Izaías
60 “Ó mudjer, labanta, i dexa bu lus brilha, pamodi bu lus dja txiga.
Glória di Jeová sta ta brilha riba di bo.
2 Odja! Sukuru ta ben kubri téra
I núven prétu ta ben kubri nasons,
Má Jeová ta ben límia riba di bo,
I se glória ta ben odjadu riba di bo.
3 Nasons ta ben odja bu lus
I reis ta ben pa bu lus ki ta brilha.
4 Labanta róstu i djobe na bu vólta!
Tudu es dja djuntadu, i es sta ta ben na bo.
Bus fidju sta ta ben di lonji,
I bus fidju-fémia sta trazedu na ragás.
5 Na kel ténpu bu ta ben odja i bu ta ben fika txeu kontenti,
Bu korason ta ben bate fórti i ta ben intxi di alegria,
Pamodi kes rikéza di mar ta ben pa bo,
I kes rikéza di nasons ta ben txiga na bo.
6 Un monti kamelu ta ben intxi bu téra,*
Kes kamelu novu di Midian i di Efá.
Tudu algen di Sabá ta ben txiga,
Es ta ben traze oru i insénsu branku.
Es ta ben lova Jeová na públiku.
7 Tudu kes ribanhu di Kedar ta ben djuntadu pa bo.
Kes karneru di Nebaiote ta ben sirbi-u.
Es ta ben oferesedu na nha altar i es ta setadu,
I N ta ben poi nha kaza ki ten glória* ta bira inda más bunitu.
8 Kes-li é kenha ki sta bua sima núven,
Sima ponba ki sta bua pa ses kaza?*
9 Kes ilha ta ben poi ses speransa na mi.
Kes barku di Társis ta ben na frenti,*
Es ta ben traze bus fidju di lonji,
Ku ses prata i ses oru,
Pa nómi di Jeová, bu Deus, kel Santu di Israel,
Pamodi el ta ben da-u glória.*
10 Stranjerus ta ben faze bus muralha,
I ses rei ta ben sirbi-u,
Pamodi na nha raiba N ataka-u,
Má pamodi nha bondadi* N ta ben ten mizerikórdia di bo.
11 Bus porton ta ben fika sénpri abértu.
Es ka ta ben fitxa nen di dia nen di noti,
Asi pa rikéza di kes nason pode entra,
I ses rei ta ben sta ta lidera.
12 Pamodi kalker nason ô reinu ki ka sirbi-u ta ben distruídu,
I kes nason li ta ben distruídu tudu.
13 Bu ta ben dadu kes arvi bunitu di Líbanu,
Djuntu ku es ta ben juníperu, freixu* i sipresti,*
Asi pa es poi nha santuáriu ta fika más bunitu,
I N ta ben da glória pa kel lugar undi ki N ta poi nha pé.
14 Kes fidju di kes ki maltrata-u ta ben inbaxa bu dianti.
Tudu kes ki trata-u sen ruspetu ta ben inbaxa na bu pé,
I es ten ki ben txoma-u di sidadi di Jeová,
Sion di Kel Santu di Israel.
15 Envês di bu bandonadu i bu odiadu, sen ningen ta pasa pa bo,
N ta ben pô-u ta ser un motivu di orgulhu pa tudu ténpu,
Un motivu di alegria pa tudu jerason.
16 I bu ta ben bebe leti di nasons,
Bu ta ben mama na petu di reis.
I di serteza bu ta ben sabe ma ami, Jeová, é bu Salvador,
I ma kel Poderozu di Jakó é bu Resgatador.
17 Envês di kóbri N ta ben traze oru,
Envês di féru N ta ben traze prata,
Envês di madera, kóbri,
Envês di pédra, féru.
N ta ben poi pas ta ser nhos enkaregadu
I justisa ta ben ser nhos xéfi.
18 Ka ta ben obidu ta papiadu más di violénsia na bu téra
Nen di distruison i disgrasa déntu di kes limiti di bu tiritóriu.
I bu ta ben txoma bus muralha di Salvason i bus porton di Lovor.
19 Sol ka ta ben da-u lus di dia,
Nen brilhu di lua ka ta ben limia-u,
Pamodi Jeová ta ben bira pa bo un lus pa tudu ténpu,
I bu Deus ta ben ser bu glória.
20 Bu sol ka ta ben kanba más,
Nen bu lua ka ta ben míngua,
Pamodi Jeová ta ben bira un lus pa bo, pa tudu ténpu,
I bus dia di lutu ta ben kaba.
21 I tudu bu povu ta ben ser justu.
Es ta ben toma kel téra li pa tudu ténpu.
Es é kel rabénta ki N planta,
Trabadju di nha mô, pa pô-m fika bunitu.
22 Kel poku ta ben bira mil,
I kel pikinoti ta ben bira un nason fórti.
Ami, Jeová, N ta ben poi kel-li ta kontise faxi na ténpu sértu.”