Keti Nge Keyibuka?
Keti nge sepelaka na kutanga banimelo ya mpa ya Nzozulu ya Nkengi? Kana nde ee, nge tasepela na kuyibuka mambu yai:
▫ Keti beto lenda kuzwa kyeleka ya lusambu? Yezu kutubaka nde: “Beno ta zaba mambu yina kele ya kieleka, ebuna mambu yina ta katula beno na kimpika.” (Yoane 8:32) Yezu kumonisaka ve kaka nde beto lenda kuzwa kyeleka, kansi yandi kumonisaka nde yau melombama nde beto kuzwa yau na lusambu na beto. Yandi kusongaka nkento ya Samaria nde: “Bansambidi ya kyeleka tasambila Tata na mpeve mpi na kyeleka.” (Yoane 4:23, NW)—4/15 (ya Kifalansa), lutiti 5.
▫ Robert Estienne kuvandaka nani, ye inki mutindu yandi kubikisaka kidimbu na yandi? Robert Estienne kele munyemi-minkanda ya kuzingaka na mvunkama ya 16. Yandi kutambikaka luzingu na yandi na kubasisa Masonuku ya Santu mpi na kusalaka ngolo na kusengumuna bangogo ya Biblia mutindu yau kusonamaka na kisina. Ngidika na yandi ya kukabula masonuku ya Biblia na bamvese ya kutula bantalu, kele ngidika ya bantu yonso kesadilaka bubu yai.—4/15 (ya Kifalansa), balutiti 10, 14.
▫ Inki mutindu beto kebakaka mambote na lutangu ya Biblia ya konso kilumbu? Masonuku kebakaka ntangu yonso ntendula ya mpa, ye bambikudulu ya ketadila bilumbu ya nsuka kekumaka pwelele na nsemo ya mambu ya beto mekatuka kumona, kuwa, mpi ya mekumina beto. Mutindu beto keyedisa eksiperianse na beto na luzingu ye kenunga makambu, beto kendimaka kuluta mingi ndongisila ya Biblia. (Bingana 4:18)—5/1, lutiti 25.
▫ Inki mutindu beto lenda kuyindula mikapu ya Biblia? Ya nge kele na kutangaka Biblia, tula kidimbu ya mikapu ya nge kezola kuyibuka, to sonika yau na bapapie mpi tulula yau na kisika mosi ya nge lenda kumona yau konso kilumbu. Longuka yau na ntu; yindulula yau; sadila yau. Kumeka ve na kutula na ntu mambu mingi na mbala mosi, tula kaka mosi to zole na mposo mosi.—5/1, lutiti 28.
▫ Inki mambu kele na Evanzile ya Luka yina kele ngika na mambu ya bansoniki ya nkaka ya Evanzile kusonikaka? Ata mingi na kati ya mambu ya Luka kusonikaka kele kiteso mosi ti nkenda ya Matayo, 59 na kati ya nkama kele ngika. Luka kusonikaka bimpa sambanu ya Yezu ya kele kaka na mukanda na yandi, ti bingana ya Yezu ya mingi na kiteso ya kuluta mbala zole, yina bansoniki ya nkaka ya Baevanzile kusonikaka ve.—6/1, lutiti 8.
▫ Inki nsemo ya ngolo ya kyeleka kutendulamaka na 1935? Na mvula yina bantu ya Yehowa kwisaka kuzaba nde kibuka ya nene, ya mesonama na Kusonga 7:9, 14, kuvandaka ve kalasi ya zole ya mazulu, kansi bayina ya kele ti bivuvu ya kuzinga na ntoto. (Yoane 10:16)—6/1, lutiti 16.
▫ Inki kele mitindu ya nsadilu ya kulembika bayina kele na ntantu? Widikila. Pesa nsyamisa. Kudipesa na Lusadisu. Baka dibansa ya kusadisa ntangu yau kelombama. Sonika mukanda to tinda karte ya ndembikilu. Samba ti bau. (Yakobo 5:16) Fula na kusadisa bau.—6/1, balutiti 29, 30.
▫ Inki bampangi ya babakala ti ya bankento ya kimpeve lenda kusala sambu na kusadisa bayina kezinga na mabuta ya kukabwana na lusambu na kuvibidila? Ntangu yonso tubila bau na bangogo ya kusyamisa, ya mbote, mpi ya ndembikilu. (1 Tesalonika 5:14) Yau kesadisaka bonso ndembikilu na mabanza mpi nitu na bau. Kana yau kele ya nsadilu mpi ya kufwana, kotisa bau na bisalu na nge ya teokrasi mpi ya kimvuka. Lombila bau na bisambu na nge. (Roma 1:9; Efezo 1:16)—6/1 (ya Kifalansa), lutiti 29.
▫ Inki nsendo kebasikaka na kumonisa nzizidi na kisalu ya kusamuna? Nzizidi kesadisaka bansamuni ya Kimfumu na kuvibidila ntembe to kutelamanina. Na kisika ya kusala bantubu ti bankwa-nzo ya makasi, bansadi ya kele na nzizidi tavanda ya kukuka na kupesa mvutu ya mawete to kukatuka malembe, na kubumbaka na mutindu yina ngemba ti kyese. (Matayo 10:12, 13) Kuluta dyaka, bantu ya kufwanana na mameme tabendama na nsangu ya Kimfumu.—6/15 (ya Kifalansa), lutiti 9.
▫ Sambu na inki kuzaba kyeleka ya Biblia kele mbalu? Kuzaba kyeleka kekatulaka beto na kimpika ya luvunu, boma, mpi bibanga-banga. Kana beto kezinga na kusadila yau, kyeleka kesyamisa beto na kuvibidila bampasi mpi kepesa beto kivuvu na kununga mimekamu.—7/1 (ya Kifalansa), lutiti 8.
▫ Na inki mukumba ya ntetentete dibundu ya Bakristu ya kupakulama kuyingaka Izraele ya kinsuni? Dibaku ya kuta kimbangi ya bunene ya Yehowa na kati ya makanda. (Yezaya 43:21; 1 Piere 2:9)—7/1, lutiti 20.
▫ Inki beto lenda kubakisa na bangogo ya ntumwa Piere yai nde bakala fwete ‘kukumisa’ nkento na yandi? (1 Piere 3:7) Bakala yina kekumisaka nkento na yandi kesimbisaka yandi nsoni ve to kefyotisaka yandi ve. Kansi, yandi kemonisaka na bansadilu to bangogo na yandi—na kingenga mpi na meso ya bantu yonso—nde yandi kezolaka yandi. (Bingana 31:10-31)—8⁄1, lutiti 18.
▫ Sambu na inki yau lenda kutubama nde yau kele kidimbu ya zola na kukula nsumuki ya kebalula ntima ve na dibundu ya Bukristu? Kubasisa na dibundu kele lumonisu ya zola sambu na Yehowa mpi banzila na yandi. (Nkunga 97:10) Yau kemonisaka zola sambu na bayina ya kelandaka nzila ya lunungu sambu yau kekatulaka na kati na bau muntu yina lenda kutula bupusi ya mbi na zulu na bau; yau mpi ketaninaka bunkete ya dibundu. (1 Korinto 5:1-13)—7/15 (ya Kifalansa), lutiti 25.
▫ Inki mutindu “mpika ya kwikama mpi ya mayele” yina Yezu kutubaka na Matayo 24:45-47, lenda kuzabana bubu yai? Bau kezabana ntetentete na kisalu ya bau kesala na kubasisaka mikanda ya kele na lufulu na Biblia, na kulongaka mpi na kusamunaka “nsangu ya mbote ya Kimfumu,” mpi na kundima na bau ya Ndinga ya Nzambi, Biblia. (Matayo 24:14; 28:19, 20)—8/1, lutiti 27.