Fidjus é ‘un eransa di Jeová’

KUZÊ ki bu ta pensa na el óras ki bu ta obi palavra “eransa”? Talvês bu ta pensa na dinheru, un kaza ô otu kuza di txeu valor ki bu família ten dja ten txeu ténpu. Ka ta inporta é kuzê, un eransa é un kuza ki ten txeu valor pa bo i di serteza bu ta krê kuida dretu di el.

Bíblia ta fla ma fidjus é ‘un eransa di Jeová.’ (Sal. 127:3) Mai ku pai ki ta ama Jeová ta atxa ma ses fidju é un prezenti di txeu valor ki Jeová da-s. Es ta faze tudu kel ki es ta pode pa es da ses fidju kes kuza ki es meste pa es vive, kuida di ses saúdi, djuda-s ser filís i ten un amizadi fórti ku Jeová.

Má infilismenti, oji, alguns mai ku pai ka ta atxa ma ses fidju é un prezenti di Deus. (Isa. 49:15; 2 Tim. 3:1-3) Otus krê kuida di ses fidju, má é difísil pa es pamodi es ten más fidjus di ki kel ki es ta pode kuida di el. Kuzê ki ta poi alguns pai ku mai ta ten txeu fidju? Kuzê ki Jeová ta spera di pai ku mai? I modi ki pai ku mai pode kria ses fidju di manera ki es pode ten filisidadi na vida?

KUZÊ KI TA POI ALGUNS PAI KU MAI TA TEN TXEU FIDJU?

Preson di família i di otus algen. Na alguns lugar kes mai ku pai ki ten txeu fidju ta ruspetadu más txeu. Pamodi kel-li, alguns kazal pode xinti ma es ten ki ten más fidju di ki kel ki es ta konsigi kuida di el, sô pamodi kuzê ki ses família i otus algen ta spera di es.
Preokupason ku futuru. Na alguns lugar di mundu undi ten falta di kumida i di ospital i ki ten txeu duénsa alguns mai ku pai ta ten txeu fidju, asi pa alguns di es ka móre sédu. Otus kazal ta skodje ten txeu fidju, asi pa kes fidju kuida di es óras ki es sta algen di idadi. Kel-li ta kontise prinsipalmenti undi govérnu ka ta djuda kes algen di idadi.
Difikuldadi na ivita gravidês. Na alguns lugar, kes kazal ka ten mutu ramedi ô produtu pa djuda-s ivita un gravidês. Otus ten medu di modi ki kes ramedi ô produtu pode afeta ses saúdi pamodi es ka ten bon kualidadi. Inda otus ka ta pode kunpra kes kuza li pamodi es é karu dimás.a

KUZÊ KI JEOVÁ TA SPERA DI PAI KU MAI?

Un família sta kontenti ta pasa ténpu djuntu na un parki. Kel pai sta ta obi se fidju-fémia ki dja sta jóven ku atenson timenti el sta pâpia. I kel mai sta ta djuga bóla ku se fidju matxu. — Nhos pasa ténpu ku kada un di nhos fidju

Da bus fidju kes kuza ki es meste. Jeová da pai ku mai responsabilidadi di da ses fidju menór kes kuza material ki es meste. El ta spera pa pai ku mai sforsa pa da kada un di ses fidju kumida, ropa i un lugar pa es mora. Tanbê Jeová ta spera ma mai ku pai ta iduka ses fidju. Pur isu, mai ku pai ki ta sirbi Jeová ka ta manda ses fidju pa kes skóla ki es ta mora lógu la. Envês di kel-li, es ta krê pa ses fidju mora djuntu ku es ti ki es bira adultu, asi pa es pode da-s kel skóla ki es meste. Tanbê, es ta pasa ténpu ku kada un di ses fidju, asi pa es xinti protejedu, suguru i amadu. Má, Jeová ka ta spera pa mai ku pai ser riku. Na verdadi, Jeová skodje un kazal póbri, má ki éra trabadjador, pa kria se Fidju. — Mat. 13:55, 56; Luk. 2:24.

Prinsípiu di Bíblia: “Si un algen ka ta kuida di kes ki é di sel, i prinsipalmenti di kes ki ta faze párti di se família, é pamodi el nega fé i el é piór di ki un algen sen fé.” — 1 Tim. 5:8.

Jeová ta intende ma mai ku pai ta meste di ajuda óras ki es bira algen grandi. Na verdadi, un di kes manera ki fidjus pode da ses pai ku ses mai ónra, é garanti ma es ta ten kel ajuda ki es meste óras ki es bira algen grandi. (Ézu. 20:12; 1 Tim. 5:4) Má, Jeová ta fika kontenti óras ki el ta odja ma mai ku pai ta preokupa prinsipalmenti ku modi ki es ta kuida di ses fidju, envês di modi ki ses fidju ta ben kuida di es. — 2 Kor. 12:14.

Inxina bus fidju sobri Jeová. Pai ku mai ki ta sirbi Jeová tanbê ten responsabilidadi di inxina ses fidju ama Jeová i mostra ma es ta adora-l. Pa Jeová, kel kuza más inportanti ki mai ku pai debe faze, é inxina ses fidju sobri el. — Deut. 6:6, 7.

Prinsípiu di Bíblia: ‘Nhos kontinua ta kria nhos fidju di akordu ku disiplina i konsedju di Jeová.’ — Efé. 6:4.

JEOVÁ KRÊ DJUDA-U KRIA BUS FIDJU PA ES SER FILÍS

Un kazal sta ta pâpia na ses kaza. Es tene Bíblia abértu na un méza ses frenti. — Nhos pâpia sobri kantu fidju nhos krê ten

Faze planu pa futuru. Si nhos sta pensa na ten fidju, nhos pensa na nhos situason. Pur izénplu, nhos ta ba ten dinheru ki ta txiga pa da txeu fidju kumida, ropa i skóla? Si nhos ka ta pode, nhos pâpia ku kunpanheru sobri kantu fidju ta da pa nhos ten. Nhos lenbra ma nhos debe kuida di kada un di es di manera ki Jeová ta spera pa nhos faze. É klaru ki Jeová sabe ma nen tudu kuza na vida ta kontise sima nhos faze planu. (Ecl. 9:11) Má, el ta ba abênsua tudu sforsu ki nhos ta faze pa nhos ser kel tipu di mai ku pai ki el krê pa nhos ser.

Prinsípiu di Bíblia: ‘Planus di un algen ki ta sforsa, di serteza ta ten bons rezultadu, má tudu kes ki ta faze kuzas sen pensa, ta kaba na pobréza.’ — Pro. 21:5.

“Kal di nhos, ki si krê faze un tori, primeru el ka ta xinta i djobe kantu ki el ta kusta, asi pa el odja si kel ki el ten ta txiga pa tirmina-l?” — Lukas 14:28.

Poi Jeová na primeru lugar na bu família. Sirbi Jeová debe ser kel kuza más inportanti pa nhos família. Si dja nhos ten fidju, nhos tra ténpu pa djuda kada un di es ama Jeová. Nhos djuda nhos fidju presta atenson i prende na runion. Nhos faze adorason na família tudu simana. Nhos inxina nhos fidju modi ki es ta prega. Ka nhos spera pa nhos fidjus más grandi, otus algen di família ô kalker otu algen faze kes kuza li. Kes-li é nhos responsabilidadi. Ta meste txeu ténpu i sforsu pa djuda nhos fidju ama Jeová. Má nhos ta ben xinti filís di odja nhos fidju ta sirbi Jeová ku alegria.

Prinsípiu di Bíblia: “N ka ten alegria más grandi ki kel-li: obi ma nhas fidju sta kontinua ta anda na verdadi.” — 3 Juan 4.b

Kunfia na Jeová. Ka ta inporta si nhos sta pensa na ten fidju ô si dja nhos ten fidju, nhos pode ten serteza ma kes prinsípiu di Jeová é más inportanti di ki kuzê ki pesoas na undi ki bu ta mora ta spera di nhos.

Imajens: 1. Un pai ku mai sta xintadu djuntu ku ses fidju duránti runion. Ses fidju sta labanta mô pa da komentáriu. 2. Un família sta djuntu na pregason. Kel pai ta prega djuntu ku ses fidju-fémia, timenti kel mai sta djuntu ku ses dôs fidju más pikinoti. — Ta iziji ténpu i sforsu pa inxina fidjus ama i sirbi Jeová

Si nhos skodje ten poku fidju, nhos kunfia ma simé Jeová ta ba da nhos kes kuza ki nhos meste óras ki nhos bira algen grandi. Ka nhos odja nhos fidju sima un “refórma pa óras ki nhos bira algen grandi.” Nhos ka meste fika preokupadu si ningen ka ta ba kuida di nhos. Jeová promete kuida di nhos i sénpri el ta kunpri se promésa. — Juz. 23:14.

Prinsípiu di Bíblia: ‘Kunfia na Jeová di tudu bu korason; ka bu kunfia na bu própi intendimentu. Lenbra di el na tudu bus kaminhu, i el ta bira-u bus kaminhu rétu.’ — Pro. 3:5, 6.

‘Ami éra jóven i gósi N sta algen grandi, má nunka N ka odja un algen justu bandonadu, nen se fidjus ta djobe pon.’ — Sal. 37:25.

“Nhos kontinua ta buska Reinu i justisa di Deus primeru, i nhos ta dadu tudu kes otu kuza.” — Mat. 6:33.

Fidjus é un prezenti di txeu valor ki Jeová da mai ku pai. Jeová ta fika txeu kontenti óras ki el ta odja mai ku pai ta kuida di ses fidju di manera ki el ta krê. Ku amor es ta da kada un di ses fidju kes kuza ki es meste, asi pa kada un di ses fidju kria filís i pa es ama Jeová. Pur isu, es ta disidi ku kuidadu kantu fidju ki es ta ten. Pa es, kel kuza más inportanti é sigi kes prinsípiu di Jeová, ka opinion di kes algen di lugar undi ki es ta mora. Di kel manera li, es ta mostra ma es ta ama ses fidju i ma es é ‘un eransa di Jeová.’

Es ka rapende

Mai ku pai ta ten prubléma óras ki es ta skodje ten poku fidju? Kel-li é un pergunta ki txeu pai ku mai ki ta vive na lugar undi ten falta di dinheru ta faze. Odja kuzê ki alguns xéfi di família ki ta sirbi Jeová i ki ta vive na alguns di kes país la fla sobri kel asuntu li.

Otus algen ta faze-u preson pa bu ten txeu fidju?

“Sin, ti mésmu alguns algen na kongregason. Un kazal fla-nu: ‘Pamodi ki nhos ten sô un fidju? Li na Áfrika, si bu ten sô un fidju é sima si bu ka ten ninhun. Si bu ten dôs é sima si bu ten sô un.’ Mésmu dipôs ki nu tevi más un fidju, es kontinua ta faze-nu preson pa nu ten más fidju.” — Jeremias

Bu tevi algun prubléma na vida pamodi bu ka tevi txeu fidju?

“Nau. Na verdadi, pamodi N skodje ten poku fidju, mi ku nha mudjer nu ta konsigi garanti pa kada un di nos na família ten kes kuza ki nu meste pa vive i más inportanti inda, pa nu ten un amizadi fórti ku Jeová. N kria na un família grandi, i N odja modi ki foi difísil pa nha pai ku nha mai daba nos kes kuza ki nu mesteba i poba nos na skóla.” — Jeremias

Modi ki bus fidju ta xinti pamodi nhos disidi ka ten txeu fidju?

“Nhas fidju ta xinti filís i es ta pode odja ma es ka ten txeu di kes prubléma ki otus mininu ki ten txeu irmon ta ten pamodi ses mai ku ses pai nen sénpri ka ta pode kuida dretu di es.” — Filipi

“Timenti nos fidjus staba ta kria, es ta xintiba filís pamodi es ta xintiba protejedu i amadu. Sénpri nu ta staba djuntu ku irmons i irmans ki ta ama Jeová txeu i ki ta daba un bon izénplu. I es inkoraja-nu pa nu faze más pa Jeová. Oji nu ta odja nos fidjus ta sigi ses bon izénplu.” — Karlus

Kal ki é kes bon rezultadu ki bu tevi pamodi bu disidi ten poku fidju?

“Pamodi disizon ki nu toma foi más fásil da nos família kes kuza ki es meste. N tinha un trabadju ki N ta ganhaba dretu. Má, dja ten três anu ki N perde kel trabadju. Dja ki nos família éra pikinoti, nu ka mesteba ten txeu dinheru pa nu ten tudu kes kuza ki nu mesteba. Pur isu, foi más fásil lida ku kel situason.” — Jeremias

“Pamodi nu ka tevi txeu fidju, nu konsigi da kada un di nos fidju kes kuza ki es mesteba pa vive i pa djuda-s ten un amizadi fórti ku Jeová. Tanbê, nu konsigi ba prega na lugaris undi ten más nisisidadi. É más fásil nu pasa ténpu ku kada un di nos fidju i kuida di es. Tudu nos fidju ta sirbi Jeová i es ten métas na sirvisu di Jeová.” — Lenadi

Kuzê ki bu ta gostaba di fla otus pai ku mai?

“N odja ma kuzê ki Bíblia ta fla na Salmo 34:10b, é verdadi. ‘Kes ki ta buska Jeová ka ta ben xinti falta di ninhun kuza bon.’ Jeová da nha família tudu kuza ki es mesteba.” — Rafael

a É kada kazal ki debe disidi kantu fidju ki es ta ten, ki ténpu ki es ta ten fidju i si es ta ba uza algun ramedi ô produtu pa ivita gravidês. Ningen ka debe julga disizons di kel kazal. (Rom. 14:4, 10-13) É klaru ki nunka es ka ta uzaba un ramedi ô un produtu ki ta faze abortu. Alén di kel-li, óras ki maridu ku mudjer ta toma kes disizon li, es debe lenbra di kel konsedju di 1 Koríntius 7:3-5.

b Na kel versiklu li, “fidju” sta ta pâpia di alguns disiplu ki Juan inxina verdadi. Má, mai ku pai ta xinti di mésmu manera óras ki ses fidju ta sirbi Jeová.