Lamentasons
א [alefe]
4 Oru brilhanti, oru puru, dja perde tudu se brilhu!
Kes pédra di santuáriu* sta spadjadu pa tudu skina!*
ב [bete]
2 Gósi, kes fidju di Sion, ki tinha txeu valor sima oru refinadu,
Sta tratadu sima vazus di baru,
Trabadju di mô di un oleru!
ג [gimel]
3 Ti mésmu katxor brabu* ta da ses fidju mama,
Má fidju-fémia di nha povu dja bira runhu, sima avestrus na dizértu.
ד [dalete]
4 Língua di kes mininu ki sta mama dja kola na séu di bóka di tantu sedi.
Kes mininu sta inplora pa da-s pon, má ningen ka ta da-s nada.
ה [hê]
5 Kes ki ta kumeba bons kumida sta ta kai na rua pamodi fómi.
Kes ki kria ta bisti ropa finu sta ta deta na monti di sinza.
ו [vau]
6 Kastigu* di fidju-fémia di nha povu é piór ki kastigu di pekadu di Sudoma,
Ki distruídu dirapenti, sen ningen pa djuda-l.
ז [zaine]
7 Ses nazireu éra más puru di ki nevi, más branku di ki leti.
Es éra más koradu di ki koral; es éra sima safira pulidu.
ח [ete]
8 Ses aparénsia dja fika más prétu di ki karvon.*
Pesoas ka sta rekonhese-s na rua.
Ses péli dja fika tudu rugadu riba di ses osu; dja el fika séku sima lenha.
ט [tete]
9 Kes ki spada mata sta midjór di ki kes ki móre pamodi fómi,
Kes ki sta ta móre poku-poku, pamodi falta di kumida na kanpu.
י [iode]
10 Mô di kes mudjer ki ten konpaxon kuzinha ses própi fidju.
Ses fidju bira ses kumida* duránti distruison di fidju-fémia di nha povu.
כ [kafe]
11 Jeová mostra se raiba.
El baza se raiba riba di Sion.
El sende un lumi na Sion ki kaba ku ses alisérsi.
ל [lamede]
12 Kes rei di téra i tudu kes algen ki ta mora na téra ka ta kriditaba
Ma inimigu ta ben entraba pa kes porton di Jiruzalen.
מ [meme]
13 Kel-li kontise pamodi pekadu di ses proféta, i di éru di ses saserdóti,
Ki mata kes algen justu déntu di sidadi.
נ [nune]
14 Es sta ta anda atoa na rua sima algen ségu.
Sangi pô-s ta bira inpuru,
Di manera ki ningen ka pode toka na ses ropa.
ס [sameke]
15 Pesoas ta grita ku es: “Nhos sai di li! Nhos é inpuru! Nhos sai di li! Nhos sai di li! Ka nhos toka na nos!”
Pamodi es fika sen kaza i es sta ta anda atoa.
Kes algen di nason fla-s: “Es ka pode fika li djuntu ku nos.*
פ [pê]
16 É própi Jeová ki spadja-s,
Es ka ta ben ten se aprovason más.
Pesoas ka ta ben ten ruspetu más pa kes saserdóti, nen es ka ta ben ten konsiderason pa kes ansion.”
ע [aine]
17 Nos odju sta kansadu di djobe ajuda atoa.
Nu djobe i nu kontinua ta djobe ajuda di un nason ki ka ta pode salvaba nos.
צ [tsade]
18 Kada pasu ki nu daba nos inimigu ta pirsigiba nos, pur isu nu ka pode andaba na prasa.
Nos fin sta kuazi ta txiga; nos dia dja kaba, pamodi nos fin dja txiga.
ק [kofe]
19 Kes ki staba ta pirsigi-nu éra más rápidu di ki ágia na séu.
Es pirsigi-nu na monti; es ta fikaba sukundidu pa ataka-nu na dizértu.
ר [rexe]
20 Kel algen ki Jeová skodje, ki é sima folgu di nos narís, dja pegadu na un braku grandi ki es koba.
Nu ta flaba sobri el: “Nu ta ben vive dibaxu di se sónbra na meiu di kes nason.”
ש [sin]
21 Grita di alegria, ó fidju-fémia di Edon, ki ta mora na téra di Us.
Má, abo tanbê bu ta ben resebe kel kópu di disgrasa, bu ta ben fika moku i nú.
ת [tau]
22 Ó fidju-fémia di Sion, kastigu di bu éru dja txiga fin.
Deus ka ta ben leba-u prézu otu bês.
Má el ta ben kastiga-u pamodi bu éru, ó fidju-fémia di Edon.
El ta ben mostra bus pekadu.