Kontinua ta sforsa pa bu pode batiza

1. (a) Kuzê ki nu ta ganha óras ki nu ta batiza? (b) Kuzê ki nu sta ben odja na kel studu li?

DJA bu da bu vida pa Jeová i dja bu batiza? Si sin, kel-li krê fla ma bu pidi Jeová pa púrdua bus pekadu i bu fla-l ma bu krê sirbi-l djuntu ku kes algen ki ta faze se vontadi. (1 Ped. 3:21) Tanbê, kantu bu faze kel-li bu da un bon izénplu pa kes algen na bu kongregason ki inda ka batiza. Pur isu, bu toma un bon disizon! Má, i si inda bu ka batiza? Di serteza bu ta ama Jeová i bu krê faze se vontadi. Bu sabe ma pa bus pekadu purduadu i pa bu ten un amizadi fórti ku Jeová bu meste batiza. (Atus 2:38-40) Má simé, pode sta ta ser difísil pa bo toma disizon di batiza. Kuzê ki pode djuda-u? Na kel studu li, nu sta ben odja (1) pamodi ki alguns algen inda ka batiza, (2) pamodi ki é inportanti lenbra ma es mundu di Satanás sta kuazi na fin, i (3) pamodi ki é inportanti bu faze kes mudansa más rápidu ki bu ta pode pa bu batiza.

PAMODI KI ALGUNS ALGEN INDA KA BATIZA?

2. Pamodi ki alguns algen inda ka batiza?

² Alguns algen inda ka batiza pamodi es ten medu. Pur izénplu, enbóra es krê sirbi Jeová, es ten medu si nunka es ka ta konsigi agrada-l. Si bu sta ta xinti si, lé testus di Bíblia ki pode da-u serteza ma Jeová ka ta spera pa bu ser perfeitu i ma el ta fika kontenti óras ki bu ta faze bu midjór pa sirbi-l. (Sal. 103:13, 14; Kol. 3:23) Si bu ten medu di opozison, pidi Jeová pa da-u kel mésmu kunfiansa di kel salmista ki skrebe: ‘Jeová sta di nha ladu, N ka ta xinti medu. Kuzê ki ómi ta pode faze-m?’ — Sal. 118:6.

3. Kuzê más ki ka ta dexa alguns algen batiza? (Odja imajen.)

³ Alguns algen ki ta ama Jeová inda ka batiza pamodi es ta atxa ma es ka ten konhisimentu ki ta txiga. Má bu meste sabe tudu kuza sobri Bíblia pa bu pode batiza? Nau. Odja un izénplu di Bíblia. Na un dia di noti, Jeová poi téra ta treme i el tra Paulu ku Silas di kadia. Es tevi oportunidadi di inxina kel guarda di kadia i se família sobri Jizus. Kel ómi ku se família intende ma kontise un milagri. Alén di kel-li, na kel noti es prende alguns kuza inportanti sobri Jeová i Jizus. Pamodi kel-li, kel ki es prende txiga pa es disidi ‘batiza lógu.’ (Atus 16:25-33) Si bu konxe Jeová, bu ta ama-l di tudu bu korason, bu konxe kes verdadi prinsipal di Bíblia, bu rapende di bus pekadu i bu sta disididu na kontinua ta vive di akordu ku ses lei, nton bu sta priparadu pa batiza. — Mar 12:30.

4. Kal ki é otus razon ki ta poi alguns algen ka ta batiza? (Odja imajen.)

⁴ Alguns algen ki ta krê agrada Deus ta konsentra na kantu ki ta kusta faze kel-li. É klaru ki é bon nu pensa ku kuidadu na modi ki un disizon ta afeta nos vida. (Luk. 14:27-30) Má, alguns ta fika preokupadu ku sakrifísius ki es ten ki faze pa es pode sirbi Deus. Kandasi, ki kria na verdadi, xinti di kel manera li kantu es oferese-l un studu di Bíblia kantu dja el éra adultu. El fla: “N sabia kuzê ki N meste fazeba pa N agradaba Jeová, má N gostaba di kes kuza ki N ta fazeba na mundu. N sabia ma ta sérba difísil N paraba di faze kes kuza la.” Otus ta fika preokupadu si es ka konsigi vive di akordu ku kel ki Jeová ta spera di kes algen batizadu. Es ten medu di faze un pekadu gravi dipôs ki es batiza i pa es tradu di kongregason. Si bu sta preokupadu ku alguns di kes kuza li, kuzê ki bu pode faze?

5. Na kuzê más ki nu debe pensa si nu ten dúvida si nu ta batiza? (Mateus 13:44-46)

⁵ Óras ki nu krê kunpra algun kuza nu ka ta djobe sô se présu, má tanbê nu ta djobe modi ki el ta ba djuda-nu. Normalmenti si kel kuza ta ba djuda-nu txeu nu ta kunpra-l lógu sikrê el é karu. Di mésmu manera, óras ki nu ta pensa si nu ta batiza, nu ka ta konsentra sô na modi ki ta ba ser difísil faze kes mudansa, má tanbê na modi ki é bon pa nos ten un amizadi fórti ku Jeová. Jizus konta dôs ilustrason pa inxina kel-li. (Lé Mateus 13:44-46.) Na kada un di kes ilustrason, un ómi fika kontenti di bende tudu kuza ki el tinha asi pa el pode kunpraba un kuza di txeu valor ki el atxa. Bo tanbê bu atxa un kuza ki ten txeu valor, ki é verdadi sobri Reinu di Deus. Si bu ten dúvida si ta bale péna vive di akordu ku verdadi, tra ténpu pa bu pensa na kes ilustrason di Jizus. Pensa na kes pergunta li: ‘N ta kridita mê ma notísia sábi sobri Reinu di Deus é un kuza ki ten txeu valor? N ta da valor pa nha amizadi ku Jeová, pa speransa ki el da-m i pa amor di nhas irmon ku irmans?’ Bus respósta pa kes pergunta li pode djuda-u odja kuzê ki bu meste faze pa bu pode toma disizon di batiza.

6. Kuzê ki ta djuda-u aplika kel ki bu sta ta prende?

⁶ Na un ilustrason ki Jizus konta di un simiador, el splika ma korason di un algen pode inpidi-l di faze prugrésu. Má tanbê, Jizus mostra ma alguns pode obi “ku korason onéstu i bon” i es pode seta mensajen di Reinu. (Luk. 8:5-15) Nton, si bu sta preokupadu pamodi bu ka ten serteza si bu ta konsigi aplika kes kuza ki bu prende, ka bu dizisti. Jeová pode da-u kel motivason sértu asi pa bu pode dizenvolve dizeju di obi ku el. Pidi Jeová na orason pa el djuda-u ama kuzê ki bu sta ta prende i faze sima bu prende. — Eze. 18:31; 36:26.

7-8. Kuzê ki sta ta inpidi alguns jóvens di faze prugrésu i batiza? (Odja imajen.)

⁷ Alguns jóvens ki ta ama Jeová ka ta faze prugrésu pa batiza pamodi influensia di otus algen. Pur izénplu, alguns profesor pode poi alunus ta pensa ma es debe seta alguns stilu di vida sikrê Deus ta atxa ma es é mariadu. Kes tipu di konsedju li pode poi un jóven ta ten txeu prubléma na vida. (Sal. 1:1, 2; Pro. 7:1-5) Bu pode ivita kes prubléma li si bu sigi izénplu di kel salmista ki fla Jeová: ‘N ta aji ku más intendimentu di ki tudu nhas méstri, pamodi N ta pensa txeu na bus lei.’ — Sal. 119:99.

⁸ Ta parse ma alguns pai ku mai ki é Tistimunha di Jeová ta inpidi ses fidju di batiza sen es da kónta. Es ta preokupa txeu ku kantu skóla i ki tipu di trabadju ki ses fidju ta ten ô ti es pode skese di insentiva ses fidju pa poi métas ki ta djuda-s bira más amigu di Jeová. I si bu xinti ma bu pai ku bu mai pode djudaba bo más txeu pa bu pode alkansa bu méta di batiza? Nton, pamodi ki bu ka ta pâpia ku es sobri kel asuntu li? Bu pode ten serteza ma bu idadi ka ta inpidi-u di ten un amizadi fórti ku Jeová. — Pro. 20:11.

9. Pamodi ki alguns algen ta dura ki batiza?

⁹ Alguns algen ki dja sta priparadu pa batiza pode dura ki faze kel-li pamodi es ta atxa ma es ten ki spera un algen di ses família ô un algen ki es é amigu pa es pode batiza djuntu. É klaru ki ka ten nada di mariadu na krê batiza djuntu ku un algen ki bu ta ama. Má, kel-li debe inpidiba bo di batiza gósi? Lenbra ma kel-li é un promésa ki bu faze sô pa Jeová, ningen más. Bu batismu ka debe dipende di kuzê ki otus algen faze. — Rom. 14:12.

LENBRA MA FIN STA PÉRTU

10. Pamodi ki alguns algen ta dimora ki faze prugrésu i batiza?

¹⁰ Alén di kes razon ki nu pâpia di es antis, alguns algen pode dimora ku batiza pamodi es ta atxa ma inda ta dura txeu ténpu pa fin ben. Má, é dretu pensa di kel manera li? Jizus aviza ses disiplu: “Nhos sta sénpri prontu, pamodi Fidju di Ómi ta ben na un óra ki nhos ka sta ta spera.” — Luk. 12:40.

11. Óras ki nu ta prende más sobri Jeová, kuzê ki nu ta xinti motivadu na faze i pamodi? (Salmo 119:60)

¹¹ É amor ki debe pô-nu ta krê da nos vida pa Jeová. Kantu más nu prende sobri Jeová, más nu ta odja modi ki el ta ama-nu i nu ta odja ma sigi ses lei é bon pa nos. (Lé Salmo 119:60.) Disiplu Tiagu pâpia di otu razon ki ta pô-nu sigi leis di Jeová sen dimora. El fla ma ninhun di nos ka sabe kuzê ki ta ben kontise manhan. Nu pode ka ten nen más un dia pa “faze kel ki é dretu”, pur isu, é gósi ki é óra di faze kuzê ki Jeová krê. — Tia. 4:13-17.

12. Kuzê ki nu ta prende ku kel ilustrason ki Jizus konta sobri kes trabadjador na kel plantason di uva?

¹² Pensa na kel ilustrason ki Jizus konta sobri kes trabadjador di kel plantason di uva. El fla ma alguns ki trabadja sô un óra resebe kel mésmu pagamentu di ki kes ki trabadja dia interu. Má pamodi ki kes ki trabadja sô un óra ka kumesa ta trabadja más sédu? Es fla: “Pamodi ningen ka kontrata-nu.” Kes trabadjador ka éra prigisozu. Es pode trabadjaba dia interu, má ningen ka kontrata-s. Lógu ki es txomadu es bai. (Mat. 20:1-16) Oji, Jizus ta txoma-nu pa nu ser ses disiplu i pa nu partisipa na trabadju di Reinu. Nu debe faze kuzê ki Jizus pidi-nu lógu ki nu prende sobri el.

13. Kuzê ki nu ta prende ku mudjer di Ló?

¹³ Alguns algen pode ka faze mudansas pa sirbi Jeová pamodi es ta atxa ma es ta ben ten ténpu di faze kes mudansa poku antis di fin ben. Má, kantu más bu spera, más difísil ta ser faze kes mudansa pa bu sirbi Deus. Jizus sabia di kel-li, pur isu el fla ses disiplu: “Nhos lenbra di mudjer di Ló.” (Luk. 17:31-35) Mudjer di Ló sabia ma julgamentu di Jeová kóntra Sudoma ku Gumora staba kuazi ta txiga. Má simé, ta parse ma el ka konsigi dexa kes kuza ki el tinha pa tras. (Jén. 19:23-26) Se izénplu ta lenbra-nu ma pórta di salvason ka ta kontinua abértu pa tudu ténpu. Na ténpu sértu, Deus ta ben fitxa kel pórta i el ta fika fitxadu pa tudu ténpu. — Luk. 13:24, 25.

14. Pamodi ki nu debe presta atenson na kes profesia di Bíblia ki sta ta kunpri?

¹⁴ Kes kuza ki sta ta kontise tudu dia na mundu ta prova ma kuzê ki Bíblia dja flaba é verdadi. Mésmu ki alguns di kes kuza li ka sta ta kontise na undi ki bu ta vive, odja-s ta kontise na otus párti di mundu ta pô-u ta faze kes mudansa ki bu meste pa bu pode batiza más rápidu ki bu pode. Odja kuzê ki apóstlu Pedru fla pa alguns kriston: “Fin di tudu kes kuza li sta pértu. Pur isu... nhos sta sénpri prontu [ô mante sienti]”. (1 Ped. 4:7; nóta di rodapé.) Na kel versiklu li, ta parse ma “fin” krê fla kel ténpu ki Jiruzalen i se ténplu ta ben sérba distruídu. Apóstlu Pedru skrebe kes palavra li pa kes kriston ki ta moraba lonji di Jiruzalen. Nton, kel-li krê fla ma es ka ta staba na Jiruzalen óras ki el sérba distruídu. (1 Ped. 1:1) Má, óras ki es odjaba kel profesia li ta kunpri, ses kunfiansa na tudu kes promésa di Jeová ta fikaba más fórti. Di mésmu manera, é inportanti bu presta atenson na kes profesia ki sta ta kunpri. Óras ki bu ta odja modi ki fin sta kuazi ta txiga, bu ta xinti más motivadu na faze kes mudansa ki bu meste pa bu pode batiza.

15. Modi ki nu pode sta priparadu pa dia di Jeová? (2 Pedru 3:10-13)

¹⁵ Na kel sugundu karta ki Pedru skrebe, el fla modi ki nu pode pripara pa dia di Jeová. Pa kes kriston di ténpu di Pedru, dia di Jeová inda ta ba duraba txeu pa txigaba. Má simé, Pedru fla-s pa es ‘staba ku xintidu’ ô ku “txeu vontadi” pa kel dia txiga. (Lé 2 Pedru 3:10-13; nóta di rodapé.) Modi ki nu ta mostra ma nu sta ku xintidu na dia di Jeová? Si sénpri nu lenbra ma el sta kuazi ta txiga i nu pripara pa el. Nu ta faze kel-li, óras ki nu ta ‘konporta di manera santu i nu ta faze kuzas ki ta mostra ma nu ta adora Deus.’ Pensa na modi ki Jeová ta fika kontenti óras ki el ta odja-nu ta faze kuzas ki ta agrada-l! El ta ben fika más kontenti inda di odja-u ta da bu vida pa el i ta batiza.

PAMODI KI É MIDJÓR BATIZA GÓSI?

16. Kal ki é midjór ténpu pa faze prugrésu i batiza? (2 Koríntius 6:1, 2) (Odja imajens.)

¹⁶ Kel midjór ténpu pa bu faze prugrésu pa bu batiza é gósi. (Lé 2 Koríntius 6:1, 2.) Kel eunuku di Itiópia ki Filipi inkontra ku el intende ma el meste ajiba lógu. Lógu ki el intende kes notísia sábi i el atxa un oportunidadi pa batiza, el ka pensa: ‘N ta gostaba di prende más sobri kes notísia sábi primeru. Ten otus lugar na strada ki ten águ.’ Envês di kel-li, el pergunta Filipi: “Kuzê ki ta inpidi-m di batiza?” (Atus 8:26, 27, 35-39) Kel-li é un bon izénplu pa nos! Dipôs ki kel eunuku batiza, el “bai se kaminhu kontenti.”

17. Di kuzê ki bu pode ten serteza?

¹⁷ Si bu sta ta dura ki toma disizon di batiza bu pode ten serteza ma Jeová krê djuda-u bira más se amigu. (Rom. 2:4) El pode djuda-u si bu sta xinti medu di batiza, si bu ta atxa difísil faze kel-li ô si otus algen ka sta ta insentiva-u pa bu batiza. Óras ki bu batiza bu ta fika ku un konsénsia trankuilu i bu ta odja ma kes kuza ki bu dexa “pa tras” ka ten valor pa bo más. (Flp. 3:8, 13) Bu pode konsentra na kes kuza ki “sta pa frenti”, ki é odja Jeová ta kunpri ses promésa pa kes algen ki da ses vida pa el i batiza. — Atus 3:19.