Masolo Ya Bansamuni Ya Kimfumu

Bakristu ya Kyeleka Tanyokwama

TUKA bilumbu ya Abele, bansadi ya Yehowa mingi mevibidilaka minyoku ya ngolo ya lusambu. (Luka 11:​49-51) Mfunu ya kuyituka kele ve, sambu Yezu kukebisaka nde “bantu yonso yina ke zolaka kulemfuka na Nzambi na kimvuka ti Yesu Kristo, bo ta monisa bo mpasi”! (2 Timoteo 3:12) Yau yina bubu yai, na bansi kuluta 25, Bambangi ya Yehowa kele na nkandika to na kuvibidila minyoku.

Na nsi mosi kisika Bambangi ya Yehowa kele na nkandika mpamba ve, kansi bantu ya mabundu mpi kenyokula bau, bansamuni ya nsangu ya mbote kiteso ya 12000 kelanda na kusala ti kikesa yonso, na kulongukaka Biblia na kiteso ya bantu kuluta 15000. Ya kyeleka, kisalu na bau ya kusamuna kesalamaka na kinsweki. Na kimvuka, bau kesalaka balukutakanu na bau na banzo, mpi kekebaka ntangu bau kebingaka bantu ya kesepelaka, na balukutakanu ya mutindu yina.

Na bilumbu ya meluta, luyalu kukumaka ti nkadilu mosi ya nkenda sambu na Bambangi, yina kesalaka ntangu yai kisalu na bau nkatu lukakilu ya kugonda. Kansi, bimvuka ya mpila na mpila ya mabundu mesadilaka bupusi na bau sambu na kubasisa mavanga.

Na mbanza mosi, kibuka mosi ya nganzi ya bantu ya mabundu kiteso ya 200 kutambulaka na kwenda na nzo kisika Bambangi ya Yehowa kiteso ya 50 vandaka kusala lukutakanu ya dibundu. Bankaka na kati ya kimvuka vandaka kunata matadi mpi kuyimba basiloga ya dibundu. Ngindu na bau kuvandaka ya kunwanisa Bambangi mpi kufwa nzo. Yau kemonana nde bantwadisi ya mabundu vandaka kutala balukutakanu mpi kukinga ntangu ya mbote sambu na kunwanisa. Kibuka kuvandaka mefinama mpenza na kukota na nzo ntangu bapolisi 15 kukumaka mpi kutumaka bau na kumwangana. Yau kuvandaka ngituka sambu na Bambangi, sambu ata muntu mosi ve na kati na bau kumonaka ntangu ya kubinga bapolisi.

Kansi, na baokazio ya nkaka, mitelamini yina kunungaka. Bambangi mingi kunatamaka na kinzonzi mpi bau kubakaka nkanu ya boloko. Dikambu mosi na nzo ya kinzonzi vandaka mebwaka kidiba bamvula mingi, mpi yau kemonana nde mufundi vandaka mekatula ngindu na yau. Kansi, na kitembo ya bamfumu ya mabundu, dikambu kuvutukaka dyaka na nzo ya kinzonzi, mpi Mbangi kuzwaka nkanu ya boloko.

Na kisika ya nkaka, kibuka mosi ya Bambangi kuzwaka nzo mosi sambu na kusungimina Madya ya Nkokila ya Mfumu. Na nima, na nkokila yina, bapolisi mingi kukangaka munkwa-nzo mpi nkuluntu ya kutwadisaka lukutakanu. Na biro ya bapolisi, bau kututamaka ngolo. Bau kulandisaka bangyufula ya makasi bantangu mingi na nima. Mbangi ya nkaka mpi kuvibidilaka minyoku ya kutulama na kiziba ya masa ya madidi bantangu mingi.

Sambu na inki bapolisi kunwanisaka dyaka mutindu yai? Dyaka, kibuka ya bantu ya mabundu, ti lusadisu ya bamfumu ya mabundu ya bwala, kuvandaka kupusa bapolisi. Na nima, mfumu ya bapolisi kusamunaka nde, bau kukangaka bantu yina nkatu nswa na yandi. Ndolula kulandaka, mpi bantu yina kusalaka mambu yina kulolamaka.

Na inza ya mvimba, Bambangi ya Yehowa kelanda na kusamuna nsangu ya mbote ya Kimfumu ya Nzambi ata bau kekutana ti minyoku ya ngolo. Bau kelandaka ndongisila ya Yezu: “Tala, mono ke tinda beno bonso mameme na kati ya bankoi; beno vanda mayele bonso ba[nyoka]. Beno vanda na ntima ya pima bonso bapizio.”​—⁠Matayo 10:⁠16.

[Caption on page 30]

[Ntendula ya Bifwanisu ya lutiti 30]

Abele kuvandaka muntu ya ntete na kunyokwama