Izaías
47 Ó fidju-fémia vírjen di Babilónia,
Dixi i xinta na téra.
Ó fidju-fémia di kes kaldeu,
Xinta na txon undi ka ten ninhun tronu,
Pamodi pesoas nunka más ka ta ben txoma-u di fina i mimada.
2 Panha un muinhu di mô i mui farinha.
Tra bu véu.
I tra bu saia, diskubri pérna.
I trabesa riu.
3 Tudu algen ta ben odja-u nú.
Es ta ben odja pamodi ki bu tene vergónha.
N ta ben vinga i ningen ka ta pode inpidi-m.*
4 “Nos Resgatador,
Ki se nómi é Jeová di izérsitu,
É kel Santu di Israel.”
5 Ó fidju-fémia di kes kaldeu,
Xinta kaladu, entra na sukuru.
Nunka más bu ka ta ben txomadu di Sinhora* di kes Reinu.
6 N fika xatiadu ku nha povu.
N bira nha eransa inpuru,
I N intrega-s na bu mô.
Má bu ka tevi péna* di es.
Bu poi un kanga* pizadu ti mésmu riba di kes gentis grandi.
7 Bu fla: “Sénpri N ta ben ser Sinhora, pa tudu ténpu.”
Bu ka leba kes kuza li asériu,
I nen bu ka pensa na modi ki tudu ta ben kaba.
8 Gósi obi kel-li, bo ki ta ama kuzas sábi,
Ki sta xintadu na suguransa, ki ta fla na korason:
“Ami é más inportanti, ka ten ningen sima mi.
N ka ta ben fika viúva.
Nunka N ka ta ben perde nhas fidju.”
9 Má kes dôs kuza li ta ben riba di bo dirapenti, na un dia sô:
Bu ta ben perde bus fidju i bu ta ben fika viúva.
Kes disgrasa li ta ben riba di bo ku tudu forsa
Pamodi kes monti bruxaria i pamodi* tudu kes feitisu poderozu pa kontrola otus algen.
10 Bu kunfia na bu maldadi.
I bu fla: “Ningen ka ta odja-m.”
Bu sabedoria i bu konhisimentu disvia-u,
I bu fla na bu korason: “Ami é más inportanti, ka ten ningen sima mi.”
11 Má un disgrasa ta ben riba di bo,
Ki ninhun di bus feitisu ka ta pode inpidi-l.*
Un disgrasa ta ben na bo i bu ka ta pode ivita-l.
Un distruison ki nunka bu ka odja ta ben riba di bo dirapenti.
12 Nton, kontinua ku bus feitisu pa kontrola otus algen i ku kes txeu bruxaria,
Ki bu sta faze désdi ki bo é jóven.
Talvês es ta djuda-u,
Talvês bu ta konsigi poi pesoas dimiradu.
13 Bu kansa na djobe konsedju na tudu kes bu konsedjeru.
Pa es labanta gósi i pa es salva-u,
Sin, es é kes algen ki ta adora kes kuza na séu,* kes ki ta djobe stréla,
Kes ki óras ki ten lua nova
Es ta fla kuzê ki ta ben kontise ku bo.
14 Odja! Es é sima padja.
Lumi ta ben kema-s.
Es ka ta pode salva ses kabésa* di puder di lumi.
Es é ka braza pa algen kenta na el,
I es é ka lumi pa algen xinta ses dianti.
15 É si ki bus fitiseru ta ben ser pa bo,
Kes ki bu sta trabadja duru ku es désdi bu juventudi.
Es ta ben anda atoa, kada un pa un ladu.*
Ka ta ben ten ningen pa salva-u.