Lamentasons
א [alefe]
3 Ami é kel ómi ki odja algen ta sufri pamodi vara di se raiba.
2 El kóre ku mi i el pô-m ta anda na sukuru, envês di anda na lus.
3 Na verdadi, dia interu el ta stende se mô pa kastiga-m un bês bai.
ב [bete]
4 El poi nha karni i nha péli ta kaba na nada,
I el kebra nhas osu.
5 El serka-m, i el poi venénu margós i prublémas na nha vólta.
6 El obriga-m mora na kes lugar sukuru, sima kes algen ki móre dja ten txeu ténpu.
ג [gimel]
7 El serka-m ku un paredi pa N ka skapa.
El prende-m ku korenti di kóbri pizadu.
8 I óras ki N ta grita dizusperadu ta pidi ajuda, el ka ta obi* nha orason.
9 El blokia nhas kaminhu ku pédras kortadu.
El poi nhas kaminhu ta bira tórtu.
ד [dalete]
10 El fika sukundidu pa ataka-m sima un ursu, sima un lion sukundidu.
11 El rasta-m pa fóra di kaminhu i el dispadasa-m.*
El dexa-m bandonadu.
12 El pripara* se arku,* i el sta ta da-m ku flexa.
ה [hê]
13 El poi flexa* di se saku ta entra na nha rin.
14 Tudu povu bira ta faze-m trósa, dia interu es ta goza ku mi na ses múzika.
15 El intxi-m di kuzas margós i el farta-m di absintu.*
ו [vau]
16 El ta kebra-m denti ku kaskadju.
El ta pô-m ta inbaxa di medu na sinza.
17 Bu ta tra-m nha pas.* Dja-m skese kuzê ki é filisidadi.*
18 Pur isu N ta fla: “Nha glória dja kaba, i tanbê nha speransa na Jeová.”
ז [zaine]
19 Lenbra ma N sta ta sufri i ma N sta sen kaza, lenbra ma N sta kume absintu i venénu margós.
20 Di serteza bu* ta ben lenbra di mi i bu ta ben inbaxa pa djuda-m.
21 N ta lenbra di kel-li na nha korason. É pur isu ki N ta ben spera ku paxénxa.
ח [ete]
22 É pamodi amor lial di Jeová ki nu ka kabadu ku el,
Pamodi se mizerikórdia nunka ka ta kaba.
23 El ta mostra mizerikórdia tudu palmanhan.* Bu lialdadi é grandi.
24 N fla:* “Jeová é nha párti, pur isu N ta ben spera pa el ku paxénxa”.
ט [tete]
25 Jeová ta mostra bondadi pa kel algen* ki ta spera pa el, pa kel algen ki ta kontinua ta djobe-l.
26 É bon spera kaladu* pa salvason di Jeová.
27 É bon pa un algen karega se kanga* duránti se juventudi.
י [iode]
28 Óras ki Deus ta poi un kanga riba di el, pa el fika xintadu el sô i kaladu.
29 Pa el poi se bóka na téra; talvês inda ta ten speransa.
30 Pa el da se róstu pa kel algen ki sta da-l pankada; pa el sufri txeu insultu.
כ [kafe]
31 Pamodi Jeová ka ta ben nega-nu pa tudu ténpu.
32 Enbóra el pô-nu ta sufri, el ta ben ten mizerikórdia di nos pamodi se amor lial é grandi.
33 Pamodi el ka gosta di poi pesoas na frónta i nen na sufrimentu.
ל [lamede]
34 Nen pa algen pila dibaxu di se pé tudu kes algen ki sta prézu na téra,
35 Nen pa algen nega justisa pa un ómi dianti di kel Deus Más Grandi,
36 Nen pa un algen inpididu di ten justisa na un kazu legal.
Jeová ka ta tolera kes kuza li.
מ [meme]
37 Ken ki pode fla algun kuza i pô-l ta kontise, si Jeová ka da órdi?
38 Di bóka di kel Deus Más Grandi,
Ka ta sai kuzas mariadu djuntu ku kuzas dretu.
39 Pamodi ki un algen* debe kexa di rezultadu di se pekadu?
נ [nune]
40 Nu izamina nos konportamentu, i nu volta pa Jeová.
41 Nu labanta nos mô pa Deus di séu ku un korason sinseru, i nu fla:
42 “Nu peka i nu rabela, i bu ka purdua-nu.
ס [sameke]
43 Ku raiba, bu inpidi-nu di txiga na bo.
Bu pirsigi-nu i bu mata-nu sen konpaxon.
44 Sima un núven, bu inpidi-nu di txiga na bo, asi pa nos orason ka txiga na bo.
45 Bu pô-nu ta bira sima lixu i kuzas suju na meiu di kes povu.”
פ [pê]
46 Tudu nos inimigu ta abri bóka kóntra nos.
47 Nu sta sénpri ku medu i ta kai na armadilha, nu sta bandonadu i distruídu.
48 Agu sta ta sai di nha odju sima agu na rubera, pamodi distruison di fidju-fémia di nha povu.
ע [aine]
49 Nha odju sta ta txora sen para, sen diskansa,
50 Ti ki Jeová spia i odja la di séu.
51 Nha odju ta pô-m ta sufri* óras ki N ta odja tudu kes fidju-fémia di nha sidadi.
צ [tsade]
52 Sen ninhun motivu, nhas inimigu pega-m sima si mi éra un pasu.
53 Es bota-m na un braku pa tenta mata-m; es kontinua ta da-m ku pédra.
54 Agu kubri nha kabésa, i N fla: “Kel-li é nha fin!”
ק [kofe]
55 Ó Jeová, di fundu di kóba N txoma bu nómi.
56 Obi nha vós; ka bu tapa bu obidu óras ki N ta pidi ajuda pa alíviu.
57 Dia ki N txoma-u bu txiga pértu di mi. Bu fla-m: “Ka bu ten medu.”
ר [rexe]
58 Ó Jeová, bu difende nha kazu,* bu salva nha vida.
59 Ó Jeová, bu odja injustisa ki N fazedu. Favor, faze-m justisa.
60 Bu odja modi ki es vinga di mi, tudu kes planu ki es faze kóntra mi.
ש [sin] ô [xin]
61 Ó Jeová, bu obi modi ki es insulta-m, tudu kes planu ki es faze kóntra mi,
62 Tanbê bu obi nhas inimigu ta pâpia kóntra mi i ta kuxixa kóntra mi dia interu.
63 Odja-s! Ô es sta xintadu ô di pé, es ta faze-m trósa na ses múzika!
ת [tau]
64 Ó Jeová, bu ta ben pô-s ta paga pa kel ki es faze.
65 Bu ta ben poi ses korason ta fika duru; kel-li ta ben ser bu maldison kóntra es.
66 Ó Jeová, bu ta ben pirsigi-s na bu raiba i bu ta ben kaba ku es riba di téra.