Nsiku ya Wolo Kele Inki?

Mvutu ya Biblia

Bangogo “Nsiku ya Wolo” ke vandaka ve na Biblia. Kansi, bantu ke sadilaka yo mingi sambu na kutubila nsiku mosi ya Yezu longaka. Na disolo yina yandi salaka na zulu ya ngumba mpi ya me zabanaka mingi, yandi tubaka nde: “Mambu yonso yina beno ke zola nde bantu kusadila beno, beno mpi beno fwete sadila bo yo.” (Matayo 7:12) Bantangu ya nkaka, bo ke tubaka nsiku yina ya wolo mutindu yai: “Beno sala bantu ya nkaka mambu yo yina ya beno zola nde bo sala beno.”—Luka 6:31, Bible en Kituba.

• Nsiku ya Wolo ke tendula inki?

• Sambu na nki Nsiku ya Wolo kele kibeni mfunu?

• Nsiku ya Wolo ke tendula kaka kupesa bantu ya nkaka yina nge ke zola nde bo pesa nge?

• Inki mutindu nge lenda sadila Nsiku ya Wolo?

Nsiku ya Wolo ke tendula inki?

Nsiku ya wolo ke lomba beto na kusadila bantu ya nkaka mambu mutindu beto ke zola nde bo sadila beto mambu. Mu mbandu, bantu mingi ke zolaka nde bo sadila bo mambu ti luzitu, mawete mpi zola. Na masonga yonso, beto fwete sadila mpi bantu ya nkaka mambu mutindu yina.—Luka 6:31.

Sambu na nki Nsiku ya Wolo kele kibeni mfunu?

Nsiku ya wolo ke sadisaka na mambu yonso ya luzingu. Mu mbandu, yo ke sadisaka . . .

• Na kukumisa makwela ngolo.—Baefezo 5:28, 33.

• Bibuti na kusansa bana.—Baefezo 6:4.

• Na kuvanda ti kinduku ya mbote ti banduku na beto, bantu yina ke zingaka pene-pene ti beto mpi bantu yina beto ke salaka ti bo.—Bingana 3:27, 28; Bakolosai 3:13.

Nsiku ya Wolo yo mosi ke tubilaka na kiteso ya kufwana mambu yina kele na kitini ya Biblia ya bantu mingi ke bingaka Kuwakana ya Ntama. Nsiku yai ke tubila bikalulu yina bantu fwete vanda ti yo ya kele na “mambu yina Nsiku [mikanda tanu ya ntete ya Biblia] mpi Bambikudi [mikanda ya bambikudulu] ke tendula.” (Matayo 7:12) Na kutuba ya nkaka, Nsiku ya Wolo ke tubila na bunkufi munsiku mosi ya kele na Kuwakana ya ntama: kuzola muntu ya nkaka.—Baroma 13:8-10.

Nsiku ya Wolo ke tendula kaka kupesa bantu ya nkaka yina nge ke zola nde bo pesa nge?

Ve. Nsiku ya Wolo ke tadilaka mingi-mngi kupesa. Ntangu Yezu pesaka Nsiku ya Wolo, yandi vandaka kutubila mutindu beto fwete sadila bantu yonso mambu yo vanda bambeni na beto. (Luka 6:27-31, 35) Yezu pesaka nsiku ya wolo sambu na kupusa bantu na kusadila bantu yonso mambu ya mbote.

Inki mutindu nge lenda sadila Nsiku ya Wolo?

1. 1. Sadila meso. Tula dikebi na mambu ya ke salama kisika nge kele. Mu mbandu, keti muntu mosi ya kele pana ke kuka ve kunangula bima na yandi? Keti muntu mosi ya ke zingaka pene-pene ti nge me kota opitale? Keti muntu mosi ya nge ke salaka ti yandi me lemba nitu? Kana nge ke “sosa . . . mambote ya bantu ya nkaka,” ntembe kele ve nde nge ta zwa mabaku ya kusonga bo to ya kusadila bo kima mosi ya bo kele na yo mfunu.—Bafilipi 2:4.

2. 2. Kuditula na kisika ya bantu. Kuditula na kisika ya bantu ya nkaka. Nge zolaka kudiwa inki mutindu kana nge kutanaka ti mambu ya mutindu mosi? (Baroma 12:15) Kana nge meka kudiwa mutindu bantu ya nkaka ke kudiwa, yo lenda sadisa nge na kusadisa bo.

3. 3. Vanda suple. Kuvila ve nde beto yonso ke vandaka ve mutindu mosi. Kima yina beto ta zola nde bantu ya nkaka kusadila beto, ke vandaka kaka ve yina bantu ya nkaka ke zolaka nde beto sadila bo. Yo yina, na kati ya mambu mingi yina nge lenda sala, sala yonso yina bantu ke zola nde nge sala sambu na bo.—1 Bakorinto 10:24.