Inki Nge Lenda Sala Kana Bampasi Me Kumina Nge na Nima ya Mbotika?

1-2. Inki beto fwete sala sambu na kuyilama na bampasi yina beto lenda kutana ti yo na dibundu ya Yehowa? Pesa mbandu.

BETO ke zabaka mbote nde beto ta kutana ti bampasi na nsi-ntoto yai ya Satana. Yo yina, Yezu songaka nkutu balongoki na yandi nde: “Bima ya ke budisaka sakuba fwete kwisa kibeni.” (Mat. 18:7) Kuzaba mambu yai lenda sadisa beto na kuyilama sambu na bampasi yina beto lenda kutana ti yo. Mu mbandu, ntangu beto ke wakana ve ti mpangi mosi na dibundu.

² Beto baka mbandu mosi. Dibundu ya Yehowa ke lombaka beto na kuyilama sambu na bisumbula ya lugangu. Inki beto fwete sala sambu na kuyilama? Ntete, beto fwete sosa kuzaba nki bisumbula lenda salama na kisika ya beto ke zingaka. Yo ta vanda mfunu mpenza na kusala mpidina, mingi-mingi kana beto kele bantu ya mpa na kisika yango. Na nima na yo, beto fwete sosa kuzaba mambu yina beto ta sala mpi kuyidika bima yina beto ta vanda ti yo mfunu kana kisumbula mosi me salama. (Bing. 21:5) Mutindu mosi mpi, beto fwete sosa kuzaba bampasi yina beto lenda kutana ti yo na dibundu ya Yehowa mpi mambu yina beto lenda sala banda bubu yai sambu na kuvanda ya kuyilama kana bampasi yango me kumina beto. Kusala mutindu yai ta sadisa beto na kukangila bampasi yango ntima mpi na kulanda kuvanda ti kinduku ya ngolo ti Yehowa. (Nk. 17:5) Yo yina, beto tadila mambu tatu ya mpasi yina beto lenda kutana ti yo mpi mutindu beto lenda yilama sambu na yo.a

KANA MPANGI MOSI ME SADILA NGE KIMA YA MBI

3. Inki diambu ya mpasi beto lenda kutana ti yo na dibundu ya Yehowa?

³ Keti nge ke yibuka mutindu nge kudiwaka ntangu nge kwendaka na mbala ya ntete na lukutakanu ya Bambangi ya Yehowa mpi nge monaka zola yina ke vandaka na kati na bo? Ntembe kele ve nde yo ndimisaka nge nde nge me zwa kieleka. (Yoa. 13:35; Bakol. 3:12) Mpangi-nkento Blancab kudiwaka mpi mpidina. Kansi na nima ya mbotika na yandi, yandi kutanaka ti diambu mosi ya mpasi yina yandi yindulaka ve nde yo lenda salama. Yandi ke tuba nde: “Mpangi-nkento mosi vandaka kusadila mono mambu ya mbi. Yandi vandaka mpi kutuba mambu ya mbi sambu na bampangi ya nkaka. Mono yindulaka ve nde mambu yai lenda salama na dibundu ya Yehowa sambu mono zabaka nde Bambangi ya Yehowa ke zolanaka mpi ke vandaka bantu ya ngemba.” Ya kieleka, Bambangi ya Yehowa ke salaka bikesa sambu na kuvanda ti bikalulu ya mbote. Kansi kuvila ve nde bo kele bantu ya kukonda kukuka. (Baef. 4:23, 24; 1 Yoa. 1:8) Yo yina, bantangu ya nkaka mpangi mosi lenda tuba to kusala kima yina lenda pesa nge mpasi. (Yak. 3:8) Diambu ya mawa kele nde, bampangi ya nkaka me yambulaka kusadila Yehowa sambu na mambu yai.

4. Inki lenda sadisa beto na kuyambula ve kusadila Yehowa kana mpangi mosi me sadila beto kima ya mbi? (Baefezo 4:32)

⁴ Inki nge lenda sala banda bubu yai sambu na kuyambula ve kusadila Yehowa ata mpangi mosi me tuba to me sadila nge kima ya mbi? Landa kusadila mambu yina kele na Baefezo 4:32. (Tanga.) Kana nge ke sala yonso sambu na kulanda kumonisila bampangi ntima-mbote mpi kuwila bo mawa, yo ta sala nde nge bendana-bendana ve ti bo. Baka mpi lukanu ya kulolula bampangi na ntima ya mvimba na mambu ya mbi yina bo ke sadila nge. Inki lenda sadisa nge na kusala mpidina? Kuvila ve nde mbala mingi, nge ke lombaka mpi Yehowa na kulolula bifu na nge mpi nge ke sepelaka mutindu yandi ke salaka yo na ntima ya mvimba. (Mat. 6:12) Kana nge ke yindula mingi mutindu Yehowa ke lolulaka nge, yo ta sadisa nge na kulolula mpi bampangi kukonda mpasi.

5. Inki verse ya Biblia lenda sadisa beto kana mpangi mosi me sadila beto kima mosi ya mbi? (Bingana 19:11) (Tala mpi bifwanisu.)

⁵ Tanga Bingana 19:11. Biblia ke tuba nde kana beto kele ti mayele ya kubakisa mambu,c yo ta sadisa beto na kuwa ve makasi nswalu kana bo me sadila beto kima mosi ya mbi. Verse yai ke sadisaka mpangi-nkento Rima yina me bakaka mbotika mwa bamvula me luta. Yandi ke tuba nde: “Kana mpangi mosi me tuba to me sala kima yina me pesa mono mpasi, mono ke yibukaka mbala mosi Bingana 19:11. Mono ke yibukaka mpi nde mambu ya luzingu na yandi, kisika yina yandi me yelaka mpi mambu ya nkaka diaka lenda pusa yandi na kutuba to na kusala kima ya mutindu yai. Mono ke salaka mpi yonso sambu na kulonga nsangu ya mbote ti mpangi yango. Yo ke sadisaka mono na kuzaba yandi mbote.” Yo kele mfunu mingi na kuzaba mbote mpenza bampangi na beto banda bubu yai. Mpidina, beto ta lolulaka bo kukonda mpasi kana bo me sadila beto kima ya mbi.

6. Inki lenda sadisa beto na kuvanda ti kinduku ya mbote ti bampangi?

⁶ Inki nge lenda sala sambu na kuvanda ti kinduku ya mbote ti bampangi? Ntangu nge ke sosa kuzaba bampangi mbote, tula dikebi ya mingi na bikalulu na bo ya mbote. (Fwanisa ti Bingana 10:12; Bar. 12:10; Bafil. 2:2, 3) Mambu yai sadisaka mpangi Mark yina me katuka kubaka mbotika. Na nima ya kubaka mbotika, yandi kumaka kulutisa ntangu mingi ti bampangi mpi yo salaka nde yandi kuma kumona bifu na bo. Inki sadisaka yandi na kulanda ve kutula dikebi na bifu yango? Yandi ke tuba nde: “Mono bakisaka nde bifu ya fioti-fioti ya bampangi kele ve kiteso mosi ti mambu ya mbi kibeni ya bantu ya nsi-ntoto yai ke salaka. Yo yina, mono bakaka lukanu ya kulutisa ve ntangu na kuyindula bifu ya fioti-fioti ya bampangi, kansi na kutula dikebi na bikalulu na bo ya mbote.” Kana nge ke sala mpi bonso mpangi Mark, nge ta vanda ti kinduku ya mbote ti bampangi.

KANA NGE ME YANTIKA KUYINDULA BIMA YINA NGE YAMBULAKA

7. Inki lenda pusa beto na kubanda kuwa nzala ya bima yina beto me yambulaka?

⁷ Ntangu nge bandaka kulonguka kieleka, ntembe kele ve nde nge vandaka na kiese ya kuyambula nsi-ntoto yai ya mbi ya Satana. Mbala ya nkaka, yo kele mpasi sambu na nge na kuyindula nde Mbangi ya Yehowa mosi lenda wa nzala ya kuvutukila mambu ya nsi-ntoto. Kansi ntangu nge ke kutana ti bampasi, nge lenda yantika kuyindula bima ya nkaka yina nge me yambulaka sambu na kusambila Yehowa to nkutu kuwa nzala na yo. (Fwanisa ti Kutanga 11:4-6.) Mu mbandu, bampangi ya nkaka me yambulaka bisalu ya lukumu sambu yo vandaka kubaka bo ntangu mingi. Bampangi ya nkaka diaka vandaka ti banduku ya ngolo yina me yambulaka bo ntangu bo yantikaka kulonguka Biblia. Bampangi ya nkaka mpi me yambulaka mambu ya mbi yina bo vandaka kusepela kusala. Yo ke salaka mpasi mingi kana mpangi mosi me yambula Yehowa sambu na kuvutukila kima mosi ya mbi yina yandi vandaka kusala na ntwala ya kukuma Mbangi ya Yehowa. Inki nge lenda sala banda bubu yai sambu ata kima mosi ve kupusa nge na kuvutukila mambu ya mbi yina nge me yambulaka?

8. Mbandu ya Abrahami ti Sara ke longa beto nki?

⁸ Biblia ke tubila bansadi mingi ya Yehowa yina lendaka kuwa diaka nzala ya bima yina bo yambulaka. Mu mbandu, Yehowa lombaka Abrahami ti Sara na kuyambula mbanza Ure, yina vandaka kitoko mpi ti bibaka ya vandaka kutanina yo, sambu na kukwenda kuzinga na batenta. Ata mpidina, bo lemfukilaka Yehowa. (Baeb. 11:8, 9) Ntembe kele ve nde bantangu ya nkaka bo vandaka mpi kuyindula luzingu ya kitoko yina bo vandaka ti yo na mbanza Ure. Kansi ‘kana bo landaka kuyindula’ yo to kuwa nzala na yo ya ngolo, yo zolaka kupusa bo na kuvutuka na bwala na bo. Abrahami ti Sara salaka ve mpidina. Bo landaka kutula dikebi na mambu ya mbote yina Yehowa silaka bo sambu na bilumbu ke kwisa.​—Baeb. 11:15, 16.

9. Inki mutindu ntumwa Polo vandaka kutadila bima yina yandi yambulaka? (Bafilipi 3:7, 8, 13)

⁹ Ntumwa Polo yambulaka mpi bima ya nkaka sambu na kusadila Yehowa. Mu mbandu na ntwala nde yandi kuma Mukristu, yandi longukaka Nsiku ya Bayuda na Gamaliele, longi mosi ya nene yina Bayuda vandaka kuzitisa mingi. (Bis. 22:3) Polo lendaka kukuma muntu ya nene na dibundu ya Bayuda. (Bag. 1:13, 14) Kansi ntangu yandi ndimaka nsangu ya mbote, yandi yambulaka bima yina yonso. Keti luzingu ya Polo vandaka ntangu yonso pete ntangu yandi kumaka Mukristu? Ve. Bampangi na yandi Bayuda vandaka kubula yandi, kutula yandi na boloko mpi kumenga yandi mingi. (2 Bak. 11:23-26) Kana Polo tulaka dikebi ya mingi na bampasi yina yandi kutanaka ti yo, to kana yandi fwanisaka luzingu yina yandi kumaka ti yo ti yina yandi vandaka ti yo ntete, yandi zolaka kuyindula nde yandi salaka kifu mutindu yandi kumaka Mukristu. Kansi Polo salaka ve mpidina, yandi tulaka dikebi ya mingi na dibaku ya nene yina yandi vandaka ti yo ya kulanda Yezu Kristu mpi na mambote yina yandi zabaka nde yo ta natila yandi na bilumbu ke kwisa. Polo vandaka kundima kibeni nde yandi bakaka lukanu ya mbote mutindu yandi kumaka Mukristu sambu kuvanda Mukristu lutaka bima yonso yina yandi yambulaka.​—Tanga Bafilipi 3:7, 8, 13.

10. Inki beto fwete yindula mbala na mbala? (Marko 10:29, 30) (Tala mpi bifwanisu.)

¹⁰ Yo ke longa beto nki? Kana nge me yantika kuyindula bima yina nge yambulaka sambu na kukuma Mukristu, yindula mpi sambu na nki nge yambulaka yo. (Lon. 7:10) Fwanisa bima yina nge me yambulaka ti balusakumunu yina nge me bakaka banda nge me kumaka Mbangi ya Yehowa. Mu mbandu, nge me kumaka nduku ya Yehowa, Muntu ya Kuluta Nene na zulu mpi na ntoto. (Bing. 3:32) Nge kele ti bampangi mingi na ntoto ya mvimba yina ke zolaka nge mingi. (Tanga Marko 10:29, 30.) Diaka, mambu mingi ya mbote ke kinga nge na ntwala. (Yez. 65:21-23) Kana nge ke yindula mbala na mbala mambote yina nge ke bakaka sambu nge ke sadilaka Yehowa, yo ta sadisa nge na kudiyangisa ve sambu na bima yina nge me yambulaka.

11. Mbandu ya mpangi Rosemary ke longa nge nki?

¹¹ Mpangi-nkento Rosemary bakaka mbotika ntangu yandi vandaka ti bamvula kiteso ya 50. Inki sadisaka yandi na kuwa diaka ve nzala ya bima yina yandi yambulaka? Yandi ke tuba nde: “Na nima ya mbotika na mono, mono vandaka kaka kuwa nzala ya Noele sambu yo vandaka kusala nde mono lutisa ntangu ya mbote ti dibuta na mono. Mono vandaka kusepela kupesa bantu ya dibuta na mono bakado. Mono vandaka kuwa kiese ntangu mono vandaka kumona bana na mono ti bantenkolo na mono ke sepela ti bakado yina mono vandaka kupesa bo.” Inki sadisaka mpangi Rosemary? Yandi ke tuba nde: “Na kisika ya kulutisa ntangu ti dibuta na mono na Noele, mono ke salaka yo na bilumbu ya nkaka. Konso mvula, mono ke ponaka kilumbu mosi mpi mono ke bingisaka bantu ya dibuta na mono. Mono ke pesaka bo bakado mpi ke songaka konso muntu na kati na bo sambu na nki mono ke zolaka yandi.” Mpangi Rosemary kutanaka mpi ti diambu ya nkaka ya mpasi. Yandi ke tuba nde: “Ntangu mono longukaka kieleka, banduku na mono yambulaka mono. Bantangu ya nkaka, mono vandaka kuwa nzala na bo mpi mono vandaka kudiwa mono mosi.”d Inki sadisaka yandi? Yandi yantikaka kuwakana ti bampangi-bankento ya nkaka sambu na kulonga ti bo nsangu ya mbote. Yandi ke tuba nde: “Yo salaka nde mono kuma ti banduku ya mpa yina mono ke zolaka mpi ke bakaka na valere mingi.” Mbandu na yandi ke longa nge nki? Nge lenda wa nzala ya kima mosi yina vandaka kupesa nge kiese mpi yina nge yambulaka sambu na kukuma Mbangi ya Yehowa, kansi kuvila ve nde nge kele ti mambu ya nkaka ya mbote yina lenda pesa nge kiese mingi kuluta. (Bafil. 4:8, 9) Kuvila mpi ve diambu yai ya mfunu: Yehowa ta pesa nge ntangu yonso bima mingi kuluta yina nge me yambulaka sambu na yandi.

KANA BANTU YA NKAKA ME YAMBULA YEHOWA

12. Inki mambu ya mpasi lenda salama na dibundu?

¹² Ntangu nge kumaka Mbangi ya Yehowa, nge sepelaka mingi mutindu nge yambulaka mambu ya mbi ya nsi-ntoto yai mpi nge kumaka na kati ya bantu yina ke longaka kieleka mpi ke salaka mambu ya mbote. (Yez. 65:14) Kansi bantangu ya nkaka, mpangi mosi lenda sala disumu ya nene mpi yo lenda sala nde bo katula yandi na dibundu. (1 Bak. 5:13) Mambu yai yangisaka mpenza mpangi-nkento Samar. Yandi ke tuba nde: “Ntangu fioti na nima ya mbotika na mono, nkuluntu mosi salaka disumu ya nene mpi bo katulaka yandi na dibundu. Yo lembisaka kibeni lukwikilu na mono sambu mono vandaka kuyindula ve nde nkuluntu lenda sala diambu ya mutindu yai.” Ya kieleka, beto ke zabaka nde bampangi na beto ke zolaka Yehowa mpi bo ke zolaka ve kuyambula kusadila yandi. (1 Bak. 13:4, 7) Kansi diambu ya mawa kele nde konso mvula, bo ke katulaka bantu ya nkaka na dibundu. Diaka, yo ke salaka mpasi mingi kana nduku na nge, muntu ya dibuta na beno to muntu yina ke vandaka mbandu ya mbote sambu na nge, me yambula Yehowa.

13. Inki beto lenda sala banda bubu yai sambu na kuyambula ve Yehowa kana nduku na beto to muntu ya dibuta na beto me yambula kusadila yandi?

¹³ Inki nge lenda sala banda bubu yai sambu na kuyambula ve Yehowa kana nduku na nge to muntu ya dibuta na beno me yambula kusadila yandi? Landa kukumisa kinduku na nge ti Yehowa ngolo. (Yak. 4:8) Kusadila ve Yehowa sambu na muntu mosi mpidina sambu konso muntu fwete yidika kinduku na yandi mosi ti Yehowa. Mu mbandu, beto ke longukaka Biblia mpi ke sambaka Yehowa na dibuta mpi na dibundu, kansi yo ke lombaka mpi nde konso muntu kusala mambu yai yandi mosi.​—Nk. 1:2; 62:8.

14. Mbandu ya ntumwa Piere ke longa beto nki? (Yoane 6:66-68)

¹⁴ Beto lenda baka mpi dilongi ya mfunu na mbandu ya ntumwa Piere. Kilumbu mosi, balongoki mingi ya Yezu yambulaka yandi sambu yandi tubaka mambu yina bo bakisaka ve. Yo ke monana nde Piere bakisaka mpi ve mambu yango, kansi yandi kangamaka kaka na Yezu. (Tanga Yoane 6:66-68.) Piere tulaka ve dikebi ya mingi na mambu yina balongoki yina ya nkaka salaka, kansi yandi tulaka dikebi ya mingi na mambu ya kieleka yina Yezu longaka yandi. Yo yina, Piere yambulaka ve Yezu. Bubu yai mpi, mambu yina bantu ya nkaka ke sala lenda soba ve ata fioti kieleka yina nge me longukaka na dibundu ya Yehowa. Kuyambula ve ata fioti kieleka yango. Mpangi-nkento Samar, yina beto me tubila dezia, ke tuba nde: “Mono ke vilaka ve ata fioti nde kana muntu mosi me sala kima mosi ya mbi, yo ke tendula ve nde dibundu ya mvimba ke salaka kima yango to nde mambu yina dibundu ya Yehowa ke longaka beto kele ya luvunu. Diaka, ata bantu me sala konso kima yina, Yehowa ke bikalaka kaka Nzambi ya mbote.”

15. Mambu yina mpangi Emily kutanaka ti yo ke longa nge nki?

¹⁵ Beto tala mbandu ya mpangi-nkento Emily. Mposo mosi na nima ya mbotika na yandi, mama na yandi yambulaka bo mpi bo katulaka yandi na dibundu. Mpangi Emily ke tuba nde: “Mono yindulaka ve ata fioti nde mama lenda sala kima ya mutindu yina. Yo kele diambu ya kuluta mpasi yina mono me kutanaka ti yo mpi mono ke waka nzala ya mama mingi mpenza.” Inki ke sadisaka mpangi Emily? Yandi ke tuba nde: “Mono kele ve mono mosi. Papa ke zolaka mono mpenza mpi yandi ke sadisaka mono mingi. Bampangi ya dibundu ke sadisaka mono mpi bo me kumaka kibeni dibuta na mono. Ya kieleka, bampangi yonso ke kutanaka ti bampasi. Yo yina, yo kele mfunu mingi kibeni na kukangama ti bampangi mpi kupesana kikesa.” (1 Pie. 5:9) Nge fwete vingila ve nde mpasi mosi kubwila nge na ntwala ya kukumisa kinduku na nge ngolo ti bampangi. Banda kusala yo sesepi. Ebuna, ata nge me kutana ti konso mpasi yina, nge ta kudiwa ve nge mosi ata fioti.

16. Inki beto fwete vila ve? (Tala mpi kifwanisu.)

¹⁶ Kuvila mpi ve nde Yehowa ke pesaka ndola na bantu yina yandi ke zolaka. (Baeb. 12:6) Yandi ke zolaka nde bantu yonso yina bo me katulaka na dibundu kuvutukila yandi. (2 Pie. 3:9) Yo yina, kana bo me katula nduku na nge ya ngolo to muntu ya dibuta na beno na dibundu, tula kibeni ntima nde bankuluntu ta sala yonso sambu na kusadisa yandi na kuvutukila Yehowa.​—2 Tim. 2:24, 25.

17. Inki beto fwete ndima kibeni?

¹⁷ Beto me tubila kaka mwa bampasi yina nge lenda kutana ti yo na nima ya mbotika. Kansi nge lenda landa kusadila Yehowa ata nge ke kutana ti bampasi ya nki mutindu. Kele ti mambu yina nge fwete sala sambu na kuyilama. Kuvila mpi ve ata fioti nde Yehowa Nzambi kele ntangu yonso pana sambu na kusadisa nge. Yandi ke sadisaka nge dezia mpi yandi ta landa kusadisa nge mvula na mvula! (1 Pie. 5:10) Ndima kibeni nde Yehowa ta landa kupesa nge ngolo mpi kikesa sambu na kukanga ntima na konso mpasi yina nge lenda kutana ti yo. Kana nge ke pesa yandi nzila ya kusadisa nge, nge ta landa kukangama kaka na yandi ata nge me kutana ti mambu ya nki mpila.​—Nk. 119:165; Bar. 8:38, 39.