Yoane Mbotiki Vandaka Nani?

Mvutu ya Biblia

Yoane Mbotiki vandaka profete ya Nzambi. (Luka 1:76) Yandi butukaka na nsuka ya mvu-nkama ya ntete na ntwala ya ntangu na beto. Yandi fwaka na mvu-nkama ya ntete ya ntangu na beto. Nzambi pesaka yandi mukumba ya kuyidika nzila sambu na kukwisa ya Mesia to Kristu. Yoane lungisaka mukamba na yandi ya kulonga mambu yina Nzambi songaka yandi na Bayuda yina vandaka kuzinga na ntangu na yandi sambu na kunata bo na Nzambi.—Marko 1:1-4; Luka 1:13, 16, 17.

Nsangu yina Yoane longaka sadisaka bantu ya ntima ya masonga yina vandaka kuwa yandi na kundima nde Yezu ya Nazareti kele Mesia yina bo tubaka nde ta kwisa. (Matayo 11:10) Yoane lombaka bantu yina vandaka kuwa yandi na kubika masumu, na kubalula ntima mpi na kubaka mbotika sambu na kumonisa nde bo me balula ntima. (Luka 3:3-6) Yandi vandaka kupesa bantu mingi mbotika, yo yina bo vandaka kubinga yandi Mbotiki. Mbotika ya Yezu vandaka mbotika ya kuluta mfunu ya Yoane.a—Marko 1:9.

Disolo yai ta tubila

• Sambu na nki beto lenda tuba nde Yoane Mbotiki vandaka ve bonso bantu yonso?

• Banani vandaka bibuti ya Yoane Mbotiki?

• Nani salaka nde bo fwa Yoane Mbotiki?

• Keti Yoane Mbotiki vandaka mbanda ya Yezu?

• Bantu ikwa na Biblia ke vandaka ti zina Yoane?

Sambu na nki beto lenda tuba nde Yoane Mbotiki vandaka ve bonso bantu yonso?

Bo tubilaka dezia kisalu na yandi: Na nzila ya kisalu na yandi ya kulonga, Yoane lungisaka mambu yina baprofete tubaka na ntwala na yina me tala kinati-nsangu ya Yehowa. (Malaki 3:1; Matayo 3:1-3) Yo monanaka nde yandi muntu ‘yidikilaka Yehowa bantu yina vandaka ya kuyilama,’ disongidila nde yandi sadisaka bampangi na yandi Bayuda na kundima mambu yina mumonisi ya ntete-ntete ya Yehowa Nzambi, disongidila Yezu Kristu, ta longa.—Luka 1:17.

Kivuvu na yandi: Yezu tubaka nde “kele ve ti muntu me luta Yoane Mbotiki na nene, kansi muntu ya fioti na Kimfumu ya zulu kele nene kuluta yandi.” (Matayo 11:11) Yoane vandaka profete. Yandi vandaka mpi “kinati-nsangu.” Yo yina ata nsadi mosi ve ya Yehowa yina zingaka na ntwala na yandi lendaka kuluta yandi na nene. Mambu yina ya Yezu tubaka monisaka mpi nde Yoane ta vanda ve ntotila na Kimfumu ya Nzambi.b Profete yai ya kangamaka na Nzambi fwaka na ntwala nde Kristu kukangudila bantu nzila ya kukwenda kuzinga na zulu. (Baebreo 10:19, 20) Ata mpidina, Yoane ta vanda na kati ya bantu yina Kimfumu ya Nzambi ta yala awa na ntoto. Yandi kele ti kivuvu ya kuzinga mvula na mvula na Paladisu.—Nkunga 37:29; Luka 23:43.

Banani vandaka bibuti ya Yoane Mbotiki?

Bibuti ya Yoane Mbotiki vandaka Zekaria mpi Elizabeti. Zekaria vandaka nganga-nzambi. Yandi vandaka Muyuda. Kubutuka ya Yoane vandaka kima mosi ya kuyituka sambu mama na yandi vandaka mukobo, to yandi lendaka ve kubuta. Katula yo, Elizabeti ti Zekaria vandaka “minunu.”—Luka 1:5-7, 13.

Nani salaka nde bo fwa Yoane Mbotiki?

Ntotila Erode Antipasi lombaka nde bo zenga Yoane ntu. Nkento na yandi Erodiade muntu pusaka mwana na yandi ya nkento na kulomba ntu ya Yoane Mbotiki. Erodiade vandaka ve kuzola Yoane ata fioti sambu yandi songaka Erode, ntotila yai ya vandaka kutuba nde yandi kele Muyuda, nde makwela na yandi ti Erodiade vandaka kufwa nsiku ya Bayuda.—Matayo 14:1-12; Marko 6:16-19.

Keti Yoane Mbotiki vandaka mbanda ya Yezu?

Ata kima mosi ve na Biblia ke monisa nde Yoane Mbotiki ti Yezu vandaka bambanda. (Yoane 3:25-30) Na masonga yonso, Yoane ndimaka na pwelele yonso nde kisalu na yandi vandaka ya kuyidika nzila sambu na Mesia, kansi ve ya kuvanda mbanda na yandi. Yandi tubaka nde: “Mono kwisaka kubotika bantu na masa . . . sambu yandi monana na Izraele.” Na nima yandi yikaka nde: “Yai kele mwana ya Nzambi.” (Yoane 1:26-34) Yoane vandaka kuwa kiese mingi ntangu yandi vandaka kuwa nde Yezu ke sala kisalu na yandi ya kulonga mbote kibeni.