Kuzê ki ta ben kontise ku relijion? — Kuzê ki Bíblia ta fla

Bu sta diziludidu ô ti mésmu disgostadu ku relijion? Enbóra relijion dja faze alguns kuza dretu na alguns lugar i pa alguns algen, tanbê el traze txeu prubléma na mundu. Un Ensiklopédiaa ta fla ma alguns di kes piór géra ki dja kontise na mundu é pamodi relijions ten krénsas diferenti di kunpanheru. Xéfis di relijion txeu bês ta uza relijion ka pa adora Deus, má pa apoia alguns ideia ki ten aver ku pulítika. Inda otus xéfi di relijion ta faze abuzu seksual, es ta furta i es ta tenta sukundi kes krimi li.

Si bu sta diziludidu ku relijion, talvês bu ta pergunta kuzê ki Deus ta atxa di kel-li. Bíblia ta mostra ma Deus ta kondena maioria di relijion pamodi kuzas ki es ta faze. Tanbê, el ten profesias ki ta mostra kuzê ki el ta ben faze ku es. Bíblia ta uza alguns konparason ki ta mostra kuzê ki Deus ta ben faze ku tudu relijion na mundu, ki nunka ka fazedu antis.

Kuzê ki Bíblia ta fla ma ta ben kontise ku relijion?

Profesia: Livru di Apokalipse ta fla ma ten un prostituta ki ta txomadu di Babilónia Grandi. Kel prostituta sta xintadu riba di un féra di kor brumedju. Dipôs, kel féra ta ben fika kóntra kel prostituta i el ta mata-l. — Apokalipse 17:3, 5, 16.

Kuzê ki kel-li krê fla: Kel prostituta, ki é Babilónia Grandi, ta reprizenta tudu kes relijion falsu ki ten na mundu, kel-li krê fla, kes relijion ki Deus ta kondena.b Kel féra di kor brumedju ta reprizenta Nasons Unidu.c Dja ki kel prostituta sta xintadu riba di kel féra di kor brumedju, kel-li ta mostra ma relijion falsu sta ta tenta influensia ô ti mésmu kontrola Nasons Unidu. Dja ki kel féra ta ben mata kel prostituta, kel-li ta mostra ma Nasons Unidu i tudu kes otu nason ki ta apoia-l, ta ben fika kóntra tudu relijion falsu ki ten na mundu i es ta ben distrui-s. Kel-li é un kuza ki ta ben fika na stória.

Modi ki relijion falsu ta ben distruídu?

Profesia: “Kes 10 txifri ki bu odja i kel féra ta ben ôdia kel prostituta. Es ta ben toma-l tudu kuza ki el ten i es ta. . . kema-l tudu na lumi. Pamodi Deus pô-s na korason [kel-li krê fla, korason di kes governanti di mundu] kel dizeju di faze kel ki sta na se pensamentu, sin, pa es kunpri kel mésmu pensamentu ki es ten di da féra ses reinu. . . É pur isu ki se pragas ta ben sô na un dia: mórti, txoru i fómi. I el ta ben kemadu tudu na lumi, pamodi Jeová Deus,d kel ki ta julga-l, é fórti.” — Apokalipse 17:16, 17; 18:8.

Kuzê ki kel-li krê fla: Deus ta ben poi nasons ta ten “se pensamentu”. El ta ben pô-s ta da “ses reinu”, ô ses puder, pa Nasons Unidu. Nton, ku kel puder ki Nasons Unidu ta ben resebe, el ta ben distrui tudu relijion falsu ki ten na mundu. É sima ki kel-li ta ben kontise “sô na un dia”, kel-li krê fla ma el ta ben kontise faxi i maioria di pesoas ta ben fika spantadu pamodi es ka staba ta spera kel-li. — Apokalipse 18:21.

Pamodi ki kes relijion falsu ta ben distruídu?

Profesia: “Se pekadus dja djunta ti ki txiga séu, i Deus lenbra di kes injustisa ki el faze.” — Apokalipse 18:5.

Kuzê ki kel-li krê fla: Relijion falsu dja faze txeu kuza ki Deus ka gosta, dja ten senténas i senténas di anu. Repara alguns di “se pekadus” ki ta poi Deus ta fla ma el ta ben distrui-l:

Mete na pulítika. Jizus inxina ses sigidor pa es ka mete na pulítika, má pa es poi ses kunfiansa na Reinu di Deus, ki é un govérnu na séu, ki ta ben governa téra na lugar di govérnus di ómi.e (Daniel 2:44; Mateus 6:9, 10; Juan 6:15; 18:36) Relijion falsu sta ta insentiva pesoas pa es kunfia na govérnus di ómi. Pamodi el ta mete na pulítika di tal manera, envês di ser lial pa Deus, kel profesia na Apokalipse ta fla ma Babilónia Grandi é kulpadu di “konportamentu seksual mariadu”, i pur isu el ta txoma-l di “kel grandi prostituta”. — Apokalipse 17:1, 2; Tiagu 4:4.



Violénsia. Relijion falsu é kulpadu di mórti di “di tudu kes ki matadu na téra.” (Apokalipse 18:24) Txeu relijion ka ta insentiva pesoas pa sta na pas. Alguns ti mésmu ta apoia i ta insentiva pesoas pa bai géra i pa faze terorismu.



Ganánsia. Relijion falsu ta “vive na un luxu sen vergónha.” (Apokalipse 17:4; 18:7) Txeu relijion ta uza ses puder i kes amizadi ki es ten pa es ten txeu rikéza. Ses ganánsia ka ta agrada Deus. — Titu 1:7.



Mintira. Relijion falsu ta inxina pesoas kridita i faze kuzas ki é kóntra kel ki Bíblia ta inxina.f Pamodi txeu kuza ki es ta faze i ki es ta inxina ta ingana pesoas i ta dizonra Deus, Bíblia ta txoma-l di “mai di. . . kes kuza nojéntu di téra.” — Apokalipse 17:5; 18:23.

Tudu relijion ta ben ser distruídu?

Nau. Livru di Apokalipse ta pâpia di un grupu di algen, di tudu párti di mundu, ki ta txomadu di “un monti di algen”. (Apokalipse 7:9) Bíblia ta fla ma es sta “bistidu ku ropa branku kunpridu,” kel-li krê fla ma es ta adora Deus di manera ki el ta krê. Es ta salva na “grandi tribulason”, ki é kel ténpu ki Bíblia ta fla ma tudu relijion falsu i tudu kes otu inimigu di Deus ta ben ser distruídu. (Apokalipse 7:13, 14; 19:11, 19-21) Kel monti di algen ki sta bistidu di ropa branku kunpridu ta faze párti di relijion verdaderu, ki é kel ki ta ben kontinua pa tudu ténpu.

Modi ki sabe ma relijion falsu ta ben distruídu ta pô-u ta xinti?

Sabe ma Deus ka ta aprova kes kuza mariadu ki relijion falsu sta ta faze pode konsola-u. Bu pode ten speransa pa futuru, pamodi bu sabe ma já-já tudu kes relijion ki ta dizonra Deus i ki ta poi pesoas ta sufri ta ben kaba pa tudu ténpu.

Tanbê bu pode ten serteza ma ten un manera di adora Deus sima el ta krê. Bíblia ta fla ma ‘adoradoris verdaderu ta adora Deus ku spritu i verdadi. Pamodi, na verdadi, Deus sta ta djobe kes algen li pa adora-l.’ (Juan 4:23) El ta fla-s: “Nhos sai di el [di Babilónia Grandi] nha povu, si nhos ka krê djunta ku el na se pekadus i si nhos ka krê resebe párti di se pragas.” (Apokalipse 18:4, 5) Sin, Deus sta ta konvida pesoas pa adora-l ku bazi na verdadi ki sta na Bíblia. (1 Timótiu 2:3, 4) El promete kes ki seta kel konviti li ma es ta ben vive pa tudu ténpu. — 1 Juan 2:17.