Izaías
3 Nhos odja! Kel Sinhor verdaderu, Jeová di izérsitu,
Ta ben tra di Jiruzalen i di Judá tudu tipu di sustentu i apoiu,
Tudu sustentu di pon ku agu,
2 El ta ben tra kel ómi poderozu i kel trópa,
Kel juís i kel proféta, kel algen ki ta dibinha i kel ansion,
3 Kel xéfi di 50, kel governanti i kel konsedjeru,
Kel algen bon na faze majia i kel ki ta prende otus ku fitisaria.
4 N ta ben poi mininu ta ser ses prínsipi,
I kes algen ki ka sabe kuzê ki es krê ta ben governa-s.
5 Pesoas ta ben ataka kunpanheru,
Kada un kóntra se prósimu.
Kes jóven ta ben ataka kes algen grandi,
I kes algen sen valor ta ben dizafia kes algen ruspetadu.
6 Kada un ta ben pega se irmon na kaza di se pai i el ta fla:
“Bu tene un kapa, nton ser nos governanti.
Toma kónta di kel lugar li ki sta tudu distruídu.”
7 Má, na kel dia el ta ben responde:
“N ka ta ben kura nhos frida;*
N ka tene kumida i nen ropa na nha kaza.
Ka nhos pô-m ta ser governanti di povu.”
8 Jiruzalen tropesa,
I Judá kai,
Pamodi kel ki es ta fla i kel ki es ta faze é kóntra Jeová.
Timenti el staba pértu* es rabela kóntra el, kel ki merese resebe tudu lovor.
9 Ses própi róstu sta ta da tistimunhu kóntra es,
Es ta pâpia klaru di ses pekadu sima kes algen di Sudoma;
Es ka ta tenta sukundi-s,
Ai di es,* pamodi es sta ta traze disgrasa riba di ses própi kabésa!
10 Fla kes algen justu ma tudu ta ben kóre dretu ku es,
Es ta ben abensuadu pa kel ki es faze.*
11 Ai di kes algen mau!
Disgrasa ta ben kai riba di es,
Pamodi sima es faze otus algen, es ta ben fazedu tanbê!
12 Nha povu, sta kastigadu pa ses kapatás,
I mudjeris sta governa riba di es.
Nha povu, bus xéfi sta ta leba nhos pa un kaminhu mariadu,
I es sta konfundi nhos kal kaminhu ki nhos debe sigi.
13 Jeová sta toma se puzison pa julga,
El sta labanta pa da povus senténsa.
14 Jeová ta ben julga kes ansion i kes prínsipi di se povu.
“Nhos kema kel plantason di uva,
I kel ki nhos furta póbri sta na nhos kaza.
15 Modi ki bu tevi koraji di pila nha povu
I injúria kes póbri?” É kel Sinhor Más Grandi, Jeová di izérsitu, ki fla.
16 É kel-li ki Jeová fla: “Dja ki kes fidju-fémia di Sion é orgulhoza,
Es ta anda ku kabésa labantadu,*
Es ta konkista ku ses odju, es ta da pasu kurtu,
I es ta faze barudju ku kes infeitu ki es ten na pé,
17 Jeová ta ben poi kabésa di kes fidju-fémia di Sion ta fika xeiu di kaska di frida,
I Jeová ta ben poi párti di frenti di ses kabésa ta fika sen kabelu.
18 Na kel dia, Jeová ta tra-s tudu kuza ki ta pô-s ta fika bunita,
Kes pulsera pa pé, kes faixa pa kabésa, kes infeitu na forma di lua,
19 Kes brinku, kes pulsera, kes véu,
20 Kes panu di mara kabésa, kes korentinha pa pé, kes faixa,*
Kes frasku di purfumu,* kes amuletu,
21 Kes anel, kes argóla pa narís,
22 Kes ropa di gala, kes kapa, kes manta, kes bólsa,
23 Kes spedju di mô, kes ropa di linhu,
Kes turbanti* i kes véu.
24 Envês di óliu di bálsamu, ta ben ten txeru podri,
Envês di sintu, un kórda,
Envês di pentiadu bunitu, kabésa sen kabelu,
Envês di ropa di luxu, ropa di panu di saku,*
Envês di bunitéza, un marka di féru kenti.
25 Bus ómi ta ben matadu ku spada,
I kes ómi balenti ta ben móre na géra.
26 Kes entrada di sidadi ta ben bira sima un mudjer ki sta txora i ta lamenta,
El ta ben bira sima un mudjer ki sta bandonadu xintadu na txon.”