Kel Rilóji di Fin di Mundu sta más pértu di meia-noti

Na dia 27 di janeru di 2026, sientistas poi kel Rilóji di Fin di Mundu más pértu di meia-noti. Meia-noti ta reprizenta kel momentu ki umanus ta distrui es mê i planéta téra.

“Boletim dos Cientistas Atômicos i Conselho de Ciência e Segurança poi oji kel rilóji 85 sugundu antis di meia-noti. Nunka nu ka tevi tantu pértu di distruison di umanus i di planéta téra sima gósi.” — Boletim dos Cientistas Atômicos.
“Sientistas sta ta uza kel Rilóji di Fin di Mundu pa pâpia ku nos di manera klaru. Ten kada bês más kuza prigozu na mundu, pesoas ka sta dispostu na trabadja djuntu pa rezolve ses prubléma i kuzas sta ta piora kada bês más. Nu meste faze mudansas i nu ta konsigi faze kel-la. Má pesoas na mundu interu meste insisti ku ses governanti pa faze kes mudansa más faxi ki es ta pode.” — Alexandra Bell, prizidenti i CEO di Boletim dos Cientistas Atômicos.

Fin di pesoas i di nos planéta sta kuazi ta txiga? Nu meste xinti medu di kuzê ki sta ben kontise na futuru? Kuzê ki Bíblia ta fla?

Kuzê ki sta ben kontise?

Bíblia ta fla ma “téra ta kontinua pa tudu ténpu” i pesoas “ta ben vive na el pa tudu ténpu.” (Ekleziastis 1:4; Salmu 37:29) Nton pesoas ka ta ben distrui téra i nen es ka ta ben bira nos planéta na un lugar ki nu ka ta konsigi vive na el más.

Má, Bíblia ta pâpia di un fin. Pur izénplu, el ta fla ma “mundu sta ta pasa”. — 1 Juan 2:17.

Pa bu sabe kuzê ki Bíblia krê fla óras ki el ta pâpia di fin di mundu, lé artigu “Fin di mundu sta kuazi ta txiga? Bíblia ta fla ma mundu ta ben kaba?”
Pa bu sabe kuzê ki Bíblia ta fla sobri kes kuza ki sta pa ben kontise na mundu, lé artigu “Ki ténpu ki fin di mundu ta ben?”

Kontinua ku un atitudi puzitivu

Bíblia pode djuda-nu mante un atitudi puzitivu, sikrê ku kes prubléma ki mundu sta ta pasa pa el. Modi ki el ta faze kel-li?

Bíblia ta da-nu konsedjus ki ta djuda-nu na nos dia-dia. (2 Timótiu 3:16, 17) Pur izénplu, lé artigu “Modi ki bu pode kontrola bus preokupason” pa odja modi ki Bíblia pode djuda-u mante un atitudi puzitivu sikrê bu sta pasa pa prublémas.
Bíblia ta da-nu un speransa pa futuru ki nu pode kunfia na el. (Romanus 15:4) El ta splika-nu kuzê ki nu pode spera ma ta kontise gósi i na futuru, i kel-li ta djuda-nu kontinua ku kunfiansa sikrê ku kes kuza ki sta kontise na mundu oji.

Pa bu prende más sobri Bíblia, nu ta konvida-u pa bu studa Bíblia di grasa ku ajuda di un algen.