Perguntas ki leitoris ta faze

Ki ténpu ki nasons ta ben fla “pas i suguransa”?

Sima nu odja ka dura li na un artigu “Perguntas ki leitoris ta faze” di Sentinéla,a ka ta dura Jeová ta ben poi na korason di “kes 10 txifri” (ki é tudu govérnu) “se pensamentu”. Kel-li krê fla ma es ta da ses puder i autoridadi pa kel “féra di kor brumedju”, ki é Nasons Unidu. Kel féra li tanbê ta txomadu di “imajen di kel féra”. (Apo. 13:14, 15; 17:3, 16, 17) Dipôs, “kes 10 txifri” i kel féra ki resebe ses puder, ta ben distrui relijion falsu na mundu interu. Má ki ténpu ki es ta ben fla “pas i suguransa”?b Ta ben ser antis ô dipôs di relijion falsu distruídu? — 1 Tes. 5:3.

Nu ka sabe na ki ténpu ki nasons ta ben fla “pas i suguransa.” Si nu sabia di tudu informason, nu ka meste fikaba sienti. Má Jizus fla ses sigidor txeu bês pa es “mante sienti.” (Mat. 24:42; 25:13; 26:41) Gósi nu ben odja alguns kuza ki Jeová uza apóstlu Paulu pa fla, na kel karta ki el skrebe pa kes irmon na Tesalónika.

Paulu skrebe: “Óras ki pesoas sta ta fla: ‘Pas i suguransa!’, nton, distruison ta ben riba di es dirapenti”. (1 Tes. 5:2, 3) Nos publikason ta flaba ma govérnus ta ben fla “pas i suguransa” poku ténpu antis di grandi tribulason, ki ta ben kumesa ku distruison di Babilónia Grandi, ki é tudu kes relijion falsu. Tanbê nu ta flaba ma óras ki es fla “pas i suguransa”, kel-li ta sérba sinal ma grandi tribulason staba kuazi ta kumesa.

Má dipôs di studa kel asuntu li ku kuidadu, ta parse ma ten otu manera di intende kel asuntu li. Talvês govérnus ta ben fla “pas i suguransa” dipôs ki relijion falsu distruídu. Pamodi ki nu pode fla kel-li? Odja alguns razon.

Relijion falsu ta involve na géra. Bíblia ta fla: “Na el [kel grandi prostituta, ki é Babilónia Grandi] atxadu sangi... di tudu kes ki matadu na téra.” (Apo. 17:1, 5; 18:24) Stória ta mostra ma relijion falsu ta apoia géra i txeu bês es ta involve na terorismu. Nton, envês di inpenha pa pas i suguransa, relijion falsu ta involve na géra i violénsia. Kel-li ta pô-nu ta faze un pergunta: ‘Nton govérnus ta ben fla “pas i suguransa” sô dipôs ki Babilónia Grandi distruídu?’ Kel-li pode kontise, má nu ka ten serteza.

Kuzê ki ta ben kontise dipôs ki govérnus di mundu fla “pas i suguransa”? Paulu fla: “Nton, distruison ta ben riba di es dirapenti.” (1 Tes. 5:3) Na kel versiklu li, apóstlu Paulu ta mostra ma pode leba poku ténpu pa govérnus di mundu distruídu dipôs ki es fla “pas i suguransa”, ô es pode distruídu lógu. Nton, pode ser ki kes govérnu di mundu ta fla “pas i suguransa” dipôs ki relijion falsu distruídu, i dipôs es ta distruídu dirapenti.

Modi ki povu di Jeová ta ben reaji óras ki kes kuza li kontise? Paulu fla: “Irmons, nhos ka sta na sukuru, asi pa kel dia ka panha nhos sima lus di dia ta panha un ladron”. (1 Tes. 5:4) Nton, si nasons fla “pas i suguransa” lógu dipôs ki relijion falsu distruídu, povu di Jeová ta fika ta sabe ma kes govérnu di ómi sta kuazi ta distruídu. Má, kes govérnu di mundu ta ben xinti suguru dipôs ki es fla “pas i suguransa” i es ka ta spera ma es ta ben distruídu. Sô ki distruison ta ben riba di es dirapenti, sima ladron, sen aviza.

Nton, kuzê ki nu sabe? Nu sabe ma já-já “kes 10 txifri” i kel féra ki ta ben resebe ses puder ta ben distrui relijion falsu. Kel-li ta ben ser komésu di grandi tribulason. Tanbê nu sabe ma na algun momentu nasons ta ben fla “pas i suguransa”. Ki ténpu kel-li ta ben kontise? Kel-li pode ben kontise antis di relijion falsu distruídu. Ô kel-li pode ben kontise dipôs ki kes pulítiku distrui Babilónia Grandi. Di kalker manera, nu ten ki spera pa nu odja kuzê ki ta ben kontise. Txeu bês, profesias di Bíblia ta intendedu midjór óras ki es sta ta kunpri ô dipôs ki dja es kunpri. — Konpara ku Juan 12:16.

Más inportanti gósi, é ka ki ténpu ki es ta ben fla “pas i suguransa”, má é nu kontinua lial pa Jeová. Nu debe “fika kordadu i mante sienti” pa nu pode sta ben priparadu, ka ta inporta modi ki profesias ta ben kunpri na futuru. — 1 Tes. 5:6.