Dikonga ya Montre ya Kilumbu ya Nsuka Me Pusana Pene-Pene ya Midi ya Mpimpa

Na Kizole 27 janvier 2026, bantu ya Siansi pusaka makonga ya kilumbu ya nsuka pene-pene ya midi ya mpimpaa. Midi ya mpimpa ke monisa ntangu yina bantu ta kudifwa mpi bo ta fwa ntoto.

• Kimvuka mosi (Bulletin of the Atomic Scientists Science and Security Board) ke tuba nde: “Bubu yai kimvuka Bulletin of the Atomic Scientists me pusa dikonga ya Montre ya Kilumbu ya Nsuka na basegondi 85 pene-pene ya midi ya mpimpa sambu mambu yonso kubeba.”

• Alexandra Bell yina kele ntwadisi mpi CEO ya Kimvuka mosi (Bulletin of the Atomic Scientists) ke tuba nde: “Bantu ya Siansi ke sadilaka Montre ya Kilumbu ya Nsuka sambu na kusonga beto pwelele kima mosi. Mambu ya ke tula luzingu ya bantu na kigonsa ke landa kukuma mingi na ntoto. Bantu ke kuka ve kusala na bumosi sambu na kumanisa bampasi na bo mpi mambu ke landa kaka kubeba. Bantu fwete sala bansoba. Yo kele ve mpasi nde bo sala bansoba yango. Kansi bantu yonso na ntoto fwete lomba bamfumu na bo na kusala bansoba yango nswalu.”

Keti bantu ta kudifwa bo mosi mpi bo ta fwa ntoto? Keti beto fwete wa boma sambu na mambu yina ta salama na bilumbu ke kwisa? Inki Biblia ke tuba?

Mambu ya ta salama na bilumbu ke kwisa

Biblia ke tuba nde “ntoto ke bikalaka kimakulu” mpi nde yo kele ti bantu yina “ta zinga kimakulu na zulu na yo.” (Longi 1:4; Nkunga 37:29) Yo yina bantu lenda bebisa diaka ve ntoto mpi bo ta sala diaka ve mambu yina ta sala nde ntoto kuvanda kisika yina mpila ya kuzinga kele ve.

Kansi, Biblia ke tubila nsuka ya kima mosi. Mu mbandu yo ke tuba nde “nsi-ntoto ke luta.”​—1 Yoane 2:17.

• Sambu na kuzaba inki Biblia ke zolaka kutuba ntangu yo ke tubilaka nsuka ya ntoto, tala disolo ya kele ti ntu-diambu “Keti Nsuka ya Nsi-Ntoto Me Kuma Pene-Pene? Apokalipse Ke Tendula Inki?”

• Sambu na kuzaba mambu yina Biblia ke tubaka na yina me tala ntangu yina mambu ya nene ta salama na ntoto, tanga disolo ya kele ti ntu-diambu “Nsuka ya Nsi-Ntoto Ta Kwisa Inki Kilumbu”

Landa kuvanda ti kivuvu sambu na bilumbu ke kwisa

Biblia lenda sadisa beto na kulanda kuvanda ti kivuvu sambu na bilumbu ke kwisa ata bubu yai bampasi kele mingi na ntoto. Inki mutindu Biblia lenda sadisa beto?

• Biblia ke pesaka beto bandongisila yina ke sadisaka beto na luzingu ya konso kilumbu. (2 Timothy 3:16, 17) Mu mbandu, tanga disolo ya kele ti ntu-diambu “Inki Nge Lenda Sala Sambu Nge Kudiyangisa Ve Kuluta Ndilu” sambu na kuzaba inki mutindu Biblia lenda sadisa nge ata nge ke kutana ti bampasi.

• Biblia ke pesaka beto kivuvu mosi ya kutudila ntima sambu na bilumbu ke kwisa. (Baroma 15:4) Yo ke tendula mbote-mbote mambu ya beto lenda vingila nde yo salama bilumbu yai mpi bilumbu ke kwisa. Kuzaba mambu yai ta sadisa beto na kulanda kuvanda ti kivuvu.

Sambu na kuzaba mambu mingi na yina me tala Biblia, beto ke lomba nge na kumeka kulonguka ti beto Biblia ya ofele.