Izaías
5 Dexa-m kanta pa kel algen ki N krê txeu,
Un múzika sobri kel algen ki N krê txeu i se plantason di uva.
El tinha un plantason di uva na un ladera ki ta da txeu kumida.
2 El koba txon i el tra kes pédra.
El planta un bon pé di uva brumedju,
El faze un tori na se meiu,
I el koba un lugar pa piza uva.
Dipôs el fika ta spera pa el da bons uva,
Má el da sô kes uva ki ka ta sirbi.
3 “I gósi, anhos ki ta mora na Jiruzalen i kes ómi di Judá,
Favor, nhos julga entri mi i nha plantason di uva.
4 Kuzê más ki N pode faze pa nha plantason di uva
Ki inda N ka faze?
Pamodi ki kantu ki N spera pa el da bons uva,
El da sô kes uva ki ka ta sirbi?
5 Gósi, N ta fla nhos
Kuzê ki N ta faze ku nha plantason di uva:
N ta ben tra-l se sérka,
I el ta ben kemadu.
N ta ben ronba kel paredi di pédra,
I el ta ben pizadu.
6 N ta ben pô-l ta bira un txon bandonadu,
El ka ta ben podadu i nen se txon ka ta ben trabadjadu.
El ta ben fika xeiu di pé di spinhu i di padja brabu,
I N ta ben manda núven pa ka baza txuba riba di el.
7 Pamodi plantason di uva di Jeová di izérsitu é povu di Israel,
Kes ómi di Judá é kel plantason ki el gostaba.
El fika ta spera justisa,
Má tinha injustisa.
El fika ta spera kuzas dretu,
Má tinha gritu di frónta.”
8 Ai di kes ki ta djunta un kaza na kel otu
I ki ta djunta un kanpu na kel otu
Ti ki ka ten más lugar
I nhos mora sô nhos na kel téra li!
9 N obi Jeová di izérsitu ta jura
Ma txeu kaza, enbóra es éra grandi i bunitu,
Es ta ben bira un kuza ki ta da algen medu,
Sen ningen ta mora la.
11 Ai di kes ki ta labanta sédu pa bebe bebida alkólika,
Kes ki ta fika ti astanta di noti, ti ki vinhu ta pô-s ta fika diskontroladu!
12 Na ses fésta ten arpa i instrumentu di kórda,
Panderu, flauta i vinhu.
Má es ka ta pensa na kes kuza ki Jeová ta faze,
Nen es ka ta odja kes trabadju ki el ta faze ku Se mô.
13 Pur isu, nha povu ta bai prézu
Pamodi es ka konxe-m.
Ses ómi ruspetadu ta ben pasa fómi,
I povu interu ta ben sufri ku sedi.
14 Pur isu, Sipultura* bira más grandi*
El abri se bóka ti dimás,
I kes algen inportanti di Jiruzalen, kes monti di algen ki ta faze txeu barudju i kes algen ki gosta di fésta
Di serteza ta ben dixi pa el.
15 I pesoas ta ben rabaxadu,
Pesoas ta ben umilhadu,
I odju di kes orgulhozu ta ben umilhadu.
16 Jeová di izérsitu ta ben engrandesedu pamodi se julgamentu.*
Kel Deus verdaderu, kel Santu, ta santifika se kabésa através di justisa.
17 I kes korderu ta kume la, sima si es sta na ses lugar di pastora,
Kes stranjeru ta kume na kes lugar bandonadu undi ki tinha kes midjór animal.
18 Ai di kes ki ta konta mintira, es sta prézu na ses éru i na ses pekadu
Sima un animal ki sta maradu na un karósa i ki ta rasta-l pa undi ki el bai.
19 Kes ki ta fla: “Pa el tirmina faxi se trabadju,
Pa el faze-l faxi, asi pa nu pode odja se rezultadu.
Pa vontadi di Santu di Israel kunpri
Asi pa nu sabe kal ki é se vontadi!”*
20 Ai di kes ki ta fla ma kel ki é bon é mau i ma kel ki é mau é bon,
Kes ki ta poi sukuru na lugar di lus i lus na lugar di sukuru,
Kes ki ta troka margós pa dósi i dósi pa margós!
21 Ai di kes ki ta pensa ma es ten sabedoria
I ki ta atxa ma es é prudenti!
22 Ai di kes ki ten fama di bebe vinhu
I di kes ki é bon na mistura bebida alkólika,
23 I di kes ki ta seta subornu pa poi kes ki é kulpadu ta bira inosenti
I ki ta nega justisa pa kes ki é justu!
24 Pur isu, sima lumi ta kema padja séku
I padja séku ta disfaze na lumi,
Ses raís ta podrise,
I ses flor ta spadja sima puera,
Pamodi es nega lei* di Jeová di izérsitu
I es ka ruspeta palavra di Kel Santu di Israel.
25 É pur isu ki Jeová sta txeu xatiadu ku se povu,
I el ta ben labanta mô pa kastiga-s.
Kes monti ta ben treme,
I kes korpu di algen mortu ta ben fika sima lixu na rua.
Pamodi tudu kel-li, se raiba ka pasa,
I se mô inda sta stikadu pa kastiga.
26 El labanta un sinal* pa un nason lonji,
El zíbia* pa es ben di kes párti más lonji di téra
I nhos odja! Es sta ta ben faxi.
27 Ninhun di es ka sta kansadu ô ta tropesa.
Ninhun di es ka sta ku sónu ô ta durmi.
Sintu na ses sintura ka sta froxu,
I nen kórda di ses sandália ka sta stragadu.
28 Tudu ses flexa sta moladu,
I tudu ses arku sta prontu pa da ku flexa.
Pé di ses kabalu é sima pédra,
I ses róda é sima un béntu fórti.
29 Es ta ruji sima un lion,
Es ta ruji sima lion novu.*
Es ta ben ruji i panha kel ki es kasa
Es ta ben leba-l i ningen ka ta pode salva-l.
30 Na kel dia es ta ben ruji riba di el,
Sima barudju di mar.
Ken ki djobe pa kel téra ta ben odja un sukuru ki ta da medu,
Ti mésmu lus ta ben fika sukuru pamodi kes núven.