Dizenvolve grandi ruspetu pa Deus sima Obadias

Obadias ta tomaba kónta di kaza di rei Akabi. Kel rei mau li dexa maldadi spadja na Israel pamodi adorason di Baal. Má simé, Obadias ta mostraba grandi ruspetu pa Jeová ‘désdi ki el éra jóven.’ (1 Reis 18:1-13) Nton kantu rainha Jizabel manda mata tudu kes proféta di Jeová, Obadias sabia ma el tinha ki sérba korajozu i faze algun kuza pa djuda-s. Sukundi un proféta dja éra prigozu, má Obadias sukundi 100 proféta i el ranja kumida pa es duránti un ténpu ki tevi un grandi fómi na país! Imajina modi ki ta sérba difísil faze kel-li sen txoma atenson di kes monti proféta falsu ki ta sirbiba rei i rainha. — 1 Reis 18:19.

Kuzê ki nu pode prende ku es ómi ki tinha grandi ruspetu pa Deus? Enbóra Obadias tinha medu di Akabi, el tinha grandi ruspetu pa Jeová. Kel-li da-l koraji pa el poi se vida na prigu pa el pode protejeba ses irmon. Si nu ta mora na un lugar undi nos óbra sta proibidu, nos tanbê nu meste dizenvolve grandi ruspetu pa Jeová. Kel kualidadi li ta da-nu forsa pa nu djuda nos irmons ku irmans ki sta ta pasa pa situasons difísil.