Algun dia krimi pamodi ódiu ta ben kaba? — Kuzê ki Bíblia ta fla?

É tristi pamodi kada bês más pesoas sta ta faze krimi pamodi es ta ôdia otus algen. Pesoas ta ataka otus algen pamodi ses rasa, ses kultura, ses relijion, pamodi es é ómi ô mudjer ô pamodi otus razon. Kes tipu di krimi li ta poi pesoas ku txeu medu, es ta dadu pankada, es ta fika ku trauma i otus ti ta móre.

Bíblia dja flaba ma na nos ténpu pesoas ta sérba ‘runhu, ka ta amaba kuzas dretu’, i “sen amor pa ningen”. (2 Timótiu 3:1-5) Má algun dia krimi pamodi ódiu ta ben kaba? Kuzê ki Bíblia ta fla?

Modi ki krimi pamodi ódiu ta ben kaba?

Bíblia ta da-nu serteza ma Deus ta pode kaba ku maldadi i el ta ben faze kel-li.

• “Kes algen mau ta ben dexa di izisti. . . Má kes algen mansu ta ben toma kónta di téra, i es ta ben ten txeu alegria pamodi ta ben ten txeu pas.” (Salmu 37:9-11) Deus ka ta ben dexa kes algen violéntu kontinua ta prujudika otus algen.

• “[Deus] ta ben linpa tudu lágua di ses odju, i ka ta ben ten más mórti, nen tristéza, nen txoru nen dór.” (Apokalipse 21:4) Deus ta ben kaba ku kalker trauma ô prubléma ki pesoas ten pamodi kes kuza kasábi ki es pasa pa el.

• “Ta ben ten un resureison”. (Atus 24:15) Deus ta ben resusita milhons di algen, kel-li ta inklui kes ki matadu pamodi ódiu.

Modi ki nu pode lida ku ódiu?

Bíblia ta da-nu speransa pa futuru, tanbê el ta inxina-nu modi ki nu pode lida ku ódiu ki sta kada bês más txeu oji. Nu ta konvida-u pa bu djobe respósta di Bíblia pa kes pergunta inportanti li:

• Kuzê ki nu pode faze gósi pa nu vense kel ódiu ki ta poi pesoas ta faze violénsia? Odja kuzê ki Bíblia ta inxina na revista Sentinéla ku téma “Nu pode vense ódiu.”

• Pamodi ki Deus sta ta dexa tantu algen kontinua ta sufri? Odja un splikason klaru ku bazi na Bíblia na kel vídiu Pamodi ki Deus ta dexa maldadi ku sufrimentu kontise?.