Landa Kuvanda ti Kinduku ya Ngolo ti Yehowa Ata Nge Ke Sala Banzo-Nkanda ya Nda

1-2. (a) Inki nge fwete landa kusala ntangu nge me baka lukanu ya kusala banzo-nkanda ya nda? (b) Bangogo yai “kutambula na mutindu yina me fwana na nzila yai mosi” ke tendula nki? (Bafilipi 3:16)

NA NIMA ya kubaka diplome, Bambangi ya Yehowa ya nkaka ke sepelaka kusala banzo-nkanda ya nda to nkutu kubaka formasio. Bo lenda yindula nde banzo-nkanda yango ta sadisa bo na kuzwa kisalu yina ta sadisa bo na kusadila Yehowa mbote. Kana nge me baka lukanu ya kusala banzo-nkanda ya nda, nki lenda ndimisa nge nde nge ta landa kuvanda ti kinduku ya ngolo ti Yehowa? (Yak. 4:8a) Ntembe kele ve nde, nge kutanaka ti mambu ya mpasi yina mekaka lukwikilu na nge na ntwala nde nge baka diplome. Ntangu yai, yo ta lomba nde nge landa “kutambula na mutindu yina me fwana na nzila yai mosi” disongidila, kulanda kusadila Yehowa na kwikama yonso mutindu nge ke salaka yo dezia.​—Tanga Bafilipi 3:16.

² Bangogo ya Kigreki ya bo me balula nde “kutambula na mutindu yina me fwana na nzila yai mosi,” bo vandaka kusadila yo mbala mingi sambu na kutubila mutindu basoda ke tambulaka na kimvuka na ndonga. Yo yina kana nge me baka lukanu ya kusala banzo-nkanda ya nda, yo ta lomba nde nge “landa kutambula” na bumosi ti bampangi sambu na kusala luzolo ya Yehowa. Na disolo yai, beto ta tubila minsiku iya yina lenda sadisa nge. Nge ke zaba dezia minsiku yango. Nge me sadilaka yo dezia sambu na kubaka balukanu ya mbote mpi nge ta vanda ti mfunu ya kusadila yo ntangu yai ya nge me baka lukanu ya kusala banzo-nkanda ya nda to ntangu nge ta manisa banzo-nkanda yango.

LANDA KUSALA MBOTE MAMBU YA KIMPEVE

3. Inki mambu ya mpasi nge lenda kutana ti yo ntangu nge ke sala banzo-nkanda ya nda?

³ Mambu ya mpasi yina nge lenda kutana ti yo. Kuvila ve nde, kusala banzo-nkanda ya nda lenda sala nde nge zwa ve ntangu ya kusala mambu ya nkaka. Sambu nge kele ti mfunu ya kununga na nzo-nkanda, nge lenda kuma kutula mambu ya nzo-nkanda yango na kisika ya ntete na kisika ya Yehowa. Nkutu, yo lenda sala nde nge baka diaka ve balukutakanu na valere, nge yambula kulonga nsangu ya mbote, kulonguka na nge mosi ya Biblia mpi kisambu.​—Kus. 2:4.

4. ‘Kuvanda ntangu yonso ti mambu mingi ya kusala na kisalu ya Mfumu’ ke tendula nki? (1 Bakorinto 15:58)

⁴ Tanga 1 Bakorinto 15:58. Sambu velo kulanda kutambula mbote yo ke lombaka nde muntu ya ke pusa yo kulanda kupedale. Mutindu mosi mpi sambu na kulanda kutambula mbote na kimpeve, beto fwete “vanda ntangu yonso ti mambu mingi ya kusala na kisalu ya Mfumu” disongidila na kisalu ya Yehowa. Yo ke tendula kaka ve kulutisa mwa ntangu na kusala mambu ya kimpeve. Kansi yo fwete baka kisika ya ntete na mambu yonso ya luzingu na beto. Kuvila ve nde kusadila Yehowa kele mfunu mingi kuluta banzo-nkanda. (Mat. 22:37) Mpangi-nkento Samantha yina kele leke ke tuba nde: “Mono bakaka lukanu nde kana nzo-nkanda kukanga mono nzila ya kusala mambu ya kimpeve, mono ta bika kulonguka.”

5. Inki nge lenda sala sambu na kulanda kudipesa mingi na kisalu ya Yehowa?

⁵ Mambu yina nge lenda sala na ntwala ya kuyantika banzo-nkanda ya nda. Kuvila ve nde nge fwete tula Yehowa na kisika ya ntete na luzingu na nge. Kudiyula nde: ‘Inki mono fwete sala sambu na kulanda kukwenda na balukutakanu mbala na mbala, kulonga nsangu ya mbote mpi kulonguka mono mosi?’ (Yoz. 1:8; Mat. 28:19, 20; Baeb. 10:25) Nge lenda kudiyula diaka nde: Ntangu mono vandaka ntete na nzo-nkanda, nki vandaka kusadisa mono na kuzwa ntangu ya kusala mambu yai? Kana nge ke mona nde yo lombaka nde nge sala mambu ya nkaka mbote na ntangu yina, nki nge lenda sala sesepi yai sambu na kusala yo diaka mbote kibeni? Vanda ti lukanu ya kulanda kudipesa mingi na kisalu ya Yehowa ntangu nge ke sala banzo-nkanda ya nda. Yo kele mbi ve na kudipesa na kiteso ya me fwana na mambu ya nzo-nkanda kansi kubika ve nde yo kanga nge nzila ya kusala mambu ya kimpeve.a​—Mat. 6:24.

6. Inki bangiufula nge fwete kudiyula ntangu nge ke kuditadila? (Tala mpi kifwanisu.)

⁶ Ntangu nge ke sala banzo-nkanda ya nda, nge fwete kuditadila mbala na mbala konso ngonda. Nge lenda kudiyula nde: ‘Keti mono ke landaka kaka kutula mambu ya kimpeve na kisika ya ntete?’ Sambu na kusala yo, nge lenda kudiyula nde: Keti mono me kumaka ti kikalulu ya kutina balukutakanu to ya kukwisa na retare? Keti mono ke yindulaka badevware na mono ntangu mono kele na lukutakanu? Keti mono me kumaka kuvukana na balukutakanu ti bampangi kaka na nzila ya video? Nge lenda kudiyula mpi nde: Keti mono me kumaka ti kikalulu ya kutanga mpi ya kusamba zulu-zulu? Keti mono me kumaka kulonga nsangu ya mbote kaka bika nde mono sala to keti mono ke salaka yo ti ngindu ya kumanisa yo nswalu? Kana mvutu na nge kele nde, ee ata na ngiufula mosi, sala na mbala mosi bansoba. Kubika ve nde mambu na nge ya nzo-nkanda kukanga nge nzila ya kutula mambu ya kimpeve na kisika ya ntete.

“TANINA MAYELE NA NGE YA KUYINDULA”

7. Inki mutindu banzo-nkanda ya nda lenda soba mutindu na nge ya kuyindula?

⁷ Mambu ya mpasi yina nge lenda kutana ti yo. Mambu ya nkaka ya nge ke longuka na banzo-nkanda ya nda lenda pusa nge na kulanda ‘mayele ya nsi-ntoto mpi bangindu ya luvunu ti ya mpamba-mpamba.’ Mu mbandu, nge lenda kuma kundima nde Nzambi ke vandaka ve mpi bima yonso kudibasikilaka. (Bakol. 2:8) Yo lenda sala nde nge kuma kuditudila ntima. Mpangi-bakala mosi ya leke ke tuba nde: “Na nzo-nkanda bo vandaka kulonga beto kaka ve mambu ya mpa kansi bo vandaka kulonga beto mpi mutindu ya nkaka ya kuyindula yina vandaka ve kuwakana ti bangindu ya Yehowa. Mu mbandu, bo vandaka kulonga beto nde sambu na kununga to kuvanda ti luzingu ya kiese beto fwete tula ntima na mayele na beto. Kuyindula mutindu yai pusaka mono na kukuma kundima nde beto ke vandaka ve ti mfunu ya lusadisu ya Yehowa sambu na kuvanda na kiese. Yo kuminaka mono mpasi na kutudila yandi ntima.”

8. Sambu na nki yo kele mfunu mingi na ‘kutanina mayele na beto ya kuyindula’? (Bingana 5:1, 2)

⁸ Tanga Bingana 5:1, 2. Biblia ke songaka beto na ‘kutanina mayele na beto ya kuyindula.’ Bo ke taninaka kima yina kele na kigonsa. Beto fwete tanina mpi mayele na beto ya kuyindula sambu Satana mpi nsi-ntoto na yandi ke sosaka kusoba na mutindu ya mbi mayele na beto ya kuyindula. (1 Pie. 5:8) Mpeve ya nsi-ntoto lenda soba mutindu na nge ya kutadila mambu ya mbote mpi ya mbi. Yo lenda soba diaka mutindu na nge ya kutadila kisina ya luzingu mpi nkutu yo lenda pusa nge na kundima nde Nzambi kele ve. Balongi mpi bantu ya nkaka lenda monisa nde mutindu na bo ya kutadila mambu ya mutindu yai me luta na ntama mutindu bantu ya nkaka ke tadilaka yo. Kansi na kutuba masonga, mutindu na bo ya kuyindula kele “buzoba na meso ya Nzambi.”​—1 Bak. 3:18-20.

9. Inki nge lenda sala sambu na kutanina mayele na nge ya kuyindula?

⁹ Mambu yina nge lenda sala na ntwala ya kuyantika banzo-nkanda ya nda. Yo kele mfunu nde na ntwala ya kusala banzo-nkanda ya nda nge vanda ti lukwikilu ya ngolo sambu na kutanina mayele na nge ya kuyindula. Nge lenda kudiyula nde: ‘Sambu na nki mono ke kwikilaka na Nzambi? Inki ke ndimisaka mono nde Biblia kele ndinga na yandi? Inki ke ndimisaka mono nde minsiku ya Biblia me luta na ntama mutindu nsi-ntoto ke tadilaka mambu ya mbote mpi mambu ya mbi?’ Diaka, yo ta vanda mbote na kuyindula mutindu bangindu ya bantu ya nsi-ntoto tulaka dezia lukwikilu na nge na kigonsa ntangu nge vandaka ntete na nzo-nkanda. Kudiyula nde: Keti lukwikilu na mono lembaka mutindu bantu ya nkaka vandaka kukwikila nde bima yonso kudibasikilaka? Keti mono vandaka mpi kuwa nzala ya kusala mambu ya mbi yina bana ya nzo-nkanda na beto vandaka kusala? Kana nge ke mona nde yo lombaka nde nge sala mambu ya nkaka mbote na ntangu yina, nki nge lenda sala sesepi yai sambu na kukumisa lukwikilu na nge ngolo? Vanda ti lukanu ya kutanina mayele na nge ya kuyindula na ntwala ya kusala banzo-nkanda ya nda.​—2 Tim. 2:16-18.b

10. Inki nge fwete landa kusala sambu na kutanina mayele na nge ya kuyindula ntangu nge ke sala banzo-nkanda ya nda?

¹⁰ Ata ntangu nge ke sala banzo-nkanda ya nda nge fwete landa na kuditadila mbote. Kudiyula nde: ‘Keti me kumaka kulanda mbandu ya mbi ya bantu ya nkaka na nzo-nkanda? Ntangu bo ke longaka beto malongi ya nkaka, keti mono ke bakisaka nde yo kele kaka bangindu ya bantu mpi nde yo kele ve kieleka? Keti mono ke ndimaka kibeni nde kaka Kimfumu ya Nzambi ta manisa bampasi ya bantu?’ Nge fwete landa kulonguka mbote Ndinga ya Nzambi mpi kuyindula mambu yina nge ke longuka sambu na kutanina mayele na nge ya kuyindula. Kana nge ke sala mambu yai, yo ta sadisa nge na kundima nde mambu yina Biblia ke tubaka kele masonga.​—1 Tim. 4:15.

SADILA MBOTE NTANGU NA NGE

11. Ntangu nge ke sala banzo-nkanda ya nda, nki bampasi nge lenda kutana ti yo kana nge ke sadila mbote ve ntangu na nge?

¹¹ Mambu ya mpasi yina nge lenda kutana ti yo. Kusala banzo-nkanda ya nda lenda baka nge ntangu mingi, mu mbandu kana nge kele ti baekzame to kana yo ke lomba nde nge manisa devware mosi na dati mosi buna. Kana nge ke sadila ntangu na nge mbote ve, nge lenda kuma ti basusi ya mingi to mpi yo lenda lembisa nge mingi. Yo yina, yo kele mbote na kutanina mpi sante na nge.

12. Sambu na ‘kusadila ntangu na nge mbote kibeni,’ yo ke lomba nde nge sala diaka nki? (Baefezo 5:15, 16)

¹² Tanga Baefezo 5:15, 16. Yo lenda vanda mpasi na ‘kusadila ntangu na nge mbote kibeni.’ Yo kele mpidina, sambu nge kele ti mambu mingi ya kusala. Mu mbandu, ata yo ke lomba nde nge kudipesa na mambu na nge ya nzo-nkanda, nge fwete lutisa mpi ntangu mingi ti bampangi ya dibuta mpi ya dibundu. (Nk. 133:1; Bing. 18:1) Kansi kusala mambu ya kimpeve fwete baka kisika ya ntete na luzingu na nge. (Mat. 6:33) Katula yo, nge fwete sala kisalu sambu na kulungisa bampusa ya dibuta na nge. Diaka, nge fwete pema mingi mpi kusala ba exercice ya nitu ti bukati-kati sambu na kutanina sante na nge. (Lon. 4:6; 1 Tim. 4:8) Sambu na kusala mambu yai yonso, nge fwete sadila mbote ntangu na nge.

13. Inki nge lenda sala sambu na kusadila ntangu na nge na mutindu ya mbote?

¹³ Mambu yina nge lenda sala na ntwala ya kuyantika banzo-nkanda ya nda. Biblia ke tubaka nde mambu ke nungaka kana muntu me yidika yo na ntwala. (Bing. 21:5) Yo yina nge fwete vanda ti programe ya mbote na ntwala ya kusala banzo-nkanda ya nda. Nge lenda kudiyula nde: Ntangu mono vandaka ntete na nzo-nkanda, keti mono vandaka kuzwa ntangu ya kusala mambu ya kuluta mfunu? Kana nge ke mona nde yo lombaka nde nge sala mambu ya nkaka mbote na ntangu yina, nki nge lenda sala sesepi yai sambu na kusala yo diaka mbote kibeni? Vanda ti lukanu ya kubika ve nde ntangu kukumisa nge mpika na yo kansi sadila yo na kulanda programe na nge.c

14. Inki bangiufula nge lenda kudiyula sambu na kusadila ntangu na nge mbote?

¹⁴ Ntangu nge sala banzo-nkanda ya nda, nge fwete landa kutadila mutindu nge ke sadila ntangu na nge. Kudiyula nde: ‘Keti mono ke zwaka ntangu ya kupema mpi ya kusala ba exercice ya nitu? Keti mono ke zwaka dibaku ya kulutisa ntangu ti bampangi ya dibundu? Keti mono ke manisaka badevware na mono na ntangu ya mbote? Kana yo kele mutindu yina ve, keti yo ke vandaka sambu mono kele ti mambu mingi ya kusala to keti yo ke vandaka sambu mono ke tubaka nde mono ta sala yo na nima? Keti banduku to bantu ya dibuta na mono ke lombaka mono na kusala mwa bansoba?’ Kana nge ke mona nde yo ta lomba nde nge sala bansoba, sala yo na mbala mosi. Nge lenda solula nkutu ti bantu ya nkaka yina ke sadilaka ntangu na bo mbote sambu bo sadisa nge.​—Bing. 11:14.

LANDA ‘KUTAMBULA TI BANTU YA MAYELE’

15. Inki mambu ya mpasi nge lenda kutana ti yo ntangu nge ke sala banzo-nkanda ya nda?

¹⁵ Mambu ya mpasi yina nge lenda kutana ti yo. Ntangu nge ke sala banzo-nkanda ya nda, bana ya nzo-nkanda na beno lenda lomba nge na kulutisa ntangu ti bo. Yo lenda vandila nge mpasi na kubuya sambu nge kele mvula mosi ti bo to mbala ya nkaka nge ke zolaka bima ya kiteso mosi ti bo mpi nge ke lutisaka ntangu mingi ti bo na nzo-nkanda. Nge lenda yindula nde nge kele diaka na mambu mingi ya mutindu mosi ti bana ya nzo-nkanda na beno kuluta bampangi na nge na dibundu. Kansi, nge fwete keba. Nkutu, ata nge kele klase mosi ti bo, zaba nde nge kele mutindu mosi ve ti bo sambu nge ke sosaka kusepedisa Yehowa kansi bo ke sosaka ve kusepedisa yandi. Kana nge ke lutisa ntangu mingi ti bo, yo lenda sala nde nge kuma mpi kusala mambu bonso bo. (1 Bak. 15:33) Mambu yai kuminaka mpi mpangi Michael ntangu yandi kotaka formasio ya bamvula iya sambu na kulonguka mambu ya courant. Yandi ke tuba nde: “Mono vandaka kulutisa bantangu mingi konso mposo na bantu ya nkaka ya kisalu yina vandaka ve kuzitisa bankento, yina vandaka kulanda miziki ya mbi mpi kutuba mambu ya mbi. Mono kumaka kumona yo ve mbi.”

16. Bingana 13:20 ke longa beto nki?

¹⁶ Tanga Bingana 13:20. Biblia ke kebisaka beto sambu na bigonsa ya kukangama ti banduku ya mbi. Na kutuba ya nkaka, “muntu yina ke tambulaka ti bantu ya mayele ta kuma mayele.” Yo ke longa beto mambu yai: Beto ke landaka mbandu ya mbote to ya mbi ya bantu yina beto ke lutisaka ntangu mingi ti bo. Yo yina, kangama ti bantu yina ke zolaka Yehowa mpi ya ke zodilaka nge mambu ya mbote.​—Nk. 101:6, 7; 119:63.

17. Inki nge lenda sala sambu na kukangama ve ti banduku ya mbi?

¹⁷ Mambu yina nge lenda sala na ntwala ya kuyantika banzo-nkanda ya nda. Tula bandilu na mingi ya ntangu yina nge ta lutisaka ti bana ya nzo-nkanda na beno. Mpangi Trenton ke tuba nde: “Mono ke zingaka mbote ti bana ya nzo-nkanda na beto kansi mono ke lutisaka ve ntangu ti bo kana beto me basika na nzo-nkanda, sambu bo kele kaka bana ya nzo-nkanda na beto kansi ve banduku na mono ya ngolo.” Inki bandilu nge fwete kuditudila? Sambu na kuzwa mvutu na ngiufula yai, kudiyula nde: Inki bandilu nge kuditudilaka na bamvula ya me luta ntangu nge vandaka ntete na nzo-nkanda? Kana nge ke mona nde yo lombaka nde nge sala mambu ya nkaka mbote na ntangu yina, nki nge lenda sala sesepi yai sambu na kusala yo diaka mbote kibeni? Vanda ti lukanu ya “kutambula ti bantu ya mayele” mpi ya kubuya kuta kinduku ti bantu yina ke zolaka ve Yehowa.d

18. Inki bangiufula nge lenda kudiyula? (Tala mpi kifwanisu.)

¹⁸ Landa kuditadila ata na nima ya mwa bantangu. Kudiyula nde: ‘Keti mono me kuma kukangama ngolo ti bana ya nzo-nkanda na beto? Keti mono me kuma kutuba, kuyindula mpi kusala mambu bonso bo? Inki mutindu Yehowa ke tadila kinduku na mono ti bo?’ (Nk. 1:1) Kana nge ke mona nde yo ta lomba nde nge sala bansoba, sala yo na mbala mosi. Baka banduku yina ke zolaka Yehowa. Diaka, kuwa ve boma ya kusonga bana ya nzo-nkanda na beno mambu ya Yehowa. Mutindu nge ke lutisaka ntangu ti bo na nzo-nkanda, yo kele dibaku ya mbote ya nge lenda longa bo kieleka.

VANDA YA KUYILAMA

19. Inki nge lenda sala sambu na kuyilama na bampasi yina nge lenda kutana ti yo ntangu nge ke sala banzo-nkanda ya nda? Pesa mbandu.

¹⁹ Beto baka mbandu yai: Muntu ya mayele ya ke zola kusala voyage ke yilamaka na ntwala. Ata yandi lenda zaba ve na ntwala mambu yina lenda kumina yandi, yandi ke salaka yonso sambu na kuvanda na sante ya mbote, yandi ke nataka bima yina lenda sadisa yandi ntangu yandi ke sala voyage yango mpi yandi ke zabaka kisika yina yandi ke kwenda. Nge lenda sala mutindu mosi ntangu nge ke yilama na kusala banzo-nkanda ya nda. Vanda ti lukwikilu ya ngolo, lwata “binwaninu yonso yina Nzambi ke pesaka” mpi vanda ti lukanu ya kupesa Yehowa lukumu kansi ve ya kukuma ti mbongo mingi to mfunu mingi na nsi-ntoto yai.​—Baef. 6:11-13; 1 Bak. 9:26, 27; 10:31.

20. Inki nge lenda sala sambu na “kulanda kudimeka sambu na kuzaba kana nge kele na lukwikilu”?

²⁰ Biblia ke lomba beto na ‘kulanda kudimeka sambu na kuzaba kana beto kele na lukwikilu mpi na kulanda kuditala kana beto kele nki mutindu.’ (2 Bak. 13:5) Nge lenda sala mambu yai ntangu ke zola kusala banzo-nkanda ya nda. Landa kuditadila na mambu ya beto me longuka na disolo yai. Keti nge ke landa kusala mbote mambu ya kimpeve? Keti nge ke taninaka mayele na nge ya kuyindula sambu mayele ya nsi-ntoto yai kubebisa yo ve? Keti nge ke sadilaka mbote ntangu na nge? Keti nge ke taka kinduku ti bampangi na dibundu kansi ve na banduku ya mbi? Yai kele bangiufula ya kudiyula kana nge kele na nzo-nkanda, na kisika ya kisalu to mpi na kisika ya nkaka. Landa kuvanda ti lukwikilu ya ngolo na konso mambu yina lenda kumina nge. Tula ntima nde Yehowa ta sakumuna bikesa ya nge ke sala sambu na kusala yo.​—Bing. 3:5, 6.