Ди къэкІуэныр Апокалипсис тхылъым къызэрыщыгъэлъэгъуар

1. Дэтхэнэ зы цІыхуми мыхьэнэшхуэ зиІэ сыт хуэдэ унафэ ищІын хуей?

ДЭТХЭНЭ зы цІыхуми мыхьэнэшхуэ зиІэ унафэ ищІын хуейщ: дуней псом и пащтыхь Иеговэ и лъэныкъуэр иубыдыну е абы и бий ШейтІаным и лъэныкъуэр иубыдыну. Ещанэ лъэныкъуэ щыІэкъым. А унафэм елъытащ цІыхум гъащІэ мыухыжыр иІэнрэ имыІэнрэ (Мт. 25:31—33, 46). НэгъуэщІу жыпІэмэ, «гузэвэгъуэшхуэ» зэманым Алыхьым и лэжьакІуэ пэжхэр крагъэлын щхьэкІэ «я натІэм дамыгъэ» традзэнущ (Апок. 7:14; Иез. 9:4, 6). ХьэкІэкхъуэкІэм и «дамыгъэр» зытетхэр-щэ? Абыхэм я гъащІэр яфІэкІуэдынущ (Апок. 14:9—11).

2. 1) Еврейхэм 10:35—39 ит псалъэхэм сытым дыхуагъэушрэ? 2) Апокалипсис тхылъыр дапхуэдэу къыддэІэпыкъуфыну?

² Къеджэ Еврейхэм 10:35—39. Иеговэ и лъэныкъуэр быубыдауэ щытмэ, ар Іущагъ зыхэлъ унафэщ. Иджы уэ нэгъуэщІ цІыхухэми, апхуэдэ унафэ къащтэн щхьэкІэ, уадэІэпыкъуну ухущІокъу. АбыкІэ Апокалипсис тхылъыр хуабжьу къыбдэІэпыкъунущ. А тхылъым къыщыгъэлъэгъуащ Иеговэ и бийхэм сыт къащыщІынуми икІи абы пэжу хуэлажьэхэм сыт хуэдэ фІыгъуэхэр ялъысынуми. ГъащІэр зэлъыта а щІэныгъэр зэдгъэгъуэтыным мыхьэнэшхуэ иІэщ. Ар къыддэІэпыкъунущ теубыдагъэ диІэу адэкІи Иеговэ дыхуэлэжьэну. Абы нэмыщІ а щІэныгъэхэр къэдгъэсэбэпу цІыху куэдым, унафэ пэж къащтэн щхьэкІэ, дадэІэпыкъуфынущ.

3. Мы статьям сыт щызэпкърытхынур?

³ Мы статьям упщІитІ щызэпкърытхынущ: 1) Алыхьым и лъэныкъуэр зыІыгъхэм сыт хуэдэ гъащІэ къапэщылъыр? 2) Апокалипсис тхылъым зи гугъу ищІ хьэщхьэвылъэ плъыжь-фІыцІафэм и лъэныкъуэр зыубыдахэм къащыщІынур сыт?

АЛЫХЬЫМ ХУЭПЭЖ ЦІЫХУХЭМ КЪАПЭЩЫЛЪЫР

4. Хьисэ и гъусэу уафэм щыІэу Иуан хэт илъэгъуар?

⁴ Апостол Иуан и нэгу щІэкІам щилъэгъуащ Иеговэ и лъэныкъуэр зыубыду гъащІэ мыухыж тыгъэу къызыІэрыхьэ цІыху гупитІ. Япэ гупыр — ар Хьисэ и гъусэу уафэм пащтыхьу щыІэну цІыху 144 000-ращ (Апок. 7:4; 14:3, 4). Ахэр Хьисэ и гъусэу Сион Іуащхьэм тетщ (Апок. 14:1). А Пащтыхьыгъуэр щІылъэ псом и тепщэу щытынущ (Апок. 5:9, 10).

5. Куэд мыщІэу уафэм кІуэну гугъэ зиІэхэм сыт къащыщІынур?

⁵ БлэкІа лІэщІыгъуэхэм къриубыдэу, уафэм кІуэн щхьэкІэ, Иеговэ цІыху мин бжыгъэ къыхихащ (Лк. 12:32; Рим 8:17). ЛІэжыху Иеговэ хуэпэжу къэнахэр иджыпсту уафэм щыІэщ. Апостол Иуан зэритхымкІэ, иужьрей махуэхэм уафэм кІуэну гугъэ зиІэхэм щыщу щІылъэм тетынухэм я бжыгъэр куэд хъукъым (Апок. 12:17). «Гузэвэгъуэшхуэм» щІидзэн ипэ абыхэм «Тхьэм и мыхъурыр» трагъэуэнущ. А мыхъурым къигъэлъагъуэр Иеговэ абыхэм хуэарэзыуэ зэрыщытыращ (Апок. 7:2, 3). ИужькІэ, «гузэвэгъуэшхуэр» екІуэкІыу, ахэри Алыхьым уафэм дришеижынущ икІи абыхэм Хьисэ и пащтыхьыгъуэр даІыгъынущ (Мт. 24:31; Апок. 5:9, 10).

6, 7. 1) Иуан сыт хуэдэ гуп иджыри илъагъур икІи абы теухуауэ сыт дэ тщІэр? 2) Апокалипсис тхылъым и 7-нэ псалъащхьэм итыр уафэм кІуэну гугъэ зиІэхэми щІылъэм щыпсэунухэми яфІэгъэщІэгъуэну щІыщытыр сыт?

⁶ Абы иужькІэ Иуан «цІыху куэдыкІей» хъу нэгъуэщІ гуп илъэгъуащ. Уафэм кІуэну гугъэ зиІэхэм елъытауэ, етІуанэ гупым хыхьэ цІыхухэм я бжыгъэр къыпхуэщІэнукъым (Апок. 7:9, 10). Абыхэм теухуауэ Библием сыт щыжыІар? Иуан етх: «Мыхэращ гузэвэгъуэшхуэм къыхэкІар... Я джанэ кІыхьхэр Щынэм илъкІэ ягъэкъэбзэжри, хужьыбзэу яжьыщІыжащ» (Апок. 7:14). А «цІыху куэдыкІейр» жэнэт хъужа щІылъэм щыпсэунущ (Пс. 37:9—11, 27—29; Прит. 2:21, 22; Апок. 7:16, 17).

⁷ Апокалипсис тхылъым и 7-нэ псалъащхьэм уафэм кІуэну гугъэ зиІэхэри щІылъэм щыпсэунухэри къыщыгъэлъэгъуащ. А гупитІым языхэзым зыщыплъэгъужрэ уэ? А «сурэтым» узэритыр зыщомыгъэгъупщэну дынолъэІу. ПсалъэкІэ пхужыІэнукъым а гупитІым щыщхэм зыхащІэну гуфІэгъуэшхуэр! Иеговэ и лъэныкъуэр къызэрыхахам ахэр зэи хущІегъуэжынукъым. Апокалипсис тхылъым гузэвэгъуэшхуэм теухуауэ сыт иджыри къыдигъащІэр? (Мт. 24:21).

АЛЫХЬЫМ И БИЙХЭМ КЪАЩЫЩІЫНУР

8. Дапхуэдэу «гузэвэгъуэшхуэр» зэрыщІидзэнур икІи и нэхъыбэ цІыхухэм сыт ящІэнур?

⁸ Мыбы ипэкІэ дджа статьям дэ къыщытщІащ политикхэр Бабилэнышхуэм — дуней псом тет дин нэпцІхэм — зэрытеуэнур (Апок. 17:16, 17). А ІуэхумкІэ гузэвэгъуэшхуэр щІидзэнущ. Абы щыгъуэ цІыху куэдым Иеговэ и лъэныкъуэр яубыдыну пІэрэ? Хьэуэ. Апокалипсис 6-нэ псалъащхьэм къызэрыщыгъэлъэгъуам хуэдэу, Иеговэ хуэмылажьэ цІыхухэм политическэ икІи коммерческэ организацэхэм хъумапІэ къыщалъыхъуэнущ. Сыт щхьэкІэ жыпІэмэ абыхэм а организацэхэр, бгым хуэдэу, быдэу къащыхъунущ. А цІыхухэм Алыхьым и Пащтыхьыгъуэм и лъэныкъуэр зэрамыубыдам къыхэкІкІэ Иеговэ ахэр и бийуэ къилъытэнущ (Лк. 11:23; Апок. 6:15—17).

9. «Гузэвэгъуэшхуэ» зэманым Иеговэ и лэжьакІуэхэр адрей цІыхухэм къащІыхэщынур сыт икІи сыт абы къыпэкІуэнур?

⁹ «Гузэвэгъуэшхуэ» зэманым Иеговэ и лэжьакІуэ пэжхэр адрей цІыхухэм хуабжьу къахэщынущ. Сыт щхьэкІэ жыпІэмэ абыхэм адэкІи Алыхь Иеговэ ягъэлъэпІэнущ икІи «хьэщхьэвылъэм» и лъэныкъуэр яубыдынукъым (Апок. 13:14—17). Апхуэдэ щытыкІэр Иеговэ и бийхэм, дауикІ, ягу ирихьынукъым. Абы къыхэкІкІэ лъэпкъ зэгухьэнухэр — Магог щІыналъэм щыщ Гогыр — дуней псом тет Алыхьым и лэжьакІуэхэм теуэнущ (Иез. 38:14—16).

10. Сыт Иеговэ ищІэнур и бийхэр и лъэпкъым теуа иужь? (Апокалипсис 19:19—21).

¹⁰ Иеговэ ар дауэ къыщыхъуну? Абы мыпхуэдэу къыджеІэ: «Си губжьыр ину къэлыдынущ» (Иез. 38:18, 21—23). Абы теухуауэ Апокалипсис тхылъым и 19-нэ псалъащхьэм нэхъыбэ къыщыдощІэ. Иеговэ и лъэпкъыр къригъэлын икІи и бийхэр игъэкІуэдын щхьэкІэ, Хьисэ къигъэкІуэнущ. Абы и гъусэнущ «уафэм и дзэхэр», нэгъуэщІу жыпІэмэ, Алыхьым хуэпэж мелыІычхэмрэ 144 000-мрэ (Апок. 17:14; 19:11—15). Дапхуэдэу а зауэр зэриухынур? Иеговэ къыпэщІэт организацэхэмрэ цІыхухэмрэ игъащІэкІэ ягъэкІуэдынущ! (Къеджэ Апокалипсис 19:19—21.)

ЗАУЭМ ИУЖЬ ЕКІУЭКІЫНУ ХЬЭГЪУЭЛІЫГЪУЭР

11. Апокалипсис тхылъым зи гугъу ищІхэм щыщу сыт хуэдэ Іуэхугъуэра нэхъ мыхьэнэшхуэ зиІэр?

¹¹ Алыхьым и бийхэр ягъэкІуэда иужь сыт хуэдэ гурыщІэхэр зыхэтщІэнуми фи нэгу къыщІэвгъэхьэт! А зэманым уафэм сыт къыщыхъунур? Бабилэнышхуэр зэрагъэкІуэдам щхьэкІэ, абы щыІэну гуфІэгъуэм нэмыщІ иджыри зы Іуэхугъуэ щекІуэкІынущ (Апок. 19:1—3). Ар «Щынэм» и хьэгъуэлІыгъуэращ. Апокалипсис тхылъым зи гугъу ищІхэм щыщу ар нэхъ мыхьэнэшхуэ зиІэ Іуэхугъуэщ (Апок. 19:6—9).

12. Щынэм и хьэгъуэлІыгъуэр щекІуэкІынур дапщэщ? (Апокалипсис 21:1, 2).

¹² Дапщэщ а хьэгъуэлІыгъуэр щекІуэкІынур? 144 000-м щыщхэр псори уафэм зэгъусэ щыхъунур Армагеддон зауэм ипэ къихуэущ. ДауикІ, абы щыгъуэ хьэгъуэлІыгъуэм и зэманкъым. (Къеджэ Апокалипсис 21:1, 2.) Абы къыхэкІкІэ Щынэм и хьэгъуэлІыгъуэр щекІуэкІынур Армагеддон зауэм иужьщ, Алыхьым и бийхэр щыщымыІэж зэманым (Пс. 45:3, 4, 13—17).

13. Щынэм и хьэгъуэлІыгъуэм сыт хуэдэ мыхьэнэ иІэр?

¹³ А «хьэгъуэлІыгъуэм» сыт хуэдэ мыхьэнэ иІэр? Ар ебгъэщхь хъунущ хьэгъуэлІыгъуэ нэужьым щауэмрэ нысащІэмрэ зыпкъ зэрыхъум. Апхуэдэу пащтыхь Хьисэ Мэссихьрэ абы и «нысащІэмрэ» (144 000-м щыщхэмрэ) зы хъунущ. А мыхьэнэшхуэ зиІэ ІуэхугъуэмкІэ щІидзэнущ илъэс минкІэ екІуэкІыну Алыхьым и Пащтыхьыгъуэм и тепщэныгъэр (Апок. 20:6).

КЪАЛЭШХУЭ ЛЪАПІЭМРЭ ДИ КЪЭКІУЭНЫМРЭ

14, 15. Апокалипсис 21-нэ псалъащхьэм 144 000-р сытым хуигъадэрэ? (Обложкэм тет сурэтым феплъ.)

¹⁴ Апокалипсис 21-нэ псалъащхьэм 144 000-м щыщхэр ЕрусалимыщІэ зи цІэ къалэ дахэм хуегъадэ (Апок. 21:2, 9). «А къалэм и блыным лъабжьэ пщыкІутІ иІэт. А лъабжьэхэм Щынэм и апостол пщыкІутІым я цІэхэр тетхат» (Апок. 21:10—14; Еф. 2:20). Фи нэгу къыщІэвгъэхьэт а лъабжьэхэм языхэзым Иуан и цІэр тетхауэ щилъэгъуам ар зэригъэщІэгъуар! Иеговэ сыту пщІэшхуэ абы хуищІа!

¹⁵ ЕрусэлимыщІэр нэгъуэщІ зы къалэми ещхькъым. Абы и бгъуагъри, и лъагагъри, и кІыхьагъри зэхуэдизщ. А къалэм и уэрам нэхъыщхьэр зэрыщыту дыщэ къабзэм къыхэщІыкІащ. «Куэбжэ пщыкІутІыр налкъутналмэс пщыкІутІт: дэтхэнэ куэбжэри зы налкъутналмэсым къыхэщІыкІат». ЕрусэлимыщІэм и блынхэмрэ и лъабжьэмрэ мывэ лъапІэхэмкІэ гъэщІэрэщІат (Апок. 21:15—21). АдэкІэ Иуан етх: «Тхьэм щелъэІу унэшхуэ гуэри щыслъэгъуакъым а къалэ лъапІэм, сыт щхьэкІэ жыпІэмэ лъэкІыныгъэшхуэ псори зиІэ Зиусхьэну Тхьэмрэ Щынэмрэ а къалэм зэрыщыІэм щхьэкІэ, а къалэр Тхьэм щелъэІу унэшхуэ лъэпкъ хуэныкъуэкъым. А къалэр зыгъэнэхун дыгъи мази хуэныкъуэкъым, сыт щхьэкІэ жыпІэмэ Тхьэм и щІыхьышхуэм а къалэр егъэнэху, Щынэр а къалэм и нэхугъэщ» (Апок. 21:22, 23). Аращи, ЕрусэлимыщІэм щыІэнухэр «Тхьэм щелъэІу унэшхуэ» хуэныкъуэнукъым, сыт щхьэкІэ жыпІэмэ абыхэм езы Иеговэ я гъусэнущ (Евр. 7:27; Апок. 22:3, 4).

16. Алыхьым и Пащтыхьыгъуэр илъэс минкІэ тепщэу щыщытыну зэманым цІыхухэм сыт къахуихьынур?

¹⁶ Уафэм кІуэну гугъэ зиІэхэр а къалэм зэрегупсысым я гур хегъахъуэ. Ауэ ЕрусэлимыщІэм теухуа къэхъун хуей псалъэхэм щІылъэм щыпсэуну гугъэ зиІэхэми я гур фІы ещІ. Сыт щхьэкІэ жыпІэмэ Алыхьым и Пащтыхьыгъуэм, илъэс минкІэ щІылъэм щытепщэну зэманым, цІыхухэм фІыгъуэ куэд къахуихьынущ. Ахэр апхуэдизкІэ куэду щытынущи, Библиер абы «цІыхухэм гъащІэ къезыт псыкІэ» йоджэ. «А псышхуэм и бгъуитІми гъащІэ къэзыт жыг Іутщ... А жыгым и тхьэмпэхэм лъэпкъхэм я узыфэхэр ягъэхъуж» (Апок. 22:1, 2). А зэманым щІылъэм щыпсэуну цІыхухэм Алыхьым и Пащтыхьыгъуэм къыбгъэдэкІ фІыгъуэхэмкІэ затІыжынущ. Хуэм-хуэмурэ Алыхьым хуэпэж цІыхухэр дагъуэншэ хъунущ икІи афІэкІа узыфэхэри, гъынри, щыгъуэныгъэри щыІэжынукъым (Апок. 21:3—5).

17. Алыхьым и Пащтыхьыгъуэр илъэс минкІэ тепщэу щыщытыну зэманым щІылъэм щыпсэунур хэт? (Апокалипсис 20:11—13).

¹⁷ Алыхьым и Пащтыхьыгъуэр илъэс минкІэ тепщэу щыщытыну зэманым щІылъэм щыпсэунур хэт? Япэрауэ, Армагеддон зауэшхуэм къелыну цІыху куэдыкІеймрэ дунеищІэм къыщалъхуну сабийхэмрэ. Абы нэмыщІ лІахэр къызэрытэджыжынур Апокалипсис 20-нэ псалъащхьэм щыжыІащ. (Къеджэ Апокалипсис 20:11—13.) Алыхьым лІахэм къахигъэтэджыкІыжынур хэт? «Щыпкъагъэ зиІи зимыІи», нэгъуэщІу жыпІэмэ, Иеговэ пэжу хуэлэжьахэмрэ абы теухуауэ къэзыщІэну Іэмал зимыІахэмрэ (Апост. 24:15; Ин. 5:28, 29). Аращи, лІауэ хъуар дунеищІэм къыщытэджыжынукъым. Иеговэ и лъэныкъуэр яубыдыну Іэмал зиІахэм, ауэ ар къэзымыгъэсэбэпахэм къагъэлъэгъуащ дунеищІэм щыпсэуну зэрахуэмыфащэр (Мт. 25:46; 2 Фес. 1:9; Апок. 17:8; 20:15).

ИУЖЬРЕЙ ГЪЭУНЭХУАПІЭР

18. Илъэс 1 000-м и кІэм деж сыт къэхъунур?

¹⁸ Илъэс 1 000-м и кІэм деж цІыху псори дагъуэншэ хъунущ. Іэдэм и гуэныхьым къыпэкІуа псори афІэкІа щыІэжынукъым (Рим 5:12). ЦІыху псоми гъащІэ дагъуэншэ зэраІэнум къыхэкІкІэ ахэр къэхъужауэ Библием щыжыІащ (Апок. 20:5).

19. Иужьрей гъэунэхуапІэм сыт хуэдэ мыхьэнэ иІэр?

¹⁹ ШейтІаным Хьисэ дапхуэдэу игъэунэхуну хэмытами, дэ дощІэ ар Алыхьым хуэпэжу къызэрынар. Ауэ дагъуэншэ хъуа цІыхухэр ШейтІаным игъэунэхуну Іэмал иІэ хъумэ, ахэр Алыхьым хуэпэжу къэнэну пІэрэ? Илъэс миным и кІэм деж, ШейтІаныр къаутІыпщыжа иужь, а упщІэм и жэуапыр дэтхэнэ зыми еттыфынущ (Апок. 20:7). Иужьрей гъэунэхуапІэм Алыхьым хуэпэжу къэнэнухэм гъащІэ мыухыжрэ хуитыныгъэ нэгъэсарэ яІэнущ (Рим 8:21). А зэманым Иеговэ пэщІэувэну цІыхухэр ШейтІанымрэ абы и жин бзаджэхэмрэ я гъусэу игъащІэкІэ ягъэкІуэдынущ (Апок. 20:8—10).

20. Апокалипсис тхылъым итыр зэрызэпкърытхам сыт хуэдэ гурыщІэхэр къывита?

²⁰ Апокалипсис зи цІэ «сурэтым» феплъыну фигу ирихьа? А Іуэхугъуэ гъуэзэджэхэм фызэрыхэтыр флъагъуну ффІэгъэщІэгъуэнкъэ? ДауикІ, а псом дэ дыхуегъэуш, ди гъусэу Иеговэ хуэлэжьэн щхьэкІэ, нэгъуэщІ цІыхухэри къедгъэблэгъэну (Апок. 22:17). Мы статьяищым я фІыгъэкІэ дэ ипэкІэ къэхъуну Іуэхугъуэхэм дыпхырыкІа хуэдэщ икІи, апостол Иуан хуэдэу, мы псалъэхэр жыдоІэ: «Іэмин. КъэкІуэж, Зиусхьэн Хьисэ!» (Апок. 22:20).