Lusadisu Sambu na Bifwa-Meso
Yo ke monana nde na ntoto ya mvimba bantu kiteso ya 43 000 000 kele bifwa-meso mpi bantu kiteso ya 295 000 000 ke monaka ve mbote.a Diambu ya mawa kele nde bantu ya nkaka ke niokulaka bo mpi ke sadilaka bo mambu na mutindu ya mbi.
Inki mutindu Nzambi ke tadilaka bifwa-meso? Inki Biblia ke tubaka sambu na bo? Mpi nki mutindu Bambangi ya Yehowa ke sadisaka bo bubu yai?
Inki mutindu Nzambi ke tadilaka bifwa-meso?
Biblia ke monisaka nde, Yehowab ke kudiyangisaka mingi sambu na bifwa-meso. Yandi ke zolaka nde bantu kusadila bo mambu ya mbote mpi bo zaba mambu yina yandi ke longaka. Yandi me tubaka mpi nde, yandi ta pesa bo luzingu mosi ya mbote na bilumbu ke kwisa.
Verse: “Bo fwete singa muntu yina ke vidisa kifwa-meso nzila.”—Kulonga 27:18.
Ntendula: Na ntangu ya ntama, nsiku yina Nzambi pesaka bantu na yandi, vandaka kutanina bifwa-meso sambu bantu kusadila bo ve mambu ya mbi.
Verse: “Nzambi ke pona-ponaka ve.”—Bisalu 10:34.
Ntendula: Nzambi ke zolaka bifwa-meso kaka mutindu yandi ke zolaka bantu yina ke monaka.
Verse: Yezu “pesaka bifwa-meso mingi dibaku ya kumona.”—Luka 7:21.
Ntendula: Ntangu Yezu vandaka awa na ntoto, yandi sadisaka bantu ya nkaka yina vandaka bifwa-meso na kumona. Mambu ya yandi salaka monisaka mambu yina Kimfumu ya Nzambi ta sala na bilumbu ke kwisa.
Verse: “Meso ya bifwa-meso ta kanguka.”—Yezaya 35:5.
Ntendula: Yehowa ke tuba nde ntama mingi ve, bifwa-meso ta mona. Yandi ta sala yo ntangu Kimfumu na yandi ta kuma kuyala ntoto.
Inki mutindu Bambangi ya Yehowa ke sadisaka bo?
Beto Bambangi ya Yehowa, beto ke longaka na ntoto ya mvimba mambu yina Nzambi ta sala sambu na bifwa-meso. Inki mutindu beto ke longaka mambu yango?
Beto me basisaka Biblia mpi mikanda yina ke sadisaka bantu na kulonguka Biblia. Beto ke basisaka mpi bavideo. Beto ke basisaka bima yina yonso na mitindu mingi sambu yo sadisa bifwa-meso mpi bantu yina ke monaka ve mbote. Beto ke basisaka yo na bisono ya bifwa-meso, na bisono ya nene, mpi mikanda yina bantu ke widikilaka.
Beto ke sakala mpi balukutakanu ya bukristu mbala na mbala mpi muntu yonso lenda kwisa, yo vanda mpi bifwa-meso.
Beto ke lombaka muntu mosi-mosi na kulonguka Biblia ti Mbangi mosi ya Yehowa.c
Beto ke salaka mambu yina yonso ya ofele. Sambu na nki? Sambu Yezu pesaka nsiku yai nde: “Beno me baka ya ofele, beno pesa mpi ya ofele.”—Matayo 10:8.
Bambangi ya Yehowa ke tudilaka bifwa-meso dikebi ya masonga. Bifwa-meso yina ke zola kusambila Nzambi ti beto ta zwa banduku ya mbote mpi ya ta sadisa bo. Tala mambu yina salamaka sambu na Bambangi ya nkaka ya Yehowa yina kele bifwa-meso.
Talita Alnashi ke zingaka na Suède. Yandi ke monaka ve mbote banda yandi me butukaka. Sosa kuzaba mutindu bibuti na yandi longaka yandi Bibllia mpi mutindu banduku na bo me monisaka nde bo ke zolaka bo mpi bo mutindu bo sadisaka bo.
James Ryan ke zingaka na États-Unis. Yandi butukaka kifwa-makutu. Na nima, yandi kumaka kifwa-meso. Sosa kuzaba nki ke sadisaka yandi na kuzinga na kiese kukonda kudiyangisa.
Cynthia Pablo ke zingaka na Philippines. Yandi kele kifwa-makutu mpi kifwa-meso. Inki mutindu Bambangi ya Yehowa ya nkaka sadisaka yandi na ntangu ya maladi ya COVID-19? Baka mvutu na disolo “Une assemblée soutient une sœur sourde et aveugle pendant la pandémie.”
Inki beto ke basisaka sambu na kulonga mambu ya kele na Biblia?
Mikanda na bisono ya bifwa-meso. Beto ke basisaka Biblia na bisono ya bifwa-meso. Beto ke basisaka yo ya kitini to ya mvimba na bandinga mingi. (Mu mbandu, tala lupangu “Mbalula ya Nsi-Ntoto ya Mpa na Bisono ya Bifwa-Meso.”) Beto ke basisaka mpi mikanda mingi ya nkaka ya ke tendulaka Biblia na bisono ya bifwa-meso. Sambu na bayina ke zola kulonguka bisono ya bifwa-meso, beto me basisaka kamukanda Longuka Kutanga Bisono ya Bifwa-Meso. Beto me basisaka yo sambu na kusadisa bifwa-meso na kuzaba kutanga bisono ya bifwa-meso ti lusadisu ya muntu mosi ya ke monaka.
Kana nge kele na mfunu ya mikanda na bisono ya bifwa-meso, solula ti Mbangi mosi ya Yehowa to lomba nde Mbangi mosi ya Yehowa kukwisa kutala nge.
Nge lenda baka bafishie ya kele ti bisadilu ya kubakila banotid na jw.org.
Mikanda ya papie ya bisono ya nene mpi mikanda ya Internet ya muntu lenda kumisa bisono nene. Beto kele ti mikanda mingi na bisono ya nene sambu na kusadisa bantu yina ke monaka ve mbote. Bo me salaka site Internet na beto jw.org na mutindu yina ke salaka nde, muntu kumona mbote mambu ya kele na mikanda na beto kana yandi me kumisa yo nene. Aplikasio JW Library ke sadisaka mpi bantu na kufiotuna bisono ya mukanda to na kukumisa yo nene.
Solula ti Mbangi mosi ya Yehowa to lomba nde Mbangi mosi ya Yehowa kukwisa kutala nge, mpidina nge lenda baka mukanda mosi ya papie ya bisono ya nene.
Na jw.org, nge lenda baka mikanda mingi ya bisono ya nene yina kele kiteso mosi ti mikanda ya papie.
Mikanda ya bo me kotisa ndinga. Beto me basisaka Babiblia Mbalula ya Nsi-Ntoto ya Mpa ya bo me kotisaka ndinga na bandinga kuluta 200. Beto ke kotisaka mpi ndinga ya mikanda mingi ya nkaka ya ke tendulaka Biblia. Mbala mingi, mikanda yai ya bo me kotisaka ndinga ke vandaka ti ntendula ya bifwanisu.
Na jw.org, nge lenda landa to kubaka mikanda ya bo me kotisaka ndinga. Nge lenda landa yo to kubaka yo mpi na aplikasio JW Library.
Na jw.org, nge lenda baka bafishie yina ke tangaka ndinga mu mbandu, mikanda yina bo ke sadilaka na apareyi yina ke tangaka ndinga mpi mikanda ya bo me kotisa ndinga ya kele na Internet.e
Bavideo ya kele ti ndinga yina ke tendula mambu.f Bambangi ya Yehowa ke basisaka bavideo yina ke tendulaka mambu ya kele na Biblia. Bavideo yai ke vandaka ti ndinga ya ke tendulaka mambu ya kele na kati. Bo ke basisaka yo na bandinga kuluta 100. Bavideo yai ke sadisaka bantu na kuzaba mbote-mbote bandongisila yina kele na Biblia mpi na kusadila yo na luzingu.
Nge lenda landa mwa bavideo yai ya bo me kotisaka ndinga yina ke tendula mambu ya kele na kati:
Balukutakanu ya dibundu mpi ya nene. Mabundu na beto kele na ntoto ya mvimba. Na mabundu na beto, beto ke longukaka Biblia konso mposo mpi beto ke sambaka Nzambi. Konso mvula, beto ke yidikaka mpi balukutakanu ya nene sambu na kulonguka Biblia. Na balukutakanu yango ya nene, kana manaka kele ti bavideo, beto ke salaka mpi ngolo sambu na kubasisa bavideo yina ke vandaka ti ndinga ya ke tendula mambu ya kele na kati sambu na kusadisa bantu yina ke vandaka ti mfunu na yo. Kana mpila kele, beto ke yidikaka mpi mambu na mpila nde bampangi kusimba maboko ya bifwa-makutu ti bifwa-meso sambu na kusala bidimbu yina lenda sadisa bo na kubakisa mambu ya beto ke longukaka na balukutakanu ya dibundu mpi ya nene. Beto ke zodilaka bantu yonso kukwisa ya mbote mpi beto ke vandaka ve ti bangindu ya mbi sambu na muntu ata mosi.
Sosa kuzaba mambu ya balukutakanu ya distrike ya beto ke salaka konso mvula.
Kwenda na Nkinsi ya Kuyibuka Lufwa ya Yezu. Yo kele nkinsi ya kuluta mfunu ya beto ke salaka konso mvula.
José Luis Ayala ke zingaka na Mexique. Yandi butukaka kifwa-makutu. Yandi kumaka kifwa-meso ntangu yandi kumaka ti bamvula 29. Sosa inki mutindu balukutakanu na beto ke vandaka mfunu sambu na yandi mpi inki mutindu bampangi sadisaka yandi na kukuma longi ya mbote ya Biblia.
a “Muntu ya ke monaka ve mbote” kele muntu yina ke monaka na mpasi mpi yina ke kukaka ve kusala mambu yina bantu ke salaka konso kilumbu. Na disolo yai, ntangu beto ke tubila “kifwa-meso,” yo ke tendula muntu yina kele kibeni kifwa-meso mpi muntu yina ke monaka ve mbote.
b Yehowa kele zina ya Nzambi. (Nkunga 83:18) Tala disolo “Yehowa Kele Nani?”
c Nge lenda lomba kulonguka ya Biblia ya ofele.
d Apareyi yina ke bakaka bakopi kele kisadilu mosi ya ke bakaka bakopi ya mikanda sambu na kukumisa yo na bisono ya bantu yina me fwaka meso. Yo ke vandaka ti baprograme ya ordinatere yina ke tangaka na ndinga ya ngolo mambu yonso ya ke basika na ekran, yo ke vandaka mpi ti kima mosi ya ke basisaka bisono ya bifwa meso. Yo lenda vanda mpi ti bisadilu yina yonso zole. Ekran ya apareyi yango ke kumisaka tubambuma ya fioti-fioti nene to fioti sambu yo basisa bisono ya bifwa-meso. Kana nge kele ti apareyi yango, yo kele ve mfunu nde nge vanda ti bakopi ya mikanda mingi na bisono ya bifwa-meso.
e Baapareyi yina bo ke sadilaka sambu na kutanga mikanda mpi mikanda ya bo me kotisaka ndinga ya kele na Internet, bo ke sadilaka yo na baordinatere yina ke basisaka ndinga yina bankento me kotisaka. Mayele yango ke sadisaka sambu na kunata na bisika ya mutindu na mutindu na mukanda mosi.
f Ndinga ya ke tendula mambu ya kele na video kele bansa yina bo ke yikaka na video sambu na kutendula bima yina ke basika na ekran.