Beno Keba na Mutindu na Beno ya Kuwa

1-2. (a) Inki mutindu Yehowa ke lungisaka bampusa ya kimpeve ya bansadi na yandi bubu yai? (Nkunga 23:​1, 2, 5) (b) Inki beto ta tubila na disolo yai?

BUBU yai, Yehowa ke pesaka beto madia mingi ya kimpeve. Yo yina, beto ke ndimaka nde mambu yai Davidi tubaka kele kieleka: “Yehowa kele Ngungudi na mono. Mono ta konda kima ve.”—Tanga Nkunga 23:​1, 2, 5.

² Yehowa ke pesaka beto mpi madia ya kimpeve na balukutakanu ya dibundu. Beto ke zabaka dezia mbote mambu mingi ya beto ke longukaka na balukutakanu yango. Beto ke vandaka ti mfunu nde bo longa beto yo diaka ata beto me “kangamaka ngolo na kieleka.” (2 Pie. 1:12) Kansi, nki nge ta sala kana mambu ya beno ke longuka kele yina nge me waka dezia mbala mingi? Keti yo ke vandilaka nge mpasi na kutula dikebi? Disolo yai ta sadisa nge. Beto ta mona sambu na nki beto fwete widikila na dikebi na balukutakanu. Beto ta mona mpi mutindu bampangi yina ke longaka na dibundu lenda sadisa bampangi na kulanda mbote na balukutakanu. Beto ta mona mpi mwa bandongisila yina lenda sadisa beto na kukuma kuwidikila mbote mpenza. Beto tubila ntete, nani mpenza ke longaka beto na balukutakanu.

KUVILA VE NDE YEHOWA MUNTU KE LONGAKA BETO

3. Inki mutindu Yehowa ke longaka beto mpi nki mutindu bansadi na yandi ke sadilaka mbote Biblia?

³ Yehowa ke longaka beto na nzila ya Ndinga na yandi Biblia. (2 Tim. 3:​16, 17) Yezu zabaka mpi mambu yai. Yo yina, yandi vandaka kusadila Ndinga ya Nzambi mbote mpenza. Nkutu yo pusaka bantu na kudiyula nde: “Inki mutindu muntu yai me zaba Masonuku, ata yandi me longukaka ve na banzo-nkanda?” (Yoa. 7:15) Bantu ya kudikulumusa mpi bayina vandaka ti mfunu ya kuzaba mambu mingi ya Yehowa, vandaka kusepela mingi ti mutindu Yezu vandaka kutendula Ndinga ya Nzambi. Bakristu yina zingaka na ntangu ya bantumwa, mu mbandu Polo mpi Apolo, landaka mpi mbandu ya Yezu ntangu bo vandaka kuyindula ti bantu mambu ya Ndinga ya Nzambi. (Bis. 17:​2, 3; 18:​24, 28) Beto, Bambangi ya Yehowa, ke zabaka nde malongi yonso ya kele na mikanda na beto, na JW Télédiffusion, na ba plan ya badiskure mpi na bavideo na beto ke katukaka na Biblia. Bantu mingi ya ke kwisaka sambu na mbala ya ntete na balukutakanu na beto, ke yitukaka mutindu Bambangi ya Yehowa ke sadilaka Biblia na balukutakanu yango. Bampangi yina ke salaka masolo na balukutakanu yango ke sadilaka ntete-ntete Biblia sambu na kulonga. Bo ke tangaka baverse ya Biblia mpi ke sadisaka bantu yonso na kubakisa yo mpi ke monisaka bo mutindu ya kusadila yo.—Luka 24:32.

4. Bangogo “kuwa” mpi “kuwidikila” ke tendula nki?

⁴ Bangogo “kuwa” mpi “kuwidikila” na Biblia ke tendulaka mbala mingi kulemfukila muntu mosi. Yo yina, ntangu Yehowa ke sadilaka Ndinga na yandi sambu na kulonga beto na balukutakanu mpi ke sadisaka beto na kubakisa luzolo na yandi, yo ke vandaka diaka mpasi ve na kulemfukila yandi. Ya kieleka, Yehowa ke waka kiese kana beto ke widikila yandi mpi ke sadila mambu yina yandi ke longaka beto.—Bing. 27:11.

SAMBU NA NKI BETO FWETE WIDIKILA NA DIKEBI NA BALUKUTAKANU?

5. Zola na beto sambu na Yehowa ke pusaka beto na kusala nki? (Yoane 4:​23, 24; 1 Yoane 5:3)

⁵ Beto ke widikilaka na dikebi na balukutakanu sambu beto ke zolaka Yehowa. (Mat. 22:37) Kana beto ke longuka mambu mingi ya Yehowa, beto ta kuma kuzola yandi diaka mingi. Zola yango ke pusaka beto na kuwidikila to kulemfukila yandi mpi na kusambila yandi mutindu yandi ke zolaka.—Tanga Yoane 4:​23, 24; 1 Yoane 5:3.

6. Inki Yehowa ke longaka beto na balukutakanu na beto?

⁶ Beto ke widikilaka na dikebi na balukutakanu sambu beto ke zolaka bantu ya nkaka. (Mat. 22:39) Na balukutakanu na beto, Yehowa ke longaka beto mutindu ya kusadisa bampangi na beto mpi bantu yina me zaba yandi ve. Mu mbandu, kamukanda Zola Bantu—Kumisa Bo Balongoki ke longaka beto mutindu ya kumonisa diaka mingi bikalulu ya mbote na kisalu ya kulonga nsangu ya mbote. Keti yo ke vandilaka nge mpasi na kuyantika disolo ti muntu na mutindu ya mbote? Kana mpidina, tula dikebi ya mingi na masolo yina bampangi ke salaka na kitini “Kudipesa na Kisalu ya Bilanga” na balukutakanu ya kati-kati ya mposo.

7. Sambu na nki yo kele mfunu na kulanda kulemfukila Yehowa?

⁷ Beto ke widikilaka na dikebi na balukutakanu sambu beto ke zolaka kuzinga na kiese mvula na mvula. Kana beto ke lemfukila Yehowa, beto ta zinga na kiese bubu yai mpi mvula na mvula. (Kul. 32:​44-47) Ntangu beto ke widikilaka na dikebi na balukutakanu, beto ke bakaka kikesa mpi yo ke sadisaka beto na kulanda kukanga ntima mpi kuvingila nsi-ntoto ya mpa. (Bar. 8:25) Yo me kuma diaka mfunu mingi na kulemfukila Yehowa mpi kudipesa na kisalu na yandi bubu yai, sambu beto ke zinga na bilumbu ya nsuka.—Mat. 24:​42-44; Kus. 1:3.

MUTINDU YA KUSADISA BANTU NA KUWIDIKILA MBOTE NA BALUKUTAKANU

8. Sambu na nki bampangi-babakala yina ke longaka na balukutakanu fwete yidika mutindu na bo ya kulonga?

⁸ Bampangi-babakala yina ke longaka na balukutakanu, mingi-mingi bayina ke salaka badiskure ya bantu yonso, fwete landa kuyidika mutindu na bo ya kulonga. Disolo ya bo me yidika mbote yina bangindu na yo me katuka na Biblia ke sadisaka bantu yina kele ve Bambangi ya Yehowa na kundima kulonguka Biblia mpi yo ke sadisaka beto na kubakisa mbote malongi ya Biblia mpi kusadila yo na luzingu na beto. Kana bo me pesa nge disolo na lukutakanu mosi, kuvila nde disolo yango lenda sadisa mingi bantu na mutindu ya nge yindulaka ve. Kana nge ke salaka badiskure, tadila mutindu nge lenda sadila bandongisila ya ke landa. Ata bandongisila yango ke tadila ntete-ntete bampangi ya ke salaka badiskure ya bantu yonso, beto lenda sadila yo na konso disolo ya bo me pesa beto.—2 Tim. 4:2; Tito 1:9.

9. Inki nge lenda sala sambu bantu kubakisa diskure na nge kukonda mpasi?

⁹ Yidika na ndonga mambu ya nge ta tuba. Beto yonso ke zolaka nde ntangu beto ke sala diskure bantu ya ke landa beto kubakisa yo kukonda mpasi mpi bo bakisa mutindu bangindu ke landana. Kana mambu ya nge ke longa kele mpasi na kubakisa, yo lenda katula dikebi ya bantu ya ke landa nge. Inki nge lenda sala sambu mambu ya nge ta tuba na diskure na nge kuvanda ya kuyidika na ndonga? Yai mambu ya nge lenda sala: (1) Monisa na luyantiku bangindu ya mfunu ya nge ta tubila na diskure na nge. (2) Tubila bangindu yango mosi-mosi. Kana nge me manisa kutubila ngindu mosi ya mfunu, pema mwa fioti mpi na nima tubila pwelele ngindu ya mfunu ya ke landa. (3) Vutukila na bunkufi na nsuka ya diskure na nge bangindu ya mfunu ya nge me tubila.

10. Sambu na nki yo kele mfunu na kusepela ti mambu ya nge ke longa?

¹⁰ Monisa nde nge ke sepela ti mambu ya nge ke longa. Nge ta tuba na kiese kana nge ke sepela ti mambu ya nge ke longa. (Bing. 2:​4, 5; Bis. 4:20) Sambu na kusala yo, nge fwete yindula mingi baverse ya Biblia mpi bangindu ya nge ta tubila na diskure na nge. Mpangi-bakala mosi ya mununu na États-Unis ke yibukaka diskure yina yandi landaka ntangu yandi vandaka mwana-leke. Yandi ke tuba nde: “Mono ke yibukaka mutindu mpangi yina salaka diskure lombaka beto na kuyindula mingi mambu yina beto ke tangaka na Ndinga ya Nzambi. Yandi tubaka yo ti kikesa yonso mpi tendulaka pwelele mutindu beto lenda sala yo. Diskure yango sadisaka mono mingi. Yo sadisaka mono na kuyidika mutindu na mono ya kulonguka Biblia mpi kinduku na mono ti Yehowa.”

11. Inki nge fwete sala sambu diskure na nge kunatila bantu yina ke widikila nge mambote? (1 Timoteo 4:​13-16)

¹¹ Yindula mambu yina bantu ya ke landa diskure na nge kele ti yo mfunu mpi songa bo mutindu bo lenda sadila malongi yango. Na kisika ya kutuba mambu mingi, sadila baverse ya Biblia sambu na kupesa bo kikesa mpi kusonga bo mutindu bo lenda sadila malongi yango. Mu mbandu, Polo songaka Timoteo mwa mambu yina Timoteo vandaka ti yo mfunu sambu na kulanda kukangama ngolo na Yehowa ata ntangu yandi vandaka kusala ngolo sambu na kusadisa bampangi na Efezo. (Tanga 1 Timoteo 4:​13-16.) Yindula mambu yina bantu ya ke landa diskure na nge kele ti yo mfunu mpi songa bo mutindu bo lenda sadila malongi yango na luzingu na bo.

12. Sambu na nki yo kele mfunu na kutuba mutindu nge ke tubaka ntangu nge ke sala diskure?

¹² Ntangu nge ke yidika diskure na nge, sala barepetisio na ndinga ya ngolo sambu nge tuba mutindu nge ke tubaka. Na kisika ya kusonika to ya kutanga ngogo mosi-mosi na diskure na nge, tuba yo mutindu nge ke tubaka sambu yo sadisa bantu na kubakisa mambu ya nge ke longa. Kamukanda Kudipesa na Kutanga mpi na Kulonga ke tuba nde: “Tuba mutindu nge ke tubaka sambu na kubasisa mawi na nge sambu na disolo mpi sambu na bawi.” Kana nge ke tuba mambu yina ke katuka na ntima, yo ta pusa bantu na kulanda nge mbote mpi na kusadila mambu ya nge ke longa na luzingu na bo.

13. Sambu na nki yo kele mbote na kulomba lusadisu na bampangi yina ke salaka mbote badiskure? (Tala mpi kifwanisu.)

¹³ Lomba lusadisu na mpangi ya ke salaka mbote badiskure. Inki mutindu nge lenda sala yo? Nge lenda songa yandi mambu yina nge me yidika na diskure mpi yika mwa mambu yina yandi lenda songa nge. Diaka, nge lenda lomba yandi na kuwidikila nge ntangu nge ke sala repetisio ya diskure na nge na ndinga ya ngolo sambu yo lenda sadisa yandi na kusonga nge kisika ya nge lenda yidika. (Bing. 1:5) Beto mosi lenda mona ve bisika yina yo ke lomba kuyidika. Yo yina, mpangi yina ke salaka mbote badiskure lenda sadisa beto na kumona bisika yango sambu beto longa mbote mpi bantu kusadila malongi yango. Beto ke zolaka kukuma balongi ya mbote sambu na kusadisa bantu na kubakisa mbote mpi kusadila malongi ya Ndinga ya Nzambi.a

MAMBU YINA NGE LENDA SALA SAMBU NA KULANDA KUWIDIKILA MBOTE NA BALUKUTAKANU

14. Sambu na nki malongi yina Yehowa ke longaka beto mbala na mbala kele mfunu? (Nkunga 119:​24, 111, 167)

¹⁴ Beto ta landa kuwidikila mbote na balukutakanu kana beto ke yibuka nde malongi yina Yehowa ke longaka beto mbala na mbala kele mfunu mingi sambu na beto. Malongi yina Yehowa ke longaka beto mbala na mbala ke sadisaka beto na kukanga ntima na bampasi yina beto ke kutana ti yo ‘na bantangu yai ya mpasi mpi ya nku.’ (2 Tim. 3:1) Bantangu ya nkaka, bo lenda longa beto malongi ya beto me longukaka dezia. Kana mpidina, yo ta vanda mbote na kumonisa kikalulu ya mbote yina muyimbi bankunga monisaka na Nkunga 119 sambu na malongi yina Yehowa ke longaka beto mbala na mbala.—Tanga Nkunga 119:​24, 111, 167.

15. Inki lenda sadisa beto na kulanda kusepela ti madia ya kimpeve yina beto ke bakaka na balukutakanu?

¹⁵ Yo kele mfunu na kulanda kusepela ti madia ya kimpeve yina Yehowa ke pesaka beto kaka mutindu yo lombaka nde bantu ya Izraele kulanda kusepela ti mana yina Yehowa vandaka kupesa bo na ntoto ya zelo na zelo. (Kub. 16:​15, 31) Ya kieleka, na luyantiku bantu ya Izraele vandaka kusepela ti mana yina Yehowa vandaka kupesa bo. Yo vandaka ntomo mpi yo vandaka kusadisa bo na kuzinga. Kansi na ntangu mosi buna, bantu ya nkaka kumaka kusaya mana yina bo vandaka kudia konso kilumbu. (Kut. 21:5) Inki yo ke longa beto? Yo ke longa beto nde beto fwete saya ve ata fioti to kumona mpamba madia ya kimpeve yina Yehowa ke pesaka beto na balukutakanu ata yandi ke pesaka beto yo mbala na mbala. Kansi beto fwete vila ve nde Yehowa muntu ke pesaka beto madia yango ya kimpeve mpi nde dibundu na yandi ke yidikilaka beto yo mbote. Diaka, beto fwete vila ve nde madia yango ya kimpeve to mambu ya beto ke longukaka na balukutakanu ke sadisaka beto na kubaka balukanu ya mbote mpi na kubaka luzingu ya mvula na mvula na bilumbu ke kwisa.—Bing. 3:​13, 16-18; Yoa. 17:3.

16. Inki ke sadisaka bampangi mingi ya ke sadilaka Yehowa banda bamvula mingi na kulanda kuwidikila mbote na balukutakanu? (Tala mpi lupangu “Bandongisila Sambu na Kuwidikila Mbote.”)

¹⁶ Mambu ya ke landa lenda sadisa beto na kuwidikila mbote na balukutakanu. Tala mambu yina me sadisaka bampangi ya nkaka ya ke sadilaka Yehowa banda bamvula mingi, na kulanda kuwidikila mbote na balukutakanu. Mpangi-nkento Ashley, yina ke sadilaka Yehowa banda bamvula kuluta 30 ke tuba nde: “Kuyidika na ntwala mambu yina beto ta longuka ke sadisaka mono na kulanda mbote balukutakanu. Kana mono me yidika yo ve, yo ke vandilaka mono mpasi na kupesa mvutu mpi mono ke tulaka ve dikebi na balukutakanu.” Mpangi-bakala József, yina ke sadilaka Yehowa banda bamvula 52, ke tuba nde: “Mono ke sepelaka kulanda malongi ya bo ke vutukilaka mbala na mbala sambu yo ke sadisaka mono na kubakisa yo diaka mbote-mbote na mutindu ya nkaka.” Yandi ke tuba diaka nde: “Kana mpangi mosi ya kele ve longi ya kuluta mbote ke longa, mono ke tulaka dikebi ya mingi na mambu yina yandi ke longa sambu yo ke katuka na Ndinga ya Nzambi kansi ve na mutindu yandi kele.”

17. Inki nge lenda sala diaka sambu na kuwidikila mbote na balukutakanu? (Tala mpi kifwanisu.)

¹⁷ Beto ta kuma kuwidikila mbote na balukutakanu kana beto ke sala mambu ya ke landa. (1) Kudia ve mingi na ntwala ya kukwenda na lukutakanu sambu nge lala ve mpongi. (2) Kuma na ntwala mpi baka kisika na ntwala nde lukutakanu kuyantika. (3) Yidika telefone to apareyi na nge ya nkaka sambu yo katula nge ve dikebi ntangu lukutakanu ke salama. (4) Yindula na ntwala mambu yina mutubi ta tubila. (5) Landa mutubi na dikebi mpenza. (6) Baka banoti to sala ba dessin ya bangindu ya mfunu. (7) Tula dikebi ya mingi na baverse ya Biblia mpi na mutindu yo ke wakana ti disolo yango. (8) Kudiyula nde, ‘Inki mutindu mono lenda sadila dilongi yai sambu na kusadisa mpangi mosi na dibundu to muntu mosi na kisika ya mono ke zingaka?’ (9) Tadila na ntwala bantu-diambu ya konso kilumbu, bantu-diambu ya konso diskure mpi baverse ya konso diskure yina ke vandaka na programe ya balukutakanu ya nziunga to ya distrike. (10) Baka kisika mpi landa na dikebi bavideo ya bankunga yina bo ke tulaka na ntwala nde lukutakanu kuyantika sambu yo sadisa nge na kulanda malongi ya Yehowa.

LANDA KUWIDIKILA YEHOWA NA DIKEBI

18. Sambu na nki beto fwete landa kuwidikila na dikebi na balukutakanu?

¹⁸ Beto fwete landa kuwidikila na dikebi na balukutakanu sambu na nsadisa na yo Yehowa ke twadisaka beto “na banzila ya lunungu.” (Nk. 23:3; 31:3) Bandongisila yina beto ke bakaka ke sadisaka beto na kuvila ve nzila ya luzingu bonso maswa yina mupepe ke nataka kisaka-saka. Yo yina tula dikebi na ‘mutindu na nge ya kuwa’ mpi sadila mambu yina bo ke longaka beto na balukutakanu. (Luka 8:18) Bantu yina ke widikilaka Yehowa ke vandaka na kiese banda bubu yai mpi ta baka luzingu ya mvula na mvula na bilumbu ke kwisa.—Nk. 119:​2, 14.