Pripara pa kes dizafiu ki ta ben dipôs di batismu

1-2. Ki kuzas ki nu pode faze pa nu pripara pa kes prubléma ki nu pode pasa pa el dipôs ki nu batiza? Da un izénplu.

NU SABE ma na kel mundu li nu ta ten prublémas. Jizus fla ses sigidor: “Ka ta da pa inpidi pa pédras di tropesu ka ben”. (Mat. 18:7) Pamodi kel-li nu meste sta priparadu pa pasa pa prublémas i kel-li ta inklui prublémas ki nu pode ten ku nos irmons i irmans.

² Pensa na kel-li. Povu di Jeová é insentivadu pa pripara pa dizastris na naturéza. Modi ki nu pode pripara? Primeru, nu meste sabe ki tipu di dizastri pode kontise na lugar undi ki nu ta vive. Kel-li é inportanti, prinsipalmenti si ten poku ténpu ki nu sta na kel lugar. Óras ki dja nu sabe ki tipu di dizastri ki pode kontise, nu ta pode faze planu di kuzê ki nu meste faze pa nu pode salva i ki kuzas nu meste ten si algun di kes dizastri kontise. (Pro. 21:5) Di mésmu manera, é bon nu sabe ki tipu di prublémas ki nu pode pasa pa el dipôs ki nu batiza. Kel-li ta djuda-nu sabe kuzê ki nu ta faze si nu pasa pa alguns di kes prubléma. Di kel manera li, nu ta konsigi lida midjór ku kel prubléma i nu ta kontinua ku un amizadi fórti ku Jeová. (Sal. 17:5) Na kel studu li, nu sta ben odja três prubléma ki nu pode pasa pa el i modi ki nu pode pripara pa kada un di es.a

SI UN IRMON Ô IRMAN OFENDE-U

3. Ki prubléma nu pode pasa pa el na kongregason dipôs ki nu batiza?

³ Bu ta lenbra modi ki bu xinti primeru bês ki bu sisti un runion i bu odja amor entri povu di Jeová? Bu fika konvensidu ma bu atxa verdadi? (Juan 13:35; Kol. 3:12) É kel-li ki Biankab xinti. Má dipôs ki el batiza kontise un kuza ki el ka staba ta spera. El fla: “Un irman trata-m mariadu. Tanbê N repara ma el ta flaba kuzas negativu sobri otus irmon na kongregason. N ka staba ta spera un kuza di kel-li. N prende ma Tistimunhas di Jeová ta sforsa pa mante pas i pa mostra amor.” É klaru ki irmons ku irmans ta sforsa pa ten kes kualidadi ki Jeová gosta, má es é ka perfeitu. (Efé. 4:23, 24; 1 Juan 1:8) Pur isu, alvês es ta fla ô faze kuzas ki ta magua-u. (Tia. 3:8) É tristi ma alguns ki pasa pa kes prubléma li para di sirbi Jeová.

4. Kuzê ki bu pode faze gósi pa pripara si un irmon ô un irman ofende-u? (Efézius 4:32)

⁴ Kuzê ki bu pode faze gósi asi óras ki un irmon ô irman ofende-u pa bu ka para di sirbi Jeová? Sforsa pa bu aplika sénpri kel konsedju ki sta na Efézius 4:32. (Lé.) Si bu faze bu midjór pa bu mostra bondadi i konpaxon di serteza kel-li ta djuda-u ivita txeu prubléma ku otus algen. Poi méta di sta sénpri prontu pa púrdua otus algen si es fla-u ô es faze algun kuza ki ofende-u. Kuzê ki ta djuda-u faze kel-li? Lenbra ma txeu bês bu ta pidi Jeová pa purdua-u i bo é gratu pamodi el ta faze kel-li. (Mat. 6:12) Óras ki bu ta pensa na kantu bês Jeová dja purdua-u ta ser más fásil bu púrdua otus algen.

5. Ki prinsípiu di Bíblia pode djuda-nu óras ki un algen ta ofende-nu? (Provérbios 19:11) (Odja imajens.)

⁵ Lé Provérbios 19:11. Bíblia ta fla ma si nu ten sabedoria i intendimentu,c kel-li ta djuda-nu ten paxénxa óras ki otus algen ta ofende-nu. Kel prinsípiu di Bíblia li sta ta djuda Ilda ki dja ten alguns anu batizadu. El fla: “Óras ki N ta odja irmons ku irmans ta aji di un manera ki ta pô-m ta xinti tristi ô ta ofende-m, primeru N ta pensa na Provérbios 19:11. N ta tenta intende ses situason, kuzas ki es pasa pa el i ta tenta pensa na pamodi ki es aji di kel manera la. Tanbê N ta konvida-s pa nu sai na pregason djuntu. Faze kel-li ta djuda-m konxe-s midjór.” Kel-li é un bon konsedju. É bon nu konxe nos irmons i irmans midjór gósi. Faze kel-li ta djuda-nu intende-s midjór i si algun di es fla ô faze kuzas ki magua-nu, ta ser más fásil nu purdua-s.

6. Kuzê ki pode djuda-nu ten bons amizadi na kongregason?

⁶ Kuzê ki bu pode faze pa bu pode ten un bon amizadi ku irmons i irmans na kongregason? Sima bu ta ba ta konxe bus irmon ku irmans sforsa pa bu konsentra na ses bons kualidadi. (Konpara ku Provérbios 10:12; Rom. 12:10; Flp. 2:2, 3) Repara modi ki faze kel-li djuda Mark ki é un irmon ki ten poku ténpu batizadu. Kantu el kumesa ta pasa más ténpu ku irmons i irmans na kongregason, el kumesa ta odja ses inperfeison. Kuzê ki djuda Mark ka tropesa kantu el odja fadjas na ses irmon ku irmans? El fla: “N da kónta ma N staba ta konsentra na fadjas pikinoti ki ka éra nada konparadu ku kes kuza mariadu ki pesoas na mundu ta faze. Fika klaru pa mi ma N ka debe konsentraba na érus pikinoti di nhas irmon ku irmans. Envês di kel-li, N fika ta konsentra na ses bons kualidadi.” Si bu faze di mésmu manera, kel-li ta djuda-u ten bons amizadi na kongregason.

XINTI FALTA DI KUZAS KI BU DEXA PA TRAS

7. Kuzê ki pode pô-nu kumesa ta dizeja kes kuza ki nu dexa pa tras?

⁷ Kantu bu bira Tistimunha di Jeová, di serteza bu fika kontenti di ka faze párti di mundu di Satanás más. Talvês bu atxa difísil kridita ma algun algen ta krê voltaba pa el. Má simé, kantu bu pasa pa prublémas difísil talvês bu kumesa ta lenbra ô ti mésmu ta dizeja alguns di kes kuza ki bu dexa pa tras pa bu pode kumesa ta sirbi Jeová. (Konpara ku Nunbru 11:4-6.) Pur izénplu, talvês alguns irmon disidi dizisti di un bon karera ki ta tomaba es txeu ténpu. Otus, kantu es kumesa ta studa Bíblia, es tevi ki larga amigus ki es gostaba txeu. Inda otus tevi ki sforsa pa larga maus ábitu ki es gostaba, má ki Jeová ta ôdia. Imajina modi ki Jeová ta fika tristi si un di ses sérvu dexaba algun kuza ki el bandona na pasadu pô-l ta para di sirbi-l! Kuzê ki bu pode faze gósi asi pa nunka bu ka volta pa kes kuza ki bu dexa pa tras, ka ta inporta kuzê ki kontise?

8. Kuzê ki nu ta prende ku izénplu di Abraon ku Sara?

⁸ Bíblia ten txeu izénplu di sérvus di Jeová ki pode kumesaba ta xinti falta di kes kuza ki es dexa pa tras. Pur izénplu, Abraon ku Sara obi ku Jeová i es dexa Ur ki éra un sidadi bunitu i ki tinha muralhas fórti, pa es bai vive na ténda. (Ebr. 11:8, 9) Talvês, di vês en kuandu es ta lenbraba di kel vida sábi ki es tinha na Ur. Má si es “kontinuaba ta lenbra” ô ta xinti sodadi di kes kuza ki es dexaba pa tras, es pode xintiba tentadu na volta pa kes kuza. Envês di kel-li, es konsentra na futuru. — Ebr. 11:15, 16.

9. Kuzê ki apóstlu Paulu ta atxaba di kes kuza ki el dexa pa tras? (Filipensis 3:7, 8, 13)

⁹ Apóstlu Paulu muda se vida pa sirbi Jeová. Antis di el bira un kriston, el ta studaba ku un instrutor di lei famozu ki txomaba Gamaliel. (Atus 22:3) Paulu pode biraba un xéfi di relijion judeu inportanti. (Gál. 1:13, 14) Má kantu el seta notísias sábi, el dexa tudu kes kuza pa tras. Dipôs ki el bira kriston, se vida sénpri foi fásil? Klaru ki nau. El sotadu, el podu prézu i se própi povu ta odiaba el. (2 Kor. 11:23-26) Si el konsentraba sô na kes prubléma i el konparaba se vida ku kel vida ki el tinha antis di el bira un kriston, el podia atxaba má antis se vida éra midjór. Envês di kel-li, Paulu konsentra na kel priviléjiu grandi ki el tinha di sirbi Jizus Kristu i na kel grandi rekonpensa ki el ta ben resebeba na futuru. Paulu tinha serteza ma sigi Jizus tinha mutu más valor di ki kalker kuza ki el dexa pa tras. — Lé Filipensis 3:7, 8, 13.

10. Na kuzê ki sénpri nu debe pensa? (Markus 10:29, 30) (Odja imajens.)

¹⁰ Kuzê ki nu ta prende? Si bu kumesa ta pensa na kes kuza ki bu dexa pa tras pa bu pode biraba un sérvu di Jeová, sforsa tanbê pa bu pensa na pamodi ki bu dexa-s pa tras. (Ecl. 7:10) Konpara kuzê ki bu dexa pa tras ku kes benson ki bu ten pamodi bu sta ta sirbi Jeová. Bu ten un amizadi fórti ku Jeová Deus. (Pro. 3:32) Bu ten txeu irmon ku irmans na kongregason i na mundu interu ki ta ama-u txeu. (Lé Markus 10:29, 30.) I pensa na kes kuza bunitu ki Jeová promete da-u na futuru! (Isa. 65:21-23) Si sénpri bu pensa na kes benson ki bu ten pamodi bu sta ta sirbi Jeová, ta ser más difísil bu xinti falta di kes kuza ki bu dexa pa tras.

11. Kuzê ki bu prende ku izénplu di Rosemary?

¹¹ Un irman ki txoma Rosemary batiza ku 50 anu. Repara kuzê ki el faze pa el ivita konsentra na kuzê ki el dexa pa tras. El fla: “Na komésu, kantu un bira un Tistimunha di Jeová, N ta xintiba tristi na ténpu di Natal, dja ki na Natal N ta pasaba ténpu sábi ku nha família. N gostaba di da nhas família prezenti. N ta fikaba kontenti óras ki N ta odjaba nhas fidju i nhas nétu na ladu di arvi di Natal ku róstu ta brilha óras ki es ta abriba kes prezenti ki N daba es.” Kuzê ki djuda Rosemary? El fla: “N tevi ki prende gosta di pasa ténpu ku nha família na otus momentu. Tudu anu, na un dia diferenti, N ta konvida nha família pa pasa dia djuntu mi. N ta da-s prezenti i N ta fla-s modi ki N ta ama-s.” Rosemary tanbê pasa pa otu prubléma. El fla: “Kantu N bira un Tistimunha di Jeová, nhas amigu bandona-m. Alvês N ta xintiba sodadi di es i N ta xintiba mi sô.”d Kuzê ki djuda-l? El kumesa ta konvida irmans diferenti pa es sai djuntu na pregason. El fla: “Kantu N faze kel-li, N ranja novus amigu ki N ta ama i ki N ta da valor.” Kuzê ki bu pode prende ku izénplu di Rosemary? Si dja bu ka ta faze algun di kes kuza ki bu ta gostaba antis di bu kumesa ta sirbi Jeová, lenbra ma bu pode ten otus kuza ki é mutu más midjór ki pode pô-u ta ser filís di verdadi mésmu gósi. (Flp. 4:8, 9) Lenbra ma Jeová sénpri ta da-u mutu más di ki kel ki bu perde.

SI OTUS ALGEN PARA DI SIRBI JEOVÁ

12. Kuzê ki pode kontise na kongregason ki pode ser difísil nu lida ku el?

¹² Kantu bu bira un Tistimunha di Jeová bu xinti aliviadu di ka faze párti di kel mundu mau li. Gósi, bu ta faze párti di kel úniku grupu di pesoas ki ta inxina verdadi i ki ta tenta faze kel ki é dretu. (Isa. 65:14) Má simé, alvês, un algen na kongregason pode faze un pekadu gravi. I si kel algen ka rapende, el pode ti tradu di kongregason. (1 Kor. 5:13) Odja modi ki un situason sima kel-li poi un irman ki txoma Samar ta xinti. El fla: “Poku ténpu dipôs ki N batiza, un ansion faze un pekadu gravi i el tradu di kongregason. N fika kuazi ta tropesa pamodi N ka staba ta konsigi kridita ma un ansion faze un pekadu kóntra Jeová i kóntra kongregason.” É klaru ki sénpri nu debe kunfia ma nos irmons ku irmans ta ama Jeová i ma es krê kontinua fiel pa el. (1 Kor. 13:4, 7) Má infilismenti, tudu anu, alguns algen ta tradu di kongregason. I pode ser más difísil pa bo inda si un amigu, un algen di bu família ô un algen ki bu ten txeu ruspetu pa el skodje bandona Jeová.

13. Kuzê ki nu pode faze gósi pa nu ka tropesa si un algen di nos família ô un amigu disidi bandona Jeová?

¹³ Kuzê ki bu pode faze gósi pa bu pripara, asi pa bu ka tropesa si un algen di bu família ô un amigu skodje bandona Jeová? Kontinua ta bira bu amizadi ku Jeová más fórti. (Tia. 4:8) Lenbra ma bu disidi sirbi Jeová, ka ta inporta kuzê ki otus algen faze. Pur izénplu, enbóra txeu bês nu ta adora Jeová djuntu na família i na kongregason, tanbê nu meste ora i lé Bíblia nos sô. — Sal. 1:2; 62:8.

14. Kuzê ki nu ta prende ku izénplu di apóstlu Pedru? (Juan 6:66-68)

¹⁴ Tanbê nu pode tra un lison di modi ki apóstlu Pedru reaji kantu txeu disiplu para di sigi Jizus. Talvês própi Pedru fika konfuzu na kel ténpu. Má repara kuzê ki el fla na Juan 6:66-68. (Lé.) Envês di konsentra na kuzê ki otus algen faze, Pedru konsentra na kes verdadi ki Jizus inxinba el. Pamodi kel-li, Pedru ka tropesa. Di mésmu manera, sikrê otus algen para di sirbi Jeová, lenbra ma é kel-li ki é organizason ki ta inxina verdadi sobri Jeová. Kontinua ta da valor pa kes kuza bunitu ki bu prende i kontinua fiel pa Jeová! Samar, ki dja nu papiaba di el antis, fla: “Sénpri N ta lenbra ma sô pamodi un algen faze un kuza mariadu, kel-li ka krê fla ma tudu algen na kongregason ta faze kuzas mariadu ô ma kes kuza ki orgnizason ta inxina é mariadu. I Jeová é un Deus ki ten bons kualidadi, ka ta inporta kuzê ki umanus faze.”

15. Kuzê ki bu prende ku spiriénsia di Emily?

¹⁵ Odja izénplu di Emily. Sô un simana dipôs ki el batiza, se mai larga se família i el tradu di kongregason. Emily fla: “Nunka N ka imajinaba ma kel-li ta kontiseba. Kel-li é kuza más difísil ki dja N pasa pa el i N tene txeu sodadi di nha mai.” Kuzê ki sta ta djuda Emily? El fla: “N ka sta mi sô. Nha pai sta ta djuda-m i kes irmon na kongregason sta ta ser sima un família pa mi. Tudu algen ki ta sirbi Jeová sta ta lida ku un prubléma. É pur isu ki é inportanti nu kontinua amigu di kunpanheru i inkoraja kunpanheru.” (1 Ped. 5:9) Bu ka meste spera pasa pa un prubléma pa bu bira bu amizadi ku irmons i irmans más fórti. Sforsa pa faze kel-li gósi. Si bu faze kel-li, ka ta inporta kuzê ki kontise, é más difísil bu xinti bo sô.

16. Kuzê ki nu debe lenbra di el? (Odja imajen.)

¹⁶ Lenbra tanbê ma Jeová ta disiplina kes algen ki el ta ama. (Ebr. 12:6) El krê pa tudu algen ki tradu di kongregason volta otu bês. (2 Ped. 3:9) Si algun algen di bu família ô amigu tradu di kongregason, bu pode ten serteza ma ansions ta faze tudu kel ki es ta pode pa djuda kel algen volta pa Jeová. — 2 Tim. 2:24, 25.

17. Di kuzê ki bu pode ten serteza?

¹⁷ Dja nu pâpia sô di alguns prubléma ki nu pode pasa pa el dipôs ki nu batiza. Alguns di es pode da-u medu. Má bu pode kontinua ta sirbi Jeová di manera fiel. Ten txeu kuza ki bu pode faze pa bu pripara. I lenbra sénpri ma Jeová ta ba djuda-u kontinua fiel pa el. Dja el sta ta djuda-u i el krê kontinua ta djuda-u pa tudu ténpu! (1 Ped. 5:10) Sénpri el ta da-u forsa i el ta kontinua ta djuda-u agenta firmi, ka ta inporta ki prubléma ki bu pasa pa el. Si bu kontinua ta seta ajuda di Jeová, ka ten ninhun prubléma ki pode pô-u ta para di sirbi-l! — Sal. 119:165; Rom. 8:38, 39.