Ajuda pa kes algen ki é ségu
Piskizadoris ta atxa ma na mundu interu ten uns 43 milhon di algen ki é ségu, i 295 milhon ki ka ta odja dretu.a Infilismenti txeu di kes algen li ta tratadu mariadu ô ku injustisa.
Kuzê ki Deus ta xinti pa kes algen ki é ségu? Kuzê ki Bíblia ta fla sobri es? I modi ki Tistimunhas di Jeová sta ta djuda-s?
Kuzê ki Deus ta xinti pa kes algen ki é ségu?
Bíblia ta mostra ma Jeováb ta preokupa di verdadi ku kes algen ki é ségu. El krê pa es tratadu ku justisa i pa es prende kes kuza ki el ta inxina. Tanbê el ta da-s un speransa sábi pa futuru.
Testu di Bíblia: “Ken ki poi un algen ségu perde na kaminhu é maldisuadu.” — Deuteronómiu 27:18.
Kuzê ki kel-li krê fla: Na ténpu antigu, kel Lei ki Deus daba se povu ta protejeba kes algen ségu di abuzu.
Testu di Bíblia: “Deus ta trata tudu algen igual”. — Atus 10:34.
Kuzê ki kel-li krê fla: Deus ta ama kes algen ki é ségu sima el ta ama kes algen ki ta odja.
Testu di Bíblia: Jizus “poi txeu ségu ta odja”. — Lukas 7:21.
Kuzê ki kel-li krê fla: Kantu Jizus staba na téra, el poi txeu algen ségu ta odja. Asi el mostra kuzê ki Reinu di Deus ta ben faze na futuru.
Testu di Bíblia: “Odju di kes algen ségu ta ben odja”. — Izaías 35:5.
Kuzê ki kel-li krê fla: Jeová ta promete ma ka ta dura, óras ki se Reinu ben governa téra, kes algen ségu ta ben bira ta odja.
Modi ki Tistimunhas di Jeová sta ta djuda kes algen ki é ségu?
Na mundu interu, Tistimunhas di Jeová ta pâpia ku kes algen ségu sobri kel speransa ki Deus ta da. Modi ki nu ta faze kel-li?
Nu ta faze Bíblia, publikasons pa studa Bíblia i vídius na txeu formatu pa djuda kes algen ségu i kes ki ka ta odja dretu, sima braili, létra grandi i gravason.
Tudu simana nu ta faze runion. Tudu algen pode sisti, i kel-li ta inklui kes algen ségu.
Nu ta oferese tudu algen oportunidadi di studa Bíblia ku ajuda di un instrutor.c
Nu ka ta kobra nada pa ninhun di kes kuza li. Pamodi? Pamodi Jizus fla: “Nhos resebe di grasa, pur isu nhos da di grasa tanbê.” — Mateus 10:8.
Tistimunhas di Jeová ta preokupa di verdadi ku kes algen ki é ségu. Kes ki krê adora Deus djuntu ku nos ta atxa bons amigu ki ta krê djuda-s. Odja spiriénsia di alguns Tistimunhas di Jeová ki é ségu.
Talita Alnashi, di Suésia, nase kuazi ségu. Odja modi ki se pai ku se mai inxina-l sobri Bíblia i modi ki el ku se família resebe amor i ajuda di ses amigu.
James Ryan, di Mérka, nase surdu i dipôs el bira ségu. Odja kuzê ki ta poi se vida ta ser filís i ta ten obijetivu.
Cynthia Pablo, di Filipinas, nase surdu i ségu. Modi ki irmons ku irmans na kongregason djuda-l duránti kes ténpu difísil di koronavírus? Odja kel-li na artigu “Kongregason sta ta djuda un irman ki é ségu i surdu duránti ténpu di koronavírus”.
Ki feraméntas i prugramas pa studa Bíblia ki nu ten?
Publikasons na braili. Dja nu faze Bíblia na braili, interu ô párti di el, na txeu língua. (Bu ta atxa un lista di kes língua na kuadru “Bíblia Traduson di Mundu Novu na braili”.) Tanbê txeu di nos publikason ki ten bazi na Bíblia sta disponível na braili. Alén di kel-li, nu faze un publikason pa djuda kes algen ki krê prende lé braili, ku téma Aprenda a Ler Braile. El fazedu pa djuda un algen ségu prende lé braili ku ajuda di un algen ki ta odja.
Pâpia ku un Tistimunha di Jeová pa bu resebe un publikason inprimidu na braili ô pidi un vizita.
Na jw.org, bu pode diskarega fixerus pa kes aparelhu iletrónikud ki ta konsigi lé i skrebe palavras na braili.
Publikasons ku létra grandi i na formatu dijital ki ta da pa omenta i diminui létra. Txeu di nos publikason fazedu ku létra grandi pa djuda kes algen ki ka ta odja dretu. Nos site fazedu di manera ki mésmu óras ki algen omenta tamanhu di pájina, el ta konsigi odja tudu kes kuza dretu. Tanbê na aplikativu JW Library ta da pa omenta ô diminui létra.
Pâpia ku un Tistimunha di Jeová pa bu resebe un publikason inprimidu ku létra grandi ô pidi un vizita.
Na jw.org, bu pode diskarega publikason ku létra grandi na formatu PDF, pa bu pode odja-s sima kes inprimidu.
Publikasons gravadu pa obi. Nu ta faze gravason di leitura di Bíblia Traduson di Mundu Novu na más di 200 língua. Tanbê nu ta faze gravasons di txeu publikason ki ten bazi na Bíblia. Txeu bês kes gravason ta inklui splikason di kuzê ki sta kontise na imajen.
Obi ô diskarega gravason na jw.org i na aplikativu JW Library.
Na jw.org, diskarega fixerus pa uza na otus sistéma,e sima kes ki ta faze leitura di ekran i kes ki ta lé livrus na formatu dijital.
Vídius ku gravason di kuzê ki sta kontise na es. Tistimunhas di Jeová ta faze kes tipu di vídiu li na más di 100 língua. Kes vídiu li ta djuda pesoas intende kuzê ki Bíblia ta inxina i faze sima es prende.
Odja izénplu di alguns di kes vídiu ku gravason di kuzê ki sta kontise na es:
Runions i prugramas spesial. Na mundu interu nu ten kongregasons, i tudu simana nu ta faze runion pa prende i adora Deus. Tanbê tudu anu nu ta faze otus runion más grandi pa nu prende más sobri Bíblia. Na kes runion ki ta mostradu vídiu, nu ta ranja manera pa kes algen ki meste, obi gravason di kuzê ki sta ta kontise na vídiu. Pa kes algen ki é surdu i ségu, sénpri ki ta da, un algen ta pega na ses mô pa faze sinal pa es pode intende runion ô prugrama. Nu gosta di resebe tudu algen dretu, i nu ka ta faze diferénsa di ningen.
Djobe un kongregason más pértu di bo.
Sabe más sobri nos kongrésus i asenbleias ki ta fazedu tudu anu.
Sisti Komemorason di mórti di Jizus, ki é kel dia más inportanti di anu.
José Luis Ayala ta mora na Méxiku. El nase surdu i dipôs ku 29 anu el bira ségu. Odja pamodi ki runion é inportanti pa el i modi ki el djudadu bira un bon instrutor di Bíblia.
a Na kel artigu li, un algen ki “ka ta odja dretu” krê fla un algen ki ten prubléma na odju ki ka ta da pa koriji i ki ta afeta se dia-dia. Tanbê palavra “ségu” alvês ta inklui algen ki ka ta odja dretu.
b Jeová é nómi di Deus. (Salmu 83:18) Odja artigu “Ken ki é Jeová?”
c Bu pode pidi pa un Tistimunha di Jeová mostra-u modi ki ta fazedu un studu di Bíblia.
d Kes aparelhu iletróniku é pikinoti i ta da pa leba-s pa kalker lugar. Normalmenti es ten alguns pontu ki ta subi i ta dixi pa ba ta forma létra na braili timenti kel algen ta ba ta lé. Tanbê alguns di kes aparelhu ta konsigi lé testu na vós altu. Pamodi kel-li, kes algen ségu ka meste ten txeu publikason na papel.
e Kes sistéma ta uza vós di konputador ô un gravason ki fazedu antis pa lé na vós altu. Kes tekinolojia li ta djuda kes algen ki é ségu uza kada párti di nos publikason.