonda mfunu. Inki mutindu?

¹² Yindula nde ntangu beto ke longa nsangu ya mbote, beto me kutana ti muntu mosi yina ke sambilaka biteki mpi ke salaka feti ya Noele ti ya Bonane ti dibuta na yandi. Beto lenda sadila Biblia sambu na kumonisa yandi nde yo kele mbi na kusambila biteki mpi nde Noele ti Bonane ke wakana ve ti malongi ya Biblia. (Yez. 44:14-20; 2 Bak. 6:14-17) Kana beto me sala yo kaka na mbala ya ntete yina beto me kutana ti yandi, beto ta longa yandi kieleka ya Ndinga ya Nzambi, kansi beto ta sadila ve Ndinga yango na mutindu ya mbote.

13. Inki mutindu beto lenda kumisa ntomo ti mungwa mambu ya beto ke tuba?

¹³ Polo tubaka mpi nde beto fwete kumisa mambu ya beto ke tuba ntomo ti mungwa. Yandi vandaka ve kutuba nde beto fwete sosa kusoba kieleka to kubuya kusonga yo bantu. Kansi yandi vandaka kulomba beto na kulonga yo na mutindu ya mbote sambu yo sepedisa bantu yina beto ke longa. (Yobi 12:11) Ya kieleka, yo kele ve pete na kusala mpidina. Mu mbandu, beto lenda sepela ti madia mosi mpi beto yindula nde bantu yonso ke sepelaka mpi ti yo. Mutindu mosi mpi, beto lenda yindula nde mutindu na beto ya kutuba ke sepedisa bantu yonso, kisi ve yo kele ve mpidina. Mu mbandu, bantu ya bisika ya nkaka ke vandaka ti kikalulu ya kutuba na mbala mosi mpi na pwelele mambu yina bo ke yindula ata ntangu bo ke solula ti bambuta na bo. Kansi na bisika ya nkaka diaka, kusala mpidina kele mbi mpi kukonda luzitu. Nkutu, Polo tubaka nde beto fwete zaba mutindu beto “fwete pesa konso muntu mvutu.” Yo ke tendula nde beto fwete tuba na mutindu yina ta sepedisa bantu ya beto ke solula ti bo, kansi ve na mutindu yina ta sepedisa beto to na mutindu beto me yikamaka kutuba na kisika ya beto me yelaka.

INKI NTANGU BETO FWETE TUBA KIELEKA?

14. Ntangu Yezu vandaka na ntoto, keti yandi longaka balongoki na yandi mambu yonso yina yandi zabaka? Tendula.

¹⁴ Mbala mingi, Yezu vandaka kutubila balongoki na yandi mpi kulonga bo mambu mingi na luzitu mpi na mawete. (Mar. 6:34) Kansi Yezu vandaka kaka ti mambu mingi ya nkaka ya kulonga bo. Ata mpidina, Yezu longaka bo ve mambu yonso yina yandi zabaka. Yandi zabaka bandilu na bo, disongidila nde yandi zabaka nde yo vandaka ve ntangu ya mbote ya kulonga bo mambu ya nkaka. Nkutu, yandi songaka bo nde bo ta kuka ve kubakisa mambu yango. (Yoa. 16:12) Yo ke longa beto nki?

15. Keti beto fwete longa balongoki na beto ya Biblia mambu yonso ya beto ke zaba na mbala mosi? Tendula. (Bingana 25:11) (Tala mpi kifwanisu.)

¹⁵ Mbandu ya Yezu ke longa beto nde kana beto ke zaba kieleka, yo ke tendula ve nde beto fwete longa yo yonso na mbala mosi. Inki mutindu beto lenda landa mbandu na yandi? Beto fwete tadila mambu ya luzingu ya bantu yina beto ke longa. Beto tubila diaka muntu yina ke sepelaka kusala ti dibuta na yandi feti ya Noele mpi ya Bonane. Beto ke zaba mbote nde bo vandaka kusala ntete bafeti yai sambu na banzambi ya luvunu mpi nde Yehowa ke sepelaka ve ti yo. Kansi yindula nde nge me yantika kulonguka ti muntu yina Biblia mposo mosi to bamposo zole na ntwala ya feti ya Noele. Keti yo ta vanda mbote na kusonga yandi mambu yina Biblia ke tubaka sambu na bafeti ya mutindu yai mpi kuyindula nde yandi fwete yambula kusala Noele kaka na mbala mosi? Mpidina ve. Yo kele kieleka nde balongoki ya nkaka ya Biblia ke sadilaka nswalu mambu yonso yina bo ke longukaka na Biblia. Kansi yo ke lombaka mwa ntangu sambu na bankaka na kusoba bangindu na bo mpi mambu yina bo ke salaka. Beto ta sadisa balongoki na beto ya Biblia na kuyela na kimpeve mpi na kusoba bikalulu na bo kana beto ke songa bo mambu yina bo fwete zaba na ntangu ya me fwana, disongidila na ntangu yina bo lenda bakisa yo.​—Tanga Bingana 25:11.

16. Inki nge fwete sala sambu na kusadisa balongoki na nge ya Biblia na ‘kulanda kutambula na kieleka’?

¹⁶ Beto ke vandaka na kiese mingi kana beto ke longa bantu mambu ya kieleka sambu na Yehowa. Sambu na kusadisa balongoki ya Biblia na ‘kulanda kutambula na kieleka,’ nge fwete sala mambu yai: Landa kupesa bo mbandu ya mbote. (3 Yoa. 3, 4) Sala yonso sambu mutindu na nge ya kuzinga kumonisa nde nge ke kwikilaka na balusilu ya Yehowa ya kele na Biblia. Tuba kieleka ti bangindu ya mbote. Longa kieleka na mawete mpi na ntangu ya mbote mpi pusa bantu na kupesa Yehowa lukumu na kisika ya kusosa nde bo pesa nge lukumu. Kana nge ke sala mambu yai, nge ta monisa kibeni nde nge kele nsadi ya Yehowa, Nzambi ya kieleka.