Yedisa ‘Mayele na Nge ya Kulonga’ Nsangu ya Mbote

1. Inki kikalulu beto fwete yedisa mpi sambu na nki? (2 Timoteo 4:2) (Tala mpi kifwanisu.)

YEZU songaka balongoki na yandi nde: “Beno kumisa bantu . . . balongoki . . . , beno longa bo na kuzitisa mambu yonso ya mono songaka beno.” (Mat. 28:19, 20) Mambu yai ya Yezu tubaka ke monisa nde bansadi ya Yehowa yonso fwete longa nsangu ya mbote. Ya kieleka, Yehowa ke bendaka ‘bantu ya ntima-masonga’ mpi bawanzio ke sadisaka beto na kukutana ti bantu yango. (Bis. 13:48; Yoa. 6:44; Kus. 14:6) Ata mpidina, kele ti mambu yina beto fwete sala. Beto tadila mbandu yina ntumwa Polo mpi ntumwa Barnabasi me bikilaka beto. Biblia ke tuba nde ntangu bo longaka na sinagoga na Ikoniumi, bo “tubaka mbote kibeni, yo yina Bayuda ti Bagreki mingi kumaka kukwikila.” (Bis. 14:1) Yo kele pwelele nde Polo ti Barnabasi yedisaka ‘mayele na bo ya kulonga.’ (Tanga 2 Timoteo 4:2.) Yo kele mbote nde bansadi yonso ya Yehowa kuyedisa mayele na bo ya kulonga.

2. Sambu na nki bampangi ya nkaka lenda yindula nde bo ta kuka ve kukuma ti mayele mingi ya kulonga?

² Bantu ya nkaka lenda yindula nde bo ta kuka ve kukuma ti mayele mingi ya kulonga sambu bo me tangaka ve mingi to sambu bo kele ve mayele mingi. Biblia ke tubila mpi bantu yina monaka nde bo me fwana ve. (Kub. 4:10; Yer. 1:6) Bampangi ya nkaka lenda yindula nde bo kele ve ti mayele ya kulonga sambu bo ke mona nde kisalu ya bampangi ya nkaka ke buta mbuma kuluta ya bo. Ya kieleka, bantu yonso ve ya beto ke solula ti bo ta sepela ti nsangu ya mbote. Diaka, mbuma yina kisalu ke buta, ke katukaka ve kaka na bikesa na beto. Mutindu beto me tubila yo, Yehowa ti bawanzio ke monaka bantu ya ntima-masonga. Ata mpidina, lukanu na beto kele ya kusala bikesa ya kulonga mbote kibeni nsangu ya mbote sambu yo sepedisa bantu. Disolo yai ta tubila mambu tatu yina ta sadisa beto na kuyedisa mayele na beto ya kulonga.

TUDILA BANTU DIKEBI

3. Sambu na nki malongi ya Yezu vandaka kusimba bantima ya bantu?

³ Biblia ke tuba nde Yezu “zabaka mambu yina vandaka na kati ya bantu.” (Yoa. 2:25) Yo ke tendula nde Yezu vandaka kuzaba mambu yina bantu ke yindula mpi bikuma yina vandaka kupusa bo na kusala mambu. Yezu vandaka kusimba bantima ya bantu sambu yandi vandaka kuzaba mambu yina bo vandaka ti yo mfunu. Yandi zabaka nde bantu vandaka kudia ve mbote na kimpeve mpi bamfumu ya mabundu vandaka kuniokula bo mpi kutudila bo bansiku. (Mat. 9:36; 23:4) Yezu tubilaka mambu yina na disolo na yandi na zulu ya ngumba. Bantu mingi vandaka kukwisa na Yezu sambu yandi vandaka kulonga bo mambu yina vandaka kibeni mfunu sambu na luzingu na bo.

4. Inki mutindu beto lenda monisa nde beto ke tudila bantu dikebi? (Tala mpi bifwanisu.)

⁴ Beto ta monisa nde beto ke tudila bantu dikebi kana beto ke sosa kubakisa mambu yina ke yangisa bo. Bantu yonso yina beto ke solulaka ti bo ke niokwamaka sambu na mambu ya mbi yina ke salama na nsi-ntoto yai ya Satana. Kuzaba mambu yai ta sadisa beto na kusadisa bo. Mu mbandu, beto lenda zwa nsangu mosi ya mpa yina ke tadila bantu ya kisika yina beto ke zinga. Keti bibuti ke kudiyangisa sambu na luzingu ya bana na bo na bilumbu ke kwisa? Keti bantu kele ve ti bisalu? Na ‘bantangu yai ya mpasi,’ meka kuyindula luzingu ya mpasi ya bantu ya me zaba ve mambu ya kitoko yina Biblia ke tubila, yina ta salama na bilumbu ke kwisa.​—2 Tim. 3:1; Yez. 65:13, 14.

5. Inki mutindu Yezu swaswanaka ti Bafarize? (Matayo 11:28-30)

⁵ Yezu vandaka kutudila bantu dikebi. Yo vandaka kumonana na mutindu yandi vandaka kusadila bo mambu. Yandi vandaka ve bonso Bafarize yina vandaka kuvweza bantu mpi kumona bo mpamba. (Mat. 23:13; Yoa. 7:49) Kansi Yezu vandaka kusadila bantu mambu na mawete mpi ti luzitu. Yandi vandaka “mawete mpi ya kudikulumusa na ntima,” yo vandaka kusala mpi nde yandi vanda longi ya mbote. (Tanga Matayo 11:28-30.) Beto mpi fwete vanda mawete mpi luzitu.

6. Inki mutindu beto lenda monisa nde beto ke sadila bantu yina ke buya nsangu to ke telemina beto mambu ya mbote mpi ke zitisa bo?

⁶ Bantu ya nkaka ke zolaka ve kuwa nsangu na beto mpi bankaka nkutu ke teleminaka beto. Inki beto fwete sala? Yezu tubaka nde beto fwete sadila ve bantu yina ke telemina beto mambu ya mbi. Kansi beto fwete suka ve pana. Yandi lombaka beto na “kusala mambu ya mbote na bantu yina ke mengaka” beto, “na kusakumuna bantu yina ke singa” beto mpi nkutu “na kusamba sambu na bantu yina ke finga” beto. (Luka 6:27, 28) Beto ta sala yo kukonda mpasi kana beto ke ndima nde mbala ya nkaka kele ti kima yina ke sala nde bo ndima ve nsangu. Ya kieleka, bantu ya nkaka ta sala yonso sambu na kukanga beto nzila ya kulonga nsangu ya mbote. Kansi bankaka lenda buya nsangu, sambu bo ke kutana ti diambu mosi ya mpasi na dibuta to bo ke kudiyangisa sambu na mambu ya nkaka. To mbala ya nkaka mpi, beto kwendaka kutala bo ve na ntangu ya mbote. Ata mpidina, beto fwete sala mambu yai ya Biblia ke tuba: “Mambu ya beno ke tuba kuvanda ntangu yonso ya mbote mpi ya bo me kumisa ntomo ti mungwa, ebuna beno ta zaba mutindu beno fwete pesa konso muntu mvutu.” (Bakol. 4:6) Kana beto ke kuditula na kisika ya bantu mpi ke sosa kubakisa mambu yina bo kele ti yo mfunu, beto ta longa bo mambu yina ta sadisa bo kibeni.

SADILA NDINGA YA NZAMBI

7. Inki mutindu Yezu monisaka nde yandi vandaka ve kulonga bangindu na yandi? (Yoane 7:14-16)

⁷ Yezu vandaka ve kulonga bantu bangindu na yandi mosi. Malongi na yandi vandaka kukatuka na Ndinga ya Nzambi mpi yandi vandaka kulonga yo na mutindu ya pete sambu bantu kubakisa yo mpi bo yibuka yo. Biblia ke tuba nde Yezu vandaka kulonga ‘bonso muntu yina kele ti kiyeka, kansi ve bonso balongi ya nsiku.’ Bantu “vandaka kuyituka mingi” na mutindu na yandi ya kulonga. (Mar. 1:22) Na bilumbu ya Yezu, balongi ya nsiku vandaka kulonga bangindu ya bamfumu ya mabundu yina zabanaka mingi. Kansi, Yezu vandaka kulonga mambu yina vandaka kukatuka na Masonuku. Yezu kele Mwana ya Nzambi mpi yandi zingaka ntete na zulu na ntwala ya kukwisa na ntoto. Yo yina yandi lendaka kulonga bantu mambu yonso yina yandi zabaka sambu na kuyitukisa bo to nkutu kufulusa bo ba-ntu ti mambu ya ngolo-ngolo. Kansi yandi salaka yo ve. Yandi sadilaka Ndinga ya Nzambi sambu na kulonga bantu luzolo ya Yehowa. (Tanga Yoane 7:14-16.) Yezu me bikilaka balongoki na yandi yonso mbandu ya mbote.

8. Inki mutindu Piere landaka mbandu ya Yezu?

⁸ Balongoki ya Yezu mpi vandaka kulonga mambu yina katukaka na Ndinga ya Nzambi. Mu mbandu, ntumwa Piere sadilaka Ndinga ya Nzambi ntangu yandi salaka diskure na Pantekoti 33 ya ntangu na beto. Piere salaka ve banzo-nkanda mingi. Kansi, yandi tendulaka mbote-mbote mutindu Yezu lungisaka baprofesi mpi malongi na yandi simbaka kibeni bantima ya bantu. (Bis. 2:14-37) Inki salamaka na nima? “Bantu yina ndimaka ndinga na yandi na kiese yonso bakaka mbotika, mpi na kilumbu yina bantu kiteso ya 3 000 yikamaka.”​—Bis. 2:41.

9. Sambu na nki beto fwete sadila Ndinga ya Nzambi ntangu beto ke longa?

⁹ Ndinga ya Nzambi mpamba lenda sadisa beto na kusimba mbote-mbote bantima ya bantu. (Baeb. 4:12) Yo yina, beto fwete sadila yo ntangu beto ke longa. Beto fwete ‘longa mambu yina kele na Biblia’ kansi ve bangindu na beto. (2 Tim. 4:2) Bingana 2:6 ke tuba nde: “Yehowa yandi mosi ke pesaka mayele; nzayilu ti luswasukusu ke katukaka na munoko na yandi.” Yo yina kana beto ke longa bantu mambu ya ke katuka na Biblia, yo kele bonso nde beto ke bika Yehowa yandi mosi kusolula ti bo. (Mal. 2:7) Beto ke zola nde bantu kuzaba nde mayele ya Biblia me luta ntama kibeni mayele ya bantu. Biblia kele mukanda ya Nzambi mpi yo ke sadisaka beto na kuzaba mambu yina beto fwete sala sambu na kusepedisa Nzambi mpi kuvanda ti luzingu ya kiese.​—2 Tim. 3:16, 17.

10. Inki mutindu beto lenda benda dikebi ya longoki na Biblia?

¹⁰ Ntangu nge ke yilama sambu na kulonguka Biblia ti muntu, yindula mpila nge ta benda dikebi na yandi na malongi ya Biblia. Longoki na nge fwete bakisa nde ata beto ke sadilaka bifwanisu mpi bavideo sambu na kubakisa mbote mambu yina beto ke longuka, Biblia kele kima ya ntete-ntete yina beto ke longukaka. Yo yina ntangu beno ke longuka, beno tanga baverse yina ta sadisa yandi na kubakisa malongi ya mfunu. Na nima, sadisa yandi na kuyindula mambu yina baverse yango ke longa yandi. Ntangu nge ke sadila bifwanisu mpi bavideo, sadisa longoki na kubakisa minsiku ya Biblia yina yo ke longa yandi. Yo ke tendula ve nde nge fwete tuba mingi to kutanga baverse mingi sambu na kusala yo. Kana beno me tanga verse mosi, bikila longoki ntangu ya kuyindula yo mpi ya kubakisa yo mbote. Nkutu bantangu ya nkaka, yo lenda lomba nde nge to longoki na nge kutanga diaka verse yango. Kana beto ke sala mpidina, beto ta longuka Biblia ti muntu, kansi ve mukanda, kifwanisu to video.​—1 Bak. 2:13.

11-12. (a) Inki mutindu beto lenda monisila longoki ntima-nda? (Bisalu 17:1-4) (Tala mpi kifwanisu.) (b) Inki bantu ya nkaka ke zabaka ve sambu na Biblia mpi nki mutindu beto lenda sadisa bo?

¹¹ Bantangu ya nkaka, yo lenda vanda mpasi sambu longoki kubakisa dilongi mosi to kundima yo. Ata mpidina, beto fwete landa ‘kulonga nsangu ti ntima-nda yonso.’ Konso longoki ke yelaka na mpila na yandi. Balongoki ya nkaka lenda baka ntangu mingi sambu na kubakisa malongi yina beto ke mona pete. Na Tesalonika, Polo longaka Bayuda mpi tendudilaka bo mbala mingi na ntwala nde bankaka na kati na bo kubakisa malongi yango.​—Tanga Bisalu 17:1-4.

¹² Beto lenda monisila mpi balongoki na beto ntima-nda kana beto ke yula bo bangiufula mpi ke bikila bo ntangu ya kutuba. Yo ta sala nde bo tuba mingi kuluta beto. Yo yina, widikila longoki na nge na dikebi mpi sosa kubakisa bangindu na yandi. Na nima, beno tanga mpi beno tubila baverse yina ta sadisa yandi na kubakisa bangindu ya Yehowa na diambu yango. Diaka, bantu ya nkaka ke zabaka ve mambu yina Biblia ke tubaka. Yo yina, nge lenda songa longoki kitini “Mambu ya Luyantiku ya Ndinga ya Nzambi” ya kele na luyantiku ya Biblia​—Mbalula ya Nsi-Ntoto ya Mpa sambu yandi bakisa mambu ya mfunu yina kele na Biblia. Nge lenda tanga ti yandi verse mosi to baverse zole ya kele na ngiufula 15 ya kitini yango sambu na kusadisa yandi na kubakisa nde Biblia lenda sadisa yandi na kuvanda ti luzingu ya kiese. Kana nge ke sadisa longoki na nge na kubakisa valere ya Biblia, yandi ta sadila mambu yina yandi ke longuka na luzingu na yandi mpi yandi ta kuma ti nzala ya kulonguka mambu mingi.

SADISA BO NA KUZABA YEHOWA

13. Beto fwete benda dikebi ya bantu na nani ntangu beto ke longa nsangu ya mbote? Pesa mbandu.

¹³ Lukanu na beto kele ya kusadisa bantu na kuzaba Yehowa mpi na kukuma banduku na yandi. (Yak. 4:8) Beto tubila mbandu mosi yina ta sadisa beto. Kana nge ke zola kusadisa muntu na kumona kima mosi na mpimpa, nge fwete kudisonga ve mwinda kansi nge fwete songa yo kisika yina kima yango kele. Beto fwete sala mpi mutindu mosi ntangu beto ke longa, beto fwete benda dikebi ya bantu na Yehowa kansi ve na beto mosi.

14. Inki mutindu beto lenda sadisa balongoki na kukuma kusepedisa Yehowa?

¹⁴ Ntangu nge ke longuka Biblia ti muntu, sadisa yandi na kukuma ti nzala ya kusepedisa Yehowa. (Bing. 27:11) Nge fwete suka ve kaka na kusadisa longoki na kuyambula bikalulu ya mbi sambu na kukuma Mbangi ya Yehowa, kansi mpi sambu na kusepedisa Yehowa. Mu mbandu, kana longoki na nge ke kuka ve kuyambula kikalulu mosi ya mbi, nge lenda yula yandi bangiufula yai: “Sambu na nki Yehowa ke mengaka kikalulu yai? Sambu na nki Yehowa ke lomba nge na kuyambula kima yina nge ke sepela ti yo? Inki mutindu yo ke monisa nde Yehowa ke zolaka nge?” Kana nge ke sadisa mingi longoki na kuyindula mambu ya Yehowa, yo ta sala nde yandi bakisa nde Yehowa kele kibeni Tata ya kuluta mbote. Yo ta sala nde yandi zola Yehowa mpi yandi sosa kusepedisa yandi.

LANDA KUYEDISA MAYELE NA NGE YA KULONGA

15. Inki nge lenda sala sambu na kukuma kulonga mbote nsangu ya mbote?

¹⁵ Nge lenda samba Yehowa sambu yandi sadisa nge na kuzaba bisika yina nge lenda yidika sambu na kukuma kulonga mbote nsangu ya mbote. (1 Yoa. 5:14) Na nima, nge fwete sala mambu ya ke wakana ti bisambu na nge. Mu mbandu, nge lenda tula dikebi na formasio yina Yehowa ke pesaka beto na balukutakanu ya dibundu. Nge lenda nata mpi bampangi yina ke longaka mbote ntangu nge ke longuka Biblia ti longoki na nge. Na nima, nge lenda yula bo bisika yina nge lenda yidika. Yindula mpi na ntwala mambu yina longoki na nge ke zaba mpi yina yandi ke zaba ve na dilongi yina beno ta longuka. Yindula mpi mutindu yandi ta kudiwa ntangu beno ta longuka dilongi yango. Ntangu beno ke longuka, sadisa yandi na kubakisa mambote yina yandi ta baka mpi mambu ya kitoko yina Yehowa ke sila beto. Yo lenda pusa yandi na kuta kinduku ya ngolo ti Yehowa mpi na kuzwa kiese ya kieleka.​—Nk. 1:1-3.

16. Sambu na nki beto fwete landa kuyedisa mayele ya kulonga?

¹⁶ Kulonga bantu mambu ya Yehowa kele na kati ya mambu yina ke pesaka beto kiese mingi. Na nsi-ntoto ya mpa, beto ta sala diaka mingi kisalu yai ya ke pesaka kiese. Yo yina ntangu beto ke longa nsangu ya mbote, beto fwete landa kutudila bantu dikebi mingi, kusadila Ndinga ya Nzambi mpi kubenda dikebi ya bantu na Yehowa. Kana beto ke sala mpidina, beto ta kuma kulonga mbote kibeni nsangu ya mbote.