Izaías
45 É si ki Jeová fla Siru, kel ki el skodje,
Kel ki N pega se mô direita
Pa vense kes nason se dianti,
I pa dizarma kes rei,
Pa abri se dianti kes dôs pórta,
Asi pa kes porton ka fika fitxadu:
N ta ben kebra kes pórta di kóbri,
I N ta ben rabenta kes tranka di féru.
3 N ta ben da-u kes tizoru ki sta guardadu na kes lugar sukuru
I kes tizoru ki sta sukundidu,
Asi pa bu sabe ma ami é Jeová,
Kel Deus di Israel, kel ki ta txoma-u pa bu nómi.
4 Pamodi nha sérvu Jakó i pamodi Israel ki N skodje,
N ta ben txoma-u pa bu nómi.
N ta ben poi bu nómi ta dadu ónra, enbóra bu ka konxe-m.
5 Ami é Jeová, i ka ten otu.
Ka ten otu Deus alén di mi.
N ta ben da-u forsa, enbóra bu ka konxe-m,
6 Pa pesoas sabe ma
Désdi undi sol ta sai ti undi sol ta kanba*
Ka ten otu Deus alén di mi.
Ami é Jeová, i ka ten otu.
7 N faze lus i sukuru,
N ta traze pas i N ta traze disgrasa.
Ami, Jeová, N ta faze tudu kes kuza li.
8 Ó séu, poi txuba ta kai la di riba,
Pa núvens baza justisa.
Pa téra abri i pa el da salvason,
I pa el poi justisa ta brota.
Ami, Jeová, N faze tudu kel-li.”
9 Ai di kenha ki ta diskuti ku Kel ki faze-l,
Pamodi el é sô un padás di baru
Na meiu di kes otu padás di baru ki sta na txon!
Baru pode fla Oleru:* “Kuzê ki bu sta ta faze?”
Ô kel kuza ki el faze debe fla: “Bu ka ten mô”?*
10 Ai di kel ki ta fla un pai: “Bu bira pai di ki tipu di fidju?”
I pa un mudjer: “Kuzê ki bu sta ben pari?”
11 É kel-li ki Jeová, kel Santu di Israel, kel ki faze-l, fla:
“Bu ta atxa ma bu pode pergunta-m sobri kes kuza ki ta ben kontise
I da-m órdi sobri nhas fidju i kes kuza ki N faze ku nha mô?
12 N faze téra i pesoas pa vive na el.
Ku nha própi mô N stende séu,
I N ta da órdi pa tudu kes kuza ki ten na séu.”*
13 Jeová di izérsitu fla: “Pamodi mi é justu N pripara un ómi,
N ta ben poi tudu ses kaminhu ta bira rétu.
El ta ben faze nha sidadi
I el ta ben liberta nha povu ki sta prézu, sen resebe nada nen subornu.”
14 É kel-li ki Jeová fla:
“Kel lukru* di Ijitu, kel nogósiu* di Itiópia i kes sabeu, ki é kes ómi altu,
Ta ben na bo i es ta bira di bo.
Es ta ben anda ku korenti bu tras.
Es ta ben i es ta inbaxa bu frenti,
Es ta ben fla na orason: ‘Di serteza Deus sta ku bo,
I ka ten otu; ka ten otu Deus.’”
15 Ó Deus di Israel, kel Salvador,
Di serteza abo é un Deus ki ta sukundi.
16 Tudu es ta ben podu na vergónha i es ta ben umilhadu,
Tudu kes algen ki ta faze imajen ta bai ses kaminhu umilhadu.
17 Má Jeová ta ben salva Israel, i kel salvason li ta ben ser pa tudu ténpu.
Nhos ka ta ben fika na vergónha i nen nhos ka ta ben umilhadu pa tudu ténpu.
18 Pamodi é si ki Jeová fla,
Kel Kriador di séu, kel Deus verdaderu,
Kel ki forma téra, i Kel ki faze-l, ki pô-l ta fika firmi,
Ki ka kria-l pa nada,* má ki faze-l pa moradu na el:
“Ami é Jeová, i ka ten otu.
19 N ka pâpia na un lugar sukundidu, na un téra sukuru,
N ka fla disendenti* di Jakó:
‘Nhos djobe-m pa nada.’*
Ami é Jeová, kel ki ta fla kel ki é justu i ta fla kel ki é sértu.
20 Nhos djunta i nhos ben.
Nhos txiga pértu, nhos ki skapa di kes nason.
Kes ki ta karega imajen ka sabe nada
I es ta faze orason pa un deus ki ka ta pode salva-s.
21 Nhos pâpia, i nhos aprizenta nhos kazu.
Pa es konsulta kunpanheru.
Ken ki fla kel-li dja ten txeu ténpu
I ki fla kel-li désdi ténpu antigu?
É ka mi, Jeová?
Ka ten otu Deus alén di mi,
Un Deus justu i Salvador, ka ten otu alén di mi.
22 Anhos ki sta na kes párti más lonji di téra, nhos volta pa mi i nhos ta salvadu,
Pamodi ami é Deus, i ka ten otu.
23 N jura pa nha kabésa,
Kel palavra ki sai di nha bóka é verdaderu,
I el ka ta volta pa tras:
Tudu juelhu ta ben dobra nha dianti,
I tudu algen* ta ben jura lialdadi pa mi
24 I es ta fla: ‘Di serteza Jeová sénpri ta faze kel ki é dretu* i el é fórti.
Tudu kes ki ta xatia ku el ta txiga se dianti ku vergónha.
25 Pamodi Jeová, ta ben fika provadu ma tudu disendenti di Israel tinha razon,
I es ta ben xinti orgulhu pamodi el.’”