Izaías
4 Na kel dia, 7 mudjer ta ben pega un ómi i es ta fla:
“Nu ta ben kume nos própi pon
I nu ta ranja nos própi ropa,
Má sô dexa pa nu txomadu pa bu nómi
Asi pa tra nos vergónha.”*
2 Na kel ténpu, Jeová ta ben poi ta kria plantas bunitu i bon, i kes algen di Israel ki skapa ta ben fika ku orgulhu i kontenti pamodi kes fruta ki téra ta ben da. 3 Tudu kes algen ki resta na Sion i ki resta na Jiruzalen ta ben txomadu di santu, sin, tudu kes na Jiruzalen ki sta skrebedu pa vive la.
4 Jeová ta ben laba kes sujidadi* di kes fidju-fémia di Sion i el ta ben linpa di se meiu kel sangi ki bazadu na Jiruzalen. El ta ben julga Jiruzalen i el ta ben mostra se raiba kóntra el.* 5 Tanbê Jeová ta ben kria un núven i un fumu di dia, i un lumi fórti ki ta límia di noti riba di tudu kes lugar na monti Sion i riba di lugar di ses kongrésu. I ta ben ten un proteson riba di tudu lugar ki ten glória. 6 I ta ben ten un baraka pa faze sónbra pa proteje di kalor di dia, i pa sukundi i proteje di tenporal i di txuba.