Izaías
48 Ó kaza di Jakó,
Nhos obi kel-li, nhos ki ta txoma nhos kabésa di Israel,
Anhos ki é disendenti* di Judá,
Nhos ki ta jura na nómi di Jeová
I ki ta invoka kel Deus di Israel,
Má ka ku sinseridadi i justisa.
2 Pamodi nhos ta fla ma nhos é povu di kel sidadi santu
I nhos ta buska ajuda di kel Deus di Israel,
Kel ki se nómi é Jeová di izérsitu.
3 “Dja ten txeu ténpu ki N fla kes kuza ki dja kontise.*
Es sai di nha bóka,
É mi ki fla-s.
N aji dirapenti i es kontise.
4 Pamodi N sabia ma bo é temozu,
Ma bu piskôs é sima un tendon di féru i ma bu tésta é di kóbri,
5 N fla-u kes kuza txeu ténpu antis.
Antis di es kontise, N fla-u sobri es,
Asi pa bu ka fla: ‘É nha deus ki faze kel-li.
É nha imajen di madera i nha imajen di metal* ki manda faze kes kuza li.’
6 Bu obi i bu odja tudu kes kuza li.
Bu ka ta ba konta-l pa otus algen?
Di li pa frenti N ta konta-u kuzas novu,
Kuzas ki bu ka sabia, ki staba na segredu.
7 É sô gósi ki N sta ta poi kes kuza li ta kontise, ka ten txeu ténpu ki N faze-s.
Ti oji nunka bu ka obiba ta papiadu di kes kuza li,
Asi pa bu ka fla: ‘Dja N sabia di es.’
8 Nau, bu ka obi, bu ka sabia,
I na pasadu bu kontinua ku bu obidu fitxadu.
Pamodi N sabe modi ki bo é traisueru,
I désdi ki bu nase bu txomadu di pekador.
9 Má pamodi nha nómi N ta ben kontrola nha raiba,
Pa nha própi glória N ta ben ten paxénxa ku bo,
I N ka ta kaba ku bo.
10 Odja! N refina-u, má ka sima ta fazedu ku prata.
N dexa-u sufri asi pa N purifika-u, sima óras ki ta deretedu un metal na fornadja.
11 Pamodi nha própi nómi, sin, pamodi nha própi nómi, N ta ben aji,
Modi ki N pode dexa pa nha nómi tratadu sen ruspetu?
N ka ta da nha glória pa ningen.*
12 Ó Jakó i Israel, kel ki N txoma, nhos obi-m.
Ami é Kel mê. Ami é kel primeru, i tanbê ami é kel últimu.
13 É nha própi mô ki faze alisérsi di téra,
I é nha mô direita ki stende séu.
Óras ki N txoma-s, es ta parse djuntu.
14 Nhos djunta nhos tudu i nhos obi.
Kenha na ses meiu* ki fla kes kuza li?
Kel ki Jeová ama
Ta ben faze ku Babilónia kel ki el krê,
I se brasu ta ben kóntra kes kaldeu.
15 É mi ki fla i N txoma-l.
É mi ki pô-l ta ben, i el ta ten bon rezultadu na kel ki el ta faze.
16 Nhos txiga pértu i nhos obi kel-li.
Désdi komésu nunka N ka fla nada sukundidu.
N staba la kantu kes kuza kontise.”
I gósi Jeová, kel Sinhor Más Grandi, manda-m ami i* se spritu.
17 É kel-li ki Jeová, bu Resgatador, kel Santu di Israel, fla:
“Ami, Jeová, ami é bu Deus,
Kel ki ta inxina-u kel ki é midjór pa bo,*
Kel ki ta gia-u na kaminhu ki bu debe anda.
18 Éra bon si bu prestaba atenson na nhas mandamentu!
Nton bu pas ta sérba sima un riu
I bu justisa sima óndias di mar.
19 Bus fidju ta ben ser sima areia
Bus disendenti ta ben ser txeu sima gran di areia.
Ses nómi nunka ka ta ben kabadu ku el i nen el ka ta ben pagadu di nha dianti.”
20 Nhos sai di Babilónia!
Nhos fuji di kes kaldeu!
Nhos fla kel-li ku gritu di alegria! Nhos pâpia di kel-li!
Nhos dexa kes párti más lonji di téra sabe di kel-li.
Nhos fla: “Jeová dja resgata se sérvu Jakó.
21 Es ka pasa sedi kantu el gia-s na dizértu.
El poi agu ta sai di rótxa pa es,
El abri rótxa i el poi agu ta sai.”
22 “Ka ten pas pa kes algen ki é mau”, é Jeová ki fla.