Алыхьым и бийхэр Апокалипсис тхылъым къызэрыщыгъэлъэгъуар

1. Алыхьым и лъэпкъым теухуауэ Апокалипсис тхылъым сыт къыщытщІэр?

АПОКАЛИПСИС тхылъым дэ къыщыдощІэ Алыхьым и Пащтыхьыгъуэм тепщэн зэрыщІидзар икІи ШейтІаныр щІылъэм къызэрырадзыхар (Апок. 12:1—9). А Іуэхугъуэм уафэм щыпсэухэм гуфІэгъуэшхуэ къахуихьащ! Ауэ щІылъэм щыпсэу Иеговэ и лэжьакІуэ пэжхэм я гъащІэр нэхъ гугъуж хъуащ, сыт щхьэкІэ жыпІэмэ ШейтІаным и губжьыр абыхэм ятрекъутэ (Апок. 12:12, 15, 17).

2. ШейтІаныр къызэрыттеуэм теубыдагъэ тхэлъу дыпэщІэтыну сыт къыддэІэпыкъунур?

² ШейтІаныр къызэрыттеуэм теубыдагъэ тхэлъу дыпэщІэтыну сыт къыддэІэпыкъунур? (Апок. 13:10). КъэкІуэну зэманым къэхъунур зэрытщІэм дэ къару къытхелъхьэ. Псалъэм папщІэ, апостол Иуан итхащ а зэманым дэ къытхуихьыну фІыгъуэхэм теухуауэ. А фІыгъуэхэм щыщу щытынущ Иеговэ и бийхэр зэригъэкІуэдыжынур. А бийхэр Апокалипсис тхылъым къызэрыщыгъэлъэгъуам дытепсэлъыхьынщ икІи Иеговэ абыхэм дапхуэдэу хьэкум ятрищІыхьынуми къэтщІэнщ.

АЛЫХЬЫМ И БИЙХЭР АПОКАЛИПСИС ТХЫЛЪЫМ КЪЫЗЭРЫЩЫГЪЭЛЪЭГЪУАР

3. Апокалипсис тхылъым щІагъыбзэкІэ зи гугъу ищІхэм фыкъытхутепсэлъыхь?

³ Апокалипсис тхылъым и япэ едзыгъуэм щыжыІащ абы итыр щІагъыбзэкІэ зэрытхар (Апок. 1:1). Алыхьым и бийхэри абы щІагъыбзэкІэ къыщыгъэлъэгъуащ. Апостол Иуан етх: «Хы Іуфэм сыІуту, хым хьэщхьэвылъэ гуэр къыхэкІыу слъэгъуащ. [Абы] щхьибл пытт, бжьакъуипщІи тетт» (Апок. 13:1). Абы иужь Иуан етх: «НэгъуэщІ хьэщхьэвылъи щІы щІагъым къыщІэкІыу слъэгъуащ итІанэ» икІи ар «благъуэжьым хуэдэу къэпсалъэрт». Уеблэмэ, абы «цІыхухэм я пащхьэм уафэм къикІыу мафІэ щІылъэм къыщригъэхащ» (Апок. 13:11—13). ИкІэм-икІэжым Иуан елъагъу «псэжьышхуэ» зытес «хьэщхьэвылъэ плъыжь-фІыцІафэ». А хьэкІэкхъуэкІищым къагъэлъагъуэр Алыхь Иеговэрэ абы и Пащтыхьыгъуэмрэ куэд щІауэ пэщІэт бийхэращ. Ахэр хэт хъунуми адэкІэ къэтщІэнщ (Апок. 17:1, 3).

4, 5. Апокалипсис тхылъым ит щІагъыбзэр къыдгурыІуэну Даниил 7:15—17 итыр дапхуэдэу къызэрыддэІэпыкъур?

⁴ А бийхэр хэт хъунуми къэтщІэн щхьэкІэ, абыхэм зэрытепсэлъыхь щІагъыбзэм къикІыр къыдгурыІуэн хуейщ. АбыкІэ езы Библиер къыддоІэпыкъу. Апокалипсис тхылъым зи гугъу ищІхэр хэт хъунуми Библием и нэгъуэщІ тхылъхэм къыщыдогъуэт. Псалъэм папщІэ, Даниил бегъымбарым пщІыхьэпІэм хэту илъэгъуащ «зыр адрейм емыщхьу, абрагъуэу хьэкІэкхъуэкІиплІ хым» къызэрыхэкІар (Дан. 7:1—3, Данил бегъымбар, 2018) Абыхэм «щІылъэм щыІэну пащтыхьиплІыр» къызэрагъэлъагъуэр Даниил къыдгурегъаІуэ (Къеджэ Даниил 7:15—17, ДБ, 2018.) Абы и фІыгъэкІэ Апокалипсис тхылъым зи гугъу ищІ хьэкІэкхъуэкІэхэм къэрал унафэщІхэр къызэрагъэлъагъуэр гурыІуэгъуэ мэхъу.

⁵ Аращи, Апокалипсис тхылъым зи гугъу ищІ Іуэхугъуэхэм щыщ иджыпсту зэпкърытхынщ. Абыхэм дыщытепсэлъыхькІэ, дэ къэтлъэгъунущ Библием а Іуэхугъуэхэм я мыхьэнэр къызэригъэлъагъуэр. ЯпэщІыкІэ хьэкІэкхъуэкІищым я гугъу тщІынщи, упщІищ зэпкърытхынщ: 1) хэт абыхэм къагъэлъагъуэр? 2) Сыт абыхэм къащыщІынур? 3) Ар тщІэным мыхьэнэшхуэ щІиІэр сыт?

АЛЫХЬЫМ И БИЙХЭР ХЭТМИ НАІУЭЩ

6. Щхьибл зыпыт хьэкІэкхъуэкІэм хэт къигъэлъагъуэр? (Апокалипсис 13:1—4).

⁶ Щхьибл зыпыт хьэкІэкхъуэкІэм хэт къигъэлъагъуэр? (Къеджэ Апокалипсис 13:1—4, ДЩІ.) Гу лъыфтэ: а хьэкІэкхъуэкІэр теплъэкІэ щомыщым (леопардым) ещхьщ, и лъакъуэхэр мыщэ лъакъуэхэм хуэдэщ, и жьэр аслъэным и жьэм хуэдэщ икІи абы бжьакъуипщІ тетщ. ГъэщІэгъуэныращи, Даниил 7-нэ псалъащхьэм зи гугъу ищІ хьэкІэкхъуэкІиплІым я теплъэм щыщ Іыхьэхэр Апокалипсис тхылъым къыщыгъэлъэгъуа зы хьэкІэкхъуэкІэм и теплъэм хэлъщ. КъызэрыщІэкІымкІэ, а зы хьэкІэкхъуэкІэм зы пащтыхьыгъуэкъым е зы дунейпсо державэкъым къигъэлъагъуэр. А хьэкІэкхъуэкІэм «унагъуэ лъэпкъ псоми, къэрал псоми, бзэ псоми, лъэпкъ псоми тепщэныгъэ яхуиІэну хуит хъуащ» (Апок. 13:7). Зэрытлъагъущи, абы и тепщэныгъэр зы къэрал гуэрым и тепщэныгъэм нэхърэ куэдкІэ нэхъ инщ. Аращи, а хьэкІэкхъуэкІэм дунейм тетауэ хъуа пащтыхьыгъуэхэр псори къегъэлъагъуэb (Эккл. 8:9).

7. ХьэкІэкхъуэкІэм и щхьиблым щыщ дэтхэнэ зыми сыт къигъэлъагъуэр?

⁷ ХьэкІэкхъуэкІэм и щхьиблым щыщ дэтхэнэ зыми сыт къигъэлъагъуэр? Апокалипсис 13-нэ псалъащхьэм зи гугъу ищІ хьэкІэкхъуэкІэм и теплъэм теухуауэ нэхъыбэ къэтщІэн щхьэкІэ 17-нэ псалъащхьэм гу лъыттэнщ. Иуан етх: «А щхьиблым къикІыр пащтыхьиблыр арщ. А пащтыхьхэм ящыщу тхур къехуэхащ, зыр щыІэщ, зыр иджыри къэкІуакъым. Ар къэкІуа нэужь, тепщэныгъэ куэдрэ иІэнукъым» (Апок. 17:9, 10). ШейтІаным къигъэсэбэпа цІыху пащтыхьыгъуэхэм щыщу блыр щхьэхуэу щытщ икІи ахэр «щхьэм» ебгъэщхь хъунущ. Ахэр дунейпсо державэхэращ икІи Алыхьым и лэжьакІуэ куэдыр абыхэм я тепщэныгъэм щІэту псэуащ е а пащтыхьыгъуэхэм ахэр кърахуэкІыу щытащ. Апостол Иуан щыпсэуа зэманым щыгъуэ абыхэм ящыщу тхур щыІэжтэкъым. Ар Мысыр, Ассирие, Бабилэн, Мидо-Персие икІи Грецие пащтыхьыгъуэхэращ. Еханэ дунейпсо державэр Иуан и зэманым щыІа Рим пащтыхьыгъуэращ. Ауэ ебланэ «щхьэуэ» икІи иужьрейуэ щытынур сыт хуэдэ пащтыхьыгъуэра?

8. ХьэкІэкхъуэкІэм и ебланэ щхьэм къигъэлъагъуэр сыт?

⁸ Ар зэхэдгъэкІыну Даниил тхылъыр къыддэІэпыкъунущ. Иужьрей махуэхэм — «Зиусхьэным и махуэм» — сыт хуэдэ пащтыхьыгъуэра дуней псом щытепщэр? (Апок. 1:10). Ар Великобританиемрэ США-мрэщ. Абы къыхэкІкІэ а къэралитІыр зэгуэту Апокалипсис 13:1—4 зи гугъу ищІ хьэкІэкхъуэкІэм и ебланэ щхьэуэ къыщІэтлъытэн щхьэусыгъуэ диІэщ.

9. Щынэм и бжьакъуэм хуэдэ бжьакъуитІ зытет хьэкІэкхъуэкІэм сыт къигъэлъагъуэр?

⁹ Апокалипсис 13-нэ псалъащхьэм Великобританиемрэ США-мрэ нэгъуэщІ хьэкІэкхъуэкІэу къыщыгъэлъэгъуащ. Абы «щынэм и бжьакъуэм хуэдэу бжьакъуитІ тетт, ауэ благъуэжьым хуэдэу къэпсалъэрт». А хьэкІэкхъуэкІэм «нэщэнэ гъэщІэгъуэныщэхэр къигъэлъэгъуащ. ЦІыхухэм я пащхьэм уафэм къикІыу мафІэ щІылъэм къыщригъэхащ» (Апок. 13:11—15). Абы нэмыщІ Апокалипсис 16, 19-нэ псалъащхьэхэм щыжыІащ бжьакъуитІ зытет а хьэкІэкхъуэкІэр «бегъымбар нэпцІу» щыту (Апок. 16:13; 19:20). Даниил тхылъым зэритымкІэ, Англо-Американскэ дунейпсо державэм «зэи ямылъэгъуа мыгъуагъэ куэд» илэжьынущ (Дан. 8:19, 23, 24). А псалъэхэр етІуанэ дунейпсо зауэшхуэм щыгъуэ къэхъуащ. А зауэр и кІэм хуэкІуэну щхьэусыгъуэ хуэхъуащ Великобританиемрэ США-мрэ я щІэныгъэлІхэм къагупсыса атомнэ бомбитІ Японием зэрыщрадзыхар. Апхуэдэу Великобританиемрэ США-мрэ «уафэм къикІыу мафІэ щІылъэм кърагъэхащ».

10. «Хьэщхьэвылъэм и сурэтым» сыт къигъэлъагъуэр? (Апокалипсис 13:14, 15; 17:3, 8, 11).

¹⁰ ИужькІэ дэ иджыри зы хьэкІэкхъуэкІэ долъагъу. Ар щхьибл зыпыт хьэкІэкхъуэкІэм ещхьщ, ауэ и плъыфэр плъыжьщ. Абы «хьэщхьэвылъэм и сурэткІэ» икІи «еянэ пащтыхькІэ» йоджэc. (Къеджэ Апокалипсис 13:14, 15; 17:3, 8, 11.) А пащтыхьыр «щыІащ, иджы щыІэжкъым, ауэ къэлъэгъуэжынущ». Мы псалъэхэр Организация Объединённых Наций жыхуаІэм фІы дыдэу хуокІуэ. А организацэм дуней псом тет политикхэм я мурадхэр егъэзащІэ. Япэ щІыкІэ абы и цІэу щытар Лига Наций жыхуаІэращ. ЕтІуанэ дунейпсо зауэшхуэм щыгъуэ абы и лэжьыгъэр щигъэтащ. Ауэ зауэ нэужьым ар къэунэхужащ икІи абы зэреджэр ООН-щ.

11. ХьэкІэкхъуэкІэхэм сыт ящІэнур икІи дэ абыхэм дащышынэн щІыхуэмейр сыт?

¹¹ А хьэкІэкхъуэкІэхэм, нэгъуэщІу жыпІэмэ, политикхэм, пцІыр къагъэсэбэпу Иеговэрэ абы и лъэпкъымрэ пэщІэувэну цІыхухэр хуагъэушынущ. ЩІагъыбзэкІэ жыпІэмэ, абыхэм «дуней псом я пащтыхьхэр» Армагеддон зауэм хэтыну зэхуашэсынущ. Ар къыщыхъунур «лъэкІыныгъэшхуэ псори зиІэ Тхьэм и махуэшхуэм щыгъуэщ» (Апок. 16:13, 14, 16). Ауэ дэ дыщІэшынэн щхьэусыгъуэ диІэкъым. Ди Алыхьышхуэ Иеговэ зиІэжьэнукъым и лъэныкъуэр зыІыгъ псори къригъэлын щхьэкІэ (Иез. 38:21—23).

12. ХьэкІэкхъуэкІэхэм сыт къащыщІынур?

¹² ХьэкІэкхъуэкІэхэм сыт къащыщІынур? Апокалипсис 19:20 щыжыІащ: «Ауэ шым тесымрэ абы и дзэмрэ хьэщхьэвылъэр яубыдащ, хьэщхьэвылъэм и пащхьэм нэщэнэ гъэщІэгъуэныщэхэр щызыгъэлъэгъуэгъа бегъымбар нэпцІри яубыдащ. Хьэщхьэвылъэм а нэщэнэхэмкІэ езым и дамыгъэр зытедза цІыхуу, абы и сурэтыр зыгъэлъапІэхэр дихьэхыгъащ. Шым тесымрэ абы и дзэмрэ хьэщхьэвылъэри бегъымбар нэпцІри яубыда нэужь, тхъуэбзащхъуэм и мафІэм ис хым а тІур псэууэ хадзащ». Алыхьым и бийхэм тепщэныгъэр иджыри щаІэщІэлъ зэманым я кІуэдыжыгъуэр къэсынущ.

13. Къэрал унафэщІхэм Иеговэ и лэжьакІуэхэм дапхуэдэу зэрытракъузэр?

¹³ Дапхуэдэу ар къызэрытлъэІэсыр? Хьисэ и лъэужь дызэрырикІуэм щхьэкІэ, Алыхьымрэ абы и Пащтыхьыгъуэмрэ хуэпэжу дыщытын хуейщ (Ин. 18:36). Абы къыхэкІкІэ политикэм пыщІа Іуэхухэм дэ дыхэІэбэкъым. Ауэ иныкъуэхэм деж нейтралитетыр пхъумэну щымытынш къохъу, сыт щхьэкІэ жыпІэмэ къэрал унафэщІхэм къыттракъузэ псалъэкІи ІуэхукІи я лъэныкъуэр тІыгъыну. Къызэрытракъузэм къыхэкІкІэ къэрал унафэщІхэм я лъэныкъуэр зыубыдхэм хьэкІэкхъуэкІэм и дамыгъэр трагъауэ (Апок. 13:16, 17). Апхуэдэ цІыхухэм Иеговэ и ней къащыхуэнущ икІи абыхэм гъащІэ мыухыжыр къалъысынукъым (Апок. 14:9, 10; 20:4). Аращи, къэрал унафэщІхэм дапхуэдэу къыттрамыкъузэми, нейтралитетыр тхъумэным мыхьэнэшхуэ иІэщ.

«ПСЭЖЬЫШХУЭМ» И КІЭУХ НАПЭТЕХЫР

14. Иуан гъэщІэгъуэн щыхъуар сыт? (Апокалипсис 17:3—5).

¹⁴ Къеджэ Апокалипсис 17:3—5. Абы иужь Иуан илъэгъуащ «хьэщхьэвылъэ плъыжь-фІыцІафэм тес цІыхубз гуэр». Ар Бабилэнышхуэ зи цІэ «псэжьышхуэращ». «Дунейм и пащтыхьхэм а псэжьым зинэ дащІащ». Иуан жеІэ: «А цІыхубзыр щыслъагъум, ину згъэщІэгъуащ» (Апок. 17:1, 2, 6).

15, 16. Бабилэнышхуэр сыт зищІысыр икІи дэнэ дэ ар щытщІэр?

¹⁵ Бабилэнышхуэр сыт зищІысыр? А псэжьым къэрал унэфэщІхэм зинэ ядещІэ (Апок. 18:9). НэгъуэщІу жыпІэмэ, ар, шуум хуэдэу, «дунейм и пащтыхьхэм» ятесщ икІи езыр зыхуеймкІэ ахэр иунэтІыну хэтщ. Абы къыхэкІкІэ а цІыхубзым политикэр къигъэлъагъуэу пхужыІэнукъым. НтІэ, а псэжьым ШейтІаным и дунейм щыщ коммерцие нэпсейр къигъэлъагъуэу пІэрэ? Хьэуэ, сыт щхьэкІэ жыпІэмэ Апокалипсис тхылъыр коммерцием «дунейм и сатуущІэкІэ» йоджэ (Апок. 18:11, 15, 16).

¹⁶ Алыхьым хуэлажьэу жаІэу, ауэ абы епцІыжу тхьэ нэпцІхэр зыгъэлъапІэхэмрэ мы дунейм ныбжьэгъу хуэхъухэмрэ Библиер щытепсэлъыхьым деж щІэх-щІэхыурэ «псэжь» псалъэр къегъэсэбэп (1 Лет. 5:25, сноскэ; Екъуб 4:4). Ауэ Алыхьым пэжу хуэлажьэхэр Библием «къэзымыша-дэмыкІуа» цІыхухэм ирегъэщхь (Апок. 14:4; 2 Кор. 11:2). Пасэрей зэманым щыІа Бабилэн къалэр дин нэпцІу хъуам къежьапІэ яхуэхъуащ. Абы къыхэкІкІэ Бабилэнышхуэм дин нэпцІу хъуар къегъэлъагъуэ (Апок. 17:5, 18; «Что такое Вавилон Великий?» жыхуиІэ статьям jw.org сайтым фыщеджэ).

17. Бабилэнышхуэм сыт къыщыщІынур?

¹⁷ Бабилэнышхуэм сыт къыщыщІынур? А упщІэм Апокалипсис 17:16, 17 мыпхуэдэу жэуап ирет: «УзыІуплъа хьэщхьэвылъэмрэ бжьакъуипщІымрэ псэжьыр жагъуэу ялъагъунущ. Абы иІэ псори трахынурэ, пцІанэу къагъэнэнущ. И пкъри яшхынущ, къэнари мафІэкІэ ягъэсынущ. Сыт щхьэкІэ жыпІэмэ Тхьэм и мурадыр ягъэзэщІэну абыхэм я гум кърилъхьащ». Аращи, Иеговэ лъэпкъхэр хуигъэушынущ «хьэщхьэвылъэ плъыжь-фІыцІафэр» е, нэгъуэщІу жыпІэмэ, ООН-р, къагъэсэбэпу дунейм тету хъуа дин нэпцІхэр ягъэкІуэдыжыну (Апок. 18:21—24).

18. Бабилэнышхуэм и Іуэхухэм дыхэтыну дызэрыхуэмейр дапхуэдэу къызэрыдгъэлъэгъуэфынур?

¹⁸ Дапхуэдэу ар къызэрытлъэІэсыр? Алыхьым дызэрыхуэлажьэр, абы и еплъыкІэкІэ, «къабзэу икІи щыщІагъэншэу» щытыным мыхьэнэшхуэ иІэщ (Екъуб 1:27). Аращи, Бабилэнышхуэм и Іуэхухэр къытхипщэну хуит тщІы хъунукъым. Псалъэм папщІэ, абы и щІэныгъэ нэпцІхэм, мажусий диныр лъабжьэ зыхуэхъуа махуэшхуэхэм, жин бзаджэхэм къабгъэдэкІ хабзэхэм икІи мы дунейм къыщекІуэкІ хабзэншагъэхэм дэ пэІэщІэ зыхуэтщІын хуейщ. Абы нэмыщІ, Алыхьым Бабилэнышхуэм трилъхьэну тезырыр цІыхухэм къатемыхуэн щхьэкІэ, ахэр «а къалэм» къыдэкІыну дэ адэкІи хуэдгъэушынущ (Апок. 18:4).

АЛЫХЬЫМ И БИЙ ЯПЭ ДЫДЭМ ТРИЛЪХЬЭНУ ТЕЗЫРЫР

19. «Благъуэжь абрагъуэ плъыжьыр» хэт хъуну?

¹⁹ Апокалипсис тхылъыр иджыри «благъуэжь абрагъуэ плъыжьым» топсэлъыхь (Апок. 12:3). А благъуэжьыр Хьисэрэ абы и мелыІычхэмрэ йозауэ (Апок. 12:7—9). Ар Алыхьым и лъэпкъым тоуэ икІи къэрал унафэщІхэр къэзыгъэлъагъуэ хьэкІэкхъуэкІэхэм тепщэныгъэ ярет (Апок. 12:17; 13:4). А благъуэжьыр хэт хъуну? Ар «иблису икІи шейтІану жыхуаІэ» блэжьыращ (Апок. 12:9; 20:2). Аращ Алыхьым и бийхэм псоми я щІыбагъым къыдэтыр.

20. Благъуэжьым сыт къыщыщІынур?

²⁰ Благъуэжьым сыт къыщыщІынур? Апокалипсис 20:1—3 зэрыщыжыІам хуэдэу, ШейтІаныр илъэс минкІэ тутнакъым ебгъэщхь хъуну «щІылъэм и кууупІэу щІэ зимыІэм» ирадзэнущ. А зэманым абы цІыхухэр къигъэпцІэну зы Іэмали иІэнукъым. Абы иужь ШейтІанымрэ жин бзаджэхэмрэ «мафІэмрэ тхъуэбзащхъуэмкІэ ис хым» хадзэнущ, нэгъуэщІу жыпІэмэ, игъащІэкІэ ягъэкІуэдыжынущ (Апок. 20:10). Фи нэгу къыщІэвгъэхьэт ШейтІанымрэ жин бзаджэхэмрэ здэщымыІэ дунейр. ПсалъэкІэ пхужыІэнукъым абы щыгъуэ щыІэну гъащІэр дахэу зэрыщытынур!

21. Апокалипсис тхылъым итыр зэрызэпкърытхам гуфІэгъуэ къыщІытхуихьыр сыт?

²¹ Апокалипсис тхылъыр щІагъыбзэкІэ зытепсэлъыхьхэм къикІыр Иеговэ къызэрыдгуригъаІуэм дэ хуабжьу дегъэгушхуэ! Иеговэ и бийхэр хэт хъунуми къызэрытщІам нэмыщІ абыхэм къащыщІынури къэтлъэгъуащ. «Къэхъуну Іуэхугъуэхэм ятеухуауэ Тхьэм деж къикІа мы псалъэхэм еджэр гъуэгу махуэ теуващ. Мы псалъэхэр зэхэзыхыу, зыгъэзащІэхэри гъуэгу махуэ теуващ» (Апок. 1:3). Алыхьым и бийхэр Іуиха иужь абы и лэжьакІуэ пэжхэм сыт хуэдэ гъащІэ къапэщылъыр? Мыбы къыкІэлъыкІуэ статьям а упщІэм и жэуапыр къыщыдгъуэтынущ.