Mona na Mabanza Masolo ya Biblia

Biblia kele ti masolo mingi ya mambu yina salamaka mpenza mpi masolo yango ke longaka beto mambu mingi ya mfunu. Kana beto ke mona masolo yango na mabanza, yo ta sadisa beto na kubakisa mbote kibeni mambu ya beto ke tanga mpi na kubakila yo mambote mingi. Tala mwa mambu yina nge lenda sala sambu na kumona na mabanza masolo ya Biblia.

• Tanga na ndinga ya ngolo. Kana nge ke tanga Biblia na ndinga ya ngolo, yo ta sadisa nge na kumona mbote mpenza na mabanza mambu yina nge ke tanga. Kana beno ke tanga Biblia na dibuta, beno lenda kumisa disolo ya beno ke tanga kitoko mpenza kana konso muntu na dibuta ke baka kisika ya muntu mosi ya kele na disolo yango.

• Mona na mabanza mutindu mambu ke salama. Meka kumona na mabanza bangindu ya bantu yina disolo yango ke tubila mpi mutindu bo ke kudiwa. Mu mbandu, kudiyula nde: ‘Sambu na nki muntu yai tubaka to salaka kima yai? Inki mono zolaka kuyindula to nki mutindu mono zolaka kudiwa kana yo vandaka mono?’

• Sala ba dessin. Kana nge ke sala ba dessin ya disolo ya nge ke tanga, yo ta sadisa nge na kumona yo mbote na mabanza mpi na kuvila yo ve. Sala mpidina ata nge ke zaba ve kusala ba dessin mbote.