Lamentasons
5 Ó Jeová, lenbra di kuzê ki kontise ku nos.
Spia i odja nos vergónha.
2 Nos eransa dadu pa kes algen stranhu, i nos kaza dadu pa kes stranjeru.
3 Dja nu bira sima kes mininu ki ka ten pai; i nos mai sta sima viúva.
4 Nu ten ki paga pa nu bebe agu ki é di nos, i nu ten ki kunpra lenha ki é di nos.
5 Kes algen ki ta pirsigi-nu sta pértu di nos.
Nu sta stafadu i nu ka tene soségu.
6 Nu stika nos mô pa Ijitu i pa Asíria, pa es da-nu kumida ki ta txiga pa nu kume.
7 Nos gentis grandi ki peka dja móre, má é nos ki ten ki paga pa ses éru.
8 Gósi, é sérvus ki sta ta governa-nu; ka ten ningen ki ta libra-nu di ses mô.
9 Nu sta ta riska nos vida* pa nu konsigi pon, pamodi sta ómis armadu na dizértu.
10 Nos péli fika kenti sima fornu, pamodi dór di fómi.
11 Es umilha* kes mudjer kazadu di Sion, i tanbê kes vírjen na sidadi di Judá.
12 Prínsipis prindadu ku kórda maradu na un mô i ansions ka ruspetadu.
13 Rapázis ta karega muinhu di mô, i kes mininu sta ta da di banda pamodi pézu di lenha ki es sta karega.
14 Ansions ka sta más na porton di sidadi; jóvens ka sta toka ses múzika.
15 Nu ka tene alegria más na nos korason; nos badju dja bira lutu.
16 Koroa dja kai di nos kabésa. Ai di nos, pamodi nu peka!
17 Nos korason dja fika duenti pamodi kel-li,
I nos odju dja fika fraku pamodi kes kuza li,
18 Dja ki monti Sion sta bandonadu, gósi é rapozas ki sta anda pa la.
19 Má abo, ó Jeová, bu sta xintadu na bu tronu pa tudu ténpu.
Bu tronu ta dura di jerason pa jerason.
20 Pamodi ki bu ta skese di nos pa sénpri i bu ta bandona-nu pa txeu ténpu si?
21 Ó Jeová, traze-nu di vólta pa bo, i nu ta volta lógu.
Poi tudu kuza ta bira sima na ténpu antigu.
22 Má, bu nega-nu konpletamenti.
Inda bu sta ku txeu raiba di nos.