Izaías
62 Pamodi Sion, N ka ta ben fika kaladu,
I pamodi Jiruzalen, N ka ta ben diskansa,
Ti ki se justisa brilha sima un lus fórti
I se salvason brilha sima lumi.
2 “Ó mudjer, kes nason ta ben odja bu justisa,
I tudu kes rei ta ben odja bu glória.
I bu ta ben txomadu pa un nómi novu,
Ki Jeová* ta ben skodje.
3 Bu ta ben bira un koroa bunitu na mô di Jeová,
Un turbanti* di rei na palma di mô di bu Deus.
4 Nunka más bu ka ta ben txomadu di mudjer bandonadu,
I bu téra nunka más ka ta txomadu bandonadu.
Má bu ta ben txomadu “El é nha alegria”,
I bu téra ta ben txomadu “Mudjer kazadu”.
Pamodi Jeová ta ben xinti alegria pamodi bo,
I bu téra ta ben ser sima un mudjer kazadu.
5 Pamodi sima un jóven ta kaza ku un vírjen,
Bus fidju ta ben kaza ku bo.
Sima un noivu ta fika kontenti ku se noiva,
Bu Deus ta ben fika kontenti ku bo.
6 Ó Jiruzalen, N poi guardas riba di bus muralha.
Nunka es ka debe fika kaladu, nen di dia nen di noti.
Anhos ki ta pâpia sobri Jeová,
Ka nhos diskansa,
7 Ka nhos dexa-l diskansa ti ki el poi Jiruzalen ta fika ben finkadu,
Sin, ti ki el poi tudu algen na téra ta lova-l.”
8 Jeová faze un juramentu ku se mô direita, ku se brasu fórti:
“Nunka más N ka ta ben da serial pa bus inimigu kume,
I kes stranjeru nunka más ka ta ben bebe vinhu novu, ki bu trabadja duru pa el.
9 Má kes ki kodje serial ta ben kume-s i es ta lova Jeová,
I kes ki ta kodje uva ta ben bebe kel vinhu novu na nha pátiu santu.”
10 Nhos pasa, nhos pasa pa kes porton.
Nhos pripara kaminhu pa povu.
Nhos faze, nhos faze un strada.
Nhos tra kes pédra.
Nhos labanta un sinal* pa povus.
11 Nhos odja! Jeová fla désdi kes párti más lonji di téra:
“Nhos fla fidju-fémia di Sion:
‘Odja! Bu salvason sta ta txiga.
Kel rekonpénsa ki el ta da sta ku el,
I kel saláriu ki el ta paga sta se dianti.’”
12 Es ta ben txomadu di povu santu, kes ki Jeová resgata,
I bu ta ben txomadu “Un sidadi ki djobedu”, “Sidadi ki ka bandonadu”.