Izaías
46 Bel ta dobra, Nebu ta inbaxa pa txon.
Ses imajen ta podu riba di animal, sin, riba di animal di karga,
Sima un karga pizadu dimás pa kes animal kansadu.
2 Es ta dobra i es ta inbaxa pa téra djuntu.
Es ka ta konsigi salva ses karga,*
I es própi* ta bai prézu.
3 “Ó família di Jakó, nhos obi-m, i tudu nhos ki resta di povu di Israel,
Anhos ki N sta sustenta désdi ki nhos nase i ki N sta karega désdi bariga.
4 Ti ki nhos bira bédju N ta kontinua kel mê,
Ti ki nhos kabelu bira branku N ta kontinua ta sustenta nhos.
Sima N ten stadu ta faze, N ta ben karega nhos, N ta sustenta i salva nhos.
5 Ku kenha ki nhos ta ben konpara-m ô fla ma nos é igual?
Kenha ki nhos ta fla ma é sima mi, sima si nu ta parse ku kunpanheru?
6 Ten kes algen ki ta tra oru di ses bólsa,
Es ta peza prata na balansa.
Es ta kontrata un algen ki ta trabadja ku metal pa faze un deus ku el.
Dipôs, es ta inbaxa i adora-l.*
7 Es ta pô-l na onbru,
Es ta karega-l i pô-l na se lugar, i el ta fika la.
El ka ta sai di se lugar.
Es ta txoma-l ku vós altu, má el ka ta responde,
El ka ta pode salva ningen di frónta.
8 Nhos lenbra di kel-li, i nhos ten koraji.
Nhos presta atenson, pekadoris.
9 Nhos lenbra di kes kuza antigu,* ki dja ten txeu ténpu ki kontise,
Nhos lenbra ma mi é Deus, i ka ten otu.
Ami é Deus, i ka ten ningen sima mi.
10 Désdi komésu N ta fla kal ki é fin,
I désdi ténpu antigu N ta fla kes kuza ki inda ka fazedu.
N ta fla: ‘Nha disizon ta ben kunpri,
I N ta ben faze tudu kel ki N krê.’
11 Désdi undi ki sol ta nase* N ta txoma un pasu* di un téra lonji,
N ta txoma un ómi pa faze kel ki N disidi.
N fla, i N ta ben faze-l.
N fla kal ki é nha vontadi, i N ta ben kunpri-I.
12 Nhos ki ten korason orgulhozu,* nhos obi-m,
Nhos ki sta lonji di justisa.
13 N ta ben traze nha justisa,
El ka sta lonji,
I nha salvason ka ta dura.
N ta ben da Sion salvason, i da Israel nha glória.”