Izaías
63 Kel-li é kenha ki sta ta ben di Edon,
Di Bosra, bistidu ku ropa di kor bibu?*
Kel-li é kenha ki tene ropa di luxu,
Ki sta marxa ku grandi puder?
“É mi, Kel ki ta fla kel ki é justu,
Kel ki ten grandi puder pa salva.”
2 Pamodi ki bu ropa sta brumedju?
Pamodi ki bus ropa sta sima un algen ki ta piza uva na lugar di faze vinhu?
3 “N piza mi sô na lugar di faze vinhu.
Ningen di povu ka staba ku mi.
Ku nha raiba N kontinua ta piza-s,
I N pila-s ku txeu raiba.
Ses sangi raspinga na nhas ropa,
I mantxa nha ropa tudu.
4 Pamodi kel dia di vingansa sta na nha korason,
I dja txiga kel anu di resgata nha povu.
5 N djobe, má ka tinha ningen pa djuda-m,
N fika spantadu, má ningen ka oferese-m ajuda,
Pur isu, nha brasu traze salvason,*
I nha própi raiba pô-m ta aji.
6 N piza povus na nha raiba,
N pô-s ta fika moku ku nha raiba
I N baza ses sangi na txon.”
7 N ta ben pâpia di modi ki Jeová mostra amor lial,
Kes kuza ki Jeová faze ki nu debe lova,
Pamodi tudu kuza ki Jeová dja faze pa nos,
Kes txeu kuza dretu ki dja el faze pa kaza di Israel,
Di akordu ku se mizerikórdia i se grandi amor lial.
8 Pamodi el fla: “Di serteza es é nha povu, fidjus ki ka ta ben ser disleal.”*
Pur isu, el bira ses Salvador.
9 Duránti tudu ses frónta el sufri djuntu ku es.
I se própi mensajeru* salva-s.
El libra-s pamodi se amor i se konpaxon,
I el labanta-s i karega-s sima el ta fazeba désdi ténpu antigu.
10 Má es rabela i es poi se spritu santu ta fika tristi.
Pur isu, el bira ses inimigu,
I el luta kóntra es.
11 Nton, es lenbra di kes ténpu antigu,
Di kes dia di Se sérvu Muizés i es pergunta:
“Undi ki sta Kel ki pô-s ta subi di mar ku kes pastor di se ribanhu?
Undi ki sta Kel ki poi Se spritu santu na es?
12 Undi ki sta Kel ki poi Se brasu fórti ta bai na direita di Muizés,
Kel ki dividi kes agu dianti di es
Pa faze pa el un nómi ki ta dura pa tudu ténpu?
13 Undi ki sta Kel ki pô-s ta anda na meiu di agu brabu,*
Kel ki pô-s ta anda sen tropesa,
Sima un kabalu na dizértu?*
14 Spritu di Jeová pô-s ta diskansa
Sima óras ki ribanhu ta dixi pa vali pa ba diskansa.”
É si ki bu gia bu povu,
Asi pa bu nómi bunitu dadu glória.
15 Di séu, djobe pa baxu i odja
Di bu morada ki é altu, santu i ki ten glória.*
Undi ki sta bu zelu i bu puder?
Undi ki sta bu konpaxon i mizerikórdia?
Bu nega-m es.
16 Pamodi abo é nos Pai.
Sikrê Abraon ka konxe-nu
I Israel tanbê ka rekonhese-nu,
Ó Jeová, abo é nos Pai.
Désdi ténpu antigu bu nómi é nos Resgatador.
17 Ó Jeová, pamodi ki bu ta dexa-nu* disvia di bus kaminhu?
Pamodi ki bu ta dexa* nos korason bira duru, asi pa nu ka ten grandi ruspetu pa bo?
Volta, pamodi bus sérvu,
Kes tribu di bu eransa.
18 Bu povu santu mora na kel téra pa poku ténpu.
Nos inimigu distrui bu santuáriu.
19 Pa txeu ténpu nu bira sima kes algen ki nunka bu ka governa,
Sima kes algen ki nunka ka txomadu pa bu nómi.